• search

ಲಕ್ಷ್ಮಿ ಎಲ್ಲಿದ್ದಾಳು : ಪುಟ-2

Subscribe to Oneindia Kannada
For Quick Alerts
ALLOW NOTIFICATIONS
For Daily Alerts
    Goddess Lakshmi
    ಕಮಲಕ್ಕೂ ಲಕ್ಷ್ಮಿಗೂ ಅದೇನೋ ನಂಟು

    ''ಕಮಲಾ"" ಎಂದೇ ಇವಳ ಇನ್ನೊಂದು ಹೆಸರೂ ಕೂಡ. ಪದ್ಮ ಪುರಾಣದಲ್ಲಿ ವೇಷಮರೆಸಿಕೊಂಡು ಯಾರನ್ನೋ ಎಚ್ಚರಿಸಲು ಬಂದಾಗ ''ಯಾರಮ್ಮ ನೀನು"" ಎಂದು ಕೇಳಿದಾಗ , ಲಕ್ಷ್ಮಿ ''ನಾನು ಕಮಲೆ"" ಎನ್ನುತ್ತಾಳೆ. (ಈ ಪ್ರಬಂಧದ ಕೊನೆಗೆ ಬರುವ ಕನ್ನಡ ಕವಿ ರನ್ನನ ಗದಾಯುದ್ಧದ ಕಥಾನಕದಲ್ಲೂ ''ನೀನು ಯಾರು "" ಎಂದು ಕೇಳಿದ ಪ್ರಶ್ನೆಗೆ ''ನಾನು ಕಮಲೆ"" ಎಂದೇ ಅವಳ ಉತ್ತರ !) ವಿಷ್ಣು ಸೂರ್ಯನಾದಾಗ ಲಕ್ಷ್ಮಿ ಕಮಲ ಆಗುತ್ತಾಳೆ - ಎಂದು ''ಪುನಶ್‌ ಚ ಪದ್ಮಾತ್‌ ಉತ್ಪನ್ನೋ ಆದಿತ್ಯೋ ಅಭೂತ್‌ ಹರಿ:"" ವಿಷ್ಣುಪುರಾಣ(1.9.143) ಹೇಳುತ್ತದೆ.

    ರೇಷ್ಮೆಯಂತೆ ನುಣುಪು, ನವಿರು. ಕಣ್ಣಿಗೆ ತಂಪು ಎನಿಸುವ ನಸುಗೆಂಪು ಬಣ್ಣ. ಸರೋವರದ ನೀರಲ್ಲಿ ಅಗಲ ಅಗಲ ಎಲೆಗಳ ಮೇಲೆ ಮಧ್ಯದಲ್ಲಿ ರಾಜಠೀವಿಯಲ್ಲಿ ಎದ್ದು ನೆಟ್ಟಗೆ ನಿಂತು, ಅರುಣೋದಯದ ವೇಳೆಯಲ್ಲಿ , ಅತ್ತ ಸೂರ್ಯ ಮೇಲೆ ಮೇಲೇರಿ ಬಂದಂತೆಲ್ಲ ಇತ್ತ ಮೆಲ್ಲನೆ ಬಿರಿದು ಸುಗಂಧವನ್ನು ಸುತ್ತಲೂ ಹರಡಿ ಕಂಗೊಳಿಸುವ ಆ ಕಮಲದ ಹೂವು ವೇದಕಾಲದಋಷಿ- ಕವಿ-ದೃಷ್ಟಾರನನ್ನು ಆಕರ್ಷಿಸದೇ ಬಿಟ್ಟೀತೆ ? ದೈವತ್ವವನ್ನು ಎಲ್ಲೆಡೆ ಕಾಣುವ ಭಾವುಕ ಬ್ರಹ್ಮಜ್ಞನಿಗೆ ಈ ಹೂವೇ ಭಗವಂತವಾಯಿತು ! ನಕ್ಷತ್ರ, ನದಿ, ಭೂಮಿಯಂತೆ ಹೂವನ್ನೂ ಸಹ ದಿವ್ಯ ದೇವತೆಯ ರೂಪದಲ್ಲಿ ಕಂಡ. ರಾಜ-ಪುಷ್ಪ ''ಕಮಲಾ"" ಎಂದೇ ಲಕ್ಷ್ಮಿಗೆ ಹೆಸರಿಸಿದ!

    ಒಡನೆಯೇ ಹಿಂಬಾಲಿಸಿ ದಂಡು ದಂಡಾಗಿ ಬಂದವು: ಪದ್ಮಾಲಯಾ, ಪದ್ಮ- ಅಕ್ಷೀ, ಪದ್ಮ- ದಳ-ಆಯತಾಕ್ಷೀ, ಪದ್ಮ- ಸುಂದರೀ, ಪದ್ಮ- ಗಂಧಿನೀ, ಪದ್ಮ - ಪ್ರಿಯೆ, ಪದ್ಮ- ಹಸ್ತೆ. ಪದ್ಮ-ಮಾಲಿನಿ- ಇತ್ಯಾದಿ ಕೆಂದಾವರೆಗೆ ಸಂಬಂಧಿಸಿದ ಅಂದ ಚಂದದ ಹೆಸರುಗಳು.

    ಕೊನೆ ಯಾವುದಣ್ಣ ಸಿರಿತನಕೆ

    ' ಶ್ರೀ"ಎಂಬುದನ್ನು ಅರ್ಥೈಸುವುದು ಬಲುಕಷ್ಟ. ಸಿರಿ, ಸಂಪತ್ತು, ಗೌರವವನ್ನು ಉಂಟುಮಾಡುವ ಭಾವ, ಸೌಂದರ್ಯ ರಾಶಿ- ಹೀಗೆ ಒಳ ತಿರುಳನ್ನು ಸ್ಫುರಿಸುವ ಪರ್ಯಾಯ ಪದಗಳನ್ನು ಎಷ್ಟೇ ಹುಡುಕಿದರೂ ಕೊನೆಗೆ ಸೋಲುತ್ತೇವೆ. ಸೌಂದರ್ಯ, ವಿಶಿಷ್ಟ ರೀತಿಯ ಕಾಂತಿ, ಎಲ್ಲರನ್ನು ಆಕರ್ಷಿಸುವ ಸಂಪತ್ತೇ ಅದು- ಎನ್ನುವ ಭಾವವನ್ನು ಮೊದಲು ಗಮನಿಸೋಣ:

    ಕತ್ತಲು ಮತ್ತು ಹಗಲಿನ ನಡುವೆ ಹೋರಾಟ ನಿರಂತರವಾಗಿ ಇದ್ದದ್ದೇ. ಹಗಲು(ಶಕ್ತಿ) ಮತ್ತು ಕತ್ತಲು (ಪ್ರತಿ-ಶಕ್ತಿ) ಬೆರೆಯುವ , ಕಲೆಯುವ (ಕಡೆಯುವ)ಒಂದು ಹುಣ್ಣಿಮೆಯ ಸಂಜೆಯನ್ನು ಊಹಿಸಿಕೊಳ್ಳಿ. ಆ ಸಂಧ್ಯೆಯ ಚೇತೋಹಾರೀ, ದೃಶ್ಯವನ್ನು ಮನಸ್ಸಿಗೆ ತಂದುಕೊಳ್ಳಿ. ನಸುಗೆಂಪು ಬಣ್ಣದ ಆ ಸೌಂದರ್ಯ ರಾಶಿ ಇದ್ದಕ್ಕಿದ್ದಂತೆ ಆ ಬಾನಿನೊಳಗಿಂದ ಆವಿರ್ಭವಿಸಿ, ಆ ನಿರಭ್ರ ನಭವನ್ನೆಲ್ಲಾ ತುಂಬಿ ಬಿಡುತ್ತದೆ. ಏನೇನೋ ಬಣ್ಣಗಳ ಓಕುಳಿಯಾಟ ಭೂಮಿ ಆಕಾಶ ಬೆರೆಯುವ ಎಡೆಯಲ್ಲಿ. ಆಮೇಲೆ , ಮೆಲ್ಲ ಮೆಲ್ಲನೆ ತುಂಬಿದ ಚಂದಿರ ದಿಗಂತದ ಆ ಅಂಚಿನಿಂದ ಮೂಡಿ ಮೇಲೇರಿ ಬಂದಂತೆಲ್ಲ ನೀಲಾಕಾಶ ಹಾಲು ಚೆಲ್ಲಿದ, ಹಾಲೇ ತುಂಬಿದ ಕಡಲಾಗಿ ಬಿಡುತ್ತದೆ !

    ಕತ್ತಲು ಹಗಲಿನೊಡನೆ ಸೆಣಸಿ, ಹಗಲೇ ಗೆಲ್ಲುವ ಅರುಣೋದಯದ ಸಂಧ್ಯೆಯ ವೇಳೆಯಲ್ಲೂ ಈ ಅಪೂರ್ವ ಸೌಂದರ್ಯರಾಶಿ ಉರಿಗೆಂಪಿನ ಉಷೆಯ ರೂಪದಲ್ಲಿ ಆರ್ವಿಭವಿಸುವುದನ್ನೂ ಕವಿ ಮನಸ್ಸಿನ ವೇದಕಾಲೀನ ಋಷಿ ಗಮನಿಸಿದ.

    ಕ್ಷೀರ ಸಾಗರ, ಸಮುದ್ರ-ಮಥನ, ಸುರ-ಅಸುರರು ಸೇರಿ ಕಡೆಯುವುದು, ' ಶ್ರೀ"ಯ ಆವಿರ್ಭಾವ, ಅಲ್ಲೇ ಚಂದ್ರನ ಹುಟ್ಟು, ಜೊತೆಜೊತೆಗೆ ಅಪೂರ್ವ ಹಾಗೂ ಶ್ರೇಷ್ಠ ಪ್ರಾಣಿಗಳು(ಕಾಮಧೇನು ಹಸು, ಐರಾವತ ಆನೆ, ಉಚ್ಜೆೈಶ್ರವಸ್ಸು ಕುದುರೆ), ಮರ(ಪಾರಿಜಾತ), ಮಣಿ (ಕೌಸ್ತುಭ), ವೈದ್ಯ(ಧನ್ವಂತರಿ), ಅಮೃತ ಮತ್ತು ಕಾಲಕೂಟ (ಹಾಲೇ ಹಾಲಲ್ಲಿ ಹಾಲಾಹಲ ವಿಷ!)-ಗಳು ಎದ್ದು ಬಂದ ಕತೆಯ ಸಂಕೇತಗಳನ್ನು ಮೇಲೆ ಹೇಳಿದ ಋಷಿ- ಕವಿಯ ಕಾಣ್ಕೆ, ದರ್ಶನ ಧ್ವನಿಸುತ್ತದೆ. ಪುರಾಣಗಳು ಈ ಕತೆಗೆ ಇನ್ನೂ ಬಣ್ಣ ಕೊಟ್ಟು ಮುಂದುವರೆಸಿದವು.

    ಶ್ರೇಷ್ಠ ವಸ್ತುಗಳಿಗೆ , ವ್ಯಕ್ತಿಗಳಿಗೆ ದೈವಾಂಶವನ್ನು ಆರೋಪಿಸುವುದು ಭಾರತೀಯ ಸಹಜ ಮನೋಭಾವ. ಆ ಕಾರಣಕ್ಕಾಗಿಯೇ-

    ಅಸಾಮಾನ್ಯ ಪ್ರಭೆ, ಶಕ್ತಿ ಎಲ್ಲೆಲ್ಲಿ ತೋರುವುದೋ,
    ಎಲ್ಲಿ ಸುಡುಗತ್ತಲನು ತೂರಿ ಬರುವುದೋ ಬೆಳಕು,
    ಸುಖ ದುಃಖ ನೊರೆ- ಅಲೆಯ ಈ ಕಡಲ ಒಡಲಿನಲಿ
    ಬಿಡುಗಡೆಯ ಆ ಕಡೆಗೆ ನಡೆಯೆ ಸೇತುವೆಯಾಂದ
    ಹೂಡಿ, ಬೆಂಗಾಡಿನ ನಡುವೆ ಹೆದ್ದಾರಿ ತೋಡುವನೋ,
    ಅಡ್ಡ ಕಳೆ ಕೊಳೆ ಮುಳಿವನ್ನ ಕುಟ್ಟಿ ಹುಡಿ ಹುಡಿ ಮಾಡಿ
    ಹತ್ತಲೆತ್ತರ ಬೆಟ್ಟ ಮೆಟ್ಟಲನು ಕಟ್ಟುವನೋ,
    ಬೀಸುವುದೋ ಎಲ್ಲಿ ಶಾಂತಿಯ ಕಂಪು, ನೆಮ್ಮದಿಯ ತಂಪು-
    ಅಲ್ಲೆಲ್ಲ ದೈವಾಂಶ ತೇಜದ ಬೀಜ ಮೊಳೆವುದ ಕಾಣ !

    - ಎಂದು ಉತ್ತಮಿಕೆಯನ್ನು ನಾವು ಗೌರವಿಸುವುದು, ಪೂಜಿಸುವುದು. ಇದನ್ನೇ ಭಗವದ್ಗೀತೆಯಲ್ಲಿ ಶ್ರೀಕೃಷ್ಣ '' ಯದ್‌ ಯದ್‌ ವಿಭೂತಿಮತ್‌ ಸತ್ತ ್ವಂ ಶ್ರೀಮದ್‌ ಊರ್ಜಿತಂ ಏವ ವಾ । ತತ್‌ ತದ ಏವ ಅವಗಚ್ಛ ತ್ವಂ ಮಮ ತೇಜೋ ಅಂಶ- ಸಂಭವಮ್‌ ।। ""(ಗೀತಾ 40.41)- ಎಂದಿರುವುದು.

    ಈ ದೃಷ್ಟಿಯಿಂದ ನೋಡಿದಾಗ, ಸಮುದ್ರಮಥನ ಕಾಲದಲ್ಲಿ ಈ ನಮ್ಮ ಲಕ್ಷ್ಮಿಯ ಒಡ ಹುಟ್ಟಿದವರ ಸಂಕೇತಕ್ಕೆ ಅರ್ಥ ಸ್ವಲ್ಪ ಹೊಳೆಯುತ್ತದೆ.

    ಲಕ್ಷ್ಮಿ ಎಲ್ಲಿದ್ದಾಳು : ಪುಟ-3

    ಕನ್ನಡ ಮ್ಯಾಟ್ರಿಮೋನಿಯಲ್ಲಿ - ಉಚಿತ ನೋಂದಣಿ !

    English summary
    This is all about Goddess of money Lakshmi

    Oneindia ಬ್ರೇಕಿಂಗ್ ನ್ಯೂಸ್,
    ತಾಜಾ ಸುದ್ದಿ ತಕ್ಷಣವೇ ಪಡೆಯಿರಿ

    X
    We use cookies to ensure that we give you the best experience on our website. This includes cookies from third party social media websites and ad networks. Such third party cookies may track your use on Oneindia sites for better rendering. Our partners use cookies to ensure we show you advertising that is relevant to you. If you continue without changing your settings, we'll assume that you are happy to receive all cookies on Oneindia website. However, you can change your cookie settings at any time. Learn more