ಗೆಲುವು ಕೊಟ್ಟ ಒಂದೇ ನಾಣ್ಯದ ಒಂದೇ ಮುಖಗಳು!
ಜಪಾನಿನ ಒಂದು ಮುಖ್ಯವಾದ ಯುದ್ಧ ನಡೆದಿತ್ತು. ಭೀಕರ ಯುದ್ಧದಲ್ಲಿ ಸೈನ್ಯವು ಬಹುತೇಕ ನಾಶವಾಗಿತ್ತು. ಯುದ್ಧ ಮಾಡಿ ಸೈನಿಕರು ಬಹಳ ದಣಿದಿದ್ದರು. ಆದರೂ ಸೈನ್ಯಾಧಿಕಾರಿಗೆ ತಮ್ಮ ಗೆಲುವು ಸಾಧ್ಯವೆಂಬ ಭರವಸೆಯಿತ್ತು. ಆದರೆ ಸೈನಿಕರಲ್ಲಿ ಆ ಬಗ್ಗೆ ಅನುಮಾನವಿತ್ತು. ಏನಾದರಾಗಲಿ, ಯುದ್ಧವನ್ನು ಮುಂದುವರೆಸುವುದೇ ಸರಿಯೆಂದು ಸೈನ್ಯಾಧಿಕಾರಿ ನಿರ್ಧರಿಸಿದ.
ಸೈನ್ಯವು ಯುದ್ಧಕ್ಕೆ ಸನ್ನದ್ಧವಾಗಿ ಮುಂದುವರಿಯಿತು. ದಾರಿಯಲ್ಲಿ ಸಿಕ್ಕ ಒಂದು ದೇವಾಲಯದ ಬಳಿ ಪ್ರಾರ್ಥನೆಗಾಗಿ ಸೇನೆ ನಿಂತಿತು. ತನ್ನ ಸೈನಿಕರೊಂದಿಗೆ ಪ್ರಾರ್ಥನೆ ಮುಗಿಸಿದ ಬಳಿಕ ಸೈನ್ಯಾಧಿಕಾರಿಯು ಜೇಬಿನಿಂದ ಒಂದು ನಾಣ್ಯವನ್ನು ಹೊರ ತೆಗೆದು ತನ್ನ ತಂಡವನ್ನು ಉದ್ದೇಶಿಸಿ ಮಾತನಾಡಿದ.
"ಸೈನಿಕರೇ, ನಾನೀಗ ಈ ನಾಣ್ಯವನ್ನು ಚಿಮ್ಮಿಸುತ್ತೇನೆ. ಅದರ ಮುಂಭಾಗ ಮೇಲ್ಭಾಗ ಕಂಡರೆ ನಾವು ಗೆಲ್ಲುತ್ತೇವೆ. ಹಿಂಭಾಗ ಕಂಡರೆ ನಾವು ಸೋಲುತ್ತೇವೆ" ಎಂದು ಹೇಳಿ ನಾಣ್ಯವನ್ನು ಮೇಲಕ್ಕೆ ಚಿಮ್ಮಿಸಿದನು.
ಎಲ್ಲರೂ ಕುತೂಹಲದಿಂದ ನಾಣ್ಯ ಕೆಳಗೆ ಬೀಳುವುದನ್ನೇ ಕಾಯುತ್ತಿದ್ದರು. ನಾಣ್ಯ ಬಿದ್ದಾಗ ಎಲ್ಲರ ಎದೆ ಢವಢವ ಎನ್ನುತ್ತಿತ್ತು. ನೋಡಿದಾಗ ಮುಂಭಾಗ ಕಾಣುವಂತೆ ಕೆಳಗೆ ಬಿತ್ತು. ಅದನ್ನು ನೋಡುತ್ತಿದ್ದಂತೆಯೇ ಇಡೀ ಸೈನ್ಯದಲ್ಲಿ ರಣೋತ್ಸಾಹ ತುಂಬಿಕೊಂಡಿತು. ತಮ್ಮ ಎದೆಯಲ್ಲಿ ಭರವಸೆಯನ್ನು ತುಂಬಿಕೊಂಡು ವೀರಾವೇಶದಿಂದ ಶತ್ರುಗಳೊಂದಿಗೆ ಕಾದಾಡಿದರು. ಕೊನೆಗೆ ಯುದ್ಧದಲ್ಲಿ ಗೆಲುವು ಸಾಧಿಸಿದರು.
"ವಿಧಿಯನ್ನು ಯಾರಿಗೂ ಬದಲಾಯಿಸಲು ಸಾಧ್ಯವಾಗುವುದಿಲ್ಲ" ಎಂದು ಒಬ್ಬ ಸೈನಿಕ ಯುದ್ಧ ಗೆದ್ದ ಸಂಭ್ರಮಾಚರಣೆ ವೇಳೆ ಸೈನ್ಯಾಧಿಕಾರಿಗೆ ಹೇಳಿದ.
"ನಿಜವಾಗಿಯೂ ಹೌದು", ಎನ್ನುತ್ತಾ ಸೈನ್ಯಾಧಿಕಾರಿಯು ಅಂದು ಚಿಮ್ಮಿದ್ದ ನಾಣ್ಯವನ್ನು ಎಲ್ಲರಿಗೂ ತೋರಿಸಿದನು. ಅದರ ಎರಡೂ ಮುಖಗಳು ಒಂದೇ ರೀತಿ ಇದ್ದವು!(ಸಂಗ್ರಹ).
Click it and Unblock the Notifications
Sign in with Google