Guinness World Record: 73 ಗಂಟೆಗಳಲ್ಲಿ 7 ಖಂಡಗಳನ್ನು ಸುತ್ತಿ ಗಿನ್ನಿಸ್ ದಾಖಲೆ ನಿರ್ಮಿಸಿದ ಭಾರತೀಯರು !

Updated: Wednesday, January 11, 2023, 17:16 [IST]

ನವದೆಹಲಿ,ಜನವರಿ.11: ಜಗತ್ತಿನಲ್ಲಿರುವ 7 ಖಂಡಗಳನ್ನು ಅತಿ ಕಡಿಮೆ ಅವಧಿಯಲ್ಲಿ ಪ್ರಯಾಣಿಸುವ ಮೂಲಕ ವಿಶ್ವವೇ ಹುಬ್ಬೆರಿಸುವಂತಹ ದಾಖಲೆಯೊಂದನ್ನು ಭಾರತೀಯ ಮೂಲದ ಪ್ರವಾಸಿಗರಿಬ್ಬರು ತಮ್ಮ ಹೆಸರಿಗೆ ಬರೆದುಕೊಂಡಿದ್ದಾರೆ.

ಮಕರ ಸಂಕ್ರಾಂತಿ ವಿಶೇಷ ಪುಟ

ಭಾರತ ಮೂಲದ ಈ ಪ್ರಯಾಣಿಕರತ್ತ ಇಡೀ ವಿಶ್ವವೇ ತಿರುಗಿ ನೋಡುವಂತೆ ಮಾಡಿದ್ದಾರೆ. ಡಾ.ಅಲಿ ಇರಾನಿ ಮತ್ತು ಸುಜೋಯ್ ಕುಮಾರ್‌ ಮಿತ್ರಾ ಎಂಬ ಪ್ರವಾಸಿಗರು ಕೇವಲ 73 ಗಂಟೆಗಳಲ್ಲಿ ಜಗತ್ತಿನಲ್ಲಿರುವ ಏಳು ಖಂಡಗಳ ಪರ್ಯಟನೆ ಕೈಗೊಳ್ಳುವ ಮೂಲಕ ಹೊಸ ಗಿನ್ನೆಸ್ ವಿಶ್ವ ದಾಖಲೆ ನಿರ್ಮಿಸಿದ್ದಾರೆ.

ಮೂರು ದಿನಗಳಲ್ಲಿ ಏಷ್ಯಾ, ಯುರೋಪ್, ಆಫ್ರಿಕಾ, ಉತ್ತರ ಅಮೆರಿಕಾ, ದಕ್ಷಿಣ ಅಮೇರಿಕಾ,ಅಂಟಾರ್ಟಿಕಾ ಸೇರಿದಂತೆ ಓಷಿಯಾನಿಯಾಗಳ ಪ್ರವಾಸ ಕೈಗೊಂಡಿದ್ದರು.

ದಾಖಲೆಗಳಿರುವುದೇ ಮುರಿಯಲು !

ಅತಿ ಕಡಿಮೆ ಅವಧಿಯಲ್ಲಿ ಏಳು ಖಂಡಗಳ ಪರ್ಯಟನೆ ಕೈಗೊಳ್ಳುವ ಮೂಲಕ ಗಿನ್ನೆಸ್ ವಿಶ್ವ ದಾಖಲೆ ನಿರ್ಮಿಸಿರುವ ಸುಜೋಯ್ ಮತ್ತು ಡಾ. ಅಲಿ ಅವರು ಗಿನ್ನಿಸ್ ವಿಶ್ವ ದಾಖಲೆ ಈ ಕುರಿತು ಸಾಮಾಜಿಕ ಜಾಲತಾಣಗಳಲ್ಲಿ ಮಾಹಿತಿ ಹಂಚಿಕೊಂಡಿದ್ದಾರೆ. ಡಾ. ಅಲಿ ಅವರು ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಗಿನ್ನೆಸ್ ವರ್ಲ್ಡ್ ರೆಕಾರ್ಡ್ ಪ್ರಮಾಣಪತ್ರವನ್ನು ಹಂಚಿಕೊಂಡಿದ್ದಾರೆ. ಎಲ್ಲ ದಾಖಲೆಗಳನ್ನು ಮುರಿಯಲು ನಿರ್ಮಿಸಲಾಗಿದೆ. ಇಂದು ನಾವು ಅನ್ಯರು ನಿರ್ಮಿಸಿದ ದಾಖಲೆಯನ್ನು ಸರಿಗಟ್ಟಿದ್ದೇವೆ, ಮುಂದಿನ ದಿನಗಳಲ್ಲಿ ಬೇರೆಯವರು ನಮ್ಮ ದಾಖಲೆಗಳನ್ನು ಮುರಿಯುತ್ತಾರೆ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಬರೆದುಕೊಂಡಿದ್ದಾರೆ.

ಗಿನ್ನೆಸ್ ವರ್ಲ್ಡ್ ರೆಕಾರ್ಡ್ಸ್ ಮಾಹಿತಿ ಪ್ರಕಾರ, ಫೆಬ್ರವರಿ 13, 2020ರಲ್ಲಿ ಯುನೈಟೆಡ್‌ ಅರಬ್ ಎಮಿರೇಟ್ಸ್‌ ಮೂಲದ ಡಾ.ಖವ್ಲಾ ಆಲ್‌ ರೂಮೈತು ಅವರು ಈ ಏಳು ಖಂಡಗಳ ಪರ್ಯಟನೆ ದಾಖಲೆಯನ್ನು ನಿರ್ಮಿಸಲು ಮೂರುದಿನ, 14 ಗಂಟೆ, 46 ನಿಮಿಷ 48 ಸೆಕೆಂಡುಗಳನ್ನು ತೆಗೆದುಕೊಂಡಿದ್ದರು. ಈಗ ಭಾರತದ ಡಾ.ಅಲಿ ಇರಾನಿ ಮತ್ತು ಸುಜೋಯ್ ಕುಮಾರ್‌ ಮಿತ್ರಾ ಅವರು 3 ದಿನಗಳು, 1 ಗಂಟೆ, 5 ನಿಮಿಷಗಳು ಮತ್ತು 4 ಸೆಕೆಂಡುಗಳಲ್ಲಿ ಸಂಚರಿಸುವ ಮೂಲಕ ನೂತನ ದಾಖಲೆ ನಿರ್ಮಿಸಿದ್ದಾರೆ.

ಫೋಟೋ ಕೃಪೆ:Dralirani