ಯುಗಾದಿ : ಬರಿಯ ಹಾದಿಯಲ್ಲವಿದು!
ಹೊಸ ಯುಗಾದಿ ಬಂದಿತ್ತು
ಗೊಂಚಲು ಗೊಂಚಲು
ಬೇವಿನ ಹೂವಲಿ
ಕುಸುರನು ಒಡೆದಿತ್ತು
ಘಮ ಘಮ ಕಂಪನು ಸೂಸಿತ್ತು !
ಹೊಸ ಯುಗಾದಿ ಬಂದಿತ್ತು !
ಬಣ್ಣ ಬಣ್ಣದ
ಮಾಮರದೊಡಲಲಿ
ತಳಿರು ಚಿಗುರಿತ್ತು
ಹಚ್ಚನೆ ಹಸಿರನು ಸುರಿದಿತ್ತು!
ಹೊಸ ಯುಗಾದಿ ಬಂದಿತ್ತು !
ಕೋಗಿಲೆ ಕಂಠಕೆ
ಪಂಚಮ ಸ್ವರದ
ಇಂಚರ ತುಂಬಿತ್ತು
ಗಾನದ ಇಂಪನು ಹೊಮ್ಮಿತ್ತು !
ಹೊಸ ಯುಗಾದಿ ಬಂದಿತ್ತು !
ಮೆಲ್ಲುಲಿ ಮಾತಿನ
ಗಿಳಿಗಳ ಬಳಗಕೆ
ಮಧುವನು ಸವರಿತ್ತು
ಸವಿನುಡಿ ಜೇನನು ಸುರಿಸಿತ್ತು !
ಹೊಸ ಯುಗಾದಿ ಬಂದಿತ್ತು !
ಗುಂಯ್ ಗುಂಯ್ ಗುಡುವ
ಭೃಂಗ ನಿನಾದಕೆ
ಅಮೃತ ಬೆರಸಿತ್ತು
ಬೆಡಗಿನ ಸುಧೆಯನು ಹರಸಿತ್ತು !
ಹೊಸ ಯುಗಾದಿ ಬಂದಿತ್ತು !
ಪ್ರಕೃತಿ ಪುರುಷ
ಪ್ರೇಮಿಗಳೆದೆಯಲಿ
ಪ್ರೀತಿಯ ಬೆಸೆದಿತ್ತು
ಭಾವೋನ್ಮಾದವ ಚಿಮ್ಮಿತ್ತು!
ಹೊಸ ಯುಗಾದಿ ಬಂದಿತ್ತು !
Click it and Unblock the Notifications
Sign in with Google