ಈ ಬಾರಿ ಎಷ್ಟು ಮಹಿಳೆಯರು ಎಂಎಲ್ಎ ಆಗ್ತಾರೋ?

Updated: Friday, April 26, 2013, 10:37 [IST]

ಬೆಂಗಳೂರು, ಏ 25: ಇತರ ಪಕ್ಷಗಳಿಗಿಂತ ಈ ಬಾರಿ ಗೆಲ್ಲುವ ಕುದುರೆ ಎಂದೇ ಬಿಂಬಿತವಾಗಿರುವ ಕಾಂಗ್ರೆಸ್ ಪಕ್ಷದ ಟಿಕೆಟಿಗೆ ಇತರ ಪಕ್ಷಗಳ ಟಿಕೆಟಿಗಿಂತ ತುಸು ಬೇಡಿಕೆ ಹೆಚ್ಚಾಗಿಯೇ ಇತ್ತು, ಎಐಸಿಸಿ ಕಚೇರಿಯಲ್ಲಿ ಭಾರೀ ಲಾಬಿಗಳೇ ನಡೆದವು. ಮಹಿಳೆಯರು ತಾವೇನೂ ಕಮ್ಮಿಯಿಲ್ಲವೆಂದು ಮೂಡಿಗೆರೆಯ ಮೋಟಮ್ಮ ನೇತೃತ್ವದಲ್ಲಿ ಧರಣಿಯೂ ನಡೆಯಿತು. ಕೆಪಿಸಿಸಿ ಅಧ್ಯಕ್ಷ ಪರಮೇಶ್ವರಪ್ಪ ಬಿಸಿಲು ಲೆಕ್ಕಿಸದೇ ಧರಣಿ ಕೂತಿದ್ದ ಮಹಿಳೆಯರಿಗೆ ಅದೇನೋ ಭರವಸೆ ಕೂಡಾ ಕೊಟ್ಟರು.

ಆದರೆ ಚುನಾವಣಾ ಸ್ಕ್ರೀನಿಂಗ್ ಕಮಿಟಿ ಇದ್ಯಾವುದಕ್ಕೂ ಜಪ್ಪಯ್ಯ ಅನ್ನದೇ ತನ್ನ ಪಾಡಿಗೆ ಪಟ್ಟಿ ಬಿಡುಗಡೆ ಮಾಡಿತು. ದುರಂತವೆಂದರೆ ಹಿರಿಯ ಕಾಂಗ್ರೆಸ್ ನಾಯಕಿ ಮೋಟಮ್ಮಗೆ ಅತ್ತ ಮೂಲ ಮೂಡಿಗೆರೆ ಕ್ಷೇತ್ರದ ಟಿಕೆಟ್ಟೂ ಸಿಗಲಿಲ್ಲ ಇತ್ತ ಬಯಸಿದ್ದ ಸಕಲೇಶಪುರ ಕ್ಷೇತ್ರದ ಟಿಕೆಟೂ ಸಿಗಲಿಲ್ಲ. ಅದ್ಯಾಕೋ ಈ ಬಾರಿ ಸೋನಿಯಾ ಮೇಡಂ ಮಹಿಳೆಯರಿಗೆ ಹಿಂಗ್ ಮಾಡ್ಬಿಟ್ರು ಎಂದು ತಮ್ಮ ತಮ್ಮಲೇ ಮಾತಾಡಿಕೊಂಡು ಬಂದ ದಾರಿಗೆ ಸುಂಕವಿಲ್ಲವೆಂದು ವಾಪಾಸಾದರು.

ಮಹಿಳೆಯರಿಗೆ ಟಿಕೆಟ್ ನೀಡುವ ವಿಚಾರದಲ್ಲಿ ಇತರ ಪಕ್ಷಗಳೂ ಹಿಂದೆ ಬಿದ್ದವು, ಯಾವ ಪಕ್ಷವೂ ಇದಕ್ಕೆ ಹೊರತಾಗಿಲ್ಲ. ಇದ್ದಿದ್ದರಲ್ಲಿ ವಾಸಿಯೆಂದರೆ ಕಾಂಗ್ರೆಸ್ ಪಕ್ಷವೇ. ಆದರೆ ಈ ಬಾರಿ ಪಕ್ಷೇತರರಾಗಿ ಕಣದಲ್ಲಿರುವ ಮಹಿಳೆಯರು 170. ಒಟ್ಟು 224 ಕ್ಷೇತ್ರಗಳಲ್ಲಿ ಮಹಿಳೆಯರಿಗೆ ನೀಡಿದ ಟಿಕೆಟಿನ ಶೇಕಡಾವಾರು ಲೆಕ್ಕ ಹಾಕುವುದಾದರೆ ಶೇ.5ಕ್ಕಿಂತ ಕಮ್ಮಿ.

1962ರಲ್ಲಿ 18 ಶಾಸಕಿಯರನ್ನು ಹೊಂದಿದ್ದ ಕರ್ನಾಟಕ ವಿಧಾನಸಭೆಯಲ್ಲಿ 2008ರಲ್ಲಿ ಬರೀ ಮೂರಕ್ಕೆ ಕುಸಿಯಿತು. ಶೋಭಾ ಕರಂದ್ಲಾಜೆ, ಸೀಮಾ ಅಶೋಕ್ ಮಸೂತಿ ಮತ್ತು ಮಲ್ಲಿಕಾ ಪ್ರಸಾದ್ ಮಾತ್ರ ಆಯ್ಕೆಯಾದರು. ತದನಂತರ ನಡೆದ ಉಪಚುನಾವಣೆಯಲ್ಲಿ ಅನಿತಾ ಕುಮಾರಸ್ವಾಮಿ ಮತ್ತು ಕಲ್ಪನಾ ಸಿದ್ದರಾಜು ಅಯ್ಯೆಯಾಗಿದ್ದರು.

ಪ್ರಮುಖ ಐದು ಪಕ್ಷಗಳು ಕಣಕ್ಕಿಳಿಸಿರುವ ಮಹಿಳಾ ಅಭ್ಯರ್ಥಿಗಳ ಪಟ್ಟಿ ಸ್ಲೈಡಿನಲ್ಲಿ ನೋಡಿ..