ಶಿರಿಯಾ ನದಿಗೆ ಅಡ್ಡಲಾಗಿ ಸೇತುವೆ ನಿರ್ಮಾಣಕ್ಕೆ ಗ್ರೀನ್‌ ಸಿಗ್ನಲ್‌; ಕರ್ನಾಟಕ-ಕೇರಳ ಗಡಿ ಗ್ರಾಮಗಳ ಸಂಪರ್ಕ ಇನ್ನು ಸುಲಭ

Updated: Friday, May 8, 2026, 17:29 [IST]

ಮಂಗಳೂರು: ಕರ್ನಾಟಕದ ಗಡಿ ಗ್ರಾಮ ಮನಿಲ ಮತ್ತು ಕೇರಳದ ಪೆರ್ಲ ಗ್ರಾಮಗಳ ನಡುವಿನ ಅಂತರವನ್ನು ಕಡಿಮೆ ಮಾಡುವ ಮಹತ್ವಾಕಾಂಕ್ಷಿ ಯೋಜನೆಯೊಂದಕ್ಕೆ ಕರ್ನಾಟಕ ಸರ್ಕಾರ ಚಾಲನೆ ನೀಡಿದೆ. ಶಿರಿಯಾ ನದಿಗೆ ಅಡ್ಡಲಾಗಿ ಸೇತುವೆ ನಿರ್ಮಿಸಲು ₹20 ಕೋಟಿ ಅನುದಾನ ಬಿಡುಗಡೆ ಮಾಡಿದ್ದು, ಇದು ಎರಡು ರಾಜ್ಯಗಳ ಗಡಿ ಭಾಗದ ಜನರ ಸಂಚಾರ ಹಾಗೂ ಆರ್ಥಿಕ ಚಟುವಟಿಕೆಗೆ ಹೊಸ ಚೈತನ್ಯ ನೀಡಲಿದೆ.

ಸದ್ಯ ಮನಿಲ ಮತ್ತು ಪೆರ್ಲ ಗ್ರಾಮಗಳ ನಡುವೆ ಕೇವಲ 7 ಕಿ.ಮೀ ಅಂತರವಿದ್ದರೂ, ಸುಸಜ್ಜಿತ ರಸ್ತೆ ಅಥವಾ ಸೇತುವೆ ಇಲ್ಲದ ಕಾರಣ ಜನರು ಸುಮಾರು 27 ಕಿ.ಮೀ ಸುತ್ತಿ ಬಳಸಿ ಸಂಚರಿಸಬೇಕಾದ ಅನಿವಾರ್ಯತೆ ಇದೆ. ಪೆರುವಾಯಿ, ಕುದ್ದುಪದವು, ಅಡ್ಯನಡ್ಕ ಮಾರ್ಗವಾಗಿ ಸಂಚರಿಸುತ್ತಿದ್ದ ಜನರಿಗೆ ಈಗ ಈ ಹೊಸ ಸೇತುವೆ ವರದಾನವಾಗಲಿದೆ. ಇದರಿಂದ ಪ್ರಯಾಣದ ದೂರ ಕೇವಲ 6ರಿಂದ 7 ಕಿಲೋಮೀಟರ್‌ಗೆ ಇಳಿಕೆಯಾಗಲಿದೆ.

ಮನಿಲದ ಕಾಮಜಾಲು ಮತ್ತು ಪೆರ್ಲದ ಪೂವನಡ್ಕವನ್ನು ಈ ಸೇತುವೆ ಸಂಪರ್ಕಿಸಲಿದೆ. ಕೇವಲ ಸಂಚಾರಕ್ಕಷ್ಟೇ ಅಲ್ಲದೆ, ಈ ಭಾಗದ ಜನರ ಸಾಂಸ್ಕೃತಿಕ ಮತ್ತು ಸಾಮಾಜಿಕ ಸಂಬಂಧಗಳಿಗೂ ಇದು ಜೀವ ತುಂಬಲಿದೆ. ಈ ಎರಡೂ ಗ್ರಾಮಗಳ ನಡುವೆ ಹಳೆಯ ವೈವಾಹಿಕ ಸಂಬಂಧಗಳಿದ್ದು, ನಿತ್ಯದ ಧಾರ್ಮಿಕ ಕಾರ್ಯಕ್ರಮಗಳಿಗಾಗಿ ಅರ್ಚಕರು ಮತ್ತು ಸಂಬಂಧಿಕರು ಪರಸ್ಪರ ಅವಲಂಬಿತರಾಗಿದ್ದಾರೆ. ಸೇತುವೆ ನಿರ್ಮಾಣದಿಂದ ಈ ಬಾಂಧವ್ಯ ಮತ್ತಷ್ಟು ಗಟ್ಟಿಯಾಗಲಿದೆ.

ಆರ್ಥಿಕ ಪ್ರಗತಿಗೆ ವೇಗ

ವಿಶೇಷವಾಗಿ ಮನಿಲ ಭಾಗದ ರಬ್ಬರ್ ಬೆಳೆಗಾರರಿಗೆ ಈ ಯೋಜನೆ ಆರ್ಥಿಕವಾಗಿ ಹೆಚ್ಚಿನ ಲಾಭ ತಂದುಕೊಡಲಿದೆ. ಕೇರಳದ ಮಾರುಕಟ್ಟೆಗಳು ರಬ್ಬರ್ ವ್ಯಾಪಾರಕ್ಕೆ ಪ್ರಸಿದ್ಧವಾಗಿದ್ದು, ನೇರ ಸಂಪರ್ಕ ಸಿಗುವುದರಿಂದ ಸಾರಿಗೆ ವೆಚ್ಚ ಕಡಿಮೆಯಾಗಿ ರೈತರಿಗೆ ಉತ್ತಮ ಮಾರುಕಟ್ಟೆ ಸೌಲಭ್ಯ ದೊರೆಯಲಿದೆ. ಕರ್ನಾಟಕದ ಕಡೆಯಿಂದ 1.5 ಕಿ.ಮೀ ಮತ್ತು ಕೇರಳದ ಕಡೆಯಿಂದ 1 ಕಿ.ಮೀ ಸಂಪರ್ಕ ರಸ್ತೆ ನಿರ್ಮಾಣಕ್ಕೆ ಹೆಚ್ಚುವರಿ ₹6 ಕೋಟಿ ಪ್ರಸ್ತಾವನೆ ಸಲ್ಲಿಕೆಯಾಗಿದೆ.

ಯೋಜನೆಯ ವಿವರಗಳು

ಸೇತುವೆಯ ಉದ್ದ: 80 ಮೀಟರ್

ಸೇತುವೆಯ ಅಗಲ: 10 ಮೀಟರ್

ಅನುದಾನ: ₹20 ಕೋಟಿ

ಹಲವು ವರ್ಷಗಳಿಂದ ಕರ್ನಾಟಕ ಮತ್ತು ಕೇರಳ ಸರ್ಕಾರಗಳ ನಡುವೆ ಈ ಯೋಜನೆಯ ಜವಾಬ್ದಾರಿಯ ಬಗ್ಗೆ ಗೊಂದಲವಿತ್ತು. ಆದರೆ ಪುತ್ತೂರು ಶಾಸಕ ಅಶೋಕ್ ಕುಮಾರ್ ರೈ ಅವರ ಸತತ ಪ್ರಯತ್ನ ಹಾಗೂ ಲೋಕೋಪಯೋಗಿ ಸಚಿವ ಸತೀಶ್ ಜಾರಕಿಹೊಳಿ ಅವರ ಸ್ಥಳ ಪರಿಶೀಲನೆಯ ನಂತರ, ನದಿಯು ಕರ್ನಾಟಕದ ವ್ಯಾಪ್ತಿಗೆ ಬರುವುದರಿಂದ ರಾಜ್ಯ ಸರ್ಕಾರವೇ ಜವಾಬ್ದಾರಿ ವಹಿಸಿಕೊಳ್ಳಲು ನಿರ್ಧರಿಸಿದೆ. ಏಪ್ರಿಲ್ 29ರಂದು ಈ ಯೋಜನೆಗೆ ಅಧಿಕೃತ ಅನುಮೋದನೆ ದೊರೆತಿದೆ. ಈ ಸೇತುವೆಗಾಗಿ ಕಳೆದ 3-4 ದಶಕಗಳಿಂದ ಈ ಭಾಗದ ಜನ ಹೋರಾಟ ನಡೆಸುತ್ತಿದ್ದರು. ಪ್ರತಿ ಚುನಾವಣೆಯಲ್ಲೂ ಇದೊಂದು ಪ್ರಮುಖ ಭರವಸೆಯಾಗಿತ್ತು. ಈಗ ಅಧಿಕೃತ ಅನುಮೋದನೆ ಸಿಕ್ಕಿರುವುದು ಗಡಿ ಭಾಗದ ಜನರ ಸಂಭ್ರಮಕ್ಕೆ ಕಾರಣವಾಗಿದೆ.