ರಾಷ್ಟ್ರಪತಿ ಚುನಾವಣೆ ಮತ ಲೆಕ್ಕಾಚಾರ, ಕೋವಿಂದ್ ರಿಗೆ ಸುಲಭ ಗೆಲುವು

ನವದೆಹಲಿ, ಜೂನ್ 26: ಮುಂದಿನ ರಾಷ್ಟ್ರಪತಿ ಸ್ಥಾನಕ್ಕೆ ನಡೆಯಲಿರುವ ಚುನಾವಣೆಯಲ್ಲಿ ಎನ್ಡಿಎ ಅಭ್ಯರ್ಥಿ ರಾಮ್ ನಾಥ್ ಕೋವಿಂದ್ ಸುಲಭ ಗೆಲುವು ಸಾಧಿಸಲಿದ್ದಾರೆ. ವಿಪಕ್ಷಗಳ ಜಂಟಿ ಅಭ್ಯರ್ಥಿ ಮೀರಾ ಕುಮಾರ್ ವಿರುದ್ಧ ಸ್ಪರ್ಧಿಸಲಿರುವ ಬಿಹಾರದ ಮಾಜಿ ರಾಜ್ಯಪಾಲರ ಗೆಲುವು ನಿಚ್ಚಳವಾಗಿದೆ.

ಕೋವಿಂದ್ ಶೇಕಡಾ 62 ಮತಗಳನ್ನು ಪಡೆಯಲಿದ್ದಾರೆ. 2012ರಲ್ಲಿ ಪ್ರಣಬ್ ಮುಖರ್ಜಿ ಶೇಕಡಾ 69 ಮತಗಳನ್ನು ಪಡೆದಿದ್ದರು. ಇಷ್ಟು ಮತಗಳನ್ನು ಪಡೆಯಲು ಕೋವಿಂದ್ ರಿಗೆ ಸಾಧ್ಯವಿಲ್ಲವಾದರೂ ಗೆಲುವಿಗೇನೂ ಅಡ್ಡಿಯಿಲ್ಲ.

ಕೋವಿಂದ್ ಅವರು 10,98,903 ಎಲೆಕ್ಟೋರಲ್ ಕಾಲೇಜು ಮತಗಳಲ್ಲಿ ಸುಮಾರು 7 ಲಕ್ಷ ಮತಗಳನ್ನು ಪಡೆಯುವ ಸಾಧ್ಯತೆ ಇದೆ. ವಿಪಕ್ಷಗಳ ಅಭ್ಯರ್ಥಿ ಮೀರಾ ಕುಮಾರ್ ಸುಮಾರು 4 ಲಕ್ಷ ಮತಗಳನ್ನು ಪಡೆಯಲಿದ್ದಾರೆ. ಎಸ್ಪಿ, ಬಿಎಸ್ಪಿ, ಆರ್.ಜೆಡಿ, ಟಿಎಂಸಿ ಮತ್ತು ಸಿಪಿಎಂ ನಂಥ ಪ್ರಾದೇಶಿಕ ಪಕ್ಷಗಳ ಬೆಂಬಲ ಅವರಿಗಿದೆ.

ಇನ್ನು ಕೋವಿಂದ್ ವಿಚಾರಕ್ಕೆ ಬಂದರೆ ಜೆಡಿಯು, ಬಿಜೆಡಿ, ಎಐಎಡಿಎಂಕೆ, ಟಿಆರ್.ಎಸ್, ಮತ್ತು ವೈಎಸ್ಆರ್ ಕಾಂಗ್ರೆಸ್ ಬೆಂಬಲ ಅವರಿಗಿದೆ.

ಮತಗಳ ಲೆಕ್ಕಾಚಾರದ ಪ್ರಕಾರ ಕೋವಿಂದ್ ಬುಟ್ಟಿಯಲ್ಲಿ 6,82,677 ಮತಗಳಿದ್ದರೆ, ಮೀರಾ ಕುಮಾರ್ ಬಳಿಯಲ್ಲಿ 3,76,261 ಮತಗಳಿವೆ.

ಇನ್ನು ಅಂದಾಜು 39,965 ಮತಗಳು ಇತರ ಪಕ್ಷಗಳಿಗೆ ಸೇರಿದ್ದು ಇವರು ಯಾರಿಗೆ ಮತದಾನ ಮಾಡುತ್ತಾರೆ ಕಾದು ನೋಡಬೇಕಾಗಿದೆ. ಆದರೆ ಇವರು ಯಾರಿಗೇ ಮತದಾನ ಮಾಡಿದರೂ ಸೋಲು ಗೆಲುವಿನಲ್ಲೇನೂ ಬದಲಾವಣೆಯಾಗುವುದಿಲ್ಲ.

ಇನ್ನು ಒಟ್ಟು 776 ಸಂಸತ್ ಸದಸ್ಯರಲ್ಲಿ ಕೋವಿಂದ್ ಗೆ 524 ಜನರ ಬೆಂಬಲವಿದ್ದರೆ, ಮೀರಾ ಕುಮಾರ್ ಗೆ 235 ಸದಸ್ಯರ ಬೆಂಬಲವಿದೆ.

English summary

Ram Nath Kovind is heading for an impressive win in the elections to the next President of India. Kovind, the former governor of Bihar was selected by the NDA for the Presidential race last week. He is pitched against the opposition's candidate Meira Kumar.