CBSE 10ನೇ ತರಗತಿ ಇಂಗ್ಲಿಷ್ ಪರೀಕ್ಷೆಗೆ ಕೇವಲ ಒಂದು ದಿನ ಬಾಕಿ: 80ಕ್ಕೆ 80 ಅಂಕ ಗಳಿಸಲು ಇಲ್ಲಿದೆ ತಜ್ಞರ ಸಲಹೆ

Updated: Thursday, February 19, 2026, 17:23 [IST]

ಸಿಬಿಎಸ್‌ಇ 10ನೇ ತರಗತಿಯ ವಿದ್ಯಾರ್ಥಿಗಳಿಗೆ ಈಗಾಗಲೇ ಶುರುವಾಗಿದೆ. ಶನಿವಾರ, ಫೆಬ್ರವರಿ 21, 2026 ರಂದು ನಡೆಯಲಿರುವ ಇಂಗ್ಲಿಷ್ ಭಾಷೆ ಮತ್ತು ಸಾಹಿತ್ಯ (ಕೋಡ್ ನಂ. 184) ಪರೀಕ್ಷೆಗೆ ದೇಶಾದ್ಯಂತ ಬರೋಬ್ಬರಿ 25 ಲಕ್ಷಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಸಜ್ಜಾಗುತ್ತಿದ್ದಾರೆ. ಬೆಳಿಗ್ಗೆ 10:30 ರಿಂದ ಮಧ್ಯಾಹ್ನ 1:30 ರವರೆಗೆ ನಡೆಯಲಿರುವ ಈ 80 ಅಂಕಗಳ ಪರೀಕ್ಷೆಯು ಓದುವ ಕೌಶಲ್ಯದಿಂದ ಹಿಡಿದು ಸಾಹಿತ್ಯದ ವಿಮರ್ಶೆಯವರೆಗಿನ ಎಲ್ಲವನ್ನೂ ಪರೀಕ್ಷಿಸುತ್ತದೆ. ಪರೀಕ್ಷೆಗೆ ಕೇವಲ ಒಂದು ದಿನಗಳು ಬಾಕಿ ಇರುವ ಈ ಸಮಯದಲ್ಲಿ, ವಿದ್ಯಾರ್ಥಿಗಳಲ್ಲಿ ಸಹಜವಾಗಿಯೇ ಆತಂಕ ಮನೆಮಾಡಿದೆ. ಆದರೆ, ಸರಿಯಾದ ಮಾರ್ಗದಲ್ಲಿ ಓದಿದರೆ ಈ ಪರೀಕ್ಷೆಯನ್ನು ಬಹಳ ಸುಲಭವಾಗಿ ಎದುರಿಸಬಹುದು.

ಈ ನಿಟ್ಟಿನಲ್ಲಿ, ದೆಹಲಿಯ ರಘುಬರ್ ದಯಾಳ್ ಜನ್ ಕಲ್ಯಾಣ್ ಸರ್ಕಾರಿ ಶಾಲೆಯ ಇಂಗ್ಲಿಷ್ ಶಿಕ್ಷಕರಾದ ಸುನೀಲ್ ಕುಮಾರ್ ಅವರು ವಿದ್ಯಾರ್ಥಿಗಳಿಗೆ ಮುಖ್ಯವಾದ ಸಲಹೆಗಳನ್ನು ನೀಡಿದ್ದಾರೆ. ನೂರಾರು ವಿದ್ಯಾರ್ಥಿಗಳಿಗೆ ಮಾರ್ಗದರ್ಶನ ನೀಡಿರುವ ಇವರ ಈ ಸಲಹೆಗಳನ್ನು ಅನುಸರಿಸಿದರೆ, ಪರೀಕ್ಷೆಯಲ್ಲಿ ಅತಿ ಹೆಚ್ಚು ಅಂಕಗಳನ್ನು ಕಲೆಹಾಕಬಹುದು.

ಸೆಕ್ಷನ್ ಎ: ಓದುವ ಕೌಶಲ್ಯ (20 ಅಂಕಗಳು) - ಕಾಪಿ ಮಾಡಬೇಡಿ, ಅರ್ಥೈಸಿಕೊಳ್ಳಿ

ಈ ವಿಭಾಗದಲ್ಲಿ ತಲಾ 10 ಅಂಕಗಳ ಎರಡು ಪ್ಯಾರಾಗಳನ್ನು (Discursive Passage ಮತ್ತು Case-Based Passage) ನೀಡಲಾಗಿರುತ್ತದೆ. "ವಿದ್ಯಾರ್ಥಿಗಳು ಮಾಡುವ ಅತಿದೊಡ್ಡ ತಪ್ಪು ಎಂದರೆ ಪ್ಯಾರಾದಲ್ಲಿರುವ ವಾಕ್ಯಗಳನ್ನು ಯಥಾವತ್ತಾಗಿ ಕಾಪಿ ಮಾಡಿ ಉತ್ತರವಾಗಿ ಬರೆಯುವುದು," ಎನ್ನುತ್ತಾರೆ ಸುನೀಲ್ ಕುಮಾರ್. "ಹೀಗೆ ಮಾಡುವುದರಿಂದ ಹೆಚ್ಚು ಅಂಕ ಸಿಗುವುದಿಲ್ಲ. ಪ್ಯಾರಾದ ಅರ್ಥವನ್ನು ಗ್ರಹಿಸಿಕೊಂಡು, ನಿಮ್ಮದೇ ಸ್ವಂತ ವಾಕ್ಯದಲ್ಲಿ ಉತ್ತರ ಬರೆಯಬೇಕು." ಇತ್ತೀಚಿನ ದಿನಗಳಲ್ಲಿ ಸಿಬಿಎಸ್‌ಇ ಕೇವಲ ಚಿತ್ರ ಆಧಾರಿತ ಪ್ರಶ್ನೆಗಳ ಬದಲಾಗಿ, ಡೇಟಾ ಆಧಾರಿತ ಪ್ರಶ್ನೆಗಳನ್ನು (ಟೇಬಲ್, ಚಾರ್ಟ್ ಅಥವಾ ಅಂಕಿಅಂಶಗಳು) ನೀಡುತ್ತಿದೆ. ಇದನ್ನು ವಿಶ್ಲೇಷಿಸಿ, ಹೋಲಿಕೆ ಮಾಡಿ ಸರಿಯಾಗಿ ಉತ್ತರಿಸುವ ಸಾಮರ್ಥ್ಯವನ್ನು ವಿದ್ಯಾರ್ಥಿಗಳು ಬೆಳೆಸಿಕೊಳ್ಳಬೇಕು.

ಸೆಕ್ಷನ್ ಬಿ: ಬರವಣಿಗೆ ಕೌಶಲ್ಯ ಮತ್ತು ವ್ಯಾಕರಣ (20 ಅಂಕಗಳು) - ರಿಪೋರ್ಟೆಡ್ ಸ್ಪೀಚ್ ಅಭ್ಯಾಸ ಮಾಡಿ

ವ್ಯಾಕರಣ ವಿಭಾಗದಲ್ಲಿ ಕೇಳಲಾಗುವ 12 ಪ್ರಶ್ನೆಗಳ ಪೈಕಿ 10ಕ್ಕೆ ಉತ್ತರಿಸಬೇಕು. ಇದರಲ್ಲಿ ಕನಿಷ್ಠ ನಾಲ್ಕು ಪ್ರಶ್ನೆಗಳು 'ರಿಪೋರ್ಟೆಡ್ ಸ್ಪೀಚ್' (Reported Speech - Direct to indirect) ಕುರಿತಾಗಿರುತ್ತವೆ. ಹಾಗಾಗಿ ಇದರ ಬಗ್ಗೆ ಇಂದೇ ಹೆಚ್ಚು ಅಭ್ಯಾಸ ಮಾಡುವುದು ಒಳಿತು.

ಇನ್ನು ಬರವಣಿಗೆ ವಿಭಾಗದಲ್ಲಿ, ಸಂಪಾದಕರಿಗೆ ಪತ್ರ (Letter to the Editor) ಬರೆಯುವ ಪ್ರಶ್ನೆ ಬರುವ ಸಾಧ್ಯತೆ ಹೆಚ್ಚು. ಇಲ್ಲಿ ಫಾರ್ಮ್ಯಾಟ್‌ಗೆ 1 ಅಂಕ, ಕಂಟೆಂಟ್‌ಗೆ 2 ಅಂಕ, ಐಡಿಯಾಗಳಿಗೆ 1 ಮತ್ತು ನಿಖರತೆಗೆ 1 ಅಂಕ ನಿಗದಿಪಡಿಸಲಾಗಿರುತ್ತದೆ. "ಫಾರ್ಮ್ಯಾಟ್ ಕಡೆ ನಿರ್ಲಕ್ಷ್ಯ ಬೇಡ. ಪ್ರೇಷಕರ ವಿಳಾಸ ಅಥವಾ 'Yours faithfully' ಎಂದು ಬರೆಯಲು ಮರೆಯಬೇಡಿ. ಇವು ಸುಲಭವಾಗಿ ಸಿಗುವ ಉಚಿತ ಅಂಕಗಳು" ಎಂದು ಅವರು ಒತ್ತಿ ಹೇಳುತ್ತಾರೆ.

ಸೆಕ್ಷನ್ ಸಿ: ಸಾಹಿತ್ಯ (40 ಅಂಕಗಳು)

ಪರೀಕ್ಷೆಯಲ್ಲಿ ಅತಿ ಹೆಚ್ಚು ಅಂಕಗಳನ್ನು ಹೊಂದಿರುವ ವಿಭಾಗವಿದು. "ಪ್ರತಿ ಪಾಠದ ಪ್ರಮುಖ ಕೀವರ್ಡ್‌ಗಳನ್ನು ನೆನಪಿಟ್ಟುಕೊಳ್ಳಿ. ಪರೀಕ್ಷಾ ಕೊಠಡಿಯಲ್ಲಿ ನಿಮಗೆ ಒಂದು ಪಾಠದ ಐದಾರು ಪ್ರಬಲ ಪದಗಳು ನೆನಪಾದರೆ, ಇಡೀ ಕಥೆ ತಾನಾಗಿಯೇ ನೆನಪಿಗೆ ಬರುತ್ತದೆ ಎನ್ನುತ್ತಾರೆ ಕುಮಾರ್. 'ಫುಟ್‌ಪ್ರಿಂಟ್ಸ್ ವಿಥೌಟ್ ಫೀಟ್' (Footprints Without Feet) ಪುಸ್ತಕದಿಂದ ಭೋಲಿ (Bholi) ಮತ್ತು ದ ನೆಕ್ಲೇಸ್ (The Necklace), ಹಾಗೂ 'ಫಸ್ಟ್ ಫ್ಲೈಟ್' (First Flight) ಪುಸ್ತಕದಿಂದ ದ ಸರ್ಮನ್ ಅಟ್ ಬೆನಾರಸ್ (The Sermon at Benares), ನೆಲ್ಸನ್ ಮಂಡೇಲಾ - ಲಾಂಗ್ ವಾಕ್ ಟು ಫ್ರೀಡಮ್ (Nelson Mandela - Long Walk to Freedom), ಮತ್ತು ಎ ಲೆಟರ್ ಟು ಗಾಡ್ (A Letter to God) ಪಾಠಗಳತ್ತ ಹೆಚ್ಚು ಗಮನಹರಿಸಲು ಅವರು ಸೂಚಿಸುತ್ತಾರೆ.

ಅಂತಿಮ ಹಂತದ ಸಿದ್ಧತೆ

ಈ ವರ್ಷ 25 ಲಕ್ಷಕ್ಕೂ ಹೆಚ್ಚು ಅಭ್ಯರ್ಥಿಗಳು ಪರೀಕ್ಷೆ ಬರೆಯುತ್ತಿದ್ದು, ಪೈಪೋಟಿ ಜೋರಾಗಿದೆ. ಪರೀಕ್ಷೆಯ ಹಿಂದಿನ ರಾತ್ರಿ ಚೆನ್ನಾಗಿ ನಿದ್ದೆ ಮಾಡಿ, ನಿಮ್ಮ ಪ್ರವೇಶ ಪತ್ರವನ್ನು (Admit Card) ಮರೆಯದೆ ತೆಗೆದುಕೊಂಡು ಬೆಳಿಗ್ಗೆ 10:30 ಕ್ಕೂ ಮುನ್ನವೇ ಪರೀಕ್ಷಾ ಕೇಂದ್ರವನ್ನು ತಲುಪಿ. ಸಿದ್ಧತೆ ಎಷ್ಟು ಮುಖ್ಯವೋ, ಪರೀಕ್ಷೆಯ ಸಮಯದಲ್ಲಿ ಶಾಂತವಾಗಿರುವುದು ಕೂಡ ಅಷ್ಟೇ ಮುಖ್ಯ. ಬರೆಯಲು ಪ್ರಾರಂಭಿಸುವ ಮುನ್ನ ಪ್ರತಿಯೊಂದು ಪ್ರಶ್ನೆಯನ್ನು ಎರಡು ಬಾರಿ ಓದಿ ಅರ್ಥಮಾಡಿಕೊಳ್ಳಿ.