ಸಿರಿಗನ್ನಡಂ ಗೆಲ್ಗೆ

• ಕೆ.ಕೆ.ವಾಲ್ಮೀಕಿ, ರಾಯಪೂರ್‌ ಜಿಲ್ಲೆ, ಛತ್ತೀಸಗಡ
  [email protected]

ಕನ್ನಡ ಭಾಷೆಯ ಪ್ರೌಢಿಮೆ ನಾಬಲ್ಲೆನಲ್ಲಿ

ನಾನಿರುವೆ ದೂರದ ಛತ್ತೀಸಗಡದಲ್ಲಿ //ಪ//

ಕನ್ನಡವೇ ಹಾಸು ಹೊದಿಕೆಯಾಗಿತ್ತಲ್ಲಿ
ತಾಯಿ ತನ್ನ ಮಗುವನ್ನು ಮಡಿಲಲ್ಲಿ ಬೆಳೆಸುವ ತೆರದಲ್ಲಿ
ಆಕಳು ತನ್ನ ಕರು ರಕ್ಷಿಸುವ ತೆರದಲ್ಲಿ
ರಕ್ಷಿಸಿದೆ ತಾಯಿ ನೀನಿಷ್ಟು ದಿನ ನಿನ್ನ ಉಡಿಯಲ್ಲಿ //1//

ನಿನ್ನ ಸುಗಂಧ ಬೀರುತ ಪರರ ಮನ ಗೆಲ್ಲುವೆ
ನೀ ಬಿತ್ತಿ ಬೆಳೆಸಿದಾ ಸಂಸ್ಕೃತಿ ಹೇಗೆ ಮರೆಯುವೆ
ನೀ ನೀಡಿದಾ ನಡೆ-ನುಡಿ, ಜ್ಞಾನ, ಸಂಪನ್ನತೆ ಅಚ್ಚೊತ್ತಿವೆ
ನಿನ್ನ ಆಶ್ರಯವೇ ತಾಯಿಯ ಮಡಿಲೆಂದು ತಿಳಿದಿರುವೆ //2//

ಒದಗಿ ಬಂದಿದೆ ಇಂದು ನಿನ್ನ ಸೇವಾಮೃತವಿಲ್ಲಿ
ನರ್ತಿಸುತಿದೆ ಆ ನಿನ್ನ ವರ್ಣ ಹೊರನಾಡಿನಾ ನಾಲಿಗೆಯಲ್ಲಿ
ಆನಂದವೇ ಆನಂದ ಮುಗ್ಧರಾದ, ಹಸನ್ಮುಖಿಗಳಾದ ಇವರಿಗೆ ಕಲಿಸುವಲ್ಲಿ
ತೊದಲು ನುಡಿಯಿಂದ ಹೊರಬರುವ ಆ ನಿನ್ನ ರೂಪ ನೋಡಿ ನಕ್ಕಿರುವೆ ಮೀಸೆಯಲ್ಲಿ //3//

ನಾಡು ಹೊಸದಾದರೂ ನುಡಿ ಹೊಸದಲ್ಲ
ಜನ ಅಪರಿಚಿತರಾದರೂ ಹೃದಯ ಕಲುಷಿತವಾಗಿಲ್ಲ
ಮುಗ್ಧ ಮನಸ್ಸಿನ ಜನರಿಗೆ ಆಂಗ್ಲರ ಗಾಳಿ ಬೀಸಿಲ್ಲ
ಚಿಂತನೆ, ಜ್ಞಾನಾರ್ಜನೆಗಾಗಿ ಕನ್ನಡ ಬಳಕೆ ಕಡಿಮೆಯೇನಿಲ್ಲ
ಹರಡಿದೆ ನಿನ್ನ ಭಾಷಾಮೃತವೆಂಬ ಪರಿಮಳ ಇಲ್ಲೆಲ್ಲ //4//

ಚೆಲುವಿನ ಮುದ್ದಿನ ಮಕ್ಕಳೆ... ಹಾಡು ಕೇಳು ನೀನು ಕೂಡ ಬೆರಗಾಗುವೆಯಿಲ್ಲಿ
ಹಸುನಗೆ ಬೀರುತ ಕನ್ನಡ ಶಬ್ಧಗಳ ಮೆಲಕು ಹಾಕುವರಿಲ್ಲಿ
ಬಿರುಬಿಸಿಲಿನಲ್ಲೂ ಮಿರಿಮಿರಿ ಮಿಂಚುವ ಓಯಾಸಿಸ್ಸಿನಲ್ಲಿ
ಭಾಷೆಯೆಂಬ ಕರಕಿಯ ಕುಡಿನೆಟ್ಟು ತಂಪನು ಬೀರುತಿಹೆನಿಲ್ಲಿ //5//

ಎದ್ದು ಬಂದು ನೋಡು ತಾಯಿ ನಿನ್ನ ಸುಗಂಧದಾ ಪರಿಮಳವಿಲ್ಲಿ
ಅದಾವುದರಲ್ಲೂ ಹಿಂದಿರದೆ ಹರಡುತಿದೆ ಆ ನಿನ್ನ ಕೀರ್ತಿ ಪತಾಕೆಯಲ್ಲಿ
ನೀ ಬಿತ್ತಿ ಬೆಳೆದ ಆ ಸಸಿ, ಇಂದು ಹೆಮ್ಮರವಾಗಿ ನೀಡುತಿಹುದು ತಂಪಾದ ನೆರಳನ್ನಿಲ್ಲಿ
ಧನ್ಯನಾದೆ ತಾಯಿ ನಾ ನಿನ್ನ ಪುತ್ರನಾಗಿ ಭಾರತಾಂಬೆಯ ಅಮೃತ ಹಸ್ತದಲ್ಲಿ //6//

ಮುಖಪುಟ / ಸಾಹಿತ್ಯ-ಸಂಸ್ಕೃತಿ