ಲಕ್ಷ್ಮಿ ಎಲ್ಲಿದ್ದಾಳು ?
ಲಕ್ಷ್ಮಿಗೆ ಹಲವು ಅಭಿಧಾನಗಳು. ನೂರಾ ಎಂಟು ನಾಮಗಳು ಇರಲಿ, ಸಾವಿರದ ಒಂದು ಅಂಕಿತಗಳೂ ಹಾಗಿರಲಿ, ಅವಳಿಗೆ ಮಾತ್ರಾ ಹೆಚ್ಚು ಮೀಸಲಾದ ಬಹು ಪರಿಚಿತವಾದ ಹೆಸರುಗಳು ಬೇಕೆಂದರೆ ನಮ್ಮ ಅಮರಸಿಂಹನ ಕೋಶಕ್ಕೆ ಶರಣು ಹೋಗಬೇಕು:
ಲಕ್ಷ್ಮೀ, ಪದ್ಮಾಲಯಾ, ಪದ್ಮಾ, ಕಮಲಾ, ಶ್ರೀಃ, ಹರಿ-ಪ್ರಿಯಾ,
ಇಂದಿರಾ, ಲೋಕಮಾತಾ, ಮಾ, ರಮಾ, ಮಂಗಳ-ದೇವತಾ,
ಭಾರ್ಗವೀ, ಲೋಕ-ಜನನೀ, ಕ್ಷೀರ -ಸಾಗರ -ಕನ್ಯಕಾ.
ಇವಲ್ಲದೆ ಇನ್ನೂ ಹೆಸರುಗಳು ಇವೆ. ಅವನ್ನು ಮುಂದೆ ನೋಡೋಣ.
ಸಮುದ್ರ-ಮಥನವಾದಾಗ ಕಮಲದ ರೂಪದಲ್ಲಿ ಲಕ್ಷ್ಮಿ ಆರ್ವಿಭವಿಸಿದಳು- ಎಂದು ವಿಷ್ಣು ಪುರಾಣ ಹೇಳಿದರೆ, ಅದೇನೇ ಮುಂದುವರಿದು, ತಾವರೆಯ ಹೂವನ್ನು ಕೈಯ್ಯಲ್ಲಿ ಹಿಡಿದುಕೊಂಡು ಬಂದವಳು ಎಂದೂ ಹೇಳುತ್ತದೆ (ನೋಡಿ ಮತ್ಸ್ಯ ಪುರಾಣ ಮತ್ತು ಭಾಗವತ ಪುರಾಣಗಳನ್ನೂ.) ಬೇರೆ ಬೇರೆ ಜನ್ಮಗಳಲ್ಲಿ ಅವಳು ಬೇರೆ ಬೇರೆ ಹೆಸರುಗಳಿಂದ ಪ್ರಸಿದ್ಧಳು. ಹಾಗಾಗಿ ಭೃಗು ಮಹರ್ಷಿಯ ಮಗಳೆಂದು ಇವಳು ''ಭಾರ್ಗವಿ"" (ವಾಯು ಪುರಾಣದಲ್ಲಿ, ಆಗ ಇವಳ ತಾಯಿ, ಕರ್ದಮನ ''ಖ್ಯಾತಿ"" ಎಂಬ ಮಗಳು!) ಕುಶಧ್ವಜನ ಹೆಂಡತಿ ಮಾಲವತಿಯ ಗರ್ಭದಲ್ಲಿ ಇದ್ದಾಗಲೇ ವೇದಗಳನ್ನು ಅರಿತವಳು ಇವಳೆಂದು ಲಕ್ಷ್ಮಿ ''ವೇದವತಿ"". ಹೆಸರು ''ಜನಕ"" ಆದರೂ ಅವನ ಸ್ವಂತ ಮಗಳಲ್ಲ; ವಿದೇಹದ ಆ ರಾಜ ನೇಗಿಲ ಮೊನೆಯಿಂದ ನೆಲವನ್ನು ಬಗೆಯುತ್ತಿದ್ದಾಗ ಸಿಕ್ಕು, ಆಮೇಲೆ ಶ್ರೀರಾಮನನ್ನು ವರಿಸಿದ ಇವಳು '' ಸೀತೆ"". ಧರ್ಮಧ್ವಜನ ಪತ್ನಿ ಮಾಧವಿಗೆ ಇವಳು '"ತುಳಸಿ""ಯಾಗಿ ಹುಟ್ಟಿದಳು. (ಪೂರ್ವ ಕತೆ ಬೇಕೆಂದರೆ , ಹೀಗಾಗಲು ಸರಸ್ವತಿ ಇವಳಿಗೆ ಏಕೆ ಶಾಪಕೊಟ್ಟಳು - ಎಂದು ತಿಳಿಯಲು ಬ್ರಹ್ಮವೈವರ್ತ ಪುರಾಣ ನೋಡಿ.) ನಮ್ಮ ಕೃಷ್ಣನಿಗೆ ಇವಳು ''ರುಕ್ಮಿಣಿ""ಯಾದಾಗ ವಿದರ್ಭರಾಜ ಭೀಷ್ಮಕನ ಮಗಳು. ಚೋಳದೇಶದ ದೊರೆ ಅಕ್ಷರಾಜ ಮತ್ತು ಧರಣೀದೇವಿಯರು ಯಜ್ಞಕ್ಕಾಗಿ ಅಗೆದ ನೆಲದೊಳಗೆ ಕಮಲದ ಮೇಲೆ ಮಲಗಿದ ಮಗುವಾಗಿ ಸಿಕ್ಕು ಕೊನೆಗೆ ಶ್ರೀನಿವಾಸನೊಡನೆ ಕಲ್ಯಾಣವಾದ ''ಪದ್ಮಾವತಿ""ಯೂ ಇವಳೇ. ವಿಷ್ಣುರೂಪೀ ಕೃಷ್ಣನ ದೇಹದ ಎಡಭಾಗದಿಂದ ಒಡಮೂಡಿದವಳು ಮಹಾಲಕ್ಷ್ಮಿಯೆಂದು ಬ್ರಹ್ಮವೈವರ್ತ ಪುರಾಣ ಬಣ್ಣಿಸುತ್ತದೆ. ಪುರಂದರ ದಾಸರಂತೂ '' ಕ್ಷೀರಾಬ್ಧಿಕನ್ನಿಕೆ ಅಂಬುಜಾಕ್ಷಿ ಶ್ರೀ ಮಹಾಲಕ್ಷ್ಮಿ ಯಾರಿಗೆ ನೀ ವಧುವಾದೆ ""- ಎಂದು ಕೇಳಿದ್ದುಂಟು ! ಎಲ್ಲರಿಗೂ ಗೊತ್ತಿರುವಂತೆ, ನಾರಾಯಣ, ವಿಷ್ಣು , ಹರಿ- ಎಂಬ ಹೆಸರಾಂತ ಭಗವಂತನ ಪ್ರಿಯ-ಪತ್ನಿ ಎಲ್ಲ ಜಗತ್ತಿನ ತಾಯಿ ಈ ಲಕ್ಷ್ಮಿ!
Click it and Unblock the Notifications
Sign in with Google