ಮೇಕ್ ಇನ್ ಇಂಡಿಯಾ ಪ್ರತಿಭೆ ಸಿಕ್ಕಿದ್ದು ನಕಲಿ ನೋಟು ದಂಧೇಲಿ!

ನಕಲಿ ನೋಟು ದಂಧೇಲಿ ಸಿಕ್ಕಿಹಾಕಿಕೊಂಡವನ ಹೆಸರು ಅಭಿನವ್. ಎಂಜಿನಿಯರ್ ಆಗಿದ್ದ ಈತನ ಆವಿಷ್ಕಾರ ಮೇಕ್ ಇನ್ ಇಂಡಿಯಾದಲ್ಲಿ ಆಯ್ಕೆಯಾಗಿತ್ತು. ಪ್ರಧಾನಿ ನರೇಂದ್ರ ಮೋಡಿ ಈತನ ಬಗ್ಗೆ ಮೆಚ್ಚುಗೆ ಮಾತಾಡಿದ್ದರು

Updated: Saturday, December 3, 2016, 11:30 [IST]

ಮೊಹಾಲಿ, ಡಿಸೆಂಬರ್ 3: ಪಂಜಾಬ್ ನ ಮೊಹಾಲಿಯಲ್ಲಿ ಪೊಲೀಸ್ ಸೂಪರಿಂಟೆಂಡೆಂಟ್ ಪರ್ಮಿಂದರ್ ಸಿಂಗ್ ಈಚೆಗೆ ಹೊಚ್ಚ ಹೊಸ ಅಡಿ ಕಾರೊಂದನ್ನು ವಶಪಡಿಸಿಕೊಂಡಿದ್ದಾಗಿ ಹೇಳಿದರು. ಅದರಲ್ಲಿ ಅತಿ ಗಣ್ಯರ ಜತೆ ಮಾತ್ರ ವ್ಯವಹಾರ ಮಾಡಲಾಗುತ್ತಿತ್ತಂತೆ. ಅದು ಏನಪ್ಪ ಅಂದರೆ ನೋಟು ಬದಲಿ ದಂಧೆ. ಹಾಗಂತ ಸಾಚಾ ನೋಟನ್ನೇನೂ ಕೊಡ್ತಿರಲಿಲ್ಲ. ಪೊಲೀಸರಿಗೆ ಸಿಕ್ಕಿದ್ದು ನಲವತ್ತೆರಡು ಲಕ್ಷ ರುಪಾಯಿ ನಕಲಿ ನೋಟು.

ಅಲ್ಲಿ ಮೂವರಿದ್ದರು. ಅದರಲ್ಲಿ ಇಬ್ಬರು ತಪ್ಪಿಸಿಕೊಂಡರೆ ಒಬ್ಬ ಸಿಕ್ಕಿಹಾಕಿಕೊಂಡ. ಈ ಮೂವರ ಗ್ಯಾಂಗ್ ನಕಲಿ ನೋಟನ್ನೇ ಅಸಲಿ ಎಂದು ಯಾಮಾರಿಸಿ, ಅದಕ್ಕೂ ಕಮಿಷನ್ ಪಡೆಯುತ್ತಿದ್ದರಂತೆ. ಸಿಕ್ಕಿಹಾಕಿಕೊಂಡನಲ್ಲ ಆತನ ಹೆಸರು ಅಭಿನವ್. ಎಂಜಿನಿಯರಿಂಗ್ ವಿದ್ಯಾರ್ಥಿ. ದೃಷ್ಟಿ ದೋಷ ಇರುವವರಿಗಾಗಿ ಅವರು ಬಳಸುವ ಸ್ಟಿಕ್ ಗೆ ಅಳವಡಿಸುವ ಸೆನ್ಸಾರ್ ಉತ್ಪಾದಿಸುವುದು ಈತನ ವ್ಯಾಪಾರವಾಗಿತ್ತು.[ಪಾಕ್, ಬಾಂಗ್ಲಾ ಗಡಿಯಲ್ಲಿ ನಕಲಿ ನೋಟಿಗೆ ಪೂರ್ಣವಿರಾಮ]

ಚಂಡೀಗಢದ ಈತನ ಕಚೇರಿಯಲ್ಲಿ 2 ಸಾವಿರ ರುಪಾಯಿ ನಕಲಿ ನೋಟು ಮುದ್ರಣ ಮಾಡಲಾಗಿದೆ. ಇವರಿಂದ ವಶಪಡಿಸಿಕೊಂಡ ನೋಟುಗಳಲ್ಲಿ ಒಂದೇ ಸೀರಿಯಲ್ ನಂಬರ್ ಇದ್ದವಂತೆ. ಇನ್ನೂ ಆಸಕ್ತಿಕರ ವಿಷಯ ಅಂದರೆ, ಆರೋಪಿ ಅಭಿನವ್ ಇದ್ದಾನಲ್ಲ, ಆತ ಕಂಡುಹಿಡಿದ 'ಫ್ರೀಡಂ ಡಿವೈಸ್' ಮೇಕ್ ಇನ್ ಇಂಡಿಯಾ ಯೋಜನೆಯಲ್ಲಿ ಆಯ್ಕೆಯಾಗಿತ್ತು. ಸ್ವತಃ ಪ್ರಧಾನಿ ನರೇಂದ್ರ ಮೋದಿ ಈತನನ್ನು ಹೊಗಳಿದ್ದರು.

ಅಭಿನವ್ ನ ಡಿವೈಸ್ ಈ ವರ್ಷ ಅಧಿಕೃತವಾಗಿ ಬಿಡುಗಡೆಯಾಗಿ, ಯಶಸ್ಸು ಕಂಡು ಭಾರತ ಸೇರಿದಂತೆ ಹದಿನೈದಕ್ಕೂ ಹೆಚ್ಚು ರಾಷ್ಟ್ರಗಳಲ್ಲಿ ಮಾರಾಟವಾಗುತ್ತಿತ್ತು. ಈತ ತನ್ನ ಆವಿಷ್ಕಾರಕ್ಕಾಗಿ 'ಮಿಲಾಪ್' ಹೆಸರಿನಲ್ಲಿ ಹಣ ಚಂದಾ ಎತ್ತುವ ಅಭಿಯಾನ ಕೂಡ ಮಾಡಿದ್ದ. ಈಗಲೂ ಈತನ ಮೋಸದ ಆವಿಷ್ಕಾರವೂ ಏನೂ ಕಡಿಮೆಯಿಲ್ಲ.[2 ಸಾವಿರ ರೂ. ನಕಲಿ ನೋಟು ಚಲಾವಣೆ: ಇಬ್ಬರ ಬಂಧನ]

ನಕಲಿ ನೋಟು ನೀಡಿ, ಅದರಲ್ಲೂ ಎರಡು ಸಾವಿರದ ನೋಟು ನೀಡಿ, ಮೋಸ ಮಾಡುವ ವಿಧಾನ ಕಂಡುಹಿಡಿಯುವುದಕ್ಕೆ ತಲೆ ಎಷ್ಟು ಖರ್ಚು ಮಾಡಿದ್ದಾನೋ, ಜತೆಗೆ ಆಡಿ ಕಾರಿನಲ್ಲಿ ಶ್ರೀಮಂತರ ಜತೆ ಮಾತ್ರ ವ್ಯವಹಾರ ಮಾಡುತ್ತಿತ್ತಂತೆ ಈತನ ತಂಡ.