ಶೇ. 63.1 ಮತಗಳೊಂದಿಗೆ ಮುಂದಿನ ರಾಷ್ಟ್ರಪತಿ ರಾಮ್ ನಾಥ್ ಕೋವಿಂದ್

ನವದೆಹಲಿ, ಜೂನ್ 23: ಎನ್ಡಿಎ ಬತ್ತಳಿಕೆಯಲ್ಲಿ ಎಲೆಕ್ಟೋರಲ್ ಕಾಲೇಜಿನ ಶೇಕಡಾ 63.1 ಮತಗಳಿದ್ದು ಮುಂದಿನ ರಾಷ್ಟ್ರಪತಿ ಯಾರು ಎಂಬುದು ಈಗಲೇ ನಿಕ್ಕಿಯಾಗಿದೆ. ಬುಧವಾರ ವಿಪಕ್ಷಗಳು ಮೀರಾ ಕುಮಾರ್ ರನ್ನು ತಮ್ಮ ಅಭ್ಯರ್ಥಿ ಎಂದು ಘೋಷಣೆ ಮಾಡಿವೆ. ಆದರೆ ಅವರು ಗೆಲ್ಲುವ ಸಾಧ್ಯತೆಗಳು ಮಾತ್ರ ಇಲ್ಲವೇ ಇಲ್ಲ.

ಹಾಗಾಗಿ ಎನ್ಡಿಎ ಅಭ್ಯರ್ಥಿ ರಾಮ್ ನಾಥ್ ಕೋವಿಂದ್ ಮುಂದಿನ ರಾಷ್ಟ್ರಪತಿಯಾಗಿ ಆಯ್ಕೆಯಾಗುವುದು ಬಹುತೇಕ ಖಚಿತವಾಗಿದೆ.

ಎನ್ಡಿಎಗೆ ತನ್ನದೇ ಆದ ಶೇಕಡಾ 48.9 ಮತಗಳಿವೆ. ಆದರೆ ಎನ್ಡಿಎ ಹೊರತಾದ ಪ್ರಾದೇಶಿಕ ಪಕ್ಷಗಳ ಬೆಂಬಲದಿಂದ ರಾಮ್ ನಾಥ್ ಕೋವಿಂದ್ ಬೆಂಬಲಿಗರ ಸಂಖ್ಯೆ ಶೇಕಡಾ 63ರ ಗಡಿ ದಾಟಿದೆ. ಎಲೆಕ್ಟೋರಲ್ ಕಾಲೇಜಿನಲ್ಲಿ ಶೇಕಡಾ 1.91 ಮತಗಳಿರುವ ಜೆಡಿಯು, ಶೇ. 5.39 ಮತಗಳಿರುವ ಎಐಎಡಿಎಂಕೆ, ಶೇ. 2.99 ಮತಗಳಿರುವ ಬಿಜೆಡಿ, ಶೇ. 2 ಮತಗಳಿರುವ ಟಿಆರ್ ಎಸ್, ಶೇ. 1.53 ಮತಗಳಿರುವ ವೈಎಸ್ಆರ್ ಕಾಂಗ್ರೆಸ್, ಶೇ. 0.38 ಮತಗಳಿರುವ ಐಎನ್ಎಲ್ ಡಿ ಬಿಜೆಪಿ ಅಭ್ಯರ್ಥಿಯ ಬೆಂಬಲಕ್ಕೆ ನಿಂತಿವೆ.

ಇದರ ಜತೆಗೆ ಶೇ. 2.34 ಮತಗಳಿರುವ ಶಿವಸೇನೆ ಕೂಡಾ ಕೋವಿಂದ್ ರನ್ನು ಬೆಂಬಲಿಸಲಿದೆ ಎಂದು ಎನ್ಡಿಎ ಅಂದುಕೊಂಡಿದೆ. ಹೀಗೆ ಒಟ್ಟು ಶೇ. 63.1 ಮತಗಳನ್ನು ಬುಟ್ಟಿಯಲ್ಲಿಟ್ಟುಕೊಂಡಿದ್ದು ಕೋವಿಂದ್ ಆಯ್ಕೆಯ ಹಾದಿ ಸುಗಮವಾಗಿದೆ.

English summary

With 63.1 per cent of the electoral college votes with the NDA in the elections for the next President of India is already a foregone conclusion. The opposition on Thursday selected Meira Kumar as its candidate, but that is unlikely to dent the chances of the NDA candidate, Ram Nath Kovind.