ತರಿಕೆರೆಯಲ್ಲಿ ಮಳೆ ತರಿಕೆರೆಯಲ್ಲಿ ಮಳೆ

ಗಳೂರು : ಬಂಡೀಪುರದಲ್ಲಿ 14 ಸೆಂಟಿ ಮೀಟರ್‌ಮಳೆ ಸುರಿದಿದೆ ಅಂತ ಹವಾಮಾನ ಇಲಾಖೆಯವರ ರಿಪೋರ್ಟ್‌ ಬಂತು. ಬಂಡೀಪುರದಲ್ಲಿ ಜೀರುಂಡೆ ಸದ್ದು , ಹಕ್ಕಿ ಪಕ್ಕಿಗಳ ಕೂಗು...ಕಾಡಾನೆಗಳ ಘೀಳು ಬಿಟ್ಟರೆ ಬೇರೇನು ಕೇಳಿಸದಷ್ಟು ದಟ್ಟವಾದ ಅರಣ್ಯವಿದೆ. ಅಲ್ಲಿ ಮಳೆ ಜಡಿಗುಟ್ಟಿ ಬರುವುದರಲ್ಲಿ ಏನು ವಿಶೇಷ ಇಲ್ಲವಲ್ಲಾ ಅಂತ ಯೋಚಿಸುತ್ತಿರುವಾಗಲೇ ಶಿರಾ ಮತ್ತು ತರಿಕೆರೆಯಿಂದ ನಮ್ಮ ಪ್ರತಿನಿಧಿಗಳು ಕಳಿಸಿದ ಫ್ಯಾಕ್ಸ್‌ ಬಂತು.

ಶಿರಾದಲ್ಲಿ 18 ಸೆಂಟಿಮೀಟರಿನಷ್ಟು ಮಳೆ ಬಂದು ಅಲ್ಲಿಯವರೆಲ್ಲ ನಮಗೆ ರಾಜಸ್ಥಾನದ ಗತಿಯಾಗುವುದಿಲ್ಲ ಎಂದು ಖುಷಿ ಪಡುತ್ತಿರುವಾಗಲೇ, ಶನಿವಾರದಂದು ಮತ್ತೆ ಆರು ಸೆಂಟಿ ಮೀಟರಿನಷ್ಟು ಬಿಡದೆ ಸುರಿದ ಮಳೆ ಜಾಜಿ ಕಟ್ಟೆಯಲ್ಲಿ ತುಂಬಿದ ನೀರು ಬತ್ತಿ ಹೋಗದಂತೆ ತಡೆಯಿತು. ತಡವಾಗಿ ಬಂದ ಮಳೆಗಾಲದ ಹುರುಪು ಶಿರಾದ ಓಣಿ , ಕಾಲೋನಿಗಳಲ್ಲಿ ಎದ್ದು ಕಾಣುತ್ತದೆ.

ತರಿಕೆರೆ, ಕಡೂರಿನಲ್ಲಿ ಕುಡಿಯುವ ನೀರು ಕೊಡುವ ಬಾವಿಗಳೆಲ್ಲಾ ಬತ್ತಿದ್ದವು. ತರಿಕೆರೆಯ ಕೆಲವು ಹಳ್ಳಿಗಳಿಗೆ ಭದ್ರಾ ಜಲಾಶಯದ ನೀರು ಜೀವ ತುಂಬಲಿದೆ. ಇದರ ಜೊತೆಗೆ ತರಿಕೆರೆಯಲ್ಲಿಯೂ 7 ಸೆಂಟಿ ಮೀಟರ್‌ ಮಳೆ ಬಂದು ಉಳುಮೆ, ಬಿತ್ತನೆ ಅಂತ ಅಲ್ಲಿಯವರು ಕನಸು ಕಾಣಲಾರಂಭಿಸಿದ್ದಾರೆ. ಶನಿವಾರದಂದು ಗುಲ್ಬರ್ಗ, ಕುಣಿಗಲ್‌ ಮತ್ತು ಮೈಸೂರಿನಲ್ಲಿ ತ-ಲಾ 4 ಸೆಂಟಿ ಮೀಟರ್‌ ಮಳೆಯಾಗಿದೆ. ಹಾಗೆ ನೋಡಿದರೆ ಕಳೆದ ವಾರ ಮಳೆಯಾಗಬೇಕಿದ್ದ ಊರುಗಳಿಗೆಲ್ಲಾ ಮಳೆ ಸುರಿಯಲೇ ಇಲ್ಲ. ದಕ್ಷಿಣ ಕನ್ನಡದಲ್ಲಿ ಪುಷ್ಯ ನಕ್ಷತ್ರದಲ್ಲಿ ಬರಬೇಕಿದ್ದ ಮಳೆ ಬರಲಿಲ್ಲ. ಮಂಡ್ಯ, ಮೈಸೂರುಗಳಲ್ಲಿ ಸಾಕಷ್ಟು ಪ್ರಮಾಣದ ಮಳೆ ಸುರಿಯಲಿಲ್ಲ ಎಂದು ಹವಾಮಾನ ಇಲಾಖೆ ಹೇಳುತ್ತದೆ.

English summary

karnataka weather page