ಕಾಲರ್ ಐಡಿ ಆ್ಯಪ್ಗಳ ನಿಯಂತ್ರಣಕ್ಕೆ TRAI ಮುಂದು: "ಇದು ತರ್ಕಹೀನ" ಎಂದು ಕಿಡಿಕಾರಿದ ಟ್ರೂಕಾಲರ್ ಸಿಇಒ
ಮೊಬೈಲ್ ಬಳಕೆದಾರರನ್ನು ಪ್ರತಿದಿನ ಕಾಡುವ ಅತಿ ದೊಡ್ಡ ಸಮಸ್ಯೆ ಎಂದರೆ ಅದು ಅನಗತ್ಯವಾದ ಸ್ಪ್ಯಾಮ್ ಕರೆಗಳು. ಅಪರಿಚಿತ ನಂಬರ್ಗಳಿಂದ ಬರುವ ಇಂತಹ ಕರೆಗಳನ್ನು ಗುರುತಿಸಲು ದೇಶದ ಕೋಟ್ಯಂತರ ಜನ ನಂಬಿರುವುದು ಟ್ರೂಕಾಲರ್ನಂತಹ ಕಾಲರ್ ಐಡಿ ಅಪ್ಲಿಕೇಶನ್ಗಳನ್ನು. ಆದರೆ, ಈಗ ಇದೇ ಕಾಲರ್ ಐಡಿ ಆ್ಯಪ್ಗಳನ್ನು ತನ್ನ ನಿಯಂತ್ರಣಕ್ಕೆ ತೆಗೆದುಕೊಳ್ಳಲು ಭಾರತೀಯ ಟೆಲಿಕಾಂ ನಿಯಂತ್ರಣ ಪ್ರಾಧಿಕಾರ (TRAI) ಮುಂದಾಗಿದೆ.
ಟ್ರಾಯ್ನ ಈ ಹೊಸ ನಿರ್ಧಾರಕ್ಕೆ ಟ್ರೂಕಾಲರ್ ಸಂಸ್ಥೆ ತೀವ್ರ ಆಕ್ರೋಶ ಹೊರಹಾಕಿದೆ. ಸರ್ಕಾರದ ಈ ನಡೆ ಸಂಪೂರ್ಣವಾಗಿ ತರ್ಕಹೀನ ಹಾಗೂ ಅರ್ಥವಿಲ್ಲದ್ದು ಎಂದು ಟ್ರೂಕಾಲರ್ ನೇರವಾಗಿಯೇ ಕಿಡಿಕಾರಿದೆ.
ಟ್ರೂಕಾಲರ್ ಮತ್ತು ಟ್ರಾಯ್ ವಿವಾದ: ಸ್ಪ್ಯಾಮ್ ಕರೆಗಳ ಹಾವಳಿ ಹೆಚ್ಚಾಗಲು ಕಾರಣವೇನು?
ಈ ಇಡೀ ವಿವಾದದ ಹಿನ್ನೆಲೆ ನೋಡುವುದಾದರೆ ಕಳೆದ ವರ್ಷ ಟ್ರಾಯ್ ಜಾರಿಗೆ ತಂದ ನಿಯಮದಲ್ಲಿ. ಬ್ಯಾಂಕಿಂಗ್ ಮತ್ತು ಪ್ರಚಾರದ ಕರೆಗಳಿಗಾಗಿ ಟ್ರಾಯ್ 140 ಮತ್ತು 160 ಸರಣಿಯ ನಂಬರ್ಗಳನ್ನು ಕಡ್ಡಾಯಗೊಳಿಸಿತ್ತು. ಅಷ್ಟೇ ಅಲ್ಲದೆ, ಈ ನಂಬರ್ಗಳನ್ನು ಟ್ರೂಕಾಲರ್ನಂತಹ ಆ್ಯಪ್ಗಳು 'ಸ್ಪ್ಯಾಮ್' ಎಂದು ಮಾರ್ಕ್ ಮಾಡಬಾರದು ಎಂದು ಆದೇಶಿಸಿತ್ತು. ಆರಂಭದಲ್ಲಿ ಟ್ರೂಕಾಲರ್ ಇದಕ್ಕೆ ಆಕ್ಷೇಪ ವ್ಯಕ್ತಪಡಿಸಿದರೂ, ನಿಯಮಕ್ಕೆ ತಲೆಬಾಗಿ ಒಪ್ಪಿಕೊಂಡಿತ್ತು.
ಆದರೆ, ಇದರ ಪರಿಣಾಮ ಈಗ ಉಲ್ಟಾ ಹೊಡೆದಿದೆ. ಟ್ರೂಕಾಲರ್ ಸಿಇಒ ರಿಷಿತ್ ಜುಂಜುನ್ವಾಲಾ ಪ್ರಕಾರ, ಈ ನಿಯಮದಿಂದಾಗಿ ದೇಶದಲ್ಲಿ ಸ್ಪ್ಯಾಮ್ ಕರೆಗಳ ಸಂಖ್ಯೆ ವಿಪರೀತವಾಗಿ ಹೆಚ್ಚಾಗಿದೆ. ಪ್ರತಿದಿನ ಈ ಸರಣಿಯ 5.1 ಕೋಟಿಗೂ ಹೆಚ್ಚು ಕರೆಗಳಿಗೆ ಜನರು ಉತ್ತರಿಸುತ್ತಿಲ್ಲ. ನಮ್ಮ ಸಿಸ್ಟಂ ಇವುಗಳನ್ನು ಸ್ಪ್ಯಾಮ್ ಎಂದು ಗುರುತಿಸಿದರೂ, ಬಳಕೆದಾರರಿಗೆ ಎಚ್ಚರಿಕೆ ನೀಡಲು ಟ್ರಾಯ್ ನಿಯಮಗಳು ನಮಗೆ ಬಿಡುತ್ತಿಲ್ಲ ಎಂದು ಅವರು ಬೇಸರ ವ್ಯಕ್ತಪಡಿಸಿದ್ದಾರೆ.
ಬ್ಯಾಂಕಿಂಗ್ ಪ್ರಚಾರ ಕರೆಗಳು ಮತ್ತು ಟ್ರೂಕಾಲರ್ನ ಹೊಸ 'ಫ್ರೀಕ್ವೆಂಟ್ಲಿ ಬ್ಲಾಕ್ಡ್' ಬ್ಯಾಡ್ಜ್
ಪ್ರತಿದಿನ ಲಕ್ಷಾಂತರ ಗ್ರಾಹಕರು ಈ ಅಧಿಕೃತ ನಂಬರ್ಗಳಿಂದಲೇ ಲೋನ್, ಕ್ರೆಡಿಟ್ ಕಾರ್ಡ್ ಆಫರ್ಗಳ ಕಿರಿಕಿರಿ ಕರೆಗಳನ್ನು ಪಡೆಯುತ್ತಿದ್ದಾರೆ. ಬಳಕೆದಾರರು ಪ್ರತಿದಿನ 1 ಲಕ್ಷಕ್ಕೂ ಹೆಚ್ಚು ಇಂತಹ ಕರೆಗಳನ್ನು ಬ್ಲಾಕ್ ಮಾಡುತ್ತಿರುವುದನ್ನು ಗಮನಿಸಿದ ಟ್ರೂಕಾಲರ್, ಈಗ ಕಠಿಣ ನಿರ್ಧಾರ ಕೈಗೊಂಡಿದೆ.
"ಇನ್ನು ಸಾಕು" ಎಂದು ಹೇಳಿರುವ ಸಿಇಒ ರಿಷಿತ್, ಟ್ರಾಯ್ ಅನುಮೋದಿಸಿದ ನಂಬರ್ಗಳಾಗಿದ್ದರೂ ಸಹ, ಅವುಗಳಿಗೆ 'ಫ್ರೀಕ್ವೆಂಟ್ಲಿ ಬ್ಲಾಕ್ಡ್' ಎಂಬ ವಿಶೇಷ ಬ್ಯಾಡ್ಜ್ ನೀಡಲು ಪ್ರಾರಂಭಿಸಿದೆ. ಅಂದರೆ, ಬ್ಯಾಂಕ್ಗಳು ಗ್ರಾಹಕರನ್ನು ಅತಿಯಾಗಿ ಕಾಡುತ್ತಿದ್ದರೆ ಆ ನಂಬರ್ ಸ್ಪ್ಯಾಮ್ ಪಟ್ಟಿಗೆ ಸೇರದಿದ್ದರೂ, ಜನರಿಗೆ ಅದರ ಬಗ್ಗೆ ಮುನ್ಸೂಚನೆ ಸಿಗಲಿದೆ.
ಸಾರ್ವಜನಿಕರ ಸುರಕ್ಷತೆಯ ಆತಂಕ
ಕಾಲರ್ ಐಡಿ ಆ್ಯಪ್ಗಳನ್ನು ನಿಯಂತ್ರಿಸುವ ಟ್ರಾಯ್ ನಿರ್ಧಾರವನ್ನು "ಸಂಪೂರ್ಣವಾಗಿ ತರ್ಕಹೀನ" ಎಂದು ಕರೆದಿರುವ ಟ್ರೂಕಾಲರ್ ಸಿಇಒ, ಇದರಿಂದ ಜನಸಾಮಾನ್ಯರಿಗೆ ಅದರಲ್ಲೂ ವಿಶೇಷವಾಗಿ ಹಿರಿಯ ನಾಗರಿಕರಿಗೆ ದೊಡ್ಡ ತೊಂದರೆಯಾಗಲಿದೆ ಎಂದು ಎಚ್ಚರಿಸಿದ್ದಾರೆ. ಟ್ರೂಕಾಲರ್ ಕೋಟ್ಯಂತರ ಜನರಿಗೆ ವಂಚನೆ ಮತ್ತು ಅನಗತ್ಯ ಕರೆಗಳಿಂದ ರಕ್ಷಣೆ ನೀಡುತ್ತಿದೆ.
ಜನರೇ ನೀಡುವ ಕಮ್ಯುನಿಟಿ ಆಧಾರಿತ ಅಲರ್ಟ್ಗಳನ್ನು ತಡೆಯುವುದರಿಂದ, ಸೈಬರ್ ವಂಚಕರಿಗೆ ಮತ್ತು ಸ್ಪ್ಯಾಮರ್ಗಳಿಗೆ ಜನರನ್ನು ಸುಲಭವಾಗಿ ಗುರಿ ಮಾಡಲು ಹಾದಿ ಮಾಡಿಕೊಟ್ಟಂತಾಗುತ್ತದೆ ಎಂದು ಅವರು ವಾದಿಸಿದ್ದಾರೆ. ಒಟ್ಟಾರೆಯಾಗಿ, ಗ್ರಾಹಕರ ಹಿತರಕ್ಷಣೆಗಾಗಿ ತಂದ ನಿಯಮವೇ ಈಗ ಗ್ರಾಹಕರಿಗೆ ಕಿರಿಕಿರಿಯಾಗುತ್ತಿದ್ದು, ಟ್ರೂಕಾಲರ್ ಮತ್ತು ಟ್ರಾಯ್ ನಡುವಿನ ಈ ಜಟಾಪಟಿ ಮುಂದಿನ ದಿನಗಳಲ್ಲಿ ಯಾವ ತಿರುವು ಪಡೆದುಕೊಳ್ಳಲಿದೆ ಎಂಬುದನ್ನು ಕಾದುನೋಡಬೇಕಿದೆ.
Click it and Unblock the Notifications
Sign in with Google