ಕೋವಿಡ್ 19: ಉತ್ತರ ಪ್ರದೇಶದಲ್ಲಿ 2 ಕಪ್ಪಾ ರೂಪಾಂತರಿ ಪತ್ತೆ

ಲಕ್ನೋ, ಜುಲೈ 09: ಉತ್ತರ ಪ್ರದೇಶದಲ್ಲಿ ಎರಡು ಕಪ್ಪಾ ರೂಪಾಂತರಿ ಪ್ರಕರಣಗಳು ಪತ್ತೆಯಾಗಿವೆ. ಲಕ್ನೋನ ಕೆಜಿಎಂಯು ಆಸ್ಪತ್ರೆಗೆ ಒಟ್ಟು 109 ಮಾದರಿಗಳನ್ನು ನೀಡಲಾಗಿತ್ತು, ಅದರಲ್ಲಿ 107 ಡೆಲ್ಟಾ ರೂಪಾಂತರಿ ಪ್ರಕರಣಗಳಾಗಿದ್ದು, ಎರಡು ಕಪ್ಪಾ ಪ್ರಕರಣಗಳಿವೆ.

ಈ ಎರಡು ರೂಪಾಂತರಿಗಳು ರಾಜ್ಯಕ್ಕೆ ಹೊಸದಾಗಿದ್ದು, ಆತಂಕ ಹೆಚ್ಚಿಸಿದ್ದು, ನಿತ್ಯ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ವೈದ್ಯರ ಜತೆ ಸಭೆ ನಡೆಸುತ್ತಿದ್ದಾರೆ.

"ಈ ರೂಪಾಂತರಿ ಕುರಿತು ಭಯ ಪಡುವುದು ಬೇಡ ಚಿಕಿತ್ಸೆ ಲಭ್ಯವಿದೆ'' ಎಂದು ಆರೋಗ್ಯ ಹೆಚ್ಚುವರಿ ಕಾರ್ಯದರ್ಶಿ ಮೋಹನ್ ಪ್ರಸಾದ್ ತಿಳಿಸಿದ್ದಾರೆ. ಕಳೆದ 24 ಗಂಟೆಯಲ್ಲಿ 10 ಮಂದಿ ಮೃತಪಟ್ಟಿದ್ದು, ಒಟ್ಟು ಸಾವಿನ ಸಂಖ್ಯೆ 22,676ಕ್ಕೆ ಏರಿದೆ, ಒಟ್ಟು 17,07,044 ಪ್ರಕರಣಗಳಿವೆ.

ಭಾರತದಲ್ಲಿ ಕಂಡುಬಂದ 2 ಸೋಂಕಿಗೆ ಡೆಲ್ಟಾ ಹಾಗೂ ಕಪ್ಪಾ ಎಂದು ಹೆಸರಿಡಲಾಗಿದೆ. ಇನ್ಮುಂದೆ ಭಾರತದ ಸೋಂಕು, ಬ್ರಿಟನ್​ ಸೋಂಕು, ಆಫ್ರಿಕಾ ಸೋಂಕು ಎಂದು ದೇಶಗಳನ್ನು ಉಲ್ಲೇಖಿಸಿ ರೂಪಾಂತರಿ ಸೋಂಕನ್ನು ಗುರುತಿಸುವಂತಿಲ್ಲ. ವೈದ್ಯಕೀಯ ಭಾಷೆಯಲ್ಲಿ ರೂಪಾಂತರಿ ಸೋಂಕನ್ನು ಹೆಸರಿಸಬೇಕು.

ಭಾರತದಲ್ಲಿ ಮೊದಲು ಕಾಣಿಸಿಕೊಂಡ B.1.617.1 ಸೋಂಕಿಗೆ ಕಪ್ಪಾ ಎಂದು, ನಂತರ ಕಾಣಿಸಿಕೊಂಡ B1.617.2 ವೈರಸನ್ನು ಡೆಲ್ಟಾ ಎಂದು ನಾಮಕರಣ ಮಾಡಲಾಗಿದೆ. ಎರಡೂ ಮಾದರಿಯ ವೈರಸ್​​ 2020ರ ಅಕ್ಟೋಬರ್​ನಲ್ಲಿ ಭಾರತದಲ್ಲಿ ಪತ್ತೆಯಾಗಿವೆ.

ವಿಶ್ವ ಆರೋಗ್ಯ ಸಂಸ್ಥೆಯ ಕೋವಿಡ್​​-19 ಟೆಕ್ನಿಕಲ್​​ ಮುಖ್ಯಸ್ಥರಾದ ಡಾ.ಮಾರಿಯಾ ವೆನ್​ ಕೆರಕೋವ ಹೆಸರುಗಳ ಬಗ್ಗೆ ಸ್ಪಷ್ಟನೆ ನೀಡಿದ್ದಾರೆ. ಯಾವುದೇ ದೇಶಗಳ ಹೆಸರನ್ನು ಬಳಸದೆ ಇನ್ಮುಂದೆ ವೈದ್ಯಕೀಯ ಹೆಸರುಗಳ ಮೂಲಕವೇ ರೂಪಾಂತರಿ ವೈರಸನ್ನು ಗುರುತಿಸಲಾಗುವುದು.

ಸೋಂಕು ಪತ್ತೆ, ಚಿಕಿತ್ಸೆ, ಅಧ್ಯಯನ ಎಲ್ಲವೂ ಇನ್ಮುಂದೆ ಗ್ರೀಕ್​​​ ಅಕ್ಷರಗಳುಳ್ಳ ಹೆಸರುಗಳ ಮೂಲಕವೇ ನಡೆಯಲಿದೆ ಎಂದು ಸ್ಪಷ್ಟನೆ ನೀಡಿದ್ದಾರೆ. ಬೇರೆ ದೇಶಗಳಲ್ಲಿ ರೂಪಾಂತರಗೊಂಡಿರುವ ವೈರಸ್​ಗೆ ಆಲ್ಫಾ, ಬೀಟಾ, ಗಮಾ ಸೇರಿದಂತೆ ಹಲವು ಗ್ರೀಕ್​ ಅಕ್ಷರಗಳನ್ನು ನೀಡಲಾಗಿದೆ.

English summary

A genome sequencing of 109 samples at Lucknow's KGMU hospital has returned 107 confirmed samples of highly infections Delta variant, and also carried two samples of the Kappa variant.