ಮೊಟ್ಟೆಯ ಸಿಪ್ಪೆ ಗಿಡಗಳಿಗೆ ನೈಸರ್ಗಿಕ ಗೊಬ್ಬರ: ಈ ರೀತಿ ಬಳಸಿದರೆ ಸಸ್ಯಗಳಿಗೆ ಸಿಗುವುದು ಅಗತ್ಯ ಪೋಷಣೆ
ದಿನಕ್ಕೊಂದು ಮೊಟ್ಟೆ ತುಂಬುವುದು ಹೊಟ್ಟೆ ಎನ್ನುವ ವಾಕ್ಯವನ್ನು ನಾವು ಕೇಳಿರುತ್ತೇವೆ. ಪೌಷ್ಟಿಕಾಂಶದ ಆಗರವಾಗಿರುವ ಮೊಟ್ಟೆಯನ್ನು ನಿತ್ಯ ಸೇವಿಸುವವರೂ ಇದ್ದಾರೆ. ಆದರೆ, ಸಾಮಾನ್ಯವಾಗಿ ಮೊಟ್ಟೆಯ ಸಿಪ್ಪೆಯನ್ನು ಕಸದ ಬುಟ್ಟಿಗೆ ಎಸೆದು ಬಿಡುತ್ತೇವೆ. ಮೊಟ್ಟೆ ಮನುಷ್ಯರಿಗೆ ಪೋಷಕಾಂಶವನ್ನು ನೀಡಿದರೆ ಅದರ ಸಿಪ್ಪೆ ಸಸ್ಯಗಳ ಬೆಳವಣಿಗೆಗ ಪ್ರಯೋಜನಕಾರಿಯಾಗಿದೆ.
ಕ್ಯಾಲ್ಸಿಯಂನಲ್ಲಿ ಸಮೃದ್ಧವಾಗಿರುವ ಮೊಟ್ಟೆಯ ಸಿಪ್ಪೆ ಆರೋಗ್ಯಕರ ಸಸ್ಯಗಳ ಬೆಳವಣಿಗೆಗೆ ಸಹಕಾರಿಯಾಗಿದೆ. ಇದು ಮಣ್ಣಿನ ಗುಣಮಟ್ಟವನ್ನು ಸುಧಾರಿಸುವ ಗುಣವನ್ನು ಹೊಂದಿದೆ. ಅಲ್ಲದೆ ಗಾರ್ಡನ್ನಲ್ಲಿ ಕಾಣಿಸಿಕೊಳ್ಳುವ ಕೀಟಗಳ ಸಮಸ್ಯೆಯಿಂದ ಮುಕ್ತಿ ನೀಡುತ್ತದೆ. ಹಾಗಾಗಿ ಮೊಟ್ಟೆಯ ಸಿಪ್ಪೆಯನ್ನು ಎಸೆಯುವ ಬದಲು ಸರಿಯಾಗಿ ಬಳಸುವ ಮೂಲಕ ಸಸ್ಯಗಳಿಗೆ ನೈಸರ್ಗಿಕ ಗೊಬ್ಬರವನ್ನು ಒದಗಿಸಬಹುದು.
ಮೊಟ್ಟೆಯ ಸಿಪ್ಪೆ ಸಸ್ಯಗಳಿಗೆ ಯಾಕೆ ಒಳ್ಳೆಯದು?:
ಮೊಟ್ಟೆಯ ಸಿಪ್ಪೆ ಸುಮಾರು 95% ಕ್ಯಾಲ್ಸಿಯಂ ಕಾರ್ಬೋನೇಟ್ನಿಂದ ಮಾಡಲ್ಪಟ್ಟಿದೆ. ಇದು ಕೃಷಿ ಸುಣ್ಣದಲ್ಲಿ ಕಂಡುಬರುವ ಸಂಯುಕ್ತವಾಗಿದೆ. ಕ್ಯಾಲ್ಸಿಯಂ ಸಸ್ಯಗಳು ಬಲವಾದ ಕೋಶ ಗೋಡೆಗಳನ್ನು ಅಭಿವೃದ್ಧಿಪಡಿಸಲು ಸಹಾಯ ಮಾಡುವ ಅತ್ಯಗತ್ಯ ಪೋಷಕಾಂಶವಾಗಿದೆ. ಇದು ಆರೋಗ್ಯಕರ ಕಾಂಡಗಳು, ಎಲೆಗಳು ಮತ್ತು ಹಣ್ಣುಗಳ ಬೆಳವಣಿಗೆಗೆ ಸಹಾಯ ಮಾಡುತ್ತದೆ. ಮೊಟ್ಟೆಯ ಸಿಪ್ಪೆ ಮಣ್ಣಿನೊಂದಿಗೆ ಬೆರೆಯುವ ಮೂಲಕ ಸಸ್ಯಗಳಿಗೆ ಕ್ಯಾಲ್ಸಿಯಂ ಅನ್ನು ಒದಗಿಸುತ್ತವೆ. ಅವು ಸಸ್ಯಗಳ ಆರೋಗ್ಯಕ್ಕೆ ಅಗತ್ಯವಾಗಿರುವ ಮೆಗ್ನೀಸಿಯಮ್, ರಂಜಕ ಮತ್ತು ಪೊಟ್ಯಾಸಿಯಮ್ ಅನ್ನು ಸಣ್ಣ ಪ್ರಮಾಣದಲ್ಲಿ ಹೊಂದಿರುತ್ತವೆ.
ಮಿಚಿಗನ್ ಸ್ಟೇಟ್ ಯೂನಿವರ್ಸಿಟಿಯ ಪ್ರಕಾರ, ನೀವು ಬಳಸುವ ಗೊಬ್ಬರಕ್ಕೆ ಮೊಟ್ಟೆಯ ಚಿಪ್ಪುಗಳನ್ನು ಸೇರಿಸುವುದರಿಂದ ಹೆಚ್ಚಿನ ಪ್ರಯೋಜನವಾಗುವುದು. ಮೊಟ್ಟೆಯ ಚಿಪ್ಪು ಅಥವಾ ಸಿಪ್ಪೆ ಕ್ಯಾಲ್ಸಿಯಂ ಮತ್ತು ಸಸ್ಯಗಳಿಗೆ ಅಗತ್ಯವಿರುವ ಇತರ ಪೋಷಕಾಂಶಗಳ ಸಮೃದ್ಧ ಮೂಲವಾಗಿದೆ. ಗಾರ್ಡನ್ ಮಣ್ಣನ್ನು ಸಮೃದ್ಧಗೊಳಿಸುವಾಗ ಮೊಟ್ಟೆಯ ಸಿಪ್ಪೆಯನ್ನು ಅದಕ್ಕೆ ಸೇರಿಸಬೇಕು. ಅವು ನಿಧಾನವಾಗಿ ಕೊಳೆಯುವುದರಿಂದ, ಶೆಲ್ನ ತುಂಡುಗಳು ಸಿದ್ಧಪಡಿಸಿದ ಕಾಂಪೋಸ್ಟ್ನಲ್ಲಿ ಕಾಣಬಹುದು. ವಿಶ್ವವಿದ್ಯಾನಿಲಯದ ಪ್ರಕಾರ ಮೊಟ್ಟೆಯ ಸಿಪ್ಪೆಯನ್ನು ಕೆಲವು ದಿನಗಳವರೆಗೆ ಒಣಗಿಸುವ ಅಥವಾ ಪುಡಿಮಾಡುವ ಮೊದಲು ಒಲೆಯಲ್ಲಿ ಸ್ವಲ್ಪ ಸಮಯದವರೆಗೆ ಬಿಸಿ ಮಾಡಬೇಕು. ಹೀಗೆ ಮಾಡಿದಾಗ ಅದನ್ನು ವೇಗವಾಗಿ ಒಡೆಯಬಹುದು.
ತೋಟದ ಮಣ್ಣಿಗೆ ಪುಡಿಮಾಡಿದ ಮೊಟ್ಟೆಯ ಚಿಪ್ಪುಗಳನ್ನು ಸೇರಿಸಿ:
ಮೊಟ್ಟೆಯ ಚಿಪ್ಪನ್ನು ಬಳಸುವ ಸರಳ ವಿಧಾನವೆಂದರೆ, ಅವುಗಳನ್ನು ಸಣ್ಣ ತುಂಡುಗಳಾಗಿ ಪುಡಿಮಾಡಿ, ಸಸ್ಯವನ್ನು ನೆಡುವ ಮೊದಲು ಮಣ್ಣಿನಲ್ಲಿ ಬೆರೆಸಬೇಕು. ಕಾಲ ಕಳೆದಂತೆ ಚಿಪ್ಪು ಮಣ್ಣಿನಲ್ಲಿ ಕೊಳೆಯುತ್ತವೆ ಮತ್ತು ನಿಧಾನವಾಗಿ ಕ್ಯಾಲ್ಸಿಯಂ ಅನ್ನು ಬಿಡುಗಡೆ ಮಾಡುತ್ತವೆ. ಈ ವಿಧಾನವು ತರಕಾರಿ ಮತ್ತು ಹೂವಿನ ತೋಟಗಳಲ್ಲಿ ಚೆನ್ನಾಗಿ ಕೆಲಸ ಮಾಡುತ್ತದೆ.
ಹೂವಿನ ತುದಿ ಕೊಳೆಯುವುದನ್ನು ತಡೆಯುತ್ತದೆ:
ಟೊಮೆಟೊ, ಮೆಣಸಿನಕಾಯಿ ಮತ್ತು ಬದನೆಕಾಯಿಗಳಂತಹ ಸಸ್ಯಗಳ ಹೂವಿನ ತುದಿ ಕೊಳೆಯುವುದನ್ನು ನೀವು ಗಮನಿಸಿರಬಹುದು. ಕ್ಯಾಲ್ಸಿಯಂ ಕೊರತೆಯಿಂದ ಈ ಸಮಸ್ಯೆ ಉಂಟಾಗುತ್ತದೆ. ಈ ಸಸ್ಯಗಳ ಬುಡದ ಸುತ್ತಲೂ ನುಣ್ಣಗೆ ಪುಡಿಮಾಡಿದ ಮೊಟ್ಟೆಯ ಸಿಪ್ಪೆಗಳನ್ನು ಸೇರಿಸಿ, ಗಿಡಕ್ಕೆ ಸರಿಯಾದ ಪ್ರಮಾಣದಲ್ಲಿ ನೀರುಹಾಕುವುದರಿಂದ ಮತ್ತು ಆರೋಗ್ಯಕರ ಮಣ್ಣಿನ ನಿರ್ವಹಣೆಯೊಂದಿಗೆ ಸಂಯೋಜಿಸಿದಾಗ ಮೊಟ್ಟೆಯ ಸಿಪ್ಪೆಯ ಕ್ಯಾಲ್ಸಿಯಂ ಆ ಗಿಡಕ್ಕೆ ಸಿಗುತ್ತದೆ.
ನೈಸರ್ಗಿಕ ಗೊಬ್ಬರವನ್ನಾಗಿ ಪರಿವರ್ತಿಸಿ:
ಮೊಟ್ಟೆಯ ಸಿಪ್ಪೆಯನ್ನು ಗೊಬ್ಬರಕ್ಕೆ ಸೇರಿಸುವ ಮೊದಲು ಅದನ್ನು ಚೆನ್ನಾಗಿ ಪುಡಿಮಾಡಬೇಕು. ಇದರಿಂದ ಅವು ವೇಗವಾಗಿ ಕೊಳೆಯುತ್ತವೆ. ಕಾಂಪೋಸ್ಟ್ ಪಕ್ವವಾಗುತ್ತಿದ್ದಂತೆ, ಸಿಪ್ಪೆಯಿಂದ ಬರುವ ಕ್ಯಾಲ್ಸಿಯಂ ಪೋಷಕಾಂಶಗಳಿಂದ ಕೂಡಿದ ಸಾವಯವ ಪದಾರ್ಥದ ಭಾಗವಾಗುತ್ತದೆ. ಇದನ್ನು ನಂತರ ತೋಟಗಳಿಗೆ ಬಳಸಬಹುದು.
ಮೊಟ್ಟೆಯ ಶೆಲ್ ಅನ್ನೇ ಪಾಟ್ ರೀತಿ ಬಳಸಿ:
ಇನ್ನು ಮೊಟ್ಟೆಯ ಸಿಪ್ಪೆಯನ್ನು ಬೀಜ ಮೊಳಕೆತೊಡೆಯುವ ತನಕ ಪಾಟ್ಗಳಾಗಿಯೂ ಬಳಸಬಹುದು. ಅರ್ಧ ಕತ್ತರಿಸಿದ ಮೊಟ್ಟೆಯ ಒಳಗೆ ಮಣ್ಣು ಮತ್ತು ಬೀಜವನ್ನು ಹಾಕಿ. ಈ ಬೀಜ ಮೊಳಕೆಯೊಡೆದು ಸಸಿಯಾದಾಗ ಚಿಪ್ಪನ್ನು ನಿಧಾನವಾಗಿ ಪುಡಿಮಾಡಿ. ನೇರವಾಗಿ ಮಣ್ಣಿನಲ್ಲಿ ನೆಡಿ. ಇದು ನೈಸರ್ಗಿಕವಾಗಿ ಮಣ್ಣಿನಲ್ಲಿ ಬೆರೆತು ಉತ್ತಮ ಗೊಬ್ಬರವಾಗಿ ಕೆಲಸ ಮಾಡುತ್ತದೆ.
ಕೀಟ ಬಾಧೆಯಿಂದಲೂ ಪರಿಹಾರ:
ಇನ್ನು ಗಿಡಗಳನ್ನು ಬಾಧಿಸುವ ಬಸವನ ಹುಳುಗಳ ಕಾಟವನ್ನು ತಪ್ಪಿಸಲು ಕೂಡಾ ಮೊಟ್ಟೆಯ ಸಿಪ್ಪೆಯನ್ನು ಬಳಸಲಾಗುತ್ತದೆ. ಒರಟಾಗಿ ಪುಡಿಮಾಡಿದ ಮೊಟ್ಟೆಯ ಸಿಪ್ಪೆಯನ್ನು ಸಸ್ಯದ ಸುತ್ತಲೂ ಹಾಕುವುದರಿಂದ ಬಸವನ ಹುಳಗಳಂಥಹ ಕೀಟಗಳು ಆ ಚೂಪಾದ ಅಂಚುಗಳ ಮೇಲೆ ತೆವಳಿಕೊಂಡು ಹೋಗುವುದಿಲ್ಲ. ಜೊತೆಗೆ ಮೊಟ್ಟೆಯ ವಾಸನೆಗೆ ಕೆಲವು ಕೀಟಗಳು ಆ ಸಸ್ಯದ ಬಳಿ ಬರುವುದೇ ಇಲ್ಲ.
ಟೊಮ್ಯಾಟೊ, ಮೆಣಸು, ಬದನೆಕಾಯಿ, ಎಲೆಕೋಸು, ಮೊದಲಾದ ಬೆಳೆಗಳಿಗೆ ಮೊಟ್ಟೆಯ ಸಿಪ್ಪೆಯನ್ನು ಬಳಸುವುದರಿಂದ ಅದರ ಆರೋಗ್ಯಕರ ಬೆಳವಣಿಗೆಗೆ ಸಹಾಯವಾಗುತ್ತದೆ.
ತೋಟಕ್ಕೆ ಮೊಟ್ಟೆಯ ಚಿಪ್ಪುಗಳನ್ನು ಹೇಗೆ ತಯಾರಿಸುವುದು?:
ಮೊಟ್ಟೆಯ ಚಿಪ್ಪುಗಳನ್ನು ಬಳಸುವ ಮೊದಲು ಈ ಸರಳ ಹಂತಗಳನ್ನು ಅನುಸರಿಸಿ:
* ಮೊದಲಿಗೆ ಮೊಟ್ಟೆಯ ಶೆಲ್ ಅನ್ನು ಚೆನ್ನಾಗಿ ತೊಳೆಯಿರಿ.
* ಅವುಗಳನ್ನು ಸಂಪೂರ್ಣವಾಗಿ ಒಣಗಲು ಬಿಡಿ.
* ಅವುಗಳನ್ನು ಸುಲಭವಾಗಿ ಪುಡಿಮಾಡಲು ಸಹಾಯವಾಗುವಂತೆ ಮಾಡಲು ಕಡಿಮೆ ತಾಪಮಾನದಲ್ಲಿ ಸುಮಾರು 10 ನಿಮಿಷಗಳ ಕಾಲ ಬಿಸಿ ಮಾಡಿ.
* ಅವುಗಳನ್ನು ಸಣ್ಣ ತುಂಡುಗಳಾಗಿ ಪುಡಿಮಾಡಿ.
* ನಂತರ ಮಣ್ಣಿನಲ್ಲಿ ಮಿಶ್ರಣ ಮಾಡಿ, ಕಾಂಪೋಸ್ಟ್ ಅಥವಾ ಸಸ್ಯಗಳ ಸುತ್ತಲೂ ಸಿಂಪಡಿಸಿ.
ನೆನಪಿಡಬೇಕಾದ ವಿಷಯಗಳು:
ಮೊಟ್ಟೆಯ ಚಿಪ್ಪುಗಳು ನಿಧಾನವಾಗಿ ಪೋಷಕಾಂಶಗಳನ್ನು ಬಿಡುಗಡೆ ಮಾಡುತ್ತವೆ. ಆದ್ದರಿಂದ ಅವುಗಳನ್ನು ಸಂಪೂರ್ಣ ಗೊಬ್ಬರಕ್ಕೆ ಪರ್ಯಾಯವೆಂದು ಪರಿಗಣಿಸಬಾರದು. ಆರೋಗ್ಯಕರ ಮಣ್ಣು, ಗೊಬ್ಬರ, ಸರಿಯಾದ ನೀರುಹಾಕುವುದು ಮತ್ತು ಸೂಕ್ತವಾದ ಸಸ್ಯ ಪೋಷಣೆಯನ್ನು ಒಳಗೊಂಡಿರುವ ಸಮತೋಲಿತ ತೋಟಗಾರಿಕೆಯ ಭಾಗವಾಗಿ ಅವು ಉತ್ತಮವಾಗಿ ಕಾರ್ಯನಿರ್ವಹಿಸುತ್ತವೆ.
(ಬರಹ: ರಂಜಿತಾ ಆರ್.ಕೆ.)
Click it and Unblock the Notifications
Sign in with Google