Delhi Election 2025 Exit Poll: ದೆಹಲಿಯಲ್ಲಿ ಎಎಪಿ ಗೆಲ್ಲುವುದು ಖಚಿತ ಎಂದ ಸಮೀಕ್ಷೆ

ದೆಹಲಿ ಜನವರಿ 6: ದೆಹಲಿ ವಿಧಾನಸಭಾ ಚುನಾವಣೆ 2025ರ ಮತದಾನ ಪೂರ್ಣಗೊಂಡಿದೆ. ಹೆಚ್ಚಿನ ಎಕ್ಸಿಟ್ ಪೋಲ್ ಫಲಿತಾಂಶಗಳು ಬಿಜೆಪಿ ಸರ್ಕಾರ ರಚನೆಯಾಗಲಿದೆ ಎಂದು ಭವಿಷ್ಯ ನುಡಿದಿವೆ. ಆದರೆ ಇದೆಲ್ಲದರ ನಡುವೆ ದೆಹಲಿಯಲ್ಲಿ ಆಮ್ ಆದ್ಮಿ ಪಕ್ಷದಿಂದ ಸರ್ಕಾರ ರಚನೆಯಾಗಲಿದೆ ಎಂದು ಸಮೀಕ್ಷೆಯೊಂದು ಹೇಳಿದೆ.

ಹೌದು.. ದೆಹಲಿ ವಿಶ್ವವಿದ್ಯಾಲಯದ (ಡಿಯು) ಸೆಂಟರ್ ಫಾರ್ ಗ್ಲೋಬಲ್ ಸ್ಟಡೀಸ್ (ಸಿಜಿಎಸ್) ತನ್ನ 15ನೇ ಚುನಾವಣಾ ಸಮೀಕ್ಷೆಯನ್ನು ಬಿಡುಗಡೆ ಮಾಡಿದ್ದು, 2025ರ ದೆಹಲಿ ವಿಧಾನಸಭಾ ಚುನಾವಣೆಯಲ್ಲಿ ಆಮ್ ಆದ್ಮಿ ಪಕ್ಷ (ಎಎಪಿ) ನಿರ್ಣಾಯಕ ಗೆಲುವು ಸಾಧಿಸಲಿದೆ ಎಂದು ಭವಿಷ್ಯ ನುಡಿದಿದೆ. ದೆಹಲಿಯಲ್ಲಿ ಎಎಪಿಗೆ ಸಂಪೂರ್ಣ ಬಹುಮತ ಸಿಗಲಿದೆ ಎಂದು ಸಮೀಕ್ಷೆ ಹೇಳಿದರೆ, ಭಾರತೀಯ ಜನತಾ ಪಕ್ಷ (ಬಿಜೆಪಿ) 29 ಸ್ಥಾನಗಳನ್ನು ಹಾಗೂ ಕಾಂಗ್ರೆಸ್ ಪಕ್ಷಕ್ಕೆ ಯಾವುದೇ ಸ್ಥಾನ ಸಿಗುವ ನಿರೀಕ್ಷೆಯಿಲ್ಲ ಎಂದಿದೆ.

ಸಿಜಿಎಸ್ ನಿರ್ದೇಶಕ ಪ್ರೊ. ಸುನಿಲ್ ಕೆ. ಚೌಧರಿ ಅವರ ಪ್ರಕಾರ ಡಿಯುನ ಈ ಸಮೀಕ್ಷೆಯು ಪಶ್ಚಿಮದ 'ಪ್ರಜಾಪ್ರಭುತ್ವ ಅಸ್ಥಿರತೆ'ಗೆ ಹೋಲಿಸಿದರೆ ಭಾರತದ 'ಪ್ರಜಾಪ್ರಭುತ್ವದ ಏರಿಕೆ'ಯನ್ನು ಪ್ರತಿಬಿಂಬಿಸುತ್ತದೆ. ಇದು ಜನವರಿ 11 ರಿಂದ ಫೆಬ್ರವರಿ 3, 2025 ರವರೆಗೆ ದೆಹಲಿ ವಿಧಾನಸಭೆಯ ಎಲ್ಲಾ 70 ಸ್ಥಾನಗಳಿಂದ 63,534 ಮತದಾರರನ್ನು ಒಳಗೊಂಡಿದೆ. ವಿವಿಧ ಸಂಸ್ಥೆಗಳ ಸುಮಾರು 2,316 ವಿದ್ಯಾರ್ಥಿಗಳು ಮತ್ತು ಸಂಶೋಧಕರು ಸಮೀಕ್ಷೆಯಲ್ಲಿ ಭಾಗವಹಿಸಿದ್ದರು. ದೆಹಲಿ ಚುನಾವಣಾ ಸಮೀಕ್ಷೆಯ ಫಲಿತಾಂಶಗಳಲ್ಲಿ ಮಹಿಳಾ ಮತದಾರರೇ ಕಿಂಗ್ ಮೇಕರ್‌ಗಳು ಎಂದಿದ್ದಾರೆ.

ದೆಹಲಿ ಚುನಾವಣಾ ಸಮೀಕ್ಷೆಯ ಫಲಿತಾಂಶಗಳಲ್ಲಿ ಮಹಿಳಾ ಮತದಾರರೇ ಕಿಂಗ್ ಮೇಕರ್-

ದೆಹಲಿ ವಿಧಾನಸಭಾ ಚುನಾವಣೆ 2025ರ ಫಲಿತಾಂಶದಲ್ಲಿ ಮಹಿಳಾ ಮತದಾರರು ಆಮ್ ಆದ್ಮಿ ಪಕ್ಷಕ್ಕೆ ಕಿಂಗ್‌ಮೇಕರ್ ಪಾತ್ರವನ್ನು ವಹಿಸುತ್ತಾರೆ ಎಂದು ಸಮೀಕ್ಷೆ ಹೇಳಿದೆ. ಈ ಬಾರಿ ಆಮ್ ಆದ್ಮಿ ಪಕ್ಷದ ಗೆಲುವು ಅಥವಾ ಸೋಲಿನ ಅಂತರವು ಸುಮಾರು 10 ರಿಂದ 12 ಸ್ಥಾನಗಳಲ್ಲಿ ಕಡಿಮೆಯಾಗುವ ನಿರೀಕ್ಷೆಯಿದೆ. ಇದು ಫಲಿತಾಂಶಗಳನ್ನು ಊಹಿಸಲು ಕಷ್ಟಕರವಾಗಿಸುತ್ತದೆ. 2025 ರ ದೆಹಲಿ ವಿಧಾನಸಭಾ ಚುನಾವಣೆಯಲ್ಲಿ ತೀವ್ರ ಪೈಪೋಟಿ ನಡೆಯುವ ಸ್ಥಾನಗಳಲ್ಲಿ ಬಾಬರ್‌ಪುರ, ಆದರ್ಶ ನಗರ, ಚಾಂದನಿ ಚೌಕ್, ಶಾಲಿಮಾರ್ ಬಾಗ್, ವಿಶ್ವಾಸ್ ನಗರ, ಕಲ್ಕಾಜಿ, ನವದೆಹಲಿ, ಸಂಗಮ್ ವಿಹಾರ್, ಬವಾನಾ, ವಜೀರ್‌ಪುರ, ನಜಾಫ್‌ಗಢ ಮತ್ತು ಲಕ್ಷ್ಮಿ ನಗರ ಸೇರಿವೆ. ಈ ಸ್ಥಾನಗಳಲ್ಲಿ ಕಠಿಣ ಸ್ಪರ್ಧೆ ನಡೆಯುವ ಸಾಧ್ಯತೆಯಿದೆ.

ಆಮ್ ಆದ್ಮಿ ಪಕ್ಷದ ಮತ ​​ಹಂಚಿಕೆ ಮತ್ತು ಗೆಲ್ಲುವ ಸ್ಥಾನಗಳು

2205ರ ದೆಹಲಿ ವಿಧಾನಸಭಾ ಚುನಾವಣೆಯಲ್ಲಿ ಎಎಪಿ 44.90% ಮತ ಹಂಚಿಕೆಯೊಂದಿಗೆ ಸುಮಾರು 41 ಸ್ಥಾನಗಳನ್ನು ಪಡೆಯಬಹುದು ಎಂದು ಡಿಯು ಸಮೀಕ್ಷೆ ಭವಿಷ್ಯ ನುಡಿದಿದೆ, ಆದರೆ ಬಿಜೆಪಿ 41% ಮತ ಹಂಚಿಕೆಯೊಂದಿಗೆ ಸುಮಾರು 29 ಸ್ಥಾನಗಳನ್ನು ಪಡೆಯಲಿದೆ ಹಾಗೂ ಕಾಂಗ್ರೆಸ್ ಪಕ್ಷವು 8.30% ಮತ ಹಂಚಿಕೆಯೊಂದಿಗೆ ಯಾವುದೇ ಸ್ಥಾನಗಳನ್ನು ಗೆಲ್ಲುವುದಿಲ್ಲ ಎಂದು ಅಂದಾಜಿಸಲಾಗಿದೆ. ಇತರ ಅಭ್ಯರ್ಥಿಗಳು ಸುಮಾರು 5.80% ಮತ ಹಂಚಿಕೆಯೊಂದಿಗೆ ಯಾವುದೇ ಸ್ಥಾನಗಳನ್ನು ಪಡೆಯುವುದಿಲ್ಲ ಎಂದು ಸಮೀಕ್ಷೆ ಹೇಳಿದೆ.

ಚುನಾವಣೋತ್ತರ ಸಮೀಕ್ಷೆಗಳು ಏನು ಹೇಳುತ್ತವೆ?

2025ರ ದೆಹಲಿ ವಿಧಾನಸಭಾ ಚುನಾವಣೆಯ ವಿವಿಧ ನಿರ್ಗಮನ ಸಮೀಕ್ಷೆಗಳ (ಪೋಲ್ ಆಫ್ ಪೋಲ್ಸ್) ಸರಾಸರಿಯ ಪ್ರಕಾರ, ಭಾರತೀಯ ಜನತಾ ಪಕ್ಷ (ಬಿಜೆಪಿ) 70 ಸದಸ್ಯರ ವಿಧಾನಸಭೆಯಲ್ಲಿ 39 ಸ್ಥಾನಗಳನ್ನು ಪಡೆಯಲಿದೆ ಎಂದು ಅಂದಾಜಿಸಲಾಗಿದೆ, ಇದು ಬಹುಮತಕ್ಕೆ ಅಗತ್ಯವಿರುವ 36 ಸ್ಥಾನಗಳಿಗಿಂತ ಹೆಚ್ಚಾಗಿದೆ. ಆಮ್ ಆದ್ಮಿ ಪಕ್ಷ (ಎಎಪಿ) 30 ಸ್ಥಾನಗಳನ್ನು ಮತ್ತು ಕಾಂಗ್ರೆಸ್ 1 ಸ್ಥಾನವನ್ನು ಪಡೆಯುವ ನಿರೀಕ್ಷೆಯಿದೆ.

ವಿವಿಧ ನಿರ್ಗಮನ ಸಮೀಕ್ಷೆಗಳ ಅಂದಾಜುಗಳು ಈ ಕೆಳಗಿನಂತಿವೆ:

ಚಾಣಕ್ಯ ಸಮೀಕ್ಷೆ: ಬಿಜೆಪಿ: 39-44 ಸ್ಥಾನಗಳು, ಎಎಪಿ: 25-28 ಸ್ಥಾನಗಳು, ಕಾಂಗ್ರೆಸ್: 2-3 ಸ್ಥಾನಗಳು

ಡಿವಿ ರಿಸರ್ಚ್: ಬಿಜೆಪಿ: 36-44 ಸ್ಥಾನಗಳು, ಎಎಪಿ: 26-34 ಸ್ಥಾನಗಳು

ಜೆವಿಸಿ: ಬಿಜೆಪಿ: 39-45 ಸ್ಥಾನಗಳು, ಎಎಪಿ: 22-31 ಸ್ಥಾನಗಳು

ಪಿ ಮಾರ್ಕು: ಬಿಜೆಪಿ: 39-49 ಸ್ಥಾನಗಳು, ಎಎಪಿ: 21-31 ಸ್ಥಾನಗಳು

ಪೋಲ್ ಡೈರಿ ಸಮೀಕ್ಷಾ ಸಂಸ್ಥೆ: ಬಿಜೆಪಿ: 42-50 ಸ್ಥಾನಗಳು, ಎಎಪಿ: 18-25 ಸ್ಥಾನಗಳು

ಜನರ ನಾಡಿಮಿಡಿತ ಸಮೀಕ್ಷೆ: ಬಿಜೆಪಿ: 51-60 ಸ್ಥಾನಗಳು, ಎಎಪಿ: 10-19 ಸ್ಥಾನಗಳು

ಈ ಅಂದಾಜಿನ ಪ್ರಕಾರ 26 ವರ್ಷಗಳ ನಂತರ ದೆಹಲಿಯಲ್ಲಿ ಬಿಜೆಪಿಗೆ ಸರ್ಕಾರ ರಚಿಸುವ ಅವಕಾಶ ಸಿಗಬಹುದು. ನಿರ್ಗಮನ ಸಮೀಕ್ಷೆಗಳು ಯಾವಾಗಲೂ ನಿಖರವಾಗಿರುವುದಿಲ್ಲ ಮತ್ತು ಫೆಬ್ರವರಿ 8 ರಂದು ಮತ ಎಣಿಕೆಯ ನಂತರವೇ ನಿಜವಾದ ಫಲಿತಾಂಶಗಳು ಸ್ಪಷ್ಟವಾಗುತ್ತವೆ.

English summary

Delhi Election 2025 Exit Poll: survey has predicted that AAP will win in Delhi.