ಎಲೆ, ಎಲೆ!

ಎಲೆ, ಎಲೆ!

ಹಂ. ಕ. ರಾಮಪ್ರಿಯನ್‌ ಕ್ಲಾರ್ಕ್ಸ್‌ವಿಲ್‌, ಮೇರಿಲೆಂಡ್‌. [email protected] ಎಲೆ, ಎಲೆ! ನಿನ್ನಯ ಹಿನ್ನೆಲೆಯನು ನಾ ಕೇಳಲುಬೇಕದ ಹೇಳುವೆಯ? । ಭಾವುಕಕವಿಗಳ ಭಾವಕೆ ಕಾರಣ ನೀನಾಗುವ ಪರಿ ತೋರುವೆಯ? ।। ವಸಂತಬರುತಿರೆ ಬರಡು ಮರಗಳೊಳು ಜೀವವ ತೋರುವ ಚಿಗುರಿನೆಲೆ । ಗಿಣಿಗಳ ಹಸಿರನು ತುಟಿಗಳ ಕೆಂಪನು ಕೂಡಿಹ ಚೆಂದದ ಬಣ್ಣದೆಲೆ ।। ಭುವಿಯಿಂ ನೀರನು ರವಿಯಿಂ ಬೆಳಕನು ಹೀರುತ ಹಿರಿದಾಗಿರುವ ಎಲೆ । ತಳಿರುತೋರಣಕೆ ಕಳೆಯನೀವುದಕೆ ನೀ ಸರಿಯಪ್ಪಟ ಹಸಿರಿನೆಲೆ ।। ಕಾಯ್ಗಳು ಬಿಡುತಿರೆ ಮುಚ್ಚುತಲವುಗಳ ‘ಎಲೆ ಮರೆಕಾಯ್‌’ ಆಗಿಸುವ ಎಲೆ । ಹಣ್ಣನು ಹೂವನು ನೀರನು ಕೂಡುತ ದೇವರ ಪಾದವ ಸೇರುವೆಲೆ *1*।। ಹೇಮಂತಋತುವು ಬರುತಿರೆ ಮೆಲ್ಲನೆ ಹಸಿರಬಣ್ಣವನು ತೊರೆಯುವೆಲೆ । ಕಿತ್ತಳೆ-ಅರಿಸಿನ-ಕುಂಕುಮ-ರಾಗದಿ ಕಣ್ಗಳಿಗೌತಣವೀಯುವೆಲೆ ।। ಗಾಳಿ ಬೀಸುತಿರೆ ಮರವನು ಬಿಡುತಲಿ ತೇಲುತ ಭೂಮಿಯ ಸೇರುವೆಲೆ । ನಿನ್ನೊಡನಾಡಿಗಳೊಂದಿಗೆ ಮನೆಗಳ ಸುತ್ತಲ ಹುಲ್ಲನು ಮುಚ್ಚುವೆಲೆ ।। ಹುಲ್ಲನು ಕೊಲ್ಲುವೆಯೆನ್ನುವ ಭಯದಿಂ ಜನಗಳೂದುತಲಿ ತೂರುವೆಲೆ । ಕಾಡಲಿ ಪದರಗಳಾಗುತ ಕೂಡಿರೆ ಜಿಂಕೆಗೆ ಹಾಸಿಗೆಯಾಗುವೆಲೆ ।। ಶಿಶಿರಋತುವಿನಲಿ ಮಳೆಯಿಂ ಹಿಮದಿಂ ತೊಯ್ಯುತ ಕೊಳೆಯುತ ಹೋಗುವೆಲೆ । ಮತ್ತೆ ಚಿಗುರುಗಳು ಕಿಲಕಿಲ ನಗುತಿರೆ ನಿನ್ನಯ ಮನ ನೋಯುವುದೆ ಎಲೆ? *2*।। 1. ಪತ್ರಂ ಪುಷ್ಪಂ ಫಲಂ ತೋಯಂ ಯೋ ಮೇ ಭಕ್ತ್ಯಾ ಪ್ರಯಚ್ಛತಿ। ತದಹಂ ಭಕ್ತ್ಯುಪಹೃತಂ ಅಶ್ನಾಮಿ ಪ್ರಯತಾತ್ಮನಃ ।। ಅಂದರೆ: ಎಲೆಹೂಹಣ್ಗಳಂ ನೀರಂ ಭಕ್ತಿಯಿಂ ಕೊಡುವಂತಹ । ಯತಚಿತ್ತನ್‌ ತಂದುದಂ ನಾನ್‌ ಉಣ್ಬೆ ಸಂತಸದಿಂದಲಿ।। - ಭಗವದ್ಗೀತೆ (9:26) 2. ಹಣ್ಣೆಲೆ ಉದುರಿದಾಗ ಚಿಗುರೆಲೆ ಕಿಲಕಿಲ ಎಂದಿತು - ಗಾದೆ Post your views

ಮುಖಪುಟ / ಎನ್‌ಆರ್‌ಐ