Karnataka Dam Water Level: ಸೈಕ್ಲೋನ್, ಭಾರೀ ಮಳೆ ಎಚ್ಚರಿಕೆ: ಹೆಚ್ಚಲಿದೆ ರಾಜ್ಯದ ಅಣೆಕಟ್ಟುಗಳ ಒಳಹರಿವು

Published: Thursday, December 12, 2024, 9:43 [IST]

ಬೆಂಗಳೂರು, ಡಿಸೆಂಬರ್ 12: ಬೆಂಗಳೂರು ಸೇರಿದಂತೆ ಕರ್ನಾಟಕ ರಾಜ್ಯದಲ್ಲಿ ಮತ್ತೆ ಮಬ್ಬು ವಾತಾವರಣ ಆವರಿಸಿದೆ. ಅರ್ಧ ರಾಜ್ಯಕ್ಕೆ ವಾಯುಭಾರ ಕುಸಿತ ಹಾಗೂ ಚಂಡಮಾರುತ ಪ್ರಭಾವ ಹೆಚ್ಚು ಬೀರುವ ಲಕ್ಷಣ ಇದೆ. ಇದರಿಂದ ದಕ್ಷಿಣ ಒಳನಾಡಿಗೆ ಮುಂದಿನ ಮೂರು ದಿನಗಳ ಕಾಲ ಭಾರೀ ಮಳೆ ಆಗುವ ಮುನ್ಸೂಚನೆ ಇದೆ. ಈಗಾಗಲೇ ಮೈದುಂಬಿಕೊಂಡಿದ್ದ ರಾಜ್ಯದ ಪ್ರಮುಖ ಜಲಾಶಯಗಳ ಒಳಹರಿವು ಮತ್ತಷ್ಟು ಹೆಚ್ಚಾಗುವ ಸಾಧ್ಯತೆ ಇದೆ. ಹಳ್ಳ, ಕೊಳ್ಳಗಳು, ಕೆರೆ ಕಟ್ಟೆಗಳು ಮತ್ತೆ ಉಕ್ಕಿ ಹರಿಯುವ ನಿರೀಕ್ಷೆ ಇದೆ. ಮುಖ್ಯವಾಗಿ ಹಿಂಗಾರು ಬಿತ್ತನೆ ಮಾಡಿದ ರೈತರಿಗೆ ಭಾರೀ ಮಳೆ ವರದಾನವಾಗಲಿದೆ.

ರಾಜ್ಯದಲ್ಲಿ ಮುಂಗಾರು ಸಮಯದಲ್ಲಿ ಅಬ್ಬರಿಸಿದ್ದ ಮಳೆಯಿಂದಾಗಿ ಜಲಾಶಯಗಳು ಭರ್ತಿಯಾಗಿವೆ. ನಂತರ ಹಿಂಗಾರು ಮಳೆಯು ಅಷ್ಟಾಗಿ ನಿರಂತರವಾಗಿ ಸುರಿಯಲಿಲ್ಲ. ಹೀಗಾಗಿ ದೈನಂದಿನ ನೀರಿನ ಬಳಕೆ, ನೀರಾವರಿಗೆ ನದಿ, ಜಲಾಶಯಗಳ ಉಪಯೋಗದಿಂದ ಕೊಂಚ ಮಟ್ಟಿಗೆ ನೀರು ಖಾಲಿಯಾಗಿತ್ತು. ಇದೀಗ ನೀಡಲಾದ ಭಾರೀ ಮಳೆಯ ಮುನ್ಸೂಚನೆಯಿಂದಾಗಿ ರಾಜ್ಯದಲ್ಲಿ ಅಣೆಕಟ್ಟುಗಳು ಮತ್ತೆ ಮೈದುಂಬಿ ಹರಿಯಲಿವೆ.

Karnataka Dam Water Level Will Increase Soon Due to Heavy Rain by Cyclone Effect

ಕಾವೇರಿ ನದಿಗೆ ಅಡ್ಡಲಾಗಿ ಕಟ್ಟಿರುವ ಕೃಷ್ಣ ರಾಜ ಸಾಗರ (KRS Dam), ಹಾರಂಗಿ ನದಿಗೆ ಅಡ್ಡಲಾಗಿ ಕಟ್ಟಿರುವ ಹಾರಂಗಿ ಜಲಾಶಯ (Harangi Dam), ಹಾಸನದಲ್ಲಿ ಹೇಮಾವತಿ ನದಿಗೆ ಅಡ್ಡವಾಗಿ ನಿರ್ಮಿಸಿರುವ ಹೇಮಾವತಿ ಡ್ಯಾಂ (Hemavati Dam) ಹಾಗೂ ಕಬಿನಿ, ಭದ್ರಾ, ತುಂಗಭದ್ರಾ, ಮಲಪ್ರಭಾ ಹಾಗೂ ವಾಣಿವಿಲಾಸ ಅಣೆಕಟ್ಟುಗಳಲ್ಲಿ ಒಳಹರಿವು ಮುಂದಿನ ಮೂರು ದಿನಗಳಲ್ಲಿ ಮತ್ತಷ್ಟು ಹೆಚ್ಚಾಗುವ ಸಾಧ್ಯತೆ ಇದೆ.

ಎಂದಿನಂತೆ ಈ ಬಾರಿಯು ನದಿಗಳು ಮತ್ತು ಜಲಾಶಯಗಳು ತುಂಬಿಕೊಂಡಿವೆ. ಈ ಕಾರಣದಿಂದ ಮುಂದಿನ ಬೇಸಿಗೆಗೆ ರಾಜ್ಯದ ಯಾವ ಭಾಗದಲ್ಲೂ ನೀರಿಗೆ ಹಾಹಾಕಾರ ಇರದು ಎಂದು ಅಂದಾಜಿಸಲಾಗಿದೆ. ಸಾಕಷ್ಟು ಪ್ರಮಾಣದ ನೀರು ಈಗಾಗಲೇ ಶೇಖರಣೆ ಆಗಿದೆ.

ಕಳೆದ ಒಂದೆರಡು ತಿಂಗಳಿಂದ ದಾಖಲೆಯ ಮಳೆ ಆಗಿಲ್ಲ. ಈ ವೇಳೆ ಜಲಾಶಯಗಳು ಹಾಗೂ ನದಿಗಳಲ್ಲಿನ ನೀರು ಬಳಕೆಯಿಂಗಿ ಖಾಲಿಯಾಗಿದ್ದ ಪ್ರಮಾಣ ಈ ಮೂರು ದಿನಗಳ ಮಳೆಯಿಂದ ತುಂಬುವ ಸಾಧ್ಯತೆ ಇದೆ.