ಪಠಾಣ್‌ ಕೋಟ್‌ ವಾಯುನೆಲೆಗೆ ನುಗ್ಗಿದ್ದ ಉಗ್ರರೆಷ್ಟು?

ಬೆಂಗಳೂರು, ಫೆಬ್ರವರಿ 10 : ಪಂಜಾಬಿನ ಪಠಾಣ್ ಕೋಟ್ ವಾಯುನೆಲೆಗೆ ನುಗ್ಗಿದ್ದ ಉಗ್ರರೆಷ್ಟು? ಎಂಬ ಬಗ್ಗೆ ರಾಷ್ಟ್ರೀಯ ತನಿಖಾ ಸಂಸ್ಥೆ (ಎನ್‌ಐಎ) ತನಿಖೆ ನಡೆಸಲಿದೆ. ವಾಯುನೆಲೆಯಿಂದ ಇಬ್ಬರು ಉಗ್ರರು ನಾಪತ್ತೆಯಾಗಿದ್ದಾರೆ ಎಂದು ಹೇಳಲಾಗುತ್ತಿದ್ದು, ಈ ಬಗ್ಗೆ ತನಿಖೆ ನಡೆಯಲಿದೆ.

ಎನ್‌ಐಎ ಮುಖ್ಯಸ್ಥ ಶರದ್‌ ಕುಮಾರ್‌ ಅವರ ನೇತೃತ್ವದಲ್ಲಿ ಈ ತನಿಖೆ ನಡೆಯಲಿದೆ. ವಾಯುನೆಲೆಗೆ ಒಟ್ಟು 6 ಉಗ್ರರು ನುಗ್ಗಿದ್ದರು ಎಂದು ಅಂದಾಜಿಸಲಾಗಿದೆ. ನಾಲ್ವರು ಉಗ್ರರನ್ನು ಯೋಧರು ಕೊಂದು ಹಾಕಿದ್ದಾರೆ. ಅವರ ಶವಗಳು ಸಿಕ್ಕಿವೆ. ಆದರೆ, ಉಳಿದ ಇಬ್ಬರು ಉಗ್ರರ ಶವಗಳು ಸಿಕ್ಕಿಲ್ಲ. [ಪಠಾಣ್ ಕೋಟ್ ವಾಯುನೆಲೆಯ ವಿಶೇಷತೆಗಳೇನು?]

ವಾಯುನೆಲೆಯಲ್ಲಿ ಮೃತಪಟ್ಟ ಉಗ್ರರಿಂದ 4 ಎಕೆ -47 ರೈಫಲ್ ಮತ್ತು ಮೂರು ಪಿಸ್ತೂಲ್‌ಗಳನ್ನು ವಶಕ್ಕೆ ಪಡೆದುಕೊಳ್ಳಲಾಗಿತ್ತು. ಆದರೆ, ಎರಡನೇ ದಿನ ಇಬ್ಬರು ಉಗ್ರರು ಯೋಧರ ಮೇಲೆ ದಾಳಿ ಮಾಡಿದ್ದಾರೆ ಎಂದು ಶಂಕಿಸಲಾಗಿದ್ದು, ಅವರ ಬಂದೂಕುಗಳು ಸಿಕ್ಕಿಲ್ಲ. [ಪಠಾಣ್ ಕೋಟ್ ಉಗ್ರರ ದಾಳಿ : ಟೈಮ್ ಲೈನ್]

ಇಬ್ಬರು ಉಗ್ರರು ಮೃತಪಟ್ಟ ಸ್ಥಳಕ್ಕೆ ಬೆಂಕಿ ಬಿದ್ದಿದ್ದು ಅಲ್ಲಿ ಸುಟ್ಟ ವಸ್ತುಗಳು ಪತ್ತೆಯಾಗಿವೆ. ಬೂದಿಯಲ್ಲಿ ಕಬ್ಬಿಣದ ತುಂಡುಗಳು ಸಿಕ್ಕಿವೆ. ಈ ಉಗ್ರರು ಸೇನಾ ಸಮವಸ್ತ್ರ ಧರಿಸಿದ್ದರೆ ಎಂಬುದಕ್ಕೆ ನಿಖರವಾದ ಸಾಕ್ಷಿಗಳು ಸಿಕ್ಕಿಲ್ಲ. ಪೊರೆನ್ಸಿಕ್ ತಜ್ಞರು ಬೂದಿಯಲ್ಲಿ ಸಿಕ್ಕ ವಸ್ತುಗಳನ್ನು ಪರಿಶೀಲಿಸುತ್ತಿದ್ದಾರೆ.

ಪೊರೆನ್ಸಿಕ್ ತಜ್ಞರ ವರದಿ ಬಂದ ಬಳಿಕ ಅಂತಿಮ ತೀರ್ಮಾನವನ್ನು ಕೈಗೊಳ್ಳಲು ಎನ್‌ಐಎ ಅಧಿಕಾರಿಗಳ ತಂಡ ನಿರ್ಧರಿಸಿದೆ. ಈ ತನಿಖೆಯಲ್ಲಿ ಸರಿಯಾದ ಸಾಕ್ಷಿಗಳು ಲಭ್ಯವಾಗದಿದ್ದರೆ. ವಾಯುನೆಲೆಗೆ 4 ಉಗ್ರರು ಮಾತ್ರ ನುಗ್ಗಿದ್ದರು ಎಂದು ತೀರ್ಮಾನಕ್ಕೆ ಎನ್‌ಐಎ ಬರಲಿದೆ.

ಜನವರಿ 1 ಮತ್ತು 2ರಂದು ಭಾರತ ಮತ್ತು ಪಾಕಿಸ್ತಾನದ ಗಡಿಭಾಗದಿಂದ ಕೇವಲ 40 ಕಿ.ಮೀ.ದೂರದಲ್ಲಿರುವ ಪಠಾಣ್ ಕೋಟ್ ವಾಯುನೆಲೆ ಮೇಲೆ ಉಗ್ರರ ದಾಳಿ ನಡೆದಿತ್ತು. ಇದು ದೇಶದ ಮಹತ್ವದ ಸೇನಾ ನೆಲೆಯಾಗಿದ್ದು, ವಾಯುಪಡೆಯ ಅತ್ಯುನ್ನತ ಯುದ್ಧ ವಿಮಾನಗಳು, ಹೆಲಿಕಾಪ್ಟರ್‌ಗಳು ಈ ವಾಯುನೆಲೆಯಲ್ಲಿವೆ.

English summary

A team of the National Investigating Agency will be visiting the Pathankot air force base to unravel the mystery behind the two missing terrorists. The team led by the NIA chief, Sharad Kumar will be in Pathankot to carry out fresh inspection of the site to solve a mystery regarding the number of terrorists.