ಪುನರ್ಜನ್ಮ

• ಲೀನಾ ಪಿ.ಎ. , ಬೆಂಗಳೂರು
  [email protected]

ಕನಸುಗಳೇ ಕಾಡಬೇಡಿ ನನ್ನ

ಬಯಕೆಗಳೇ ಬಂಧಿಸಬೇಡಿ ನನ್ನ

ಸ್ವಚ್ಛಂದ ಹಕ್ಕಿಯಂತೆ ಹಾರಬೇಕು ನಾನು

ಮುಗ್ಧ ಮನಸಿನ ಮಗುವಿನಂತೆ ನಗಬೇಕು ನಾನು

ಮಾತುಗಳೆ ಮರೆಯಾಗಿ ಮೌನದ ಹಿಂದೆ
ಯೋಚನೆಗಳೆ ಹಾರಿ ಗಾಳಿಗಿಂತ ಮುಂದೆ
ಅಮ್ಮನ ಮಡಿಲಲ್ಲಿ ಮತ್ತೆ ಮಗುವಾಗಬೇಕು ನಾನು
ಅಪ್ಪನ ತೊಡೆಯೇರಿ ಮತ್ತೆ ಕಥೆ ಕೇಳಬೇಕು ನಾನು

ಕರಿಮೋಡಗಳೆ ಕರಗಿ ಮಳೆಯಾಗಿ ಹೋಗಿ
ಕದಡುವ ನೆನಪುಗಳೆ ಮಾಸಿ ಮಾಯವಾಗಿ
ಅರಳುವ ಮೊಗ್ಗನೋಡಿ ಅರಳಬೇಕು ನಾನು
ಹರಿಯುವ ನೀರ ನೋಡಿ ಕುಣಿಯಬೇಕು ನಾನು

ಕತ್ತಲೆ ನೀ ಕರಗಿಹೋಗು ಹೊಸಬೆಳಕಿನೊಳಗೆ
ಭಯವೆ ನೀ ತೊಲಗು ಮನದಿಂದ ಹೊರಗೆ
ಈ ದಿನ ಹೊಸ ದಿನ ಪಡೆದೆ ನಾ ಹೊಸತನ
ಎಲ್ಲ ಹೊಸತಾಗಿ ಬರಲೆನಗೆ

ಮುಖಪುಟ / ಸಾಹಿತ್ಯ-ಸಂಸ್ಕೃತಿ