ಕ್ಷೇತ್ರ ಪರಿಚಯ: ಕಲಬುರಗಿ ಗ್ರಾಮೀಣ ಕ್ಷೇತ್ರದಲ್ಲಿ ಹಿರಿಯರ ಕದನ

ಕಲಬುರಗಿ ಜಿಲ್ಲೆಯ ಪರಿಶಿಷ್ಟ ಜಾತಿ ಮೀಸಲು ಕ್ಷೇತ್ರಗಳಲ್ಲಿ ಕಲಬುರಗಿ ಗ್ರಾಮೀಣ ಕೂಡಾ ಒಂದು. 2008ರಲ್ಲಿ ವಿಧಾನಸಭಾ ಕ್ಷೇತ್ರಗಳ ಪುನರ್ ವಿಂಗಡಣೆಯಾದ ಬಳಿಕ ಸೃಷ್ಟಿಯಾದ ಕೇತ್ರವಿದು.

ಇಲ್ಲಿ 2008ರಲ್ಲಿ ನಡೆದ ಮೊದಲ ಚುನಾವಣೆಯಲ್ಲಿ ಬಿಜೆಪಿಯ ರೇವೂನಾಯಕ್ ಬೆಳಮಗಿ ಗೆಲುವು ಸಾಧಿಸಿದ್ದರು. ಕಾಂಗ್ರೆಸ್ ನ ಚಂದ್ರಿಕಾ ಪರಮೇಶ್ವರ್ ವಿರುದ್ಧ 17 ಸಾವಿರಕ್ಕೂ ಹೆಚ್ಚು ಮತಗಳಿಂದ ಜಯಸಾಧಿಸಿದ್ದರು.

1994ರಿಂದ ಸತತ ಮೂರು ಬಾರಿ ಕಮಲಾಪುರ ಮೀಸಲು ಕ್ಷೇತ್ರದಿಂದ ಆಯ್ಕೆಯಾಗಿದ್ದ ಬೆಳಮಗಿ ಅವರು ನಂತರ ಕಲಬುರಗಿ ಗ್ರಾಮೀಣ ಮೀಸಲು ಕ್ಷೇತ್ರಕ್ಕೆ 2008ರಲ್ಲಿ ವಲಸೆ ಬಂದಿದ್ದರು. ಹೀಗೆ ಗೆಲುವು ಸಾಧಿಸಿದ ಬೆಳಮಗಿ ಮುಂದೆ ಯಡಿಯೂರಪ್ಪ ಸರಕಾರದಲ್ಲಿ ಪಶುಸಂಗೋಪನೆ ಸಚಿವರಾಗಿಯೂ ಸೇವೆ ಸಲ್ಲಿಸಿದ್ದರು.

2013ರಲ್ಲಿ ಇಲ್ಲಿ ಚುನಾವಣೆ ನಡೆದಾಗ 70 ವರ್ಷಕ್ಕಿಂತ ಹೆಚ್ಚಿನವರ ನಡುವೆಯೇ ಸ್ಪರ್ಧೆ ನಡೆದಿತ್ತು. ಆಗ 4 ಬಾರಿಯ ಶಾಸಕ ರೇವುನಾಯಕ ಬೆಳಮಗಿಯವರಿಗೆ 72 ವರ್ಷ ವಯಸ್ಸಾಗಿತ್ತು. ಕಾಂಗ್ರೆಸ್ ಅಭ್ಯರ್ಥಿ ಜಿ ರಾಮಕೃಷ್ಣ ಆಗಷ್ಟೆ 75ನೇ ವರ್ಷಕ್ಕೆ ಕಾಲಿಟ್ಟಿದ್ದರು.

ಈ ಚುನಾವಣೆಯಲ್ಲಿ ಮಾತ್ರ ಸತತ ನಾಲ್ಕು ಬಾರಿ ಗೆಲುವು ಕಂಡಿದ್ದ ರೇವೂ ನಾಯಕ್ ಬೆಳಮಗಿ ಸೋಲಬೇಕಾಯಿತು. ಜಿ. ರಾಮಕೃಷ್ಣ ವಿರುದ್ಧ ಬೆಳಮಗಿ 8 ಸಾವಿರ ಮತಗಳ ಅಂತರದಿಂದ ಬೆಳಮಗಿ ಸೋಲು ಕಂಡಿದ್ದರು.

ಇಲ್ಲಿ ಕೆಜೆಪಿ ಅಭ್ಯರ್ಥಿ ಬಾಬುರಾವ ಚವ್ಹಾಣ ಬೆಳಮಗಿಯವರ ಸೋಲಿನಲ್ಲಿ ಪ್ರಮುಖ ಪಾತ್ರವಹಿಸಿದ್ದರು. ಅವರು 26 ಸಾವಿರ ಮತಗಳನ್ನು ಪಡೆದು ಬೆಳಮಗಿ ಸೋಲಿಗೆ ಕಾರಣವಾಗಿದ್ದರು.

ಈ ಬಾರಿ ಕೆಜಿಪಿ ಮತ್ತೆ ಬಿಜೆಪಿಯಲ್ಲಿ ವಿಲೀನವಾಗಿರುವುದರಿಂದ ಇಲ್ಲಿ ಬಿಜೆಪಿ ಗೆಲುವು ಸುಲಭ ಎಂದುಕೊಳ್ಳಲಾಗಿದೆ.

ಸದ್ಯ ರೇವೂನಾಯಕ್ ಬೆಳಮಗಿಯವರಿಗೆ 77 ವರ್ಷ ವಯಸ್ಸು, ಜಿ. ರಾಮಕೃಷ್ಣ 80ರತ್ತ ಹೆಜ್ಜೆ ಹಾಕಿದ್ದು, ಇಲ್ಲಿ ಈ ಬಾರಿಯೂ ಹಿರಿಯರ ಕದನ ಕುತೂಹಲಕಾರಿಯಾಗಿದೆ. ಮಾಜಿ ಶಾಸಕ ಬಾಬುರಾವ ಚವ್ಹಾಣರ ನಡೆಯ ಬಗ್ಗೆಯೂ ಕುತೂಹಲವಿದೆ.

ಇಲ್ಲಿ ಜೆಡಿಎಸ್ ಮತ್ತು ಸಿಪಿಎಂಗೆ ಸ್ವಲ್ಪಮಟ್ಟಿನ ನೆಲೆ ಇದ್ದು ಫಲಿತಾಂಶದ ಏರುಪೇರಿನಲ್ಲಿ ತಮ್ಮದೇ ಕೊಡುಗೆ ನೀಡಲಿವೆ.

English summary

Karnataka Assembly Election 2018: Read all about Kalaburagi (Gulbarga) Rural assembly constituency of Kalaburagi (Gulbarga) district. Get election news from Kalaburagi Rural. Know about candidates list, election results during Karnataka elections.