Sania Mirza: ಶೋಯೆಬ್ ಮಲಿಕ್ ಮೂರನೇ ಮದುವೆ ಬಗ್ಗೆ ಸಾನಿಯಾ ಮಿರ್ಜಾ ತಂದೆ ಹೇಳಿದ್ದೇನು?

ಪಾಕಿಸ್ತಾನ ಕ್ರಿಕೆಟ್ ತಂಡದ ಮಾಜಿ ನಾಯಕ ಶೋಯೆಬ್ ಮಲಿಕ್ ಅವರು ಭಾರತದ ಮಾಜಿ ಟೆನಿಸ್ ಆಟಗಾರ್ತಿ ಮತ್ತು ಎರಡನೇ ಪತ್ನಿ ಸಾನಿಯಾ ಮಿರ್ಜಾ ಅವರಿಂದ ದೂರವಾಗಿರುವ ವದಂತಿಯ ನಡುವೆಯೇ ಮೂರನೇ ಮದುವೆಯಾಗಿದ್ದಾರೆ.

ನಟಿ ಸನಾ ಜಾವೇದ್‌ ಅವರನ್ನು ಶೋಯೆಬ್ ಮಲಿಕ್ ವಿವಾಹವಾಗಿದ್ದಾರೆ. ಶೋಯೆಬ್ ಮದುವೆಯ ಸುದ್ದಿ ಬೆನ್ನಲ್ಲೇ ಸಾನಿಯಾ ಮಿರ್ಜಾ ತನ್ನ ಪತಿಗೆ ಏಕಪಕ್ಷೀಯವಾಗಿ ವಿಚ್ಛೇದನ ನೀಡಿದ್ದಾರೆ ಎಂದು ಸಾನಿಯಾ ಕುಟುಂಬಸ್ಥರು ತಿಳಿಸಿರುವುದಾಗಿ ವರದಿಯಾಗಿದೆ.

ವಿಚ್ಚೇದನ ನೀಡುವ ಪದ್ದತಿಯನ್ನು 'ಖುಲಾ' ಎಂದು ಹೇಳಲಾಗಿದೆ. ಇದು ಮುಸ್ಲಿಂ ಮಹಿಳೆ ತನ್ನ ಪತಿಗೆ ಏಕಪಕ್ಷೀಯವಾಗಿ ವಿಚ್ಛೇದನ ನೀಡುವ ಹಕ್ಕನ್ನು ಉಲ್ಲೇಖಿಸುತ್ತದೆ. ಪಿಟಿಐ ಮಾಡಿರುವ ವರದಿಯಲ್ಲಿ ಕೂಡ ಸಾನಿಯಾ ತಂದೆ ಇದನ್ನೇ ಸ್ಪಷ್ಟಪಡಿಸಿರುವುದಾಗಿ ಹೇಳಿದೆ.

ಯಾರು ಈ ಸನಾ ಜಾವೇದ್?

ಸಾಮಾಜಿಕ ಮಾಧ್ಯಮಗಳಲ್ಲಿ ಸನಾ ಜಾವೇದ್ ಅವರೊಂದಿಗಿನ ಮದುವೆ ಫೋಟೋವನ್ನು ಹಂಚಿಕೊಂಡಿರುವ ಶೋಯೆಬ್ ಮಲಿಕ್ "ನಾವು ನಿಮ್ಮನ್ನು ಜೋಡಿಯಾಗಿ ರಚಿಸಿದ್ದೇವೆ" ಎಂದು ಶೀರ್ಷಿಕೆ ನೀಡಿದ್ದಾರೆ. ಇಬ್ಬರೂ ಪಾಕಿಸ್ತಾನದಲ್ಲಿ ಅನೇಕ ಕಾರ್ಯಕ್ರಮಗಳು ಮತ್ತು ಟಿವಿ ಜಾಹೀರಾತುಗಳಲ್ಲಿ ಒಟ್ಟಿಗೆ ಕೆಲಸ ಮಾಡಿದ್ದಾರೆ. ಈ ಸಂದರ್ಭದಲ್ಲಿ ಪರಿಚಯ ಪ್ರೇಮಕ್ಕೆ ತಿರುಗಿ ಮದುವೆವರೆಗೂ ಬಂದಿದೆ ಎನ್ನಲಾಗಿದೆ.

ಸಾನಿಯಾ - ಶೋಯೆಬ್ ದೂರ ದೂರ

ಶೋಯೆಬ್ ಮತ್ತು ಸಾನಿಯಾ ನಡುವಿನ ಭಿನ್ನಾಭಿಪ್ರಾಯಗಳ ಬಗ್ಗೆ ವದಂತಿಗಳು ಇದ್ದಾಗ ಶೋಯೆಬ್ ಮದುವೆ ಸುದ್ದಿ ಬಂದಿದೆ. ಕಳೆದೆರಡು ವರ್ಷಗಳಿಂದ ಸೆಲೆಬ್ರಿಟಿ ಜೋಡಿ ಒಟ್ಟಿಗೆ ಕಾಣಿಸಿಕೊಂಡಿರುವುದು ಅಪರೂಪ. ಅವರು ಬೇರ್ಪಟ್ಟಿದ್ದಾರೆ ಎಂದು ಹಲವಾರು ವರದಿಗಳು ಹೇಳಿದೆ. ಆದರೆ ಯಾವುದೇ ಅಧಿಕೃತ ದೃಢೀಕರಣವಿಲ್ಲ. ಮಲಿಕ್, ಕಳೆದ ವರ್ಷ ಪಾಕಿಸ್ತಾನ ಟಿವಿ ಶೋಗಳಲ್ಲಿ ಸಾನಿಯಾ ಸಂಬಂಧಿತ ಪ್ರಶ್ನೆಗಳಿಗೆ ಉತ್ತರ ನೀಡದೆ ಜಾರಿಕೊಂಡಿದ್ದರು. ಕೆಲ ದಿನಗಳ ಹಿಂದಷ್ಟೇ ಶೋಯೆಬ್ ಮಲಿಕ್ ಸಾನಿಯಾ ಮಿರ್ಜಾರನ್ನು ಇನ್‌ಸ್ಟಾಗ್ರಾಮ್‌ನಲ್ಲಿ ಅನ್‌ಫಾಲೋ ಮಾಡಿದ್ದರು.

ಮಗನ ಜೊತೆ ಸಾನಿಯಾ ವಾಸ

ಶೋಯೆಬ್ ಮತ್ತು ಸಾನಿಯಾ ಏಪ್ರಿಲ್ 2010 ರಲ್ಲಿ ಹೈದರಾಬಾದ್‌ನಲ್ಲಿ ವಿವಾಹವಾದರು. ಇಬ್ಬರು ದುಬೈನಲ್ಲಿ ವಾಸಿಸುತ್ತಿದ್ದರು. 2018 ರಲ್ಲಿ ಇಹ್ಜಾನ್ ಮಿರ್ಜಾ ಮಲಿಕ್ ಎಂಬ ಮಗ ಕೂಡ ಜನಿಸಿದ್ದನು. ಸದ್ಯಕ್ಕೆ ಮಗ ಸಾನಿಯಾ ಅವರೊಂದಿಗೆ ವಾಸಿಸುತ್ತಿದ್ದಾರೆ.

ಶೋಯೆಬ್‌ ಮಲಿಕ್‌ಗೆ ಮಾತ್ರವಲ್ಲ ಸನಾ ಜಾವೇದ್ ಅವರಿಗೂ ಕೂಡ ಇದು ಎರಡನೇ ಮದುವೆಯಾಗಿದೆ ಎಂಬುದು ಗಮನಾರ್ಹ. ಕರೋನವೈರಸ್ ಸಾಂಕ್ರಾಮಿಕದ ಮಧ್ಯೆ ಅವರು 2020 ರಲ್ಲಿ ಸರಳ ಸಮಾರಂಭದಲ್ಲಿ ಗಾಯಕ ಉಮೈರ್ ಜೈಸ್ವಾಲ್ ಅವರನ್ನು ಮದುವೆಯಾಗಿದ್ದರು. ಸನಾ ಹಲವಾರು ಹಿಟ್ ನಾಟಕ ಧಾರಾವಾಹಿಗಳಲ್ಲಿ ನಟಿಸಿದ್ದಾರೆ ಮತ್ತು ಪಾಕಿಸ್ತಾನಿ ಚಲನಚಿತ್ರಗಳಲ್ಲಿಯೂ ನಟಿಸಿದ್ದಾರೆ. ಎರಡು ತಿಂಗಳ ಹಿಂದೆ, ಅವರು ಗಂಡನಿಂದ ವಿಚ್ಛೇದನ ಪಡೆದಿರುವ ಬಗ್ಗೆ ವರದಿಗಳು ಬಂದಿದ್ದವು.

English summary

Sania Mirza's father, Imran, stated on Saturday that the tennis star opted for Khula, exercising her right to unilaterally divorce. Shoaib Malik announced his marriage to Pakistani actor Sana Javed.