Bengaluru-Mysuru expressway: ಬೆಂಗಳೂರು-ಮೈಸೂರು ಎಕ್ಸ್ಪ್ರೆಸ್ವೇ ಪ್ರಯಾಣ ಮತ್ತೆ ದುಬಾರಿ: ಏಪ್ರಿಲ್ 1ರಿಂದ ಹೊಸ ಟೋಲ್ ದರ
ಬೆಂಗಳೂರು: ನೀವು ಬೆಂಗಳೂರು ಮತ್ತು ಮೈಸೂರು ನಡುವೆ ಸಂಚರಿಸುವವರಾಗಿದ್ದರೆ ನಿಮ್ಮ ಜೇಬಿಗೆ ಕತ್ತರಿ ಬೀಳುವುದು ಖಚಿತ. ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರವು (NHAI) ವಾರ್ಷಿಕ ದರ ಪರಿಷ್ಕರಣೆಯ ಭಾಗವಾಗಿ ಬೆಂಗಳೂರು-ಮೈಸೂರು ಎಕ್ಸ್ಪ್ರೆಸ್ವೇ ಟೋಲ್ ದರವನ್ನು ಏರಿಕೆ ಮಾಡಿದ್ದು, ಏಪ್ರಿಲ್ 1ರಿಂದ ಹೊಸ ದರಗಳು ಜಾರಿಗೆ ಬರಲಿವೆ. ಇದರಿಂದ ಇನ್ಮುಂದೆ ಬೆಂಗಳೂರು-ಮೈಸೂರು ನಡುವೆ ಪ್ರಯಾಣ ಮತ್ತಷ್ಟು ದುಬಾರಿಯಾಗಲಿದೆ.
ಹೊಸ ಪರಿಷ್ಕೃತ ದರದ ಪ್ರಕಾರ, ಬೆಂಗಳೂರಿನಿಂದ ಮೈಸೂರಿಗೆ ಕಾರಿನಲ್ಲಿ ಏಕಮುಖ ಸಂಚಾರ (One-way) ಮಾಡುವವರು ಇನ್ಮುಂದೆ 355 ರೂ. ಟೋಲ್ ಪಾವತಿಸಬೇಕಾಗುತ್ತದೆ. ಈ ಹಿಂದೆ ಇದ್ದ ದರಕ್ಕಿಂತ ಇದು ಗಣನೀಯ ಏರಿಕೆಯಾಗಿದ್ದು, ಪ್ರವಾಸಿಗರು ಮತ್ತು ನಿತ್ಯ ಸಂಚರಿಸುವವರಿಗೆ ಆರ್ಥಿಕ ಹೊರೆಯಾಗಿ ಪರಿಣಮಿಸಲಿದೆ.
ಕೇವಲ ಕಾರುಗಳಷ್ಟೇ ಅಲ್ಲದೆ, ಲಘು ವಾಣಿಜ್ಯ ವಾಹನಗಳು, ಬಸ್ ಮತ್ತು ಟ್ರಕ್ಗಳ ಟೋಲ್ ದರದಲ್ಲೂ ಏರಿಕೆ ಮಾಡಲಾಗಿದೆ. ಪ್ರತಿ ವರ್ಷ ಹಣದುಬ್ಬರಕ್ಕೆ ಅನುಗುಣವಾಗಿ ಹೆದ್ದಾರಿ ಪ್ರಾಧಿಕಾರವು ದರಗಳನ್ನು ಪರಿಷ್ಕರಿಸುತ್ತದೆ, ಅದರಂತೆ ಈ ವರ್ಷವೂ ಏಪ್ರಿಲ್ ಮೊದಲ ದಿನದಿಂದಲೇ ಈ ಬದಲಾವಣೆ ಜಾರಿಯಾಗುತ್ತಿದೆ. ಸುಸಜ್ಜಿತ ರಸ್ತೆಯಿದ್ದರೂ ಸಹ, ಇಷ್ಟು ಹೆಚ್ಚಿನ ಮೊತ್ತದ ಟೋಲ್ ಪಾವತಿಸುವುದು ಸಾಮಾನ್ಯ ಜನರಿಗೆ ಕಷ್ಟಸಾಧ್ಯ ಎಂಬ ಅಭಿಪ್ರಾಯಗಳು ಸಾರ್ವಜನಿಕ ವಲಯದಲ್ಲಿ ವ್ಯಕ್ತವಾಗುತ್ತಿವೆ.
ಹೊಸ ದರ ವಿವರ
ವಾರ್ಷಿಕ ದರ ಪರಿಷ್ಕರಣೆಯ ಭಾಗವಾಗಿ ಏಪ್ರಿಲ್ 1ರಿಂದ ಅನ್ವಯವಾಗುವಂತೆ ಟೋಲ್ ದರವನ್ನು ಶೇಕಡಾ 3ರಷ್ಟು ಏರಿಕೆ ಮಾಡಲಾಗಿದೆ. ಸಗಟು ಬೆಲೆ ಸೂಚ್ಯಂಕದ (WPI) ಆಧಾರದ ಮೇಲೆ ಹಣದುಬ್ಬರಕ್ಕೆ ಅನುಗುಣವಾಗಿ ಈ ಕ್ರಮ ಕೈಗೊಳ್ಳಲಾಗಿದ್ದು, ಕೇವಲ ಈ ಹೆದ್ದಾರಿಯಷ್ಟೇ ಅಲ್ಲದೆ ರಾಜ್ಯಾದ್ಯಂತ ಒಟ್ಟು 62 ಟೋಲ್ ಪ್ಲಾಜಾಗಳಲ್ಲಿ ದರ ಪರಿಷ್ಕರಣೆ ಮಾಡಲಾಗಿದೆ.
ಹೊಸ ಪರಿಷ್ಕೃತ ದರದ ಪ್ರಕಾರ, ಬೆಂಗಳೂರಿನಿಂದ ಮೈಸೂರಿಗೆ ಕಾರು, ಜೀಪ್ ಅಥವಾ ವ್ಯಾನ್ಗಳಲ್ಲಿ ಸಂಚರಿಸುವವರು ಇನ್ಮುಂದೆ ಏಕಮುಖ ಪ್ರಯಾಣಕ್ಕೆ ಒಟ್ಟು 355 ರೂ. ಟೋಲ್ ಪಾವತಿಸಬೇಕಾಗುತ್ತದೆ. ಕಣಮಿಣಿಕಿ ಮತ್ತು ಶೇಷಗಿರಿಹಳ್ಳಿ ಟೋಲ್ ಪ್ಲಾಜಾಗಳಲ್ಲಿ ಈ ಹಿಂದೆ ಇದ್ದ 175 ರೂ. ದರವನ್ನು ಈಗ 180 ರೂ. ಗೆ ಏರಿಸಲಾಗಿದೆ. ಅದೇ ರೀತಿ ಗಣಂಗೂರು ಟೋಲ್ ಕೇಂದ್ರದಲ್ಲಿ 170 ರೂ. ಬದಲಾಗಿ ಇನ್ಮುಂದೆ 175 ರೂ. ಪಾವತಿಸಬೇಕಾಗುತ್ತದೆ.
ಕೇವಲ ಸಣ್ಣ ವಾಹನಗಳಷ್ಟೇ ಅಲ್ಲದೆ, ವಾಣಿಜ್ಯ ವಾಹನಗಳ ಸಂಚಾರವೂ ಈಗ ದುಬಾರಿಯಾಗಿದೆ. ಮಿನಿ ಬಸ್ಗಳು ಮತ್ತು ಲಘು ವಾಣಿಜ್ಯ ವಾಹನಗಳ (LCV) ಟೋಲ್ ದರವನ್ನು 555 ರೂ.ನಿಂದ 565 ರೂ.ಗೆ ಹೆಚ್ಚಿಸಲಾಗಿದೆ. ಇದಲ್ಲದೆ ಬಸ್, ಟ್ರಕ್ ಮತ್ತು ಭಾರಿ ಗಾತ್ರದ ವಾಹನಗಳ ಸುಂಕದಲ್ಲೂ ಏರಿಕೆ ಮಾಡಲಾಗಿದ್ದು, ಇದು ಸರಕು ಸಾಗಣೆ ವೆಚ್ಚದ ಮೇಲೆ ನೇರ ಪರಿಣಾಮ ಬೀರಲಿದೆ.
ಪ್ರತಿ ವರ್ಷದಂತೆ ಈ ಬಾರಿಯೂ ಏಪ್ರಿಲ್ ಮೊದಲ ದಿನದಿಂದಲೇ ಈ ಹೊಸ ದರ ಪಟ್ಟಿ ಜಾರಿಗೆ ಬರಲಿದೆ. ಈಗಾಗಲೇ ಇಂಧನ ಬೆಲೆ ಏರಿಕೆಯಿಂದ ಕಂಗಾಲಾಗಿರುವ ಜನರಿಗೆ, ಹೆದ್ದಾರಿ ಸುಂಕದ ಈ ಸಣ್ಣ ಏರಿಕೆಯೂ ಸಹ ಆರ್ಥಿಕ ಹೊರೆಯಾಗಿ ಪರಿಣಮಿಸಿದೆ. ಸುಸಜ್ಜಿತ ರಸ್ತೆಯಿದ್ದರೂ ಪದೇ ಪದೇ ದರ ಏರಿಸುತ್ತಿರುವುದಕ್ಕೆ ಸಾರ್ವಜನಿಕ ವಲಯದಲ್ಲಿ ತೀವ್ರ ಅಸಮಾಧಾನ ವ್ಯಕ್ತವಾಗುತ್ತಿದೆ.
Click it and Unblock the Notifications
Sign in with Google