ವೀರಪ್ಪನ್‌ ಏನು ಕೇಳಿದಾನೆ ಅನ್ನೋದು ರಾಜ್‌ಗೆ ಗೊತ್ತೇ ಇಲ್ಲ

ಬೆಂಗಳೂರು : ವೀರಪ್ಪನ್‌ ಬೇಡಿಕೆಗಳ ಬಗೆಗೆ ರಾಜ್‌ಗೆ ಗೊತ್ತಿಲ್ಲ.

ಅಣ್ಣಾವ್ರು ಇಂಥಾ ಬೇಡಿಕೆಗಳನ್ನ ಒಪ್ಕೋತಾರಾ? ನನ್ನ ಏನಾರೂ ಮಾಡ್ಲಿ, ವೀರಪ್ಪನ್‌ ಕೇಳೋದನ್ನ ಕೊಡಬೇಡಿ ಅಂತ ಹೇಳೋಕಾಗಲ್ವ? ಎಂಬಿತ್ಯಾದಿ ಮಾತುಗಳು ಅಲ್ಲಲ್ಲಿ ಕೇಳಿ ಬರುತ್ತಿವೆ. ಆದರೆ, ವೀರಪ್ಪನ್‌ ಕೇಳಿರೋದೇನು ಅನ್ನೋದೇ ಅಣ್ಣಾವ್ರಿಗೆ ತಿಳಿದಿಲ್ಲವಂತೆ.

ರೇಡಿಯೋ ಮೂಲಕ ಪ್ರಸಾರ ಮಾಡಲಾದ ಸಂದೇಶಗಳಲ್ಲಿ ತಮ್ಮ ಕುಟುಂಬದವರ ದನಿಗಳನ್ನು ಮಾತ್ರ ರಾಜ್‌ಗೆ ಕೇಳಿಸಲಾಗಿದೆ. ವೀರಪ್ಪನ್‌ ಸಹಚರರಲ್ಲಿ ಮೂವರಿಗೆ ಕನ್ನಡ ಗೊತ್ತಿದ್ದು, ರೇಡಿಯೋದಲ್ಲಿ ಪ್ರಸಾರವಾದ ಬೇಡಿಕೆಗಳ ವಿವರಗಳು ಅವರಿಗೆ ತಿಳಿಯದಂತೆ ಎಚ್ಚರ ವಹಿಸಲಾಗಿದೆ ಎಂದು ನಕ್ಕೀರನ್‌ ಸಂಪಾದಕ ಗೋಪಾಲ್‌ ತಿಳಿಸಿರುವುದಾಗಿ ರಾಘವೇಂದ್ರ ರಾಜ್‌ಕುಮಾರ್‌ ಸೋಮವಾರ ಸುದ್ದಿಗಾರರಿಗೆ ಹೇಳಿದ್ದಾರೆ.

‘ವೀರಪ್ಪನ್‌ ಬೇಡಿಕೆಗಳೇನು ಅನ್ನೋದು ಅಪ್ಪಾಜಿಯವರಿಗೆ ಗೊತ್ತಿಲ್ಲ. ಗೊತ್ತಾದರೆ ಖಂಡಿತ ಅವರು ಒಪ್ಪೋದಿಲ್ಲ. ತಮಗಿಂತ ನಾಡು ಹಾಗೂ ಜನರ ಒಳಿತೇ ಮುಖ್ಯ ಎಂದು ಅವರು ಭಾವಿಸಿದ್ದಾರೆ. ಅವರಿಗೀಗ 72 ವರ್ಷ. ದುಡ್ಡು ಕೊಟ್ಟು ತಮ್ಮನ್ನು ಬಿಡಿಸಿಕೊಂಡು ಹೋಗಿ ಅಂತ ಕೂಡ ಹೇಳೋರಲ್ಲ ಅವರು. ತಮ್ಮ ಜೊತೆ ಒತ್ತೆಯಾಳಾಗಿರೋ ಇತರ ಮೂವರಿಗೆ ನೀವು ಹೋಗಿ, ನಾನು ಬರ್ತೀನಿ ಅಂದರಂತೆ. ಆದರೆ ಅವರು ಅದಕ್ಕೆ ಒಪ್ಪಲಿಲ್ವಂತೆ’ ಎಂದು ರಾಘವೇಂದ್ರ ರಾಜ್‌ಕುಮಾರ್‌ ತಿಳಿಸಿದರು.

ರಾಜ್‌ ವನವಾಸದ ದಿನಚರಿಯನ್ನು ಗೋಪಾಲ್‌ ತಿಳಿಸಿದ್ದಾರೆ. ಅದನ್ನ ರಾಘವೇಂದ್ರ ರಾಜ್‌ಕುಮಾರ್‌ ವಿವರಿಸುವುದು ಹೀಗೆ....

ರಾಜ್‌ಕುಮಾರ್‌ ದಿನಚರಿ : ವೀರಪ್ಪನ್‌ ಹಾಗೂ ಅವನ ಕಡೆಯೋರು ಅಪ್ಪಾಜೀನ ಪೆರಿಯಾರ್‌ (ದೊಡ್ಡವರೇ) ಅಂತಲೇ ಕರಿತಾರಂತೆ. ಅವರನ್ನ ಯಾವುದೇ ಮನೆನಲ್ಲಿ ಇಟ್ಟಿಲ್ಲ. ಪಾಲಿಥಿನ್‌ ಡೇರೆ ಹಾಕಿ ಕೊಟ್ಟಿದಾರಂತೆ. ಒಂದು ಹನಿ ನೀರೂ ಒಳಗೆ ಬರೋಲ್ವಂತೆ. ಅಪ್ಪಾಜಿ ದಿನಾ ರಾತ್ರಿ ಬೇಗ ಮಲಗುತ್ತಾರಂತೆ. ಬೆಳಿಗ್ಗೆ 6ಕ್ಕೆ ಎದ್ದು, ಸ್ವಲ್ಪ ವಾಕ್‌ ಮಾಡಿ, ಯೋಗಾಸನ ಕೂಡ ಹಾಕ್ತಾರಂತೆ.

‘ಆಗಸ್ಟ್‌ 15ಕ್ಕೆ ನನ್ನ ಎರಡನೇ ಮಗನ ಹುಟ್ಟುಹಬ್ಬ : ಗೋಪಾಲ್‌ ಕಾಡಿಗೆ ಹೋದಾಗ ಅಪ್ಪಾಜಿಗೆ ಅಂತ ಹೊಸ ಅಂಗಿ- ಪಂಚೆ, ಶಾಲು ತಗೊಂಡು ಹೋಗಿದ್ದರಂತೆ. ಆದರೆ ಅಪ್ಪಾಜಿ ಅಂಗಿ- ಪಂಚೆ ಬೇಡ ಅಂದರಂತೆ. ತುಂಬಾ ಬಲವಂತ ಮಾಡಿದ್ದಕ್ಕೆ ಶಾಲನ್ನು ಇಟ್ಟುಕೊಂಡರಂತೆ. ಗೋಪಾಲ್‌ ಬಿಸ್ಲೆರಿ ನೀರನ್ನೂ ತಗೊಂಡು ಹೋಗಿದ್ದರು. ಅಪ್ಪಾಜಿ ಅದನ್ನ ಕುಡೀಲಿಲ್ವಂತೆ. ಮನೇಲೂ ಬಿಸ್ಲೆರಿ ನೀರನ್ನ ಅವರು ಕುಡೀತಿರ್ಲಿಲ್ಲ. ಬೇಕು ಅನ್ನಿಸಿದಾಗ ಬೆಚ್ಚನೆಯ ನೀರನ್ನ ಕುಡೀತಾರಂತೆ.

ಗೋಪಾಲ್‌ ಕಾಡನ್ನು ಬಿಡೋ ಮುಂಚೆ, ಆಗಸ್ಟ್‌ 15ಕ್ಕೆ ನನ್ನ ಎರಡನೇ ಮಗನ ಹುಟ್ಟುಹಬ್ಬ, ಅಷ್ಟೊತ್ತಿಗೆ ನನ್ನ ಕರೆದುಕೊಂಡು ಹೋಗ್ತೀರಾ ಅಂತ ಅಪ್ಪಾಜಿ ಕೇಳಿದರಂತೆ (ರಾಘವೇಂದ್ರ ರಾಜ್‌ಕುಮಾರ್‌ ಕಣ್ಣು ತುಂಬಿತು).