ಮತದಾರರ ಸಂಖ್ಯೆ ಹೆಚ್ಚಳ; ಮತದಾನ ಅವಧಿಯೂ ಹೆಚ್ಚಳ?

ಬೆಂಗಳೂರು, ಮಾರ್ಚ್11: ಮೊನ್ನೆ ಭಾನುವಾರದಿಂದ ಹೊಸ ಮತದಾರರು ಸಮರೋಪಾದಿಯಲ್ಲಿ ಬಂದು ಮತದಾರರ ಪಟ್ಟಿಗೆ ನೋಂದಣಿಯಾಗುತ್ತಿರುವುದರಿಂದ ಈ ಬಾರಿ ಹದಿನಾರನೆಯ ಲೋಕಸಭಾ ಚುನಾವಣೆಗೆ ಮತದಾರರ ಸಂಖ್ಯೆ ಭಾರಿ ಪ್ರಮಾಣದ ಹೆಚ್ಚಳವಾಗಿದೆ. ಸುಮಾರು 6 ಲಕ್ಷ ಮಂದಿ ಹೊಸದಾಗಿ ಹೆಸರು ಸೇರ್ಪಡೆಗೆಂದು ಭಾನುವಾರ ಅರ್ಜಿ ಸಲ್ಲಿಸಿದ್ದಾರೆ.

ಮತದಾರರ ಸಂಖ್ಯೆ ಭಾರಿ ಪ್ರಮಾಣದಲ್ಲಿ ಹೆಚ್ಚಳವಾಗುತ್ತಿರುವುದನ್ನು ಮನಗಂಡು ಚುನಾವಣಾ ಆಯೋಗವು ಮತದಾನದ ಸಮಯವನ್ನು ಹೆಚ್ಚಿಸುವ ಸಾಧ್ಯತೆಯಿದೆ. ಸಾಮಾನ್ಯವಾಗಿ, ಮತದಾನ ಸಮಯವನ್ನು ಸಮಯ/ಸಂದರ್ಭ ನೋಡಿಕೊಂಡು ಹೆಚ್ಚಿಸುವ ವಿವೇಚನೆಯನ್ನು ಆಯಾ ಚುನಾವಣಾಧಿಕಾರಿಗಳಿಗೆ ನೀಡಲಾಗಿರುತ್ತದೆ. ಆದರೆ ಈ ಬಾರಿ ಇಡೀ ದೇಶದಾದ್ಯಂತ ಮತದಾರರ ಸಂಖ್ಯೆ ಹೆಚ್ಚಳವಾಗಿರುವುದರಿಂದ ಇಡೀ ದೇಶಕ್ಕೆ ಅನ್ವಯಗಾಗುವಂತೆ ಮತದಾನದ ಸಮಯವನ್ನು ವಿಸ್ತರಿಸುವ ಸಾಧ್ಯತೆಯಿದೆ.

ಅಂದರೆ ಸಾಮಾನ್ಯವಾಗಿ ಸಂಜೆ 5 ಗಂಟೆಗೆ ಮತದಾನ ಅವಧಿ ಮುಗಿಯುತ್ತದೆ. ಅದು ಕೆಲವೊಮ್ಮ 6 ಗಂಟೆಗೂ ವಿಸ್ತರಸಲ್ಪಡುತ್ತದೆ. ಇತ್ತೀಚೆಗೆ ದೆಹಲಿಯಲ್ಲಿ ಆಮ್ ಆದ್ಮಿ ಪಕ್ಷದ ಅಲೆಯಿಂದಾಗಿ ಮತದಾನ ಪ್ರಮಾಣ ಹೆಚ್ಚಳವಾಗಿದ್ದರಿಂದ ರಾತ್ರಿ 8 ಗಂಟೆಯವರೆಗೂ ಮತದಾನ ನಡೆದಿತ್ತು. ಹಾಗಾಗಿ, ಈ ಬಾರಿ ಲೋಕಸಭಾ ಚುನಾವಣೆಗೆ ಸಮಯವನ್ನು ವಿಸ್ತರಿಸುವ ಸಾಧ್ಯತೆ ಹೆಚ್ಚಾಗಿದೆ.

ಉಳಿದಂತೆ ರಾಜ್ಯ ಮುಖ್ಯ ಚುನಾವಣಾಧಿಕಾರಿ ಅನಿಲ್‌ ಕುಮಾರ್‌ ಝಾ ಹೇಳುವಂತೆ:
* ಜನವರಿ 31, 2014ರ ಅನ್ವಯ ರಾಜ್ಯದಲ್ಲಿ ಈಗಾಗಲೇ 4.46 ಕೋಟಿ ಮತದಾರರಿದ್ದಾರೆ.
* ರಾಜ್ಯಾದ್ಯಂತ ಶನಿವಾರದವರೆಗೆ ಹೊಸದಾಗಿ 3.14 ಲಕ್ಷ ಅರ್ಜಿ ಸಲ್ಲಿಕೆಯಾಗಿವೆ.
* online ಮುಖಾಂತರವೂ 40,000 ಅರ್ಜಿಗಳು ಬಂದಿವೆ.
* ಭಾನುವಾರ ನಡೆದ ವಿಶೇಷ ಅಭಿಯಾನದಲ್ಲಿ ಒಂದೇ ದಿನ 2.44 ಲಕ್ಷ ಹೊಸ ಅರ್ಜಿ ಬಂದಿದೆ.
* ಇನ್ನೂ ನಾಲ್ಕು ಜಿಲ್ಲೆಗಳ ಮಾಹಿತಿ ಬರಬೇಕಾಗಿದೆ.
* ಮತಯಂತ್ರಗಳ ಕೊರತೆ ಇಲ್ಲ.
* ಮಾರ್ಚ್‌ 16 ರವರೆಗೂ ಮತದಾರರ ಪಟ್ಟಿಗೆ ಹೆಸರು ಸೇರಿಸಲು ಅವಕಾಶವಿದೆ.
* ಅರ್ಜಿ ಸಲ್ಲಿಸಿದ 10 ದಿನಗಳಲ್ಲಿ ಮತದಾರರ ಪಟ್ಟಿಗೆ ಹೆಸರು ಸೇರ್ಪಡೆ ಮಾಡಲಾಗುವುದು.
* ಆ ಬಳಿಕ ಒಂದು ವಾರದಲ್ಲಿ ಹೊಸ ಮತದಾರರಿಗೆ ಗುರುತಿನ ಚೀಟಿ (EPIC‌) ವಿತರಣೆ ಮಾಡಲಾಗುವುದು.
* ಬೆಂಗಳೂರುಒನ್‌ ಮತ್ತು ಕರ್ನಾಟಕಒನ್‌ ಕೇಂದ್ರಗಳಲ್ಲೂ EPIC ಕಾರ್ಡ್‌ ಪಡೆಯಬಹುದು.
* ಇಂದು ಚುನಾವಣಾಧಿಕಾರಿಗಳ ಕಚೇರಿಯಲ್ಲಿ ರಾಜ್ಯದ ಎಲ್ಲ ಜಿಲ್ಲಾಧಿಕಾರಿಗಳಿಗೆ ಕಾರ್ಯಾಗಾರ ಆಯೋಜಿಸಲಾಗಿದೆ.
* ಅತಿ ಕಡಿಮೆ ಹಾಗೂ ಹೆಚ್ಚು ಮತದಾರರ ಕ್ಷೇತ್ರ:
1) ಉಡುಪಿ- ಚಿಕ್ಕಮಗಳೂರು ಕ್ಷೇತ್ರದಲ್ಲಿ ಅತಿ ಕಡಿಮೆ ಅಂದರೆ 13,51,245 ಮತದಾರರಿದ್ದಾರೆ.
2) ಬೆಂಗಳೂರು ಉತ್ತರ ಕ್ಷೇತ್ರದಲ್ಲಿ ಅತಿ ಹೆಚ್ಚು ಅಂದರೆ 22,24,847 ಮತದಾರರು ಇದ್ದಾರೆ.

ಚುನಾವಣಾ ದಿನಾಂಕ ಬದಲಾವಣೆ?: ಚುನಾವಣಾ ದಿನಾಂಕ ಬದಲಾಯಿಸುವ ಬಗ್ಗೆ ಆರ್ಚ್ ಬಿಷಪ್ ಹಾಗೂ ಬಿಜೆಪಿ ಪಕ್ಷದಿಂದ ಮನವಿಗಳು ಬಂದಿವೆ. ಈ ಮನವಿಗಳನ್ನು ಕೇಂದ್ರ ಚುನಾವಣಾ ಆಯೋಗಕ್ಕೆ ಕಳುಹಿಸಿಕೊಡಲಾಗುವುದು ಎಂದು ಅನಿಲ್‌ ಕುಮಾರ್‌ ಝಾ ತಿಳಿಸಿದ್ದಾರೆ. (ಕರ್ನಾಟಕ ವಾರ್ತೆ)

English summary

Lok Sabha Election- 2014. Thanks to voter registration special drive voters number increases hugely said Karnataka Chief Electoral Officer Anil Kumar Jha. Jha told reporters in Bangalore on Monday that nearly three lakh applications, including 39,000 online, were received on Sunday.