iPhone hack alert row: ಕೇಂದ್ರ ಸರ್ಕಾರದಿಂದ ವಿಪಕ್ಷ ನಾಯಕರ ಐಫೋನ್ ಹ್ಯಾಕ್- ರಾಹುಲ್ ಗಾಂಧಿ ಗಂಭೀರ ಆರೋಪ
ನವದೆಹಲಿ, ಅಕ್ಟೋಬರ್ 31: ಮೋದಿ ನೇತೃತ್ವದ ಕೇಂದ್ರ ಸರ್ಕಾರವು ವಿರೋಧ ಪಕ್ಷಗಳ ನಾಯಕರ ಐಫೋನ್ಗಳನ್ನು ಹ್ಯಾಕ್ ಮಾಡುತ್ತಿದೆ ಎಂದು ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಆರೋಪಿಸಿದ್ದಾರೆ.
ಈ ವಿಚಾರವಾಗಿ ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ಮಾತನಾಡಿರುವ ಅವರು, 'ದೇಶದಲ್ಲಿ ನಂಬರ್ ಒನ್ ಸ್ಥಾನದಲ್ಲಿರುವವರು ಪ್ರಧಾನಿ ಮೋದಿ, ನಂಬರ್ ಟು ಸ್ಥಾನದಲ್ಲಿರುವವರು ಅದಾನಿ ಹಾಗೂ ನಂಬರ್ ಥ್ರೀ ಸ್ಥಾನದಲ್ಲಿರುವವರು ಅಮಿತ್ ಶಾ ಎಂದು ನಾನು ಈ ಮೊದಲು ಭಾವಿಸಿದ್ದೆ.
ಆದರೆ, ಇದು ತಪ್ಪೆಂದು ಈಗ ತಿಳಿದಿದೆ. ನಂಬರ್ ಒನ್ ಸ್ಥಾನದಲ್ಲಿ ಅದಾನಿ ಇದ್ದಾರೆ. ನಂಬರ್ ಟು ಸ್ಥಾನದಲ್ಲಿ ಪಿಎಂ ಮೋದಿ ಇದ್ದಾರೆ. ನಂಬರ್ ಥ್ರೀ ಸ್ಥಾನದಲ್ಲಿ ಅಮಿತ್ ಶಾ ಇದ್ದಾರೆ. ನಾವು ಭಾರತದ ರಾಜಕೀಯವನ್ನು ಅರ್ಥಮಾಡಿಕೊಂಡಿದ್ದೇವೆ. ಈಗ ಅದಾನಿ ಜಿ ತಪ್ಪಿಸಿಕೊಳ್ಳಲು ಸಾಧ್ಯವಿಲ್ಲ. ಈ ಕಾರಣಕ್ಕಾಗಿಯೇ ಗೊಂದಲದ ರಾಜಕೀಯ ನಡೆಯುತ್ತಿದೆ' ಎಂದು ಹೇಳಿದ್ದಾರೆ.
'ನನ್ನ ಕಚೇರಿಯಲ್ಲಿ ಹಲವಾರು ಜನರಿಗೆ ಈ ಸಂದೇಶ ಬಂದಿದೆ. ಕಾಂಗ್ರೆಸ್ನಲ್ಲಿ ಕೆಸಿ ವೇಣುಗೋಪಾಲ್, ಸುಪ್ರಿಯಾ ಸುಲೆ, ಪವನ್ ಖೇರಾ ಕೂಡ ಹ್ಯಾಕ್ ಸಂದೇಶಗಳನ್ನು ಸ್ವೀಕರಿಸಿದ್ದಾರೆ. ಅವರು (ಬಿಜೆಪಿ) ಯುವಕರ ಗಮನವನ್ನು ಬೇರೆಡೆ ಸೆಳೆಯಲು ಪ್ರಯತ್ನಿಸುತ್ತಿದ್ದಾರೆ' ಎಂದು ರಾಹುಲ್ ಆರೋಪಿಸಿದ್ದಾರೆ.
'ಇದರ ವಿರುದ್ಧ ಕೆಲವೇ ಕೆಲವು ಜನರು ಹೋರಾಡುತ್ತಿದ್ದಾರೆ. ಆದರೆ, ನಾವು ಹೆದರುವುದಿಲ್ಲ. ನೀವು ಎಷ್ಟು ಬೇಕಾದರೂ (ಫೋನ್) ಟ್ಯಾಪಿಂಗ್ ಮಾಡಬಹುದು. ನಾನು ಹೆದರುವುದಿಲ್ಲ. ನೀವು ನನ್ನ ಫೋನ್ ತೆಗೆದುಕೊಳ್ಳಲು ಬಯಸಿದರೆ, ನಾನು ಅದನ್ನು ನಿಮಗೆ ಕೊಡುತ್ತೇನೆ' ಎಂದು ವಾಗ್ದಾಳಿ ನಡೆಸಿದ್ದಾರೆ.
'ಇದು ಕ್ರಿಮಿನಲ್ಗಳು ಮತ್ತು ಕಳ್ಳರ ಕೆಲಸ' ಎಂದು ಕಾಂಗ್ರೆಸ್ ಸಂಸದ ರಾಹುಲ್ ಗಾಂಧಿ ಆರೋಪಿಸಿದ್ದಾರೆ.
ಕೆಲವು ಪ್ರತಿಪಕ್ಷಗಳ ನಾಯಕರು ತಮ್ಮ ಫೋನ್ಗಳ ಮೇಲೆ 'ಕೇಂದ್ರ ಸರ್ಕಾರದ ಪ್ರಾಯೋಜಿತ' ದಾಳಿಯ ಬಗ್ಗೆ ಹಲವು ನಾಯಕರು ಮಾಹಿತಿ ನೀಡಿದ್ದಾರೆ ಎಂದು ಇದೇ ವೇಳೆ ಹೇಳಿದ್ದಾರೆ.
ದೇಶದಿಂದ 'ಅದಾನಿ ಸರ್ಕಾರ'ವನ್ನು ತೆಗೆದುಹಾಕುವ ಕುರಿತು ಕಾಂಗ್ರೆಸ್ ಸಂಸದ ರಾಹುಲ್ ಗಾಂಧಿ ಹೇಳಿಕೆ ನೀಡಿದ್ದಾರೆ.
'ಇದು ಬಹುದೊಡ್ಡ ಸಮಸ್ಯೆಯಾಗಿದೆ. ನನ್ನಲ್ಲಿ ಕೆಲವು ಆಲೋಚನೆಗಳಿವೆ. ಸಮಯ ಬಂದಾಗ ಅದಾನಿ ಸರ್ಕಾರವನ್ನು ಹೇಗೆ ತೆಗೆದುಹಾಕಬಹುದು ಎಂಬುದನ್ನು ನಾವು ತೋರಿಸುತ್ತೇವೆ. ಸರ್ಕಾರವನ್ನು ತೆಗೆದುಹಾಕಿದ ತಕ್ಷಣ ಅದಾನಿ ತೆಗೆದುಹಾಕಬಹುದು ಎಂದು ನೀವು ಭಾವಿಸಬೇಡಿ. ಅದಾನಿ ಎಂಬುದು ಪ್ರಸ್ತುತ ದೇಶದಲ್ಲಿ ನಡೆಯುತ್ತಿರುವ ಏಕಸ್ವಾಮ್ಯದ ಸಂಕೇತವಾಗಿದೆ. ಬಿಜೆಪಿಯ ಹಣಕಾಸು ವ್ಯವಸ್ಥೆಯು ಅವನೊಂದಿಗೆ (ಅದಾನಿ) ನೇರವಾಗಿ ಸಂಬಂಧ ಹೊಂದಿದೆ' ಎಂದು ವಾಗ್ದಾಳಿ ನಡೆಸಿದ್ದಾರೆ.
Click it and Unblock the Notifications
Sign in with Google