ಶಾಲೆಯಲ್ಲಿ ಕಾಲ್ತುಳಿತ: 14 ಮಕ್ಕಳ ದಾರುಣ ಸಾವು

ನೈರೋಬಿ, ಫೆಬ್ರವರಿ 4: ಪ್ರಾಥಮಿಕ ಶಾಲೆಯೊಂದರಲ್ಲಿ ಕಾಲ್ತುಳಿತ ಉಂಟಾಗಿ ಕನಿಷ್ಠ 14 ಮಕ್ಕಳು ಮೃತಪಟ್ಟ ಹೃದಯ ವಿದ್ರಾವಕ ಘಟನೆ ಪಶ್ಚಿಮ ಕೀನ್ಯಾದಲ್ಲಿ ನಡೆದಿದೆ.

ಕೀನಾ ರಾಜಧಾನಿ ನೈರೋಬಿಯ ಆಗ್ನೇಯ ವಾಯವ್ಯ ಭಾಗದಲ್ಲಿರುವ ಕಾಕಮೆಗಾ ಪ್ರಾಥಮಿಕ ಶಾಲೆಯಲ್ಲಿ ಸೋಮವಾರ ಮಧ್ಯಾಹ್ನ ಈ ದುರಂತ ಸಂಭವಿಸಿದೆ. 3 ಗಂಟೆ ಸುಮಾರಿಗೆ ಮಕ್ಕಳು ಶಾಲೆಯಿಂದ ಮನೆಗೆ ಹೊರಡುವ ವೇಳೆ ಕಾಲ್ತುಳಿತ ಉಂಟಾಗಿದೆ. ಆದರೆ ಈ ಘಟನೆಗೆ ಕಾರಣ ತಿಳಿದುಬಂದಿಲ್ಲ.

ಕಾಲ್ತುಳಿತದಿಂದ ಕನಿಷ್ಠ 39 ಮಕ್ಕಳಿಗೆ ತೀವ್ರ ಗಾಯಗಳಾಗಿವೆ. ಅವರಿಗೆ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ ಎಂದು ಪೊಲೀಸ್ ಮುಖ್ಯಸ್ಥ ಡೇವಿಡ್ ಕಬೆನಾ ತಿಳಿಸಿದ್ದಾರೆ.

ಶಾಲೆ ಮುಗಿಯುತ್ತಿದ್ದಂತೆಯೇ ವಿದ್ಯಾರ್ಥಿಗಳು ತರಗತಿಯಿಂದ ಕೆಳಕ್ಕಿಳಿಯಲು ಮೆಟ್ಟಿಲಿನಿತ್ತ ಒಟ್ಟಿಗೆ ಧಾವಿಸಿದ್ದರು. ಕಿರಿದಾಗಿದ್ದ ಮೆಟ್ಟಿಲು ಕುಸಿದು ಈ ದುರಂತ ಸಂಭವಿಸಿದೆ ಎಂದು ವರದಿಗಳು ಹೇಳಿವೆ. ಇನ್ನು ಕೆಲವು ಮಕ್ಕಳು ಗಾಬರಿಯಿಂದ ಓಡಿದ್ದರಿಂದ ಮೂರನೇ ಮಹಡಿಯಿಂದ ಕೂಡ ಕೆಳಕ್ಕೆ ಬಿದ್ದಿರುವುದು ವರದಿಯಾಗಿದೆ.

ನೈರೋಬಿಯ ಶಾಲೆಯೊಂದರಲ್ಲಿ ಕಳೆದ ವರ್ಷದ ಸೆಪ್ಟೆಂಬರ್‌ನಲ್ಲಿ ತರಗತಿ ಕಟ್ಟಡ ಕುಸಿದು ಎಂಟು ಮಕ್ಕಳು ಮೃತಪಟ್ಟು, 69 ಮಕ್ಕಳು ಗಾಯಗೊಂಡಿದ್ದರು.

ಈ ಘಟನೆ ಕೀನ್ಯಾದಲ್ಲಿನ ಶಾಲೆಗಳಲ್ಲಿ ಮಕ್ಕಳ ಸುರಕ್ಷತೆಯ ಕುರಿತು ಪ್ರಶ್ನೆಗಳನ್ನು ಹುಟ್ಟುಹಾಕಿದೆ. ಪೊಲೀಸರು ಘಟನೆ ಕುರಿತು ತನಿಖೆ ಆರಂಭಿಸಿರುವುದಾಗಿ ತಿಳಿಸಿದ್ದಾರೆ.

English summary

At least 14 students killed in a stampede at a primary school in Kakamega, Kenya.