ರಾಜ್ಯದಲ್ಲಿ ತಲೆ ಎತ್ತಲಿವೆ ಇನ್ನಷ್ಟು ಎಂಜಿನಿಯರಿಂಗ್‌ ಕಾಲೇಜುಗಳು?

ಬೆಂಗಳೂರು : ಬರುವ ದಿನಗಳಲ್ಲಿ ಹೆಚ್ಚಲಿರುವ ಎಂಜಿನಿಯರುಗಳ ಅವಶ್ಯಕತೆ ಪೂರೈಸಲು ರಾಜ್ಯದಲ್ಲಿ ಇನ್ನಷ್ಟು ಹೊಸ ಎಂಜಿನಿಯರಿಂಗ್‌ ಕಾಲೇಜುಗಳನ್ನು ಸ್ಥಾಪಿಸಲು ಕರ್ನಾಟಕ ಸರ್ಕಾರ ಒಪ್ಪಿಗೆ ನೀಡುವ ಸಾಧ್ಯತೆಯಿದೆ.

ಸೆಪ್ಟೆಂಬರ್‌ 8ರಿಂದ 10ರವರೆಗೆ ಮೈಸೂರಿನಲ್ಲಿ ನಡೆಯಲಿರುವ ಐಟಿ ಡಾಟ್‌ ಕಾಂ ಸ್ಥಾಪನಾ ಸಮಾರಂಭದ , ಸೋಮವಾರದ ಪೂರ್ವಭಾವಿ ಕಾಯಕ್ರಮದಲ್ಲಿ ಮಾತಾಡುತ್ತಿದ್ದ ಕೈಗಾರಿಕಾ ಸಚಿವ ಆರ್‌.ವಿ. ದೇಶಪಾಂಡೆ ಸುದ್ದಿಗಾರರಿಗೆ ಈ ವಿಷಯ ತಿಳಿಸಿದರು. 2004ನೇ ಇಸವಿ ಹೊತ್ತಿಗೆ 30 ಸಾವಿರ ಕೋಟಿ ರುಪಾಯಿ ಮೌಲ್ಯದ ಸಾಫ್ಟ್‌ವೇರ್‌ ಉತ್ಪಾದನೆಯನ್ನು ರಫ್ತು ಮಾಡುವ ಹಾಗೂ 5 ಲಕ್ಷ ಉದ್ಯೋಗಾವಕಾಶಗಳನ್ನು ಹುಟ್ಟು ಹಾಕುವ ಗುರಿಯನ್ನು ಸರ್ಕಾರ ಹೊಂದಿದೆ. ಈ ನಿಟ್ಟಿನಲ್ಲಿ ಮೈಸೂರು, ಮಂಗಳೂರು, ಹುಬ್ಬಳ್ಳಿ ಹಾಗೂ ಬೆಳಗಾವಿಗಳನ್ನು ಮುಖ್ಯ ಐಟಿ ನಗರಗಳನ್ನಾಗಿ ಪರಿವರ್ತಿಸಲು ನಿರ್ಧರಿಸಲಾಗಿದೆ ಎಂದು ಅವರು ಹೇಳಿದರು.

ಪ್ರಸಕ್ತ ವರ್ಷದಲ್ಲಿ 2000 ಹೆಚ್ಚುವರಿ ಎಂಜಿನಿಯರಿಂಗ್‌ ಸೀಟುಗಳನ್ನು ನೀಡಲು ರಾಜ್ಯಕ್ಕೆ ಅನುಮತಿ ಸಿಕ್ಕಿದೆ. ಆದರೆ, ಮುಂದಿನ ಮೂರ್ನಾಲ್ಕು ವರ್ಷಗಳಲ್ಲಿ ಅಮೆರಿಕ ಮತ್ತಿತರ ರಾಷ್ಟ್ರಗಳಲ್ಲೂ ಭಾರತೀಯ ಎಂಜಿನಿಯರುಗಳ ಅಗತ್ಯ ಗಣನೀಯವಾಗಿ ಹೆಚ್ಚಲಿದೆ. ಈ ನಿಟ್ಟಿನಲ್ಲಿ ಹೊಸ ಎಂಜಿನಿಯರಿಂಗ್‌ ಕಾಲೇಜುಗಳ ಸ್ಥಾಪನೆ ಅಗತ್ಯವಾಗಿದೆ ಎಂದರು.

ವಿಮಾನ ನಿಲ್ದಾಣಗಳ ಸ್ಥಾಪನೆ ಪ್ರಸ್ತಾವನೆ : ಜಾಗತಿಕ ಹೂಡಿಕೆದಾರರ ಸಮಾವೇಶದ ಫಲಶೃತಿಯಿಂದ ಮೈಸೂರು, ಮಂಗಳೂರು, ಹುಬ್ಬಳ್ಳಿ ಹಾಗೂ ಬೆಳಗಾವಿಗಳಲ್ಲಿ ವಿಮಾನ ನಿಲ್ದಾಣ ಸ್ಥಾಪಿಸುವ ಪ್ರಸ್ತಾವನೆಗಳು ಬಂದಿವೆ. ಸಿಂಗಪೂರ್‌ ಏರ್‌ಲೈನ್ಸ್‌ ಮತ್ತು ಅಮೆರಿಕ ಮೂಲದ ಏರ್‌ಲೈನ್ಸ್‌ ಮೈಸೂರಿನಿಂದ ವಿವಿಧೆಡೆಗೆ ವಿಮಾನ ಹಾರಿಸಲು ಆಸಕ್ತಿ ತೋರಿವೆ . ಮಿನಿ ವಿಮಾನ ನಿಲ್ದಾಣಗಳನ್ನು ಸ್ಥಾಪಿಸಲು 3 ಪ್ರಸ್ತಾವನೆಗಳು ಬಂದಿದ್ದು, ಸರ್ಕಾರ ಸದ್ಯಕ್ಕೆ ಮೈಸೂರಿಗೇ ಆದ್ಯತೆ ನೀಡಲಿದೆ. ಏಕೆಂದರೆ ಬೆಂಗಳೂರಿನಂತೆ ಮೈಸೂರು ಕೂಡ ಸಾಫ್ಟ್‌ವೇರ್‌ ಉದ್ಯಮಕ್ಕೆ ಹೆಸರುವಾಸಿಯಾಗಲಿದೆ. ಪ್ರಸ್ತಾವನೆಗಳನ್ನು ಸೆಪ್ಟೆಂಬರ್‌- ಅಕ್ಟೋಬರ್‌ನಲ್ಲಿ ಅಖೈರು ಮಾಡಲಾಗುವುದು ಎಂದು ದೇಶಪಾಂಡೆ ತಿಳಿಸಿದರು.

ಹಾರ್ಡ್‌ವೇರ್‌ನಲ್ಲೂ ಹೂಡಿಕೆಗೆ ಅವಕಾಶ : ಜಪಾನ್‌ ಪ್ರಧಾನಿ ಯಾಶಿರೋ ಮೋರಿ ಅವರ ಬೆಂಗಳೂರು ಭೇಟಿಯ ವೇಳೆ ಸಾಫ್ಟ್‌ವೇರ್‌ ಜತೆಗೆ ಹಾರ್ಡ್‌ವೇರ್‌ ಉದ್ಯಮದಲ್ಲೂ ಜಪಾನ್‌ ಹಣ ತೊಡಗಿಸುವಂತೆ ಚರ್ಚಿಸಲಾಗುವುದು ಎಂದು ದೇಶಪಾಂಡೆ ಪ್ರಶ್ನೆಯಾಂದಕ್ಕೆ ಉತ್ತರ ನೀಡಿದರು. ಇದಲ್ಲದೆ ಕೃಷಿ, ಆಟೊಮೊಬೈಲ್‌ ಹಾಗೂ ತೋಟಗಾರಿಕೆ ಕ್ಷೇತ್ರದಲ್ಲೂ ಬಂಡವಾಳ ಹೂಡಲು ಅವಕಾಶವಿದ್ದು, ಜಪಾನ್‌ ಪ್ರಧಾನಿ ಜತೆ ಚರ್ಚಿಸಲಾಗುವುದು ಎಂದರು.

(ಯುಎನ್‌ಐ)