ಬಾಲಿವುಡ್ ಸಿನಿಮಾದಲ್ಲಿ ನಟಿಸಿದ ಲಾಲು ಪ್ರಸಾದ್ ಯಾದವ್ ಪುತ್ರ
ಮುಂಬೈ, ಜೂನ್ 27: ಬಿಹಾರದ ವರ್ಣ ರಂಜಿತ ರಾಜಕಾರಣಿ ಲಾಲು ಪ್ರಸಾದ್ ಯಾದವ್ ಪುತ್ರ ತೇಜ್ ಪ್ರತಾಪ್ ಯಾದವ್ ಅವರೀಗ ತೆರೆಯ ಮೇಲೆ ಬಂದು ಜನರನ್ನು ರಂಜಿಸಲಿದ್ದಾರೆ. ಬಿಹಾರದ ಮಾಜಿ ಆರೋಗ್ಯ ಸಚಿವರೂ ಆಗಿರುವ 29 ವರ್ಷದ ತೇಜ್ ಪ್ರತಾಪ್ ಹಿಂದಿ ಸಿನಿಮಾದಲ್ಲಿ ನಟಿಸಿದ್ದಾರೆ.
'ರುದ್ರ: ದಿ ಅವತಾರ್' ಎಂಬ ಸಿನಿಮಾದಲ್ಲಿ ತೇಜ್ ಪ್ರತಾಪ್ ನಟಿಸಿದ್ದು, ಇದರ ಪೋಸ್ಟರ್ ಅನ್ನು ಅವರು ತಮ್ಮ ಟ್ಟಿಟ್ಟರ್ ನಲ್ಲಿ ಹಂಚಿಕೊಂಡಿದ್ದಾರೆ. ನೀಲಿ ವರ್ಣದ ಈ ಪೋಸ್ಟರ್ ನಲ್ಲಿ ತೇಜ್ ಪ್ರತಾಪ್ ಯಾದವ್ ಕೂಲಿಂಗ್ ಗ್ಲಾಸ್ ಹಾಕಿಕೊಂಡು ಮಿಂಚುತ್ತಿದ್ದಾರೆ.
— Tej Pratap Yadav (@TejYadav14) June 27, 2018
ಚಿತ್ರ ಸದ್ಯದಲ್ಲೇ ಬಿಡುಗಡೆಯಾಗಲಿದೆ ಎಂಬುದನ್ನು ಪೋಸ್ಟರ್ ಹೇಳುತ್ತಿದೆ. ಈ ಹಿಂದೆ 2016ರಲ್ಲಿ ಭೋಜ್ಪುರಿ ಸಿನಿಮಾ 'ಅಪಹರಣ್ ಉದ್ಯೋಗ್'ನಲ್ಲಿ ಅವರು ಮುಖ್ಯಮಂತ್ರಿಯ ಪಾತ್ರವನ್ನು ನಿಭಾಯಿಸಿದ್ದರು. ಇದು ಅವರ ಮೊದಲ ಹಿಂದಿ ಸಿನಿಮಾವಾಗಿದೆ.
ಕಳೆದ ತಿಂಗಳಷ್ಟೇ ಆರ್.ಜೆ.ಡಿ ಯ ಜನಪ್ರತಿನಿಧಿಯೊಬ್ಬರ ಮಗಳನ್ನು ತೇಜ್ ಪ್ರತಾಪ್ ಯಾದವ್ ಮದುವೆಯಾಗಿದ್ದರು. ಅವರ ತಮ್ಮ ತೇಜಸ್ವಿ ಯಾದವ್ ಬಿಹಾರ ವಿಧಾನಸಭೆಯಲ್ಲಿ ವಿರೋಧ ಪಕ್ಷದ ನಾಯಕರಾಗಿದ್ದಾರೆ.