ಥೈರಾಯ್ಡ್ ಇದ್ಯಾ? ಕಾಫಿ ಸೇರಿ ಇವನ್ನೆಲ್ಲ ಮುಟ್ಟಲೇ ಬೇಡಿ, ಆರೋಗ್ಯದೆಡೆ ಇರಲಿ ಗಮನ
ಥೈರಾಯ್ಡ್ ಗ್ರಂಥಿಯು ಅಂತಃಸ್ರಾವಕ ವ್ಯವಸ್ಥೆಯ ಪ್ರಮುಖ ಭಾಗವಾಗಿದ್ದು, ದೇಹದ ಚಯಾಪಚಯ ಕ್ರಿಯೆಯನ್ನು ನಿಯಂತ್ರಿಸುವ ಹಾರ್ಮೋನುಗಳ ಉತ್ಪಾದನೆಗೆ ಕಾರಣವಾಗಿದೆ. ಇದು ಅನೇಕ ಭಾರತೀಯರಲ್ಲಿ ಆರೋಗ್ಯ ಸಮಸ್ಯೆಗಳನ್ನು ಉಂಟುಮಾಡುವ ಒಂದು ಗ್ರಂಥಿಯಾಗಿದೆ. ಥೈರಾಯ್ಡ್ ಗ್ರಂಥಿಯ ಆರೋಗ್ಯಕರ ಕಾರ್ಯನಿರ್ವಹಣೆಯನ್ನು ಕಾಪಾಡಿಕೊಳ್ಳಬೇಕಾದರೆ ನಾವು ಯಾವ ಆಹಾರವನ್ನು ಸೇವಿಸುತ್ತೇವೆ ಎನ್ನುವುದು ಬಹಳ ಮುಖ್ಯವಾಗಿರುತ್ತದೆ.
ಥೈರಾಯ್ಡ್ ಗ್ರಂಥಿಗೆ ಸಂಬಂಧಿಸಿದ ಕಾಯಿಲೆಗಳಲ್ಲಿ ಮುಖ್ಯವಾಗಿ ಎರಡು ವಿಧಗಳಿವೆ. ಅವುಗಳೆಂದರೆ ಹೈಪೋಥೈರಾಯ್ಡಿಸಮ್ ಮತ್ತು ಹೈಪರ್ ಥೈರಾಯ್ಡಿಸಮ್. ಥೈರಾಯ್ಡ್ ಗ್ರಂಥಿಯು ಸರಿಯಾಗಿ ಕಾರ್ಯನಿರ್ವಹಿಸದಿದ್ದರೆ ಹೈಪೋಥೈರಾಯ್ಡಿಸಮ್ ಉಂಟಾಗುತ್ತದೆ. ಇದು ಮಹಿಳೆಯರಲ್ಲಿ ಹೆಚ್ಚಾಗಿ ಕಂಡುಬರುತ್ತದೆ. ಮತ್ತೊಂದೆಡೆ, ಅತಿಯಾಗಿ ಕಾರ್ಯನಿರ್ವಹಿಸಿದರೆ ಹೈಪರ್ ಥೈರಾಯ್ಡಿಸಮ್ ಉಂಟಾಗುತ್ತದೆ. ಥೈರಾಯ್ಡ್ ಹಾರ್ಮೋನುಗಳ ಸಂಶ್ಲೇಷಣೆ ಮತ್ತು ನಿಯಂತ್ರಣವು ನಾವು ಆಹಾರದಲ್ಲಿ ಯಾವ ಪೌಷ್ಟಿಕಾಂಶವನ್ನು ಸೇವಿಸುತ್ತೇವೆ ಎನ್ನುವದರಿಂದ ಪ್ರಭಾವಿತವಾಗುತ್ತದೆ.
ಥೈರಾಯ್ಡ್ ಆರೋಗ್ಯವನ್ನು ಕಾಪಾಡಿಕೊಳ್ಳಲು ಸಹಾಯ ಮಾಡುವ ಐದು ಆಹಾರ ಸಲಹೆಗಳು:
1. :
ಹೈಪೋಥೈರಾಯ್ಡಿಸಮ್ ಇರುವವರು ಹಣ್ಣುಗಳು, ತರಕಾರಿಗಳು, ಬ್ರೌನ್ ರೈಸ್, ಓಟ್ಸ್, ಬಾರ್ಲಿ, ಗೋಧಿ ಮುಂತಾದ ಧಾನ್ಯಗಳು, ಬೀಜಗಳು, ಆಲಿವ್ ಎಣ್ಣೆ, ಬೀನ್ಸ್, ಕೋಳಿ, ಮೀನು, ದ್ವಿದಳ ಧಾನ್ಯಗಳು, ಮೊಸರು ಮತ್ತು ಚೀಸ್ ನಂತಹ ನೇರ ಪ್ರೋಟೀನ್ಗಳಿಂದ ಸಮೃದ್ಧವಾಗಿರುವ ಮೆಡಿಟರೇನಿಯನ್ ಆಹಾರವನ್ನು ಸೇವಿಸಬೇಕು. ಈ ಆಹಾರಗಳು ಥೈರಾಯ್ಡ್ ಆರೋಗ್ಯವನ್ನು ಕಾಪಾಡಿಕೊಳ್ಳಲು ಅವಶ್ಯಕವಾಗಿದೆ. ಇದಲ್ಲದೆ, ಹೈಪೋಥೈರಾಯ್ಡಿಸಮ್ ಇರುವವರು ಸಂಸ್ಕರಿಸದ ಮತ್ತು ಸಂಪೂರ್ಣ ಆಹಾರಗಳಲ್ಲಿ ಸಮೃದ್ಧವಾಗಿರುವ ಪ್ಯಾಲಿಯೊ ಆಹಾರವನ್ನು ಸೇವಿಸಿದರೆ ಪ್ರಯೋಜನವಾಗುವುದು.
ಆದರೆ, ಹೈಪೋಥೈರಾಯ್ಡಿಸಮ್ ಇರುವವರು ಹಸಿ ತರಕಾರಿಗಳನ್ನು ಸೇವಿಸಬಾರದು. ಇದು ಥೈರಾಯ್ಡ್ ಹಾರ್ಮೋನ್ ಉತ್ಪಾದಿಸುವ ದೇಹದ ಸಾಮರ್ಥ್ಯಕ್ಕೆ ಅಡ್ಡಿಪಡಿಸುವ ಸಾಧ್ಯತೆ ಹೆಚ್ಚಾಗಿರುತ್ತದೆ. ಬ್ರೊಕೊಲಿ, ಮೂಲಂಗಿ, ಹೂಕೋಸು, ಹಸಿರು ಎಲೆ ತರಕಾರಿ, ಬೇರು ತರಕಾರಿಗಳನ್ನು ಹಸಿಯಾಗಿ ತಿನ್ನಬಾರದು.
2. ಅಯೋಡಿನ್ ಸೇವನೆಯನ್ನು ಉತ್ತಮಗೊಳಿಸುವುದು:
ಥೈರಾಯ್ಡ್ ಹಾರ್ಮೋನುಗಳನ್ನು ಉತ್ಪಾದಿಸಲು ಅಯೋಡಿನ್ ಅತ್ಯಗತ್ಯ. ಸೂಕ್ಷ್ಮ ಪೋಷಕಾಂಶದ ಕೊರತೆಯು ಹೈಪೋಥೈರಾಯ್ಡಿಸಂನ ಸಾಮಾನ್ಯ ಕಾರಣಗಳಲ್ಲಿ ಒಂದಾಗಿದೆ. ಅಯೋಡಿಕರಿಸಿದ ಉಪ್ಪನ್ನು ಬಳಸದವರು, ಸಸ್ಯಾಹಾರಿ ಆಹಾರವನ್ನು ಅನುಸರಿಸುವವರು ಮತ್ತು ಗರ್ಭಿಣಿಯರಲ್ಲಿ ಅಯೋಡಿನ್ ಕೊರತೆಯ ಅಪಾಯ ಹೆಚ್ಚಾಗಿರುತ್ತದೆ.
ಅಯೋಡಿಕರಿಸಿದ ಉಪ್ಪಿನ ಹೊರತಾಗಿ, ಡೈರಿ ಉತ್ಪನ್ನಗಳು, ಸಮುದ್ರಾಹಾರ ಮತ್ತು ಮೊಟ್ಟೆಗಳು ಅಯೋಡಿನ್ನ ಇತರ ಮೂಲಗಳಾಗಿವೆ. ಆದರೆ ಇಲ್ಲಿ ಗಮನಿಸಬೇಕಾದ ಅಂಶ ಎಂದರೆ ಹಶಿಮೊಟೊ ಥೈರಾಯ್ಡಿಟಿಸ್ ಸೇರಿದಂತೆ ಆಟೋಇಮ್ಯೂನ್ ಹೈಪೋಥೈರಾಯ್ಡಿಸಮ್ ಇರುವವರು ಅತಿಯಾದ ಅಯೋಡಿನ್ ಸೇವಿಸಬಾರದು.
3. ಸೆಲೆನಿಯಂನ ಸಮತೋಲಿತ ಸೇವನೆ:
ಸೆಲೆನಿಯಮ್ ಒಂದು ಅತ್ಯಗತ್ಯ ಆಹಾರ ಖನಿಜವಾಗಿದ್ದು, ಇದು ಥೈರಾಯ್ಡ್ ಹಾರ್ಮೋನ್ ಉತ್ಪಾದನೆಯನ್ನು ಬೆಂಬಲಿಸುತ್ತದೆ. ಜೊತೆಗೆ ಆಕ್ಸಿಡೇಟಿವ್ ಒತ್ತಡದಿಂದ ಉಂಟಾಗುವ ಹಾನಿಯಿಂದ ಗ್ರಂಥಿಯನ್ನು ರಕ್ಷಿಸುತ್ತದೆ. ಟ್ಯೂನ ಮೀನು, ಮೊಟ್ಟೆ, ಬ್ರೆಜಿಲ್ ಬೀಜಗಳು, ದ್ವಿದಳ ಧಾನ್ಯಗಳು, ಸಾರ್ಡೀನ್ಗಳು ಮತ್ತು ಓಟ್ಮೀಲ್ನಂತಹ ಸೆಲೆನಿಯಮ್-ಭರಿತ ಆಹಾರಗಳನ್ನು ಸಾಂದರ್ಭಿಕವಾಗಿ ಸೇವಿಸಬೇಕು. ಇಲ್ಲಿ ನೆನಪಿಡಬೇಕಾದ ಅಂಶ ಎಂದರೆ ಹೆಚ್ಚಿನ ಪ್ರಮಾಣದಲ್ಲಿ ಸೆಲೆನಿಯಮ್ ಸೇವಿಸಬಾರದು. ಇದು ಸೆಲೆನಿಯಮ್ ವಿಷತ್ವಕ್ಕೆ ಕಾರಣವಾಗಬಹುದು ಮತ್ತು ಗಂಭೀರ ಆರೋಗ್ಯ ಸಮಸ್ಯೆಗಳನ್ನು ಉಂಟು ಮಾಡಬಹುದು.
4. ಸತುವಿನ ಸೇವನೆ:
ಡಾ. ಕಿನ್ಹಾ ಅವರ ಪ್ರಕಾರ, ಸತುವಿನ ಕೊರತೆಯು ಹೈಪೋಥೈರಾಯ್ಡಿಸಮ್ ಸ್ಥಿತಿಯನ್ನು ಉಂಟುಮಾಡಬಹುದು ಅಥವಾ ಹದಗೆಡಿಸಬಹುದು. ಖನಿಜದಲ್ಲಿ ಸಮೃದ್ಧವಾಗಿರುವ ಆಹಾರಗಳಲ್ಲಿ ಕುಂಬಳಕಾಯಿ ಬೀಜಗಳು, ಸಿಂಪಿ, ಬೀಜಗಳು ಮತ್ತು ಬೇಳೆಗಳು ಸೇರಿವೆ. ಆದರೆ ಸಂಭಾವ್ಯ ಅಡ್ಡಪರಿಣಾಮಗಳನ್ನು ತಪ್ಪಿಸಲು ಆರೋಗ್ಯ ವೃತ್ತಿಪರರು ಸಲಹೆ ನೀಡದ ಹೊರತು ಸತುವನ್ನು ಹೆಚ್ಚಿನ ಪ್ರಮಾಣದಲ್ಲಿ ಸೇವಿಸಬಾರದು.
5. ವಿಟಮಿನ್ ಡಿ, ವಿಟಮಿನ್ ಬಿ12, ಕಬ್ಬಿಣ ಮತ್ತು ಮೆಗ್ನೀಸಿಯಮ್ ಸೇವನೆ:
ವಿಟಮಿನ್ ಡಿ ಮತ್ತು ಬಿ12 ಕೊರತೆ, ಮತ್ತು ಕಬ್ಬಿಣ ಮತ್ತು ಮೆಗ್ನೀಸಿಯಮ್ ಖನಿಜಗಳ ಕೊರತೆಯನ್ನು ಹೈಪೋಥೈರಾಯ್ಡಿಸಮ್ಗೆ ಅಪಾಯಕಾರಿ ಅಂಶಗಳೆಂದು ಪರಿಗಣಿಸಲಾಗಿದೆ. ಸೂರ್ಯನ ಬೆಳಕಿಗೆ ಒಡ್ಡಿಕೊಳ್ಳುವುದು, ಕೊಬ್ಬಿನ ಅಂಶ ಇರುವ ಮೀನು, ಕೆಂಪು ಮಾಂಸ, ಮೊಟ್ಟೆಯ ಹಳದಿ ಭಾಗ, ಮೀನಿನ ಯಕೃತ್ತಿನ ಎಣ್ಣೆ, ಡೈರಿ ಉತ್ಪನ್ನಗಳು ಮತ್ತು ಸಸ್ಯ ಆಧಾರಿತ ಹಾಲು ಸೇವನೆಯಿಂದ ವಿಟಮಿನ್ ಡಿ ಪಡೆಯಬಹುದು. ಪ್ರಾಣಿ ಆಧಾರಿತ ಆಹಾರಗಳಲ್ಲಿ ವಿಟಮಿನ್ ಬಿ12 ಕೂಡಾ ಸಮೃದ್ಧವಾಗಿದೆ.
ಕುಂಬಳಕಾಯಿ ಬೀಜಗಳು, ಅಗಸೆಬೀಜಗಳು, ಚಿಯಾ ಬೀಜಗಳು, ಗೋಡಂಬಿ, ಬಾದಾಮಿ, ಧಾನ್ಯಗಳು, ದ್ವಿದಳ ಧಾನ್ಯಗಳು, ಆವಕಾಡೊಗಳು, ಡಾರ್ಕ್ ಚಾಕೊಲೇಟ್, ಬಾಳೆಹಣ್ಣುಗಳು, ಒಣದ್ರಾಕ್ಷಿ, ಹಾಲು, ಮೊಸರು ಮತ್ತು ಪೀನಟ್ ಬಟರ್ ಇವು ಮೆಗ್ನೀಸಿಯಮ್ನ ಕೆಲವು ಮೂಲಗಳಾಗಿವೆ. ಕಬ್ಬಿಣದಂಶವಿರುವ ಆಹಾರಗಳಲ್ಲಿ ಪಾಲಕ್, ಬಲವರ್ಧಿತ ಧಾನ್ಯಗಳು, ಸಮುದ್ರಾಹಾರ, ಕಡಲೆ ಮತ್ತು ತೋಫು ಸೇರಿವೆ. ದೇಹವು ಹೀರಿಕೊಳ್ಳುವ ಕಬ್ಬಿಣದ ಪ್ರಮಾಣವನ್ನು ಹೆಚ್ಚಿಸಲು ಸಿಟ್ರಸ್ ಹಣ್ಣುಗಳನ್ನು ಕಬ್ಬಿಣದಂಶವಿರುವ ಆಹಾರಗಳೊಂದಿಗೆ ಜೋಡಿಸುವುದು ಉತ್ತಮ ಎನ್ನುತ್ತಾರೆ ವೈದ್ಯರು.
ಯಾವ ಆಹಾರಗಳನ್ನು ಸೇವಿಸಬಾರದು:
ಯಾರಿಗಾದರೂ ಹೈಪೋಥೈರಾಯ್ಡಿಸಮ್ ಇದ್ದರೆ, ಅತಿಯಾಗಿ ಸಂಸ್ಕರಿಸಿದ ಆಹಾರಗಳನ್ನು ಸೇವಿಸಬಾರದು. ಇವು ದೇಹದಲ್ಲಿ ಉರಿಯೂತ ಅಥವಾ ಆಕ್ಸಿಡೇಟಿವ್ ಒತ್ತಡವನ್ನು ಹೆಚ್ಚಿಸಬಹುದು.
ಹೈಪರ್ ಥೈರಾಯ್ಡಿಸಮ್ ಇರುವವರು, ಹೆಚ್ಚುವರಿ ಅಯೋಡಿನ್, ಕೆಫೀನ್, ಸೋಯಾ ಮತ್ತು ಗ್ಲುಟನ್ ಸೇವನೆಯನ್ನು ತಪ್ಪಿಸುವುದು ಉತ್ತಮ.
"ಪೌಷ್ಠಿಕ ಆಹಾರಗಳ ಸರಿಯಾದ ಮಿಶ್ರಣ, ದೈನಂದಿನ ವ್ಯಾಯಾಮ, ಸಾಕಷ್ಟು ನಿದ್ರೆ, ನಿಯಮಿತ ತಪಾಸಣೆಗಳು ಮತ್ತು ಅನಾರೋಗ್ಯಕರ ಆಹಾರಗಳ ಸೇವನೆಯನ್ನು ಸೀಮಿತಗೊಳಿಸುವುದರಿಂದ ಥೈರಾಯ್ಡ್ ಆರೋಗ್ಯವನ್ನು ಸುಧಾರಿಸುವುದು ಸಹಾಯವಾಗುವುದು.
(ಬರಹ: ರಂಜಿತಾ ಆರ್.ಕೆ.)
Click it and Unblock the Notifications
Sign in with Google