ದೆಹಲಿಯಲ್ಲಿ ಲಘು ಮಳೆ: ಗಾಳಿಯ ಗುಣಮಟ್ಟ ತುಂಬಾ ಕಳಪೆ: ಸುಧಾರಿಸುವ ನಿರೀಕ್ಷೆ

Published: Saturday, January 22, 2022, 12:57 [IST]

ಹೊಸದಿಲ್ಲಿ ಜನವರಿ 22: ಇಂದು (ಶನಿವಾರ 22 ಜನವರಿ) ಬೆಳಗ್ಗೆ ದೆಹಲಿ NCR ನಲ್ಲಿ ಮಳೆ ಆರಂಭವಾಗಿದೆ. ಬೆಳಗ್ಗೆ 4 ಗಂಟೆಯಿಂದ ದೆಹಲಿಯಲ್ಲಿ ಲಘು ಮಳೆ ಮುಂದುವರಿದಿದೆ. ಇದೇ ವೇಳೆ ದೆಹಲಿಯಲ್ಲಿ ಚಳಿ ಹೆಚ್ಚಾಗುವ ಸಾಧ್ಯತೆ ಇದ್ದು, ಭಾನುವಾರವೂ ಮಳೆಯಾಗುವ ಸಾಧ್ಯತೆ ಇದೆ ಎಂದು ಹವಾಮಾನ ಇಲಾಖೆ ಸೂಚನೆ ನೀಡಿದೆ. ಭಾರತೀಯ ಹವಾಮಾನ ಇಲಾಖೆ (IMD) ಮುನ್ಸೂಚನೆಯ ಪ್ರಕಾರ, ದೆಹಲಿಯು ಭಾನುವಾರ ಗಾಳಿಯೊಂದಿಗೆ ಲಘುವಾಗಿ ಸಾಧಾರಣ ಮಳೆಯಾಗುವ ಸಾಧ್ಯತೆಯಿದೆ. ದೆಹಲಿ ಎನ್‌ಸಿಆರ್‌ನಲ್ಲಿ ಶನಿವಾರ ಬೆಳಗ್ಗೆ ಮಳೆಯ ತಣ್ಣನೆಯ ಹನಿಗಳಿಂದ ಚಳಿ ಇನ್ನಷ್ಟು ಹೆಚ್ಚಾಗಿದೆ. ಮಳೆಯಿಂದಾಗಿ ದೆಹಲಿ ವಾಯುಮಾಲಿನ್ಯ ಸುಧಾರಿಸುವ ನಿರೀಕ್ಷೆ ಇದೆ. ಕಳೆದ ಕೆಲ ದಿನಗಳಿಂದ ಕಳಪೆ ಮಟ್ಟ ಗತಲುಪಿದ ವಾಯುಮಾಲಿನ್ಯ ಮಳೆಯಿಂದಾಗಿ ಸುಧಾರಣೆ ಕಾಣುತ್ತದೆ ಎಂದು ಊಹಿಸಲಾಗಿದೆ. ಈ ಕುರಿತು ಶುಕ್ರವಾರ ತಡರಾತ್ರಿ ಹವಾಮಾನ ಇಲಾಖೆ ಮಾಹಿತಿ ನೀಡಿದೆ.

ದೆಹಲಿಯಲ್ಲಿ ಮುಂಜಾನೆ ಮಳೆ

ಶನಿವಾರ ಮಳೆಯೊಂದಿಗೆ ಗಂಟೆಗೆ 30-40 ಕಿ.ಮೀ ವೇಗದಲ್ಲಿ ಬಲವಾದ ಗಾಳಿಯು ದಿನವನ್ನು ತಂಪಾಗಿಸುತ್ತದೆ ಎಂದು IMD ತಿಳಿಸಿದೆ. ಶನಿವಾರದಂದು ಗರಿಷ್ಠ ತಾಪಮಾನವು ಸುಮಾರು 15-16 ಡಿಗ್ರಿ ಸೆಲ್ಸಿಯಸ್ (ಡಿಗ್ರಿ ಸೆಲ್ಸಿಯಸ್) ಇರಬಹುದೆಂದು ನಿರೀಕ್ಷಿಸಲಾಗಿದೆ. IMD ಇದನ್ನು 'ಶೀತ ದಿನ' ಎಂದು ವರ್ಗೀಕರಿಸಿದೆ. ಶುಕ್ರವಾರ ದೆಹಲಿಯಲ್ಲಿ ಗರಿಷ್ಠ ತಾಪಮಾನ 19.6 ಡಿಗ್ರಿ ಸೆಲ್ಸಿಯಸ್ ದಾಖಲಾಗಿತ್ತು. ಶುಕ್ರವಾರ ಮುಂಜಾನೆ ದೆಹಲಿಯಲ್ಲಿ ಲಘುವಾಗಿ ಸಾಧಾರಣ ಮಂಜಿನ ಅನುಭವವಾಯಿತು. ಸಫ್ದರ್‌ಜಂಗ್‌ನಲ್ಲಿ 200 ಮೀಟರ್ ಮತ್ತು ಪಾಲಂನಲ್ಲಿ 700 ಮೀಟರ್‌ಗೆ ಗೋಚರತೆ ಕುಸಿದಿದೆ.

ಐಎಂಡಿ ಸೂಚನೆ

ಪಾಶ್ಚಿಮಾತ್ಯದಲ್ಲಿ ಹವಮಾನ ಬದಲಾವಣೆಯಲ್ಲಿ ಮಳೆಯಾಗಿದ್ದು, ಶುಕ್ರವಾರ ರಾತ್ರಿ ಮತ್ತು ಶನಿವಾರದ ಮುಂಜಾನೆ ತುಂತುರು ಮಳೆಯಾಗಿದೆ ಎಂದು ಐಎಂಡಿ ವಿಜ್ಞಾನಿ ಆರ್‌ಕೆ ಜೆನಮಣಿ ಹೇಳಿದ್ದಾರೆ. "ಭಾನುವಾರ (ಜನವರಿ 23) ಸಹ ಮಳೆಯಾಗುವ ನಿರೀಕ್ಷೆಯಿದೆ. ಈ ವೆಸ್ಟರ್ನ್ ಡಿಸ್ಟರ್ಬನ್ಸ್‌ನ ಪರಿಣಾಮವು ಭಾನುವಾರ ರಾತ್ರಿಯೊಳಗೆ ಕೊನೆಗೊಳ್ಳುವ ನಿರೀಕ್ಷೆಯಿದೆ. ಸೋಮವಾರದ ವೇಳೆಗೆ, ಗರಿಷ್ಠ ತಾಪಮಾನವು 17 ಡಿಗ್ರಿ ಸೆಲ್ಸಿಯಸ್ ಆಗಿರಬಹುದು'' ಎಂದಿದ್ದಾರೆ.

ಮಂಜು ಕವಿದ ವಾತಾವರಣ

ಭಾನುವಾರ ಮತ್ತು ಸೋಮವಾರ ದೆಹಲಿಯಲ್ಲಿ ಚಳಿ ಇನ್ನಷ್ಟು ಹೆಚ್ಚಾಗಬಹುದು ಎಂದು ಆರ್.ಕೆ.ಜೆನಮಣಿ ಹೇಳಿದ್ದಾರೆ. ಭಾನುವಾರ ಲಘು ಮಳೆಯೊಂದಿಗೆ ಗಾಳಿಯ ವೇಗ ಗಂಟೆಗೆ 40 ಕಿಮೀ ತಲುಪಬಹುದು. ಗರಿಷ್ಠ ತಾಪಮಾನವು ತುಂಬಾ ಕಡಿಮೆ ಇರುತ್ತದೆ. ಪಾಶ್ಚಿಮಾತ್ಯ ಅವಾಂತರದಿಂದಾಗಿ ದೆಹಲಿಯಲ್ಲಿ ಮಳೆಯಾಗುತ್ತಿದೆ. ಪಾಶ್ಚಾತ್ಯ ಅಡಚಣೆಯು ಕಡಿಮೆ ಗಾಳಿಯ ಒತ್ತಡದ ಪ್ರದೇಶವನ್ನು ಸೂಚಿಸುತ್ತದೆ. ಇದರಿಂದ ಚಳಿ ಗಾಳಿ ಪಶ್ಚಿಮದಿಂದ ಪೂರ್ವಕ್ಕೆ ಚಲಿಸುತ್ತದೆ. ಇದು ಉತ್ತರ ಭಾರತದ ಮೇಲೆ ಮಳೆ, ಹಿಮಪಾತ ಮತ್ತು ಮಂಜಿಗೆ ಕಾರಣವಾಗಬಹುದು.

ಅತ್ಯಂತ ಕಳಪೆಯಾಗಿದ್ದ ವಾಯುಮಾಲಿನ್ಯ

ಸಿಸ್ಟಂ ಆಫ್ ಏರ್ ಕ್ವಾಲಿಟಿ ಮತ್ತು ವೆದರ್ ಫೋರ್ಕಾಸ್ಟಿಂಗ್ ಮತ್ತು ರಿಸರ್ಚ್ (SAFAR) ಪ್ರಕಾರ, ಮಳೆಯ ನಂತರ ಮುಂದಿನ 24 ಗಂಟೆಗಳಲ್ಲಿ ದೆಹಲಿಯ ಗಾಳಿಯ ಗುಣಮಟ್ಟ ಸುಧಾರಿಸುತ್ತದೆ. SAFAR ಪ್ರಕಾರ, "ಜನವರಿ 22 ಮತ್ತು 23 ರಂದು ಮಳೆಯಾಗುವ ಸಾಧ್ಯತೆಯಿದೆ. ಇದರಿಂದ ಗಾಳಿಯ ಗುಣಮಟ್ಟ ಸುಧಾರಣೆಯಾಗಲಿದೆ. ಬಲವಾದ ಗಾಳಿಯಿಂದಾಗಿ AQI ನಲ್ಲಿ ಗಮನಾರ್ಹ ಸುಧಾರಣೆ ಕಂಡುಬರುತ್ತದೆ" ಎಂದಿದೆ. ಕೇಂದ್ರ ಮಾಲಿನ್ಯ ನಿಯಂತ್ರಣ ಮಂಡಳಿಯ ದೈನಂದಿನ ಸಂಜೆ 4 ಗಂಟೆಯ ಬುಲೆಟಿನ್ ಪ್ರಕಾರ, ದೆಹಲಿಯ ಗಾಳಿಯ ಗುಣಮಟ್ಟವು ಕಳೆದ 24 ಗಂಟೆಗಳಲ್ಲಿ "ಅತ್ಯಂತ ಕಳಪೆ" ವಿಭಾಗದಲ್ಲಿ 365 ರ ವಾಯು ಗುಣಮಟ್ಟ ಸೂಚ್ಯಂಕದೊಂದಿಗೆ (AQI) ಉಳಿದಿದೆ. ಶುಕ್ರವಾರದ AQI ಮಟ್ಟವು 387 ಆಗಿತ್ತು (ಅತ್ಯಂತ ಕಳಪೆ). ದೆಹಲಿಯಲ್ಲಿ ಮಳೆಯಿಂದಾಗಿ ಗಾಳಿ ಗುಣಮಟ್ಟ ಸುಧಾರಿಸುವ ಸಾಧ್ಯತೆ ಇದೆ.