Manusmriti: ಕಾನೂನು ವಿದ್ಯಾರ್ಥಿಗಳಿಗೆ 'ಮನುಸ್ಮೃತಿ' ಕಲಿಸಲು ಹೊರಟ ದೆಹಲಿ ವಿಶ್ವವಿದ್ಯಾನಿಲಯ, ಭಾರಿ ಆಕ್ರೋಶ
ನವದೆಹಲಿ, ಜುಲೈ. 12: ದೆಹಲಿ ವಿಶ್ವವಿದ್ಯಾನಿಲಯದ ಎಲ್ಎಲ್ಬಿ ವಿದ್ಯಾರ್ಥಿಗಳಿಗೆ ಮನುಸ್ಮೃತಿ (ಮನುವಿನ ನಿಯಮಗಳು) ಕಲಿಸುವ ಪ್ರಸ್ತಾಪ ಕೆಂಗಣ್ಣಿಗೆ ಗುರಿಯಾಗಿದೆ. ವಿಶ್ವವಿದ್ಯಾಲಯದ ಈ ನಿರ್ಧಾರಕ್ಕೆ ವಿದ್ಯಾರ್ಥಿಗಳು, ಶಿಕ್ಷಕರು ವಿರೋಧ ವ್ಯಕ್ತಪಡಿಸಿ, ಟೀಕಿಸಿದ್ದಾರೆ. ಹೀಗಾಗಿ ನಿರ್ಧಾರ ವಾಪಸ್ ಪಡೆಯಲಾಗಿದೆ.
ಶುಕ್ರವಾರ ದೆಹಲಿ ವಿಶ್ವವಿದ್ಯಾನಿಲಯದ ಶೈಕ್ಷಣಿಕ ಮಂಡಳಿಯ ಸಭೆಯಲ್ಲಿ ಚರ್ಚೆ ನಡೆಸಲಾಗಿದೆ. ಪದವಿಪೂರ್ವ ಕೋರ್ಸ್ಗಳಲ್ಲಿ ಮನುಸ್ಮೃತಿಯನ್ನು ಕಲಿಸುವ ಪ್ರಸ್ತಾವನೆಯನ್ನು ಅನುಮೋದನೆಗಾಗಿ ಇರಿಸಲಾಗಿದೆ ಎಂಬ ವರದಿಗಳ ವಿವಾದ ಭುಗಿಲೆದ್ದ ನಂತರ, ಎಲ್ಎಲ್ಬಿ ವಿದ್ಯಾರ್ಥಿಗಳಿಗೆ ಪ್ರಾಚೀನ ಹಿಂದೂ ಕಾನೂನು ಪಠ್ಯವಾದ 'ಮನುಸ್ಮೃತಿ' ಬೋಧಿಸುವುದಿಲ್ಲ ಎಂದು ದೆಹಲಿ ವಿಶ್ವವಿದ್ಯಾಲಯದ ಉಪಕುಲಪತಿ ಯೋಗೇಶ್ ಸಿಂಗ್ ಸ್ಪಷ್ಟಪಡಿಸಿದ್ದಾರೆ.
ವೀಡಿಯೊ ಹೇಳಿಕೆಯಲ್ಲಿ ಉಪಕುಲಪತಿ ಯೋಗೇಶ್ ಸಿಂಗ್ ಅವರು ಗುರುವಾರ ಕಾನೂನು ವಿಭಾಗವು 'ನ್ಯಾಯಶಾಸ್ತ್ರ' ಎಂಬ ಶೀರ್ಷಿಕೆಯ ಪತ್ರಿಕೆಯಲ್ಲಿ ಬದಲಾವಣೆಗಳನ್ನು ಸೂಚಿಸಿದ್ದಾರೆ. ಅವರ ಸಲಹೆಗಳು 'ಮನುಸ್ಮೃತಿ' ಕುರಿತು ಓದುವಿಕೆಯನ್ನು ಒಳಗೊಂಡಿತ್ತು, ಅದನ್ನು ವಿಶ್ವವಿದ್ಯಾಲಯವು ತಿರಸ್ಕರಿಸಿದೆ ಎಂದಿದ್ದಾರೆ.
"ಕಾನೂನು ವಿಭಾಗದಿಂದ ದೆಹಲಿ ವಿಶ್ವವಿದ್ಯಾನಿಲಯ ಆಡಳಿತಕ್ಕೆ ಪ್ರಸ್ತಾವನೆಯನ್ನು ಸಲ್ಲಿಸಲಾಯಿತು. ಅವರು ನ್ಯಾಯಶಾಸ್ತ್ರ ಶೀರ್ಷಿಕೆಯ ಪತ್ರಿಕೆಯಲ್ಲಿ ಬದಲಾವಣೆಗಳನ್ನು ಸೂಚಿಸಿದರು. ಪ್ರಸ್ತಾವನೆಯಲ್ಲಿನ ಬದಲಾವಣೆಗಳಲ್ಲಿ ಒಂದು ಮನುಸ್ಮೃತಿಯ ಓದುವಿಕೆಯನ್ನು ಸೇರಿಸುವುದು. ದೆಹಲಿ ವಿಶ್ವವಿದ್ಯಾಲಯವು ಸೂಚಿಸಿದ ವಾಚನಗೋಷ್ಠಿಗಳು ಮತ್ತು ಅಧ್ಯಾಪಕರು ಪ್ರಸ್ತಾಪಿಸಿದ ತಿದ್ದುಪಡಿಗಳನ್ನು ತಿರಸ್ಕರಿಸಿದೆ. ವಿದ್ಯಾರ್ಥಿಗಳಿಗೆ ('ಮನುಸ್ಮೃತಿ' ಬಗ್ಗೆ) ಕಲಿಸಲಾಗುವುದಿಲ್ಲ" ಎಂದು ಉಪಕುಲಪತಿ ಸ್ಪಷ್ಟನೆ ನೀಡಿದ್ದಾರೆ.
ಕಾನೂನು ವಿಭಾಗವು ತನ್ನ ಮೊದಲ ಮತ್ತು ಮೂರನೇ ವರ್ಷದ ವಿದ್ಯಾರ್ಥಿಗಳಿಗೆ 'ಮನುಸ್ಮೃತಿ' ಕಲಿಸಲು ಪಠ್ಯಕ್ರಮವನ್ನು ಪರಿಷ್ಕರಿಸಲು ದೆಹಲಿ ವಿಶ್ವವಿದ್ಯಾನಿಲಯದ (ಡಿಯು) ಅತ್ಯುನ್ನತ ನಿರ್ಧಾರ ತೆಗೆದುಕೊಳ್ಳುವ ಸಂಸ್ಥೆಯಿಂದ ಅನುಮೋದನೆಯನ್ನು ಕೋರಿತ್ತು. ಇನ್ನು, ಡಿಯುನ ಎಲ್ಎಲ್ಬಿ ವಿದ್ಯಾರ್ಥಿಗಳಿಗೆ 'ಮನುಸ್ಮೃತಿ' ಕಲಿಸುವ ಪ್ರಸ್ತಾಪವನ್ನು ಶುಕ್ರವಾರ ಅದರ ಶೈಕ್ಷಣಿಕ ಮಂಡಳಿಯ ಸಭೆಯಲ್ಲಿ ಚರ್ಚಿಸಲಾಗಿದೆ.
ಎಲ್ಎಲ್ಬಿಯ ಒಂದು ಮತ್ತು ಆರನೇ ಸೆಮಿಸ್ಟರ್ಗಳಿಗೆ ಸಂಬಂಧಿಸಿದ ನ್ಯಾಯಶಾಸ್ತ್ರ ಪತ್ರಿಕೆಯ ಪಠ್ಯಕ್ರಮದಲ್ಲಿನ ಬದಲಾವಣೆ ಮಾಡಲು ಚಿಂತಿಸಲಾಗಿತ್ತು. ಪರಿಷ್ಕರಣೆಗಳ ಪ್ರಕಾರ, ಮನುಸ್ಮೃತಿಯ ಮೇಲೆ ಜಿ ಎನ್ ಝಾ ಅವರ ಮೇಧಾತಿಥಿಯ ಮನುಭಾಷ್ಯ ಮತ್ತು ಟಿ ಕ್ರಿಷ್ಣಸಾವ್ಮಿ ಅಯ್ಯರ್ ಅವರ ಮನು ಸ್ಮೃತಿ ಸ್ಮೃತಿಚಂದ್ರಿಕಾ ವ್ಯಾಖ್ಯಾನದೊಂದಿಗೆ ಎರಡು ಓದುವಿಕೆಗಳನ್ನು ವಿದ್ಯಾರ್ಥಿಗಳಿಗೆ ಪರಿಚಯಿಸಲು ಪ್ರಸ್ತಾಪಿಸಲಾಗಿದೆ.
ಸಭೆಯ ನಡಾವಳಿಗಳ ಪ್ರಕಾರ, ಕಾನೂನು ವಿಭಾಗದ ಡೀನ್ ಅಂಜು ವಾಲಿ ಟಿಕೂ ನೇತೃತ್ವದ ಅಧ್ಯಾಪಕರ ಕೋರ್ಸ್ ಸಮಿತಿಯ ಜೂನ್ 24 ರ ಸಭೆಯಲ್ಲಿ ಪರಿಷ್ಕರಣೆಗಳನ್ನು ಸೂಚಿಸುವ ನಿರ್ಧಾರವನ್ನು ಸರ್ವಾನುಮತದಿಂದ ಅಂಗೀಕರಿಸಲಾಯಿತು. "ಡಿಯು ಸಮಿತಿಯು ಶಿಫಾರಸುಗಳನ್ನು ನೀಡಿದೆ. ಈ ವಿಷಯವು ಇದ್ದಕ್ಕಿದ್ದಂತೆ ಬಂದಿಲ್ಲ, ಹೈಕೋರ್ಟ್ನ ನಿವೃತ್ತ ನ್ಯಾಯಾಧೀಶರು ಸೇರಿದಂತೆ ವಿದ್ವಾಂಸರ ಸಮಾಲೋಚನೆಗಳು ನಡೆದವು. ಜೂನ್ 25ರಂದು ಸ್ಥಾಯಿ ಪರಿಷತ್ತಿನ ಸಭೆ ಇತ್ತು, ನಾನು ಆ ಸಭೆಯಲ್ಲಿ ಭಾಗಿಯಾಗಿದ್ದೆ ಮತ್ತು ಆಗ ಯಾರೂ ಅದನ್ನು ವಿರೋಧಿಸಲಿಲ್ಲ. ಇದ್ದಕ್ಕಿದ್ದಂತೆ ಕೆಲವರು ವಿರುದ್ಧ ಎಚ್ಚೆತ್ತಿದ್ದಾರೆ" ಎಂದು ಅಂಜು ವಾಲಿ ಟಿಕೂ ಹೇಳಿದ್ದಾರೆ.
Click it and Unblock the Notifications
Sign in with Google