ಇಲಿನಾಯ್‌ನಲ್ಲಿ ಯುಗಾದಿ ಹರ್ಷ!

• ವರದಿ : ಕೆ. ತ್ರಿವೇಣಿ ಶ್ರೀನಿವಾಸರಾವ್‌
  [email protected]
• ಚಿತ್ರಗಳು : ಶ್ರೀನಿವಾಸರಾವ್‌

ಏಪ್ರಿಲ್‌.16ರಂದು ಇಲಿನಾಯ್‌ವಿದ್ಯಾರಣ್ಯ ಕನ್ನಡ ಕೂಟದಲ್ಲಿ ಯುಗಾದಿಯ ಸಂಭ್ರಮ! ಇದು ಈ ವರ್ಷದ ಮೊಟ್ಟ ಮೊದಲನೆಯ ಕಾರ್ಯಕ್ರಮ ಕೂಡ ಆಗಿದ್ದರಿಂದ ನೋಂದಣಿ, ಪರಸ್ಪರ ಪರಿಚಯ ಮತ್ತು ಉಭಯ ಕುಶಲೋಪರಿಗಳ ನಡುವೆ ಸದಸ್ಯರು ಬೇವು-ಬೆಲ್ಲಗಳನ್ನು ವಿನಿಮಯ ಮಾಡಿಕೊಂಡರು. ಮೊದಲಿಗೆ ಪೂಜೆ. ರಾಷ್ಟ್ರಗೀತೆ, ಸ್ವಾಗತಗೀತೆಗಳ ನಂತರ ಪ್ರೇಕ್ಷಕರ ಮನರಂಜಿಸಲು ಹಲವಾರು ಕಾರ್ಯಕ್ರಮಗಳು ಸರತಿಯ ಸಾಲಿನಲ್ಲಿ ಕಾದು ನಿಂತಿದ್ದವು.

ಮೊದಲಿಗೆ ಎರಡು ನೃತ್ಯಗಳಿದ್ದವು ‘ಮಾತನಾಡಯ್ಯ ಮಾತನಾಡು’ ಮತ್ತು ‘ಯವ್ವಾ ನಾ ಹೇಗೆ ಬಾಳಲೆ?’ ‘ಮಾತನಾಡಣ್ಣಯ್ಯ’ ನೃತ್ಯವನ್ನು ಮಕ್ಕಳ ತಾಯಂದಿರ ಸಹಕಾರದಿಂದ ವತ್ಸಲಾ ಶ್ರೀಪಾದ್‌ ಮತ್ತು ವಿಜಯ ನಾರಾಯಣ್‌ ಸಂಯೋಜಿಸಿದ್ದರೆ, ಮತ್ತೊಂದು ನೃತ್ಯವನ್ನು ನಂದಿನಿ ಬೆಂಡಾಲ ಮತ್ತು ಸುಮ ರಾಜಶೇಖರ್‌ ಅವರು ಸಂಯೋಜಿಸಿದ್ದರು.

ಈ ನೃತ್ಯಗಳ ನಂತರ ಕನ್ನಡಕೂಟದ ಸದಸ್ಯರು ಭಾವಗೀತೆ ಮತ್ತು ಜನಪಗೀತೆಗಳನ್ನು ಹಾಡಿದರು. ಈ ಗೀತೆಗಳಿಗೆ ಶೃತಿ ಅಜ್ಜಂಪುರ್‌ ಅವರು ಕೀಬೋರ್ಡ್‌, ಮುಕುಂದ್‌ ಅಕೂರ್‌ ಅವರು ಕೊಳಲಿನ ಸಾಹಚರ್ಯವನ್ನು ಒದಗಿಸಿದ್ದರು. ‘ಅಮ್ಮಕ ಆಹಾ! ಜಿಮ್ಮಕ’ ಎಂಬ ಮತ್ತೊಂದು ನೃತ್ಯವನ್ನು ಮಕ್ಕಳು ಸೊಗಸಾಗಿ ನಡೆಸಿಕೊಟ್ಟರು. ಈ ನೃತ್ಯವನ್ನು ನಂದಿನಿ ಬೆಂಡಾಲ ಮತ್ತು ಸುಜಾತ ದತ್ತ ಅವರು ಸಂಯೋಜಿಸಿದ್ದರು. ‘ತಿರುಕನ ಕನಸು’ - ಮುಪ್ಪಿನ ಷಡಕ್ಷರಿಗಳು ರಚಿಸಿರುವ ಈ ಗೀತೆ ಯಾರಿಗೆ ತಾನೇ ಗೊತ್ತಿಲ್ಲ? ತಿರುಕನ ಕನಸಿನಲ್ಲಿ ಹಾದುಹೋಗುವ ರಮ್ಯ ಮನೋಹರ ಕಲ್ಪನೆಗಳನ್ನು ರಂಗದ ಮೇಲೆ ಮೂಡಿಸುವುದು ಸ್ವಲ್ಪ ಕಠಿಣವಾದ ಕೆಲಸವೇ. ಆದರೆ ಈ ನೃತ್ಯದ ರೂವಾರಿಗಳಾದ ಬಿ. ಇಂದುಶೇಖರ್‌, ಕುಸುಮ ಇಂದುಶೇಖರ್‌ ಮತ್ತು ರೂಪಾಕೃಷ್ಣ ಅವರು ಇದನ್ನು ಸಮರ್ಥವಾಗಿ ನಿರ್ವಹಿಸಿದ್ದರು. ಇಪ್ಪತ್ತಕ್ಕೂ ಹೆಚ್ಚು ಮಕ್ಕಳು ಈ ನೃತ್ಯ ರೂಪಕವನ್ನು ಅಚ್ಚುಕಟ್ಟಾಗಿ ಅಭಿನಯಿಸಿದರು. ಪಟ್ಟದಾನೆಯಿಂದ ಹಾರ ಹಾಕಿಸಿಕೊಂಡ ತಿರುಕ, ತನ್ನ ಕನಸಿನಲ್ಲಿಯೇ ಮಹಾರಾಜನಾಗಿ, ಸಮಸ್ತ ರಾಜ್ಯ-ವೈಭವವನ್ನು ಅನುಭವಿಸಿ, ಮತ್ತೆ ತಿರುಕನಾಗಿ ‘ಅಮ್ಮಾ ತಾಯಿ...’ ಎಂದು ಭಿಕ್ಷೆ ಬೇಡುತ್ತಾ ಬಂದು ನಿಂತು ಪ್ರೇಕ್ಷಕರನ್ನು ನಿಬ್ಬೆರಗಾಗಿಸಿದ! ಇದಾದ ನಂತರ ಸೌಮ್ಯ ಆಚಾರ್‌ ಅವರು ಭಾವಗೀತೆ, ಜನಪದಗೀತೆಗಳನ್ನು ಹಾಡಿದರು. ‘ಹರಗೋಣ ಬಾ ಹೊಲ ಹೊಸದಾಗಿ’’ - ಇದು ಕನ್ನಡ ಕೂಟದ ಸದಸ್ಯರು ಅಭಿನಯಿಸಿದ ಗ್ರಾಮೀಣ ನೃತ್ಯ. ಈ ನೃತ್ಯವನ್ನು ರೂಪಾ ಕೃಷ್ಣ ಮತ್ತು ಕುಸುಮ ಇಂದುಶೇಖರ್‌ ಸಂಯೋಜಿಸಿದ್ದರು. ದೊಡ್ಡವರು ಮಕ್ಕಳಂತೆ ಹಗುರ ಮನಸ್ಸಿನಿಂದ ಹೆಜ್ಜೆ ಹಾಕಿದ ಈ ಜನಪದ ನೃತ್ಯಕ್ಕೆ ಪ್ರೇಕ್ಷಕರು ಪ್ರಚಂಡ ಕರತಾಡನದ ಮೂಲಕ ತಮ್ಮ ಮೆಚ್ಚಿಗೆಯನ್ನು ಸೂಚಿಸಿದರು. ಆಫ್ರಿಕಾ ಖಂಡ ನಮ್ಮ ಪಾಲಿಗೆ ಇನ್ನೂ ಕಗ್ಗತ್ತಲೆ ಖಂಡವೇ. ಅಲ್ಲಿರುವ ಹಲವಾರು ಬುಡಕಟ್ಟುಗಳ ಬಗೆಗೆ, ಅವರಲ್ಲಿರುವ ನೂರೆಂಟು ವಿಚಿತ್ರ ಸಂಪ್ರದಾಯಗಳ ಬಗೆಗೆ ನಮಗೆ ಬಹಳ ಕುತೂಹಲ. ಅಲ್ಲಿಯ ಬುಡಕಟ್ಟು ನೃತ್ಯಗಳಲ್ಲಿ ಅನೇಕ ಪ್ರಕಾರಗಳಿವೆ. ‘ಆಫ್ರಿಕ ಖಂಡದ ನಗಾರಿ ನರ್ತಕರು’ ಕಾಡಿನಲ್ಲಿ ಮಾಡುವ ಈ ನೃತ್ಯವನ್ನು ವಿದ್ಯಾ‘ರಣ್ಯ’ದ ಮಕ್ಕಳು ನಾಡಿನಲ್ಲಿಯೇ ನಮಗೆ ಪರಿಚಯಿಸಿದರು. ‘ವಿಶ್ವೈಕ್ಯ ನಾಟ್ಯ’ ಎಂಬ ಹೆಸರು ಈ ನೃತ್ಯಕ್ಕೆ ಒಪ್ಪುವಂತಿತ್ತು. ‘ಅಲೌಕಿಕ ನೃತ್ಯ’ - ಈ ನೃತ್ಯಕ್ಕಂತೂ ಇಡೀ ಸಭಾಂಗಣ ಮಂತ್ರಮುಗ್ಧವಾಗಿಬಿಟ್ಟಿತ್ತು. ಲಯಬದ್ಧವಾಗಿ ಹರಿದು ಬರುತ್ತಿದ್ದ ವಾದ್ಯ ಸಂಗೀತಕ್ಕನುಗುಣವಾಗಿ, ಬಾಗುತ್ತಾ, ಬಳುಕುತ್ತಾ ನರ್ತಿಸುತ್ತಿದ್ದ ಪುಟ್ಟ ಮಕ್ಕಳು ಮಿಂಚಿನ ಬಳ್ಳಿಗಳಂತೆ ಗೋಚರಿಸುತ್ತಿದ್ದರು. ಈ ನೃತ್ಯ ಇಷ್ಟು ಅದ್ಭುತವಾಗಿ ಮೂಡಿಬರಲು ಪುಟಾಣಿಗಳು ಬಹಳ ದಿನಗಳ ಅಭ್ಯಾಸವನ್ನೇ ನಡೆಸಿರಬೇಕು! ಭಾಗ್ಯ ನಾಗೇಶ್‌ ಅವರು ಸಂಯೋಜಿಸಿದ್ದ ಈ ನೃತ್ಯಕ್ಕೆ ಜಯಶ್ರೀ ಕುಮಾರ್‌ ಅವರ ಸಹಕಾರವಿತ್ತು. ಈ ನೃತ್ಯಗಳ ನಂತರ ಭೋಜನ ವಿರಾಮವಿತ್ತು. ಈ ಬಾರಿಯ ವಿಶೇಷವೇನೆಂದರೆ, ಭೋಜನ ಕಮಿಟಿಯ ಎಲ್ಲಾ ಸದಸ್ಯರು ವೇದಿಕೆಯ ಮೇಲೆ ಬಂದು ಅಂದು ತಯಾರಾಗಿದ್ದ ಅಡಿಗೆಗಳ ಪಟ್ಟಿಯನ್ನು ಹಾಡಿನ ಮೂಲಕ ಮೊದಲೇ ಪ್ರಕಟಿಸಿಬಿಟ್ಟರು. ‘ಅಹಾಹಾ.... ಎಂತಹ ಭೋಜನ....’ ಈ ಹಾಡಿನಲ್ಲಿದ್ದ ವಿವಿಧ ಬಗೆಯ ಭಕ್ಷ-ಭೋಜ್ಯಗಳ ಹೆಸರುಗಳೇ ಸಾಕಿತ್ತು ಮೊದಲೇ ಹಸಿದಿದ್ದ ಜನರ ಹಸಿವನ್ನು ಮತ್ತಷ್ಟು ಹೆಚ್ಚಾಗಿಸಲು. ಆದರೆ ಈ ಹಾಡಿನಲ್ಲಿದ್ದ ಬಹಳ ಐಟಂಗಳು, ಊಟದ ಮೇಜಿನ ಮೇಲೆ ಕಾಣದೆ, ಅದೆಷ್ಟು ಜನರಿಗೆ ನಿರಾಸೆಯಾಯಿತೋ ಗೊತ್ತಿಲ್ಲ! ಆದರೆ ಅಂದಿನ ಮುಖ್ಯ ಆಕರ್ಷಣೆಯಾಗಿದ್ದ ಹೂವಿನಂತಹ ಹೋಳಿಗೆಯ ಸವಿ ಆ ನಿರಾಸೆಯನ್ನು ಮರೆಸಿಬಿಟ್ಟಿತ್ತು! ಬೆರಳ್ಗೆ ಕೊರಳ್‌! ಇದು ವಿದ್ಯಾರಣ್ಯದ ಸದ್ಯಸ್ಯರಲ್ಲಿ ಬಹು ನಿರೀಕ್ಷೆ ಮೂಡಿಸಿದ್ದ ಕುವೆಂಪು ವಿರಚಿತ ನಾಟಕ. ಈ ನಾಟಕವನ್ನು ಹಲವಾರು ಬಾರಿ ಯಶಸ್ವಿಯಾಗಿ ಅಭಿನಯಿಸಿರುವ, ವಾಷಿಂಗ್‌ಟನ್‌ ಡಿ.ಸಿ.ಯಿಂದ ಆಗಮಿಸಿದ್ದ ಕಾವೇರಿಯ ಕಲಾವಿದರು ಜನರ ನಿರೀಕ್ಷೆಯನ್ನು ಇಲ್ಲಿಯೂ ಹುಸಿಯಾಗಿಸಲಿಲ್ಲ. ಏಕಲವ್ಯ ಪಾತ್ರದಾರಿ ರವಿ ಹರಪನಹಳ್ಳಿ, ಅಬ್ಬೆಯಾಗಿದ್ದ ಸುಮಾ ಮುರಳೀಧರ್‌, ದ್ರೋಣ, ಅರ್ಜುನ, ಅಶ್ವತ್ಥಾಮ ಪಾತ್ರಗಳನ್ನು ನಿರ್ವಹಿಸಿದ ಸಂಜಯರಾವ್‌, ರಾಮರಾವ್‌, ಮಹೇಶ್‌ ಮಹದೇವಪ್ಪ ತಮ್ಮ ತಮ್ಮ ಪಾತ್ರಗಳಿಗೆ ಪೂರ್ಣ ನ್ಯಾಯ ಸಲ್ಲಿಸಿದರು. ಆದರೆ ಧ್ವನಿವರ್ಧಕ ವ್ಯವಸ್ಥೆ ಅಷ್ಟು ಸಮರ್ಪಕವಾಗಿ ಇರದಿದ್ದುದರಿಂದ, ಆಗಾಗ ಮೈಕಾಸುರನಿಂದ ಕರ್ಕಶ ಶಬ್ದ ಹೊರಹೊಮ್ಮಿ, ನಾಟಕದಲ್ಲಿ ತಲ್ಲೀನರಾಗಿದ್ದವರಿಗೆ ರಸಭಂಗ ಉಂಟುಮಾಡುತ್ತಿತ್ತು. ಈ ದೋಷವೊಂದನ್ನು ಹೊರತುಪಡಿಸಿದರೆ, ಉಳಿದಂತೆ ‘ಬೆರಳ್ಗೆ ಕೊರಳ್‌’ ಶಿಕಾಗೋ ಜನಮನವನ್ನು ಗೆಲ್ಲುವಲ್ಲಿ ಸಫಲವಾಯಿತು. ‘ಬೆರಳ್ಗೆ ಕೊರಳ್‌’ ನಾಟಕದ ನಿರ್ದೇಶಕರು ಶ್ರೀಯುತ ತಾವರೆಕೆರೆ ಶ್ರೀಕಂಠಯ್ಯ, ಶಬ್ದ ನಿರ್ವಹಣೆ ಶ್ರೀಮತಿ ಜಯಶ್ರೀ ಶ್ರೀಕಂಠಯ್ಯ ಮತ್ತು ನಿರ್ಮಾಪಕಿ ಶ್ರೀಮತಿ ಸುಮಾ ಮುರಳೀಧರ್‌. ವಂದನಾರ್ಪಣೆಯಾಂದಿಗೆ, ಪಾರ್ಥಿವ ನಾಮ ಸಂವತ್ಸರದಲ್ಲಿ ಪ್ರಾರಂಭವಾದ ಕನ್ನಡ ಕೂಟದ ಮೊದಲ ಕಾರ್ಯಕ್ರಮ ಮುಕ್ತಾಯಗೊಂಡಿತು! Post your views ಕಾರ್ಯಕ್ರಮದ ವಿಶೇಷ ಛಾಯಾಚಿತ್ರಗಳ ವೀಕ್ಷಣೆಗಾಗಿ ಇಲ್ಲಿ ಕ್ಲಿಕ್ಕಿಸಿ ಮುಖಪುಟ / ಯುಗಾದಿ