'ಅಕ್ಕ' ಬೆಂಗಳೂರು ಕಚೇರಿ ಉದ್ಘಾಟನೆ

ಬೆಂಗಳೂರು, ಜ. 27 : ಅನಿವಾಸಿ ಅಮೆರಿಕನ್ನಡಿಗರ ಸಂಸ್ಥೆ 'ಅಕ್ಕ' ತನ್ನ ಭಾರತ ಕಚೇರಿಯನ್ನು ಬೆಂಗಳೂರಿನಲ್ಲಿ ತೆರೆದಿದೆ. ಎಂಜಿ ರಸ್ತೆಗೆ ಹೊಂದಿಕೊಂಡಿರುವ ಮಣಿಪಾಲ್ ಸೆಂಟರ್ ಕಟ್ಟಡದಲ್ಲಿನ ಕಚೇರಿಯನ್ನು ಸೋಮವಾರ ಉದ್ಘಾಟಿಸಲಾಯಿತು. ಬಣ್ಣದ ರಿಬ್ಬನ್ನುಗಳನ್ನು ಸ್ಟೇನ್ ಲೆಸ್ ಸ್ಟೀಲ್ ಕತ್ತರಿಯಿಂದ ಕತ್ತರಿಸುವುದರ ಮೂಲಕ

ಕಚೇರಿಯನ್ನು ಉದ್ಘಾಟಿಸಿದರು. [ಗ್ಯಾಲರಿ]

ಕಚೇರಿ ಉದ್ಘಾಟನೆ ವೇಳೆ ಅಕ್ಕದ ನಿಕಟಪೂರ್ವ ಅಧ್ಯಕ್ಷ ರವಿ ಡೆಂಕಣಿಕೋಟೆ, ಟ್ರಸ್ಟಿ ಅಮರ್ ನಾಥ್ ಗೌಡ, ಯುನೈಟೆಡ್ ಲ್ಯಾಂಡ್ ಬ್ಯಾಂಕಿನ ಅಧ್ಯಕ್ಷ ಪ್ರದೀಪ್ ಕುಮಾರ್, ರಾಘವೇಂದ್ರ ರಾಜು ಮುಂತಾದ ಅಕ್ಕ ಸದಸ್ಯರು ಹಾಗೂ ಅಭಿಮಾನಿಗಳು ನೆರೆದಿದ್ದರು. ಕಚೇರಿಯ ವಿಳಾಸ : ಉತ್ತರ ಅಮೆರಿಕ ಕನ್ನಡ ಕೂಟಗಳ ಆಗರ (ಅಕ್ಕ). S-415, ನಾಲಕ್ಕನೇ ಮಹಡಿ, ಮಣಿಪಾಲ್ ಸೆಂಟರ್, ಡಿಕನ್ ಸನ್ ರಸ್ತೆ, ಎಂಜಿ ರಸ್ತೆ ಪಕ್ಕ, ಬೆಂಗಳೂರು 560 042. ದೂರವಾಣಿ : 080-4212 7135, 080-4212 7137, 080-4149 0304.

ಸಂಸ್ಥೆಯ ಹತ್ತು ವರ್ಷಗಳ ಪ್ರಯಾಣದಲ್ಲಿ ಇಂದೊಂದು ಪ್ರಮುಖ ಮೈಲಿಗಲ್ಲು. ನಮ್ಮದೇ ಆದ ಒಂದು ಕಚೇರಿಯನ್ನು ಹೊಂದಬೇಕೆಂಬ ಬಹುದಿನಗಳ ಕನಸು ಇಂದು ನೆರವೇರಿತು ಎಂದು ಕಚೇರಿ ಉದ್ಘಾಟನೆ ನಂತರ ಮಾತನಾಡಿದ ಅಮರ್ ನಾಥ್ ಗೌಡ ಹೇಳಿದರು. ಅಮೆರಿಕಾದಲ್ಲಿ ಅಕ್ಕ ಕಾರ್ಯದರ್ಶಿಯ (ನಾಗಶಂಕರ್ ಚಂದ್ರಶೇಖರ್) ನಿವಾಸವೇ ಕಚೇರಿಯಾಗಿ ಕಾರ್ಯ ನಿರ್ವಹಿಸುವ ಪದ್ಧತಿ ನಡೆದುಕೊಂಡು ಬಂದಿದೆ. ಆದರೆ, ಭಾರತದಲ್ಲಿ ಇಂಥ ಕಚೇರಿಯ ಅಗತ್ಯ ತೀವ್ರವಾಗಿ ಕಂಡುಬಂದುದರಿಂದ ಸ್ಥಳ ಪಡೆಯಲಾಯಿತು ಎಂದು ರವಿ ಡೆಂಕಣಿಕೋಟೆ ತಿಳಿಸಿದರು.

ಇದೇ ವೇಳೆ, ಅಕ್ಕದ ನೂತನ ಅಧ್ಯಕ್ಷರಿಗೆ ಅಧಿಕಾರ ಹಸ್ತಾಂತರ ಮಾಡುವ ಔಪಚಾರಿಕ ಕಾರ್ಯಕ್ರಮವೂ ನೆರವೇರಿತು. ಹೂ ಗುಚ್ಛ ನೀಡುವುದರ ಮೂಲಕ ರವಿ ಡೆಂಕಣಿಕೋಟೆ ಅವರು ಅಕ್ಕದ ಹೊಣೆಯನ್ನು ದಯಾಶಂಕರ ಅಡಪ ಅವರಿಗೆ ವರ್ಗಾಯಿಸಿದರು. ಈ ಸಂದರ್ಭದಲ್ಲಿ ದಟ್ಸ್ ಕನ್ನಡದೊಂದಿಗೆ ಮಾತನಾಡಿದ ಅಕ್ಕ ಮುಂದಾಳುಗಳ ಕೆಲವು ಕನಸುಗಳು ಇಂತಿವೆ:

* ವಿಶ್ವ ಕನ್ನಡಿಗರ, ಮುಖ್ಯವಾಗಿ ಅಮೆರಿಕನ್ನಡಿಗರ ಬಾಂಧವ್ಯ ವೃದ್ಧಿಗೆ ಹೊಸ ಯತ್ನಗಳು.
* ಅಮೆರಿಕ ಕನ್ನಡ ಕೂಟಗಳ ನಡುವಣ ಪರಸ್ಪರ ಸಂಬಂಧಗಳಿಗೆ ಅಕ್ಕ ಹೊಸ ಭಾಷ್ಯ.
* ಕರ್ನಾಟಕ ಕನ್ನಡಿಗರೊಂದಿಗಿನ ಸಾಮರಸ್ಯ ಸುಧಾರಣೆಗೆ ಅಕ್ಕದ ನೂತನ ಸಂಕಲ್ಪ.
* ರಾಜ್ಯ ಸರಕಾರದಿಂದ ಯಾವ ಕಾರಣಕ್ಕೂ ಚಿಕ್ಕಾಸೂ ಧನಸಹಾಯ ಪಡೆಯಬಾರದೆಂಬ ಪ್ರತಿಜ್ಞೆ.
* ಮುಂದಿನ ಸಮ್ಮೇಳನ ಲಾಸ್ ವೆಗಾಸ್ ಅಥವಾ ಫಿಲಡೆಲ್ಫಿಯಾದಲ್ಲಿ ನಡೆಸುವ ಆಲೋಚನೆ.
* ಸದ್ಯದಲ್ಲೇ ಅಕ್ಕದ ಹೊಸ ಕಾರ್ಯಕ್ರಮಗಳ ಘೋಷಣೆ. [ಅಕ್ಕ ಸಂಸ್ಥೆ]

English summary

NRI Kannada Association AKKA opens its India Office in Manipal Center, Bangalore. AKKA president Dayashankar Adappa, trustee Amarnath Gowda, former president Ravi Denkanikote were present at the occasion.