ಒಂದು ಕಾಲದ ಕುದುರೆ ಫಾರ್ಮ್‌, ಈಗ ವಿಶ್ವಕ್ಕೆ ಕೊರೊನಾ ಲಸಿಕೆ ಕೇಂದ್ರ: ರೇಸ್‌ನಲ್ಲಿ ಗೆಲ್ತಾರ ಪೂನವಾಲಾ

Updated: Monday, August 3, 2020, 17:52 [IST]

ಪುಣೆ, ಆಗಸ್ಟ್‌ 03: ಕೋವಿಡ್ 19 ರ ವಿರುದ್ಧ ಲಸಿಕೆಗಾಗಿ ಇಡೀ ಜಗತ್ತು ಕಾಯುತ್ತಿದೆ. ಈ ಸಾಂಕ್ರಾಮಿಕಕ್ಕೆ ಪರಿಹಾರವನ್ನು ಯಾರು ಲಸಿಕೆ ಕಂಡುಕೊಳ್ಳುತ್ತಾರೋ ಅವರು ವಿಶ್ವದ ಹೀರೋ ಆಗೋದ್ರಲ್ಲಿ ಅನುಮಾನವಿಲ್ಲ.

ಸೀರಮ್ ಇನ್ಸ್ಟಿಟ್ಯೂಟ್ ಆಫ್ ಇಂಡಿಯಾ

ಪುಣೆಯ ಸೀರಮ್ ಇನ್ಸ್ಟಿಟ್ಯೂಟ್ ಆಫ್ ಇಂಡಿಯಾವು ಭಾರತದ ಶ್ರೀಮಂತ ಕುಟುಂಬಗಳಲ್ಲಿ ಒಂದಾಗಿದೆ. ಇದನ್ನು ಮೊದಲು ಕುದುರೆ ಫಾರ್ಮ್ ಆಗಿ ಪ್ರಾರಂಭಿಸಲಾಯಿತು. ಆದರೆ ಈಗ ಕೊರೊನಾವೈರಸ್ ಲಸಿಕೆ ತಯಾರಿಕೆಯಲ್ಲಿ ವಿಶ್ವದ ಇತರ ಭಾಗಗಳೊಂದಿಗೆ ಸ್ಪರ್ಧಿಸುತ್ತಿದೆ. ಕಂಪನಿಯು ಕೆಲವು ಮಿಲಿಯನ್ ಡೋಸ್ ಲಸಿಕೆ ತಯಾರಿಕೆಯಲ್ಲಿ ತೊಡಗಿದೆ. ಪ್ರಯೋಗಗಳು ಇನ್ನೂ ಪ್ರಗತಿಯಲ್ಲಿದೆ ಎಂದು ನ್ಯೂಯಾರ್ಕ್ ಟೈಮ್ಸ್ ಲೇಖನವು ಬಹಿರಂಗಪಡಿಸಿದೆ. ಎಲ್ಲವೂ ಯೋಜಿಸಿದಂತೆ ನಡೆದು ಲಸಿಕೆ ಹೊರಬಂದರೆ ಕಂಪನಿಯ ಮಾಲೀಕ 'ಆದರ್ ಪೂನವಾಲಾ' ಅವರ ಹೆಸರು ಪ್ರಪಂಚದಾದ್ಯಂತ ವೈರಲ್ ಆಗುತ್ತದೆ.

ಸೀರಮ್ ಇನ್ಸ್ಟಿಟ್ಯೂಟ್ ಆಫ್ ಇಂಡಿಯಾಗೆ ವಿಶ್ವದಲ್ಲೇ ದೊಡ್ಡ ಸ್ಥಾನ

ಸೀರಮ್ ಇನ್ಸ್ಟಿಟ್ಯೂಟ್ ಆಫ್ ಇಂಡಿಯಾ ಖಾಸಗಿ ವಲಯದ ಲಸಿಕೆ ತಯಾರಕ. ಇದನ್ನು ಉದ್ಯಮಿ ಸೈರಸ್ ಪೂನವಾಲಾ 1966 ರಲ್ಲಿ ಸ್ಥಾಪಿಸಿದರು. ಅದು ಪೂನವಾಲಾ ಹೂಡಿಕೆ ಮತ್ತು ಕೈಗಾರಿಕೆಗಳ ಅಡಿಯಲ್ಲಿತ್ತು. ಇಂದು ವಿಶ್ವದ ಅತಿದೊಡ್ಡ ಲಸಿಕೆ ತಯಾರಕರು ಯಾರು ಎಂಬ ಪ್ರಶ್ನೆಗೆ ಸೀರಮ್ ಇನ್ಸ್ಟಿಟ್ಯೂಟ್ ಆಫ್ ಇಂಡಿಯಾದ ಎಸ್ಐಐಐ ಉತ್ತರವಾಗಿದೆ! ಅವರು ಪ್ರತಿವರ್ಷ 1.3 ಬಿಲಿಯನ್ ಡೋಸ್ ಲಸಿಕೆಯನ್ನು ಉತ್ಪಾದಿಸುತ್ತಾರೆ.

ಆದರ್ ಪೂನವಾಲಾ

ಸೀರಮ್ ಸಂಸ್ಥೆಯ ಸಂಸ್ಥಾಪಕ ಸೈರಸ್ ಪೂನವಾಲಾ ಅವರ ಏಕೈಕ ಪುತ್ರ ಆದರ್ ಪೂನವಾಲಾ. ಪ್ರಸ್ತುತ ಅವರು ಸೀರಮ್ ಸಂಸ್ಥೆಯ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಯಾಗಿದ್ದಾರೆ. ಒಂದು ವೇಳೆ ಕೊರೊನಾ ಲಸಿಕೆ ಸಂಪೂರ್ಣ ಯಶಸ್ಸು ಕಂಡರೆ ಆದರ್ ಹೆಸರು ಇತಿಹಾಸದಲ್ಲಿ ಶಾಶ್ವತವಾಗಿ ಉಳಿಯುವುದು ಖಚಿತ.

ಕೋವಿಡ್ ಲಸಿಕೆಯ ಉತ್ಪಾದನೆ

ಆಕ್ಸ್‌ಫರ್ಡ್ ಲಸಿಕೆ ಸಂಪೂರ್ಣವಾಗಿ ಕಾರ್ಯನಿರ್ವಹಿಸುತ್ತದೆಯೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ಆದರೆ ಔಷಧದ ಶತಕೋಟಿ ಪ್ರಮಾಣವನ್ನು ಈಗಾಗಲೇ ಸೀರಮ್ ಇನ್‌ಸ್ಟಿಟ್ಯೂಟ್ ಆಫ್ ಇಂಡಿಯಾದಲ್ಲಿ ಉತ್ಪಾದಿಸಲಾಗುತ್ತಿದೆ ಎಂಬ ಅಂಶವೇ ಆದರ್ ಪೂನವಾಲಾ ಈಗ ನ್ಯೂಯಾರ್ಕ್ ಟೈಮ್ಸ್‌ನಲ್ಲೂ ಹೆಗ್ಗುರುತಾಗಿ ಕಾಣಿಸಿಕೊಳ್ಳಲು ಕಾರಣವಾಗಿದೆ.

ಲಸಿಕೆ ಯಶಸ್ವಿಯಾಗಲಿ ಎಂದು ಜಗತ್ತೇ ಕಾಯುತ್ತಿದೆ

ಇಡೀ ಜಗತ್ತು ಅಕ್ಷರಶಃ ಕೋವಿಡ್ ಲಸಿಕೆಗಾಗಿ ಕಣ್ಣು ಮಿಟುಕಿಸದೆ ಕಾಯುತ್ತಿದೆ. ಈ ಔಷಧಿ ಯಶಸ್ವಿಯಾದರೆ, ಸೀರಮ್ ಇನ್ಸ್ಟಿಟ್ಯೂಟ್ ಆಫ್ ಇಂಡಿಯಾ ಮತ್ತು ಆದರ್ ಪೂನವಾಲಾ ವಿಶ್ವದ ಕಣ್ಣುಗಳಾಗುವುದರಲ್ಲಿ ಸಂದೇಹವಿಲ್ಲ. ಏಕೆಂದರೆ ಪ್ರಪಂಚದ ಎಲ್ಲಾ ಭಾಗಗಳು ಪ್ರತಿದಿನ ಕೊರೊನಾದಿಂದ ಕಂಗೆಟ್ಟು ಹೋಗಿವೆ.

ಹಿಂದೆದೂ ಕಾಣದ ಬೇಡಿಕೆ ಬರಲಿದೆ

ಲಸಿಕೆ ಪರೀಕ್ಷಿಸದ ಕಾರಣ ಈ ಔಷಧಿಗಳು ಪ್ರಸ್ತುತ ಮಾರುಕಟ್ಟೆಯಲ್ಲಿ ಲಭ್ಯವಿಲ್ಲ. ಎರಡು ಮತ್ತು ಮೂರು ಹಂತಗಳಲ್ಲಿ ಪರೀಕ್ಷೆಗಳು ನಡೆಯುತ್ತಿವೆ. ಈ ಹಂತದಲ್ಲಿಯೂ ಸಹ, ಔಷಧವನ್ನು ಬಿಡುಗಡೆ ಮಾಡಿದರೆ, ಬಿಸಿ ಬಿಸಿ ದೋಸೆಗಳಂತೆ ಮಾರಾಟ ಮಾಡುವುದು ಖಚಿತ.

ಅನೇಕ ದೇಶಗಳಿಂದ ಕರೆ

ಅನೇಕ ದೇಶಗಳ ಪ್ರಧಾನ ಮಂತ್ರಿಗಳು ಮತ್ತು ಆರೋಗ್ಯ ಮಂತ್ರಿಗಳು ಸೇರಿದಂತೆ ಗಣ್ಯರು ಪ್ರತಿದಿನ ಅವರನ್ನು ಕರೆ ಮಾಡಿ ಮಾತನಾಡಿಸುತ್ತಿದ್ದಾರೆ ಎಂದು ಆದರ್ ಪೂನವಾಲಾ ನ್ಯೂಯಾರ್ಕ್ ಟೈಮ್ಸ್‌ಗೆ ತಿಳಿಸಿದರು. ಪ್ರತಿಯೊಬ್ಬರೂ ಲಸಿಕೆ ಬಯಸುತ್ತಾರೆ ಎಂದು ಅವರು ಹೇಳಿದರು.