Jwala Gutta: ಹೆರಿಗೆಯಾದ ಮೊದಲ ವರ್ಷದಲ್ಲೇ 60 ಲೀಟರ್ ಎದೆಹಾಲು ದಾನ ಮಾಡಿದ ಬ್ಯಾಡ್ಮಿಂಟನ್ ತಾರೆ ಜ್ವಾಲಾ ಗುಟ್ಟಾ
ಹೈದರಾಬಾದ್: ಭಾರತದ ಸ್ಟಾರ್ ಬ್ಯಾಡ್ಮಿಂಟನ್ ಆಟಗಾರ್ತಿ ಜ್ವಾಲಾ ಗುಟ್ಟಾ (Jwala Gutta) ಆಟದ ಮೈದಾನದಲ್ಲಷ್ಟೇ ಅಲ್ಲ, ನಿಜ ಜೀವನದಲ್ಲೂ ಹೀರೊ ಎಂಬುದನ್ನು ಸಾಬೀತುಪಡಿಸಿದ್ದಾರೆ. ತಮಗೆ ಮಗು ಜನಿಸಿದ ಮೊದಲ ವರ್ಷದಲ್ಲಿ ಅವರು ಬರೋಬ್ಬರಿ 60 ಲೀಟರ್ ಎದೆಹಾಲನ್ನು ದಾನ ಮಾಡಿರುವುದಾಗಿ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದು, ಅವರ ಈ ಮಾನವೀಯ ನಡೆಗೆ ದೇಶಾದ್ಯಂತ ಭಾರಿ ಶ್ಲಾಘನೆ ವ್ಯಕ್ತವಾಗುತ್ತಿದೆ.
ಚೆನ್ನೈ ಮತ್ತು ಹೈದರಾಬಾದ್ನ ಸರ್ಕಾರಿ ಆಸ್ಪತ್ರೆಗಳಿಗೆ ತಾವು ಈ ಹಾಲನ್ನು ದಾನ ಮಾಡಿದ್ದು, ಇದು ಆಸ್ಪತ್ರೆಯ ತೀವ್ರ ನಿಗಾ ಘಟಕದಲ್ಲಿರುವ (NICU) ನೂರಾರು ನವಜಾತ ಶಿಶುಗಳ ಜೀವ ಉಳಿಸಲು ಸಹಾಯ ಮಾಡಿದೆ ಎಂದು ಅವರು ತಿಳಿಸಿದ್ದಾರೆ. ಸಾಮಾಜಿಕ ಜಾಲತಾಣದಲ್ಲಿ ಈ ಬಗ್ಗೆ ಬರೆದುಕೊಂಡಿರುವ ಜ್ವಾಲಾ, "ಕೇವಲ 100 ಎಂಎಲ್ ದಾನದ ಹಾಲು, 1 ಕೆ.ಜಿ ತೂಕವಿರುವ ಪುಟ್ಟ ಮಗುವಿಗೆ ಹಲವು ದಿನಗಳವರೆಗೆ ಆಹಾರವಾಗಬಲ್ಲದು. ಎದೆಹಾಲು ದಾನ ಮಾಡುವುದು ಸಂಪೂರ್ಣ ಸುರಕ್ಷಿತವಾಗಿದೆ, ಕಟ್ಟುನಿಟ್ಟಾದ ತಪಾಸಣೆಯ ನಂತರವೇ ಇದನ್ನು ಸಂಗ್ರಹಿಸಲಾಗುತ್ತದೆ. ಪ್ರಸ್ತುತ ಇದರ ಅಗತ್ಯತೆ ತುಂಬಾ ಇದೆ" ಎಂದು ಪೋಷಕರಲ್ಲಿ ಜಾಗೃತಿಯೂ ಮೂಡಿಸಿದ್ದಾರೆ.
ಶಿಶುಗಳಿಗೆ ಇದು ಏಕೆ ಮುಖ್ಯ?
ಶಿಶುಗಳಿಗೆ ಅನುವಂಶೀಯ ಆರೋಗ್ಯ ಸಮಸ್ಯೆಗಳು, ಅವಧಿಗೆ ಮುನ್ನ ಹೆರಿಗೆ (Premature Birth), ತಾಯಂದಿರ ಅನಾರೋಗ್ಯ ಅಥವಾ ತೀವ್ರ ಮಾನಸಿಕ ಒತ್ತಡದ ಕಾರಣದಿಂದಾಗಿ ಅನೇಕ ನವಜಾತ ಶಿಶುಗಳಿಗೆ ಆರಂಭದ ದಿನಗಳಲ್ಲಿ ತಾಯಿಯ ಹಾಲು ಸಿಗುವುದಿಲ್ಲ. ಇಂತಹ ಸಂದರ್ಭದಲ್ಲಿ ದಾನಿಗಳಿಂದ ಸಿಗುವ ಎದೆಹಾಲು ಆ ಪುಟ್ಟ ಕಂದಮ್ಮಗಳಿಗೆ ರೋಗನಿರೋಧಕ ಶಕ್ತಿಯನ್ನು ನೀಡುತ್ತದೆ. ವಿಶೇಷವಾಗಿ ಅವಧಿಗೆ ಮುನ್ನ ಹುಟ್ಟುವ ಮಕ್ಕಳಲ್ಲಿ ಕಾಣಿಸಿಕೊಳ್ಳುವ 'ನೆಕ್ರೋಟೈಸಿಂಗ್ ಎಂಟರೊಕೊಲೈಟಿಸ್' (ಜೀವಕ್ಕೆ ಕಂಟಕವಾಗುವ ಕರುಳಿನ ಕಾಯಿಲೆ) ಅಪಾಯವನ್ನು ಕಡಿಮೆ ಮಾಡಲು ಇದು ಪ್ರಮುಖ ಪಾತ್ರ ವಹಿಸುತ್ತದೆ ಎಂದು ಜ್ವಾಲಾ ವಿವರಿಸಿದ್ದಾರೆ.
I donated around 60 litres of breast milk to the government hospital in Hyderabad and Chennai during my first year of post partum!!
— Gutta Jwala 💙 (@Guttajwala) May 14, 2026
Why does it matter? Just 100ml of donor milk can feed a tiny 1kg baby for several days. This donation could potentially support dozens of infants… pic.twitter.com/JzEXQZDrXa
ಸಂಶೋಧನೆಗಳು ಏನು ಹೇಳುತ್ತವೆ?
ವೈದ್ಯಕೀಯ ನಿಯತಕಾಲಿಕೆಗಳ ಪ್ರಕಾರ, ದಾನಿಗಳಿಂದ ಸಂಸ್ಕರಿಸಿದ ಎದೆ ಹಾಲು ಶಿಶುಗಳಿಗೆ ಪೌಷ್ಟಿಕಾಂಶವನ್ನು ಒದಗಿಸುವುದರ ಜೊತೆಗೆ, ನವಜಾತ ಶಿಶುಗಳಲ್ಲಿ ಬರುವ ಶ್ವಾಸಕೋಶದ ಕಾಯಿಲೆಗಳ ಅಪಾಯವನ್ನು ತಡೆಯುತ್ತದೆ. ಅಲ್ಲದೆ, ಪೌಡರ್ ಹಾಲಿಗೆ ಹೋಲಿಸಿದರೆ ಈ ಹಾಲು ಕುಡಿಯುವ ಮಕ್ಕಳಿಗೆ ವೆಂಟಿಲೇಟರ್ ಬ್ಯಾಕಪ್ ಅಗತ್ಯತೆ ಕೂಡ ತೀರಾ ಕಡಿಮೆ ಇರುತ್ತದೆ ಎಂದು ವೈದ್ಯರು ಹೇಳುತ್ತಾರೆ.
ಭಾರತದಲ್ಲಿ 'ಹ್ಯೂಮನ್ ಮಿಲ್ಕ್ ಬ್ಯಾಂಕ್ ಅಸೋಸಿಯೇಷನ್ ಆಫ್ ಇಂಡಿಯಾ' ಆರೋಗ್ಯವಂತ ತಾಯಂದಿರಿಂದ ಎದೆಹಾಲನ್ನು ಸಂಗ್ರಹಿಸಿ, ಸೂಕ್ತ ತಪಾಸಣೆಯ ನಂತರ ಅಗತ್ಯವಿರುವ ಶಿಶುಗಳಿಗೆ ತಲುಪಿಸುವ ಕೆಲಸ ಮಾಡುತ್ತಿದೆ. ಸದ್ಯ ಜ್ವಾಲಾ ಗುಟ್ಟಾ ಅವರ ಈ ನಡೆ ಸಮಾಜದಲ್ಲಿ ಎದೆಹಾಲು ದಾನದ ಕುರಿತು ದೊಡ್ಡ ಜಾಗೃತಿ ಮೂಡಿಸುತ್ತಿದೆ.
ವೈಯಕ್ತಿಕ ಜೀವನ ಮತ್ತು ಮಗಳ ಜನನ
ಭಾರತೀಯ ಬ್ಯಾಡ್ಮಿಂಟನ್ ತಾರೆ ಜ್ವಾಲಾ ಗುಟ್ಟಾ ಅವರು ತಮಿಳು ಚಿತ್ರರಂಗದ ಖ್ಯಾತ ನಟ ಹಾಗೂ ನಿರ್ಮಾಪಕ ವಿಷ್ಣು ವಿಶಾಲ್ ಅವರನ್ನು 2021ರಲ್ಲಿ ಹೈದರಾಬಾದ್ನಲ್ಲಿ ನಡೆದ ಖಾಸಗಿ ಸಮಾರಂಭದಲ್ಲಿ ವಿವಾಹವಾಗಿದ್ದರು. ವಿಶೇಷವೆಂದರೆ, ಈ ದಂಪತಿ ತಮ್ಮ ಮದುವೆಯ ನಾಲ್ಕನೇ ವಾರ್ಷಿಕೋತ್ಸವದ ದಿನದಂದೇ ಹೆಣ್ಣು ಮಗುವನ್ನು ಬರಮಾಡಿಕೊಂಡಿದ್ದರು. ತಮ್ಮ ಮುದ್ದಿನ ಮಗಳಿಗೆ ಇವರು 'ಮೀರಾ' ಎಂದು ಹೆಸರಿಟ್ಟಿದ್ದು, ಮಗಳು ಜನಿಸಿದ ಮೊದಲ ವರ್ಷದಲ್ಲೇ ಜ್ವಾಲಾ ಅವರು ಈ ಅಪರೂಪದ ಎದೆಹಾಲು ದಾನದ ಸಮಾಜಮುಖಿ ಕಾರ್ಯವನ್ನು ಮಾಡಿದ್ದಾರೆ.
Click it and Unblock the Notifications
Sign in with Google