ನಿನ್ನೊಲುಮೆ ನಮಗಿರಲಿ ತಂದೆ ಕೈ ಹಿಡಿದು ನಡೆಸು ಮುಂದೆ

ಇನಿದನಿಗೆ, ಭಾವಪೂರ್ಣ ಗಾಯನಕ್ಕೆ ಸುಮಿತ್ರ ಹೆಸರಾದವರು. ‘ಘಲ್ಲು ಘಲ್ಲೆನ್ನುತ’ ಎನ್ನುವ ಜನಪದದಿಂದ ‘ನಮ್ಮ ಮಕ್ಕಳು’ ಸಿನಿಮಾದ ‘ನಿನ್ನೊಲುಮೆ ನಮಗಿರಲಿ ತಂದೆ’ ಪದದವರೆಗೆ ಸುಮಿತ್ರ ಕಂಠದ ಹರವು ದೊಡ್ಡದು. ಸುಮಿತ್ರ ಕಂಠದ ಜನಪ್ರಿಯ ಗೀತೆ ಇಲ್ಲಿದೆ. ಶ್ರೀಯವರ ‘ಕರುಣಾಳು ಬಾ ಬೆಳಕೆ’ ಗೀತೆಯಂತೆ ಕನ್ನಡಿಗರನ್ನು ಕಾಡಿದ ಮತ್ತೊಂದು ಅಪರೂಪದ ಗೀತೆಯಿದು. ಕಾರ್ಯಕ್ರಮದಲ್ಲಿ ಸುಮಿತ್ರಾ ಈ ಗೀತೆಯನ್ನು ಹಾಡಬಹುದು. ಹಾಡದಿದ್ದರೆ ಕೋರಿಕೆ ಸಲ್ಲಿಸಿ; ಎದೆ ತುಂಬಿಸಿಕೊಳ್ಳಿ.

ಸತ್ಯ ಮಾರ್ಗದಿ ನಡೆವ ಶಕ್ತಿ ಕೊಡು ತಂದೆ

ನಿನ್ನೊಲುಮೆ ನಮಗಿರಲಿ ತಂದೆ
ಕೈ ಹಿಡಿದು ನೀ ನಡೆಸು ಮುಂದೆ ।

ತಾನುರಿದು ಜಗಕೆಲ್ಲ ಜ್ಯೋತಿಯನು ನೀಡುವ
ದೀಪದೊಳು ನೀ ನನ್ನ ಅನುಗೊಳಿಸು ತಂದೆ

ಕಾನನದ ಸುಮವೊಂದು ಸೌರಭವ ತಾ ಸೂಸಿ
ಸಫಲತೆಯ ಪಡೆವಂತೆ ಮಾಡೆನ್ನ ತಂದೆ

ಸಿರಿಯು ಸಂಪದ ಬೇಡ ಯಾವ ವೈಭವ ಬೇಡ
ನಿನ್ನ ಕರುಣೆಯು ಒಂದೆ ಸಾಕೆಮಗೆ ತಂದೆ ।। ನಿನ್ನೊಲುಮೆ।।

ನಿನ್ನ ಈ ಮಕ್ಕಳನು ಪ್ರೇಮದಲಿ ನೀ ನೋಡು
ಈ ಮನೆಯು ಎಂದೆಂದು ನಗುವಂತೆ ನೀ ಮಾಡು

ನಂಬಿದರೆ ಭಯವಿಲ್ಲ ನಂಬದಿರೆ ಬಾಳಿಲ್ಲ
ಅಂಬಿಗನೇ ನೀ ನಡೆಸು ಈ ಬಾಳ ನೌಕೆ

ಯಾವ ನೋವೇ ಬರಲಿ ಎದೆಗುಂದದಿರಲಿ
ಸತ್ಯ ಮಾರ್ಗದಿ ನಡೆವ ಶಕ್ತಿ ಕೊಡು ತಂದೆ ।। ನಿನ್ನೊಲುಮೆ।।

(ಚಿತ್ರ : ನಮ್ಮ ಮಕ್ಕಳು)

ವಾರ್ತಾ ಸಂಚಯ
ಮುಖಪುಟ / ಸಾಹಿತ್ಯ ಸೊಗಡು