ನೆಹರೂ-ಕಾಮರಾಜ್ ಮಾದರಿ: ರಾಹುಲ್ ಕೈಹಿಡಿಯುವರೇ ಸ್ಟಾಲಿನ್? ಮೈತ್ರಿಕೂಟದ ಹೊಸ ಲೆಕ್ಕಾಚಾರ

ಭಾರತೀಯ ರಾಜಕೀಯದ ಇತಿಹಾಸದಲ್ಲಿ ಜವಾಹರಲಾಲ್ ನೆಹರೂ ಮತ್ತು ಕೆ. ಕಾಮರಾಜ್ ಅವರ ಜೋಡಿ ಅತ್ಯಂತ ಯಶಸ್ವಿ ಎನ್ನಲಾಗಿತ್ತು. ನೆಹರೂ ದೇಶದ ಜನಪ್ರಿಯ ಮುಖವಾಗಿದ್ದರೆ, ಕಾಮರಾಜ್ ಅವರು ಪಕ್ಷವನ್ನು ಸಂಘಟಿಸುವ ಶಕ್ತಿಯಾಗಿದ್ದರು. ಇಂದು ರಾಷ್ಟ್ರ ರಾಜಕಾರಣದಲ್ಲಿ ಅಂತಹದ್ದೇ ಒಂದು ಕುತೂಹಲಕಾರಿ ಪ್ರಶ್ನೆ ಎದ್ದಿದೆ. ಕೇಂದ್ರದಲ್ಲಿ ಬಿಜೆಪಿಯನ್ನು ಎದುರಿಸಲು ರಚನೆಯಾಗಿರುವ 'ಇಂಡಿಯಾ' (I.N.D.I.A) ಮೈತ್ರಿಕೂಟದಲ್ಲಿ, ತಮಿಳುನಾಡು ಮುಖ್ಯಮಂತ್ರಿ ಎಂ.ಕೆ. ಸ್ಟಾಲಿನ್ ಅವರು ರಾಹುಲ್ ಗಾಂಧಿ ಅವರಿಗೆ 'ಕಾಮರಾಜ್' ಅವರಂತೆ ಬೆಂಬಲವಾಗಿ ನಿಲ್ಲಬಲ್ಲರೇ?

ಈ ಪ್ರಶ್ನೆಗೆ ಎರಡು ಆಯಾಮಗಳಿವೆ. ಒಂದು, ಸ್ಟಾಲಿನ್ ಅವರು ಮೈತ್ರಿಕೂಟದ ಸಂಘಟನೆಯ ಜವಾಬ್ದಾರಿ ಹೊತ್ತು ರಾಹುಲ್ ಗಾಂಧಿಯವರನ್ನು ರಾಷ್ಟ್ರೀಯ ನಾಯಕನನ್ನಾಗಿ ಬೆಂಬಲಿಸುತ್ತಾರೆಯೇ ಎಂಬುದು. ಎರಡನೆಯದಾಗಿ, ರಾಹುಲ್ ಗಾಂಧಿ ಅವರು ಅಂತಹ ಅಧಿಕಾರ ಹಂಚಿಕೆಯ ಸೂತ್ರವನ್ನು (ಅಂದರೆ ತಮಗೆ ನಾಯಕತ್ವ, ಇತರರಿಗೆ ಸಂಘಟನಾ ಜವಾಬ್ದಾರಿ) ಒಪ್ಪಿಕೊಳ್ಳುತ್ತಾರೆಯೇ ಎಂಬುದು. ಈ ಜೋಡಿ ಒಂದಾದರೆ ಕಾಂಗ್ರೆಸ್ ನೇತೃತ್ವದ ಮೈತ್ರಿಕೂಟಕ್ಕೆ ಹೊಸ ಶಕ್ತಿ ಬರಬಹುದು ಎಂಬ ಚರ್ಚೆ ಈಗ ಶುರುವಾಗಿದೆ.

ಇತ್ತೀಚೆಗೆ ಹಿರಿಯ ನಾಯಕ ಮಣಿಶಂಕರ್ ಅಯ್ಯರ್ ನೀಡಿರುವ ಹೇಳಿಕೆ ರಾಜಕೀಯ ವಲಯದಲ್ಲಿ ಹೊಸ ಸಂಚಲನ ಮೂಡಿಸಿದೆ. "ಇಂಡಿಯಾ ಮೈತ್ರಿಕೂಟವನ್ನು ಒಗ್ಗೂಡಿಸಲು ಎಂ.ಕೆ. ಸ್ಟಾಲಿನ್ ಅವರೇ ಅತ್ಯಂತ ಸೂಕ್ತ ನಾಯಕ. ಅಂದು ಕಾಮರಾಜ್ ಅವರು ನೆಹರೂ ಅವರ ನಂತರ ಪ್ರಧಾನಿ ಹುದ್ದೆಗೇರುವ ಅವಕಾಶವಿದ್ದರೂ, ಅದನ್ನು ನಿರಾಕರಿಸಿ ಪಕ್ಷದ ಸಂಘಟನೆಗೆ ಒತ್ತು ನೀಡಿದ್ದರು. ಇಂದು ಸ್ಟಾಲಿನ್ ಕೂಡ ರಾಹುಲ್ ಗಾಂಧಿ ಅವರ ಪ್ರಧಾನಿ ಕನಸಿಗೆ ಅಡ್ಡಿಯಾಗದೆ, ಮೈತ್ರಿಕೂಟವನ್ನು ಯಶಸ್ವಿಯಾಗಿ ಮುನ್ನಡೆಸುವ ಸಾಮರ್ಥ್ಯ ಹೊಂದಿದ್ದಾರೆ" ಎಂದು ಅಯ್ಯರ್ ಅಭಿಪ್ರಾಯಪಟ್ಟಿದ್ದಾರೆ.

ಈ ಹಿಂದೆ ಕಾಮರಾಜ್ ಅವರು ಪ್ರಧಾನಿ ಹುದ್ದೆಯ ಪ್ರಸ್ತಾಪ ಬಂದಾಗ, "ನನಗೆ ಇಂಗ್ಲಿಷ್ ಮತ್ತು ಹಿಂದಿ ಬರುವುದಿಲ್ಲ, ನಾನು ಹೇಗೆ ಪ್ರಧಾನಿಯಾಗಲಿ?" ಎಂದು ಸರಳವಾಗಿ ಉತ್ತರಿಸಿದ್ದರು. ಅಯ್ಯರ್ ಅವರ ಪ್ರಕಾರ ಇಂದು ಸ್ಟಾಲಿನ್ ಕೂಡ ಇದೇ ನಿಲುವಿನಲ್ಲಿದ್ದಾರೆ. ಈ ಮಾತಿಗೆ ತಮಿಳುನಾಡಿನ ವಿಸಿಕೆ (VCK) ಪಕ್ಷದ ನಾಯಕ ತಿರುಮಾವಳವನ್ ಕೂಡ ಬೆಂಬಲ ನೀಡಿದ್ದಾರೆ. ಇದು ಕೇವಲ ಹಳೆಯ ನೆನಪಿನ ಮಾತಲ್ಲ, ಬದಲಾಗಿ ವಿರೋಧ ಪಕ್ಷಗಳ ಒಕ್ಕೂಟದ ನಾಯಕತ್ವ ಮತ್ತು ಸಂಘಟನೆಯ ಮುಂದಿರುವ ಒಂದು ಗಂಭೀರ ಪ್ರಶ್ನೆಯಾಗಿದೆ.

ಇಂಡಿಯಾ ಮೈತ್ರಿಕೂಟಕ್ಕೆ ಇಬ್ಬರು ನಾಯಕರ ಅಗತ್ಯವಿದೆಯೇ?

ಇಂದಿನ ರಾಜಕೀಯ ಸನ್ನಿವೇಶದಲ್ಲಿ ರಾಷ್ಟ್ರಮಟ್ಟದಲ್ಲಿ ಜನರನ್ನು ಸೆಳೆಯಲು ಒಬ್ಬ ನಾಯಕ ಮತ್ತು ಮೈತ್ರಿ ಪಕ್ಷಗಳನ್ನು ಒಗ್ಗಟ್ಟಾಗಿ ಮುನ್ನಡೆಸಲು ಮತ್ತೊಬ್ಬ ನಾಯಕನ ಅಗತ್ಯವಿದೆಯೇ ಎಂಬ ಚರ್ಚೆ ಶುರುವಾಗಿದೆ. ನೆಹರೂ ಅವರ ಕಾಲದಲ್ಲಿ ಕಾಮರಾಜ್ ಅವರು ಪ್ರಧಾನಿ ಹುದ್ದೆಯ ಆಸೆ ಪಡದೆ, ಪಕ್ಷದ ಒಳಗಿನ ಭಿನ್ನಾಭಿಪ್ರಾಯಗಳನ್ನು ಬಗೆಹರಿಸುತ್ತಾ ಸಂಘಟನೆಗೆ ಶಕ್ತಿ ತುಂಬುತ್ತಿದ್ದರು. ಇಂದು ತಮಿಳುನಾಡು ಮುಖ್ಯಮಂತ್ರಿ ಎಂ.ಕೆ. ಸ್ಟಾಲಿನ್ ಅವರು ಅದೇ ಪಾತ್ರವನ್ನು ವಹಿಸಬಹುದು ಎಂಬುದು ಹಲವರ ಲೆಕ್ಕಾಚಾರ.

ಸ್ಟಾಲಿನ್ ಅವರು ಪ್ರಾದೇಶಿಕ ಪಕ್ಷಗಳನ್ನು ವಿಶ್ವಾಸಕ್ಕೆ ತೆಗೆದುಕೊಂಡು, ಒಕ್ಕೂಟ ವ್ಯವಸ್ಥೆಯ ಪರವಾಗಿ ಧ್ವನಿ ಎತ್ತುತ್ತಾ ಮೈತ್ರಿಯನ್ನು ಗಟ್ಟಿಗೊಳಿಸುವ ಸಾಮರ್ಥ್ಯ ಹೊಂದಿದ್ದಾರೆ. ಈ ಮೂಲಕ ಸ್ಟಾಲಿನ್ ಅವರು ಮೈತ್ರಿಕೂಟದ ಸಂಘಟನೆಯ ಜವಾಬ್ದಾರಿ ಹೊತ್ತರೆ, ರಾಹುಲ್ ಗಾಂಧಿ ಅವರು ರಾಷ್ಟ್ರೀಯ ಮಟ್ಟದಲ್ಲಿ ಪ್ರಚಾರದ ಪ್ರಮುಖ ಮುಖವಾಗಿ ಮುಂದುವರಿಯಬಹುದು. ಈ 'ಅಧಿಕಾರ ಹಂಚಿಕೆ'ಯ ಸೂತ್ರವು ಬಿಜೆಪಿಯನ್ನು ಎದುರಿಸಲು ವಿರೋಧ ಪಕ್ಷಗಳಿಗೆ ಹೊಸ ಬಲ ನೀಡಬಲ್ಲದು ಎನ್ನಲಾಗುತ್ತಿದೆ.

ಆದರೆ, ನೆಹರೂ ಮತ್ತು ಕಾಮರಾಜ್ ಅವರ ಕಾಲದ ಪರಿಸ್ಥಿತಿಗೂ ಇಂದಿನ ಪರಿಸ್ಥಿತಿಗೂ ಅಜಗಜಾಂತರ ವ್ಯತ್ಯಾಸವಿದೆ. ಅಂದಿನ ಕಾಂಗ್ರೆಸ್ ದೇಶಾದ್ಯಂತ ಏಕೈಕ ದೊಡ್ಡ ಶಕ್ತಿಯಾಗಿತ್ತು. ಇಂದಿನ ಕಾಂಗ್ರೆಸ್ ಇತರ ಪ್ರಾದೇಶಿಕ ಪಕ್ಷಗಳ ಜೊತೆ ಸಮಾನವಾಗಿ ಅಧಿಕಾರ ಹಂಚಿಕೊಳ್ಳಬೇಕಾದ ಅನಿವಾರ್ಯತೆಯಲ್ಲಿದೆ. ಇಂದಿನ ರಾಜಕೀಯವು ಮೈತ್ರಿ ಸರ್ಕಾರಗಳು, ವ್ಯಕ್ತಿ-ಕೇಂದ್ರಿತ ಪ್ರಚಾರಗಳು ಮತ್ತು ಪ್ರಾದೇಶಿಕ ಅಸ್ಮಿತೆಯ ಮೇಲೆ ನಿಂತಿದೆ. ಇಂತಹ ಸಮಯದಲ್ಲಿ ನಾಯಕರ ನಡುವೆ ಜವಾಬ್ದಾರಿಗಳ ಹಂಚಿಕೆ ಸುಲಭದ ಮಾತಲ್ಲ. ಮೈತ್ರಿಕೂಟದ ಒಳಗಿನ ವಿವಿಧ ಪಕ್ಷಗಳನ್ನು ಸಮಾಧಾನಪಡಿಸುತ್ತಾ ಈ 'ಅಧಿಕಾರ ಹಂಚಿಕೆ'ಯ ಸೂತ್ರ ಯಶಸ್ವಿಯಾಗುತ್ತದೆಯೇ ಎಂಬುದು ಬಹುದೊಡ್ಡ ಪರೀಕ್ಷೆಯಾಗಿದೆ.

ಸ್ಟಾಲಿನ್ ರಾಷ್ಟ್ರೀಯ ನಾಯಕರಾಗಿ ಬೆಳೆದ ಬಗೆ

ಇಂದು ಎಂ.ಕೆ. ಸ್ಟಾಲಿನ್ ಅವರ ರಾಜಕೀಯ ವ್ಯಕ್ತಿತ್ವ ಕೇವಲ ತಮಿಳುನಾಡಿಗೆ ಸೀಮಿತವಾಗಿಲ್ಲ. ರಾಜ್ಯಗಳ ಹಕ್ಕುಗಳು, ಸಾಮಾಜಿಕ ನ್ಯಾಯ ಮತ್ತು ಒಕ್ಕೂಟ ವ್ಯವಸ್ಥೆಯ ಪರವಾಗಿ ಅವರು ಎತ್ತುತ್ತಿರುವ ಧ್ವನಿ ಅವರಿಗೆ ರಾಷ್ಟ್ರಮಟ್ಟದಲ್ಲಿ ಮನ್ನಣೆ ತಂದುಕೊಟ್ಟಿದೆ. ಕಾಂಗ್ರೆಸ್ ಎಂದರೆ ತುಸು ಅಂತರ ಕಾಯ್ದುಕೊಳ್ಳುವ ಇತರ ಪ್ರಾದೇಶಿಕ ಪಕ್ಷಗಳ ನಾಯಕರು, ಸ್ಟಾಲಿನ್ ಅವರ ಮೇಲೆ ಹೆಚ್ಚಿನ ನಂಬಿಕೆ ಇಟ್ಟಿದ್ದಾರೆ. ಮಣಿಶಂಕರ್ ಅಯ್ಯರ್ ಹೇಳುವಂತೆ, "ಸ್ಟಾಲಿನ್ ಕೇವಲ ಘೋಷಣೆಗಳನ್ನು ಕೂಗುವ ನಾಯಕನಲ್ಲ, ಬದಲಾಗಿ ಒಕ್ಕೂಟ ವ್ಯವಸ್ಥೆಯ ನಿಜವಾದ ಸಮಸ್ಯೆಗಳ ಬಗ್ಗೆ ಮಾತನಾಡುವ ಪ್ರಬುದ್ಧ ನಾಯಕ."

ಇದುವರೆಗೆ 'ಇಂಡಿಯಾ' ಮೈತ್ರಿಕೂಟವು ವೇದಿಕೆಯ ಮೇಲೆ ಒಗ್ಗಟ್ಟು ಪ್ರದರ್ಶಿಸಿದೆಯಾದರೂ, ಅದನ್ನು ಕಾರ್ಯರೂಪಕ್ಕೆ ತರುವಲ್ಲಿ ಸ್ವಲ್ಪ ಹಿಂದೆ ಬಿದ್ದಿದೆ. ರಾಹುಲ್ ಗಾಂಧಿ ಅವರು ಜನರನ್ನು ಸೆಳೆಯುವಲ್ಲಿ ಮತ್ತು ಬಿಜೆಪಿಯ ವಿರುದ್ಧ ಸೈದ್ಧಾಂತಿಕ ಹೋರಾಟ ನಡೆಸುವಲ್ಲಿ ಯಶಸ್ವಿಯಾಗಿದ್ದಾರೆ. ಆದರೆ, ಸೀಟು ಹಂಚಿಕೆಯಂತಹ ಕಠಿಣ ಮಾತುಕತೆಗಳನ್ನು ನಡೆಸುವುದು ಮತ್ತು ರಾಜ್ಯಗಳ ರಾಜಕೀಯ ಸೂಕ್ಷ್ಮತೆಗಳನ್ನು ನಿಭಾಯಿಸುವುದು ಸುಲಭದ ಕೆಲಸವಲ್ಲ. ಈ ಹಂತದಲ್ಲಿ ಸ್ಟಾಲಿನ್ ಅವರ ಅನುಭವ ಮತ್ತು ರಾಜಕೀಯ ಚಾಣಾಕ್ಷತನ ಮೈತ್ರಿಕೂಟಕ್ಕೆ ಆನೆಯ ಬಲ ನೀಡಬಲ್ಲದು. ಇಲ್ಲಿನ ಸೂತ್ರ ಬಹಳ ಸರಳ: ರಾಹುಲ್ ಗಾಂಧಿ ಅವರು ದೇಶದ ಜನರಿಗೆ ಮೈತ್ರಿಕೂಟದ ಸಂದೇಶ ತಲುಪಿಸಿದರೆ, ಸ್ಟಾಲಿನ್ ಅವರು ಮೈತ್ರಿಯ ಆಂತರಿಕ ಲೆಕ್ಕಾಚಾರಗಳನ್ನು ನಿಭಾಯಿಸಬಹುದು.

ರಾಹುಲ್ ಗಾಂಧಿ ಅವರ ಮುಂದಿರುವ ಸವಾಲು

ಈ ಹೊಸ ರಾಜಕೀಯ ಮಾದರಿಯ ಯಶಸ್ಸು ಕೇವಲ ಇತಿಹಾಸದ ಉದಾಹರಣೆಗಳ ಮೇಲೆ ನಿಂತಿಲ್ಲ; ಬದಲಾಗಿ ಇಂದಿನ ನಾಯಕರ ಪರಸ್ಪರ ನಂಬಿಕೆಯ ಮೇಲೆ ನಿಂತಿದೆ. ರಾಹುಲ್ ಗಾಂಧಿ ಅವರು ರಾಷ್ಟ್ರೀಯ ನಾಯಕತ್ವವನ್ನು ತಮ್ಮಲ್ಲೇ ಉಳಿಸಿಕೊಂಡು, ಮೈತ್ರಿಕೂಟವನ್ನು ಮುನ್ನಡೆಸುವ ಜವಾಬ್ದಾರಿಯನ್ನು ಸ್ಟಾಲಿನ್ ಅವರಂತಹ ಪ್ರಾದೇಶಿಕ ನಾಯಕನಿಗೆ ಬಿಟ್ಟುಕೊಡಲು ಸಿದ್ಧರಿದ್ದಾರೆಯೇ? ಎಂಬುದು ಇಲ್ಲಿನ ಅಸಲಿ ಪ್ರಶ್ನೆ. ಅಂದರೆ, ಅಧಿಕಾರವನ್ನು ಹಂಚಿಕೊಳ್ಳುವ ಅಥವಾ ವಿಕೇಂದ್ರೀಕರಿಸುವ ಮನಸ್ಥಿತಿ ರಾಹುಲ್ ಅವರಿಗಿದೆಯೇ ಎಂಬುದರ ಮೇಲೆ ಈ ಮೈತ್ರಿಯ ಭವಿಷ್ಯ ನಿರ್ಧಾರವಾಗಲಿದೆ.

ರಾಹುಲ್ ಗಾಂಧಿ ಅವರ ಇಂದಿನವರೆಗಿನ ರಾಜಕೀಯ ಶೈಲಿಯನ್ನು ನೋಡಿದರೆ, ಅವರು ಜನಸಂಪರ್ಕ ಯಾತ್ರೆಗಳು ಮತ್ತು ಸೈದ್ಧಾಂತಿಕ ಹೋರಾಟಕ್ಕೆ ಹೆಚ್ಚು ಒತ್ತು ನೀಡಿದ್ದಾರೆ. ಮೈತ್ರಿಕೂಟದ ನಿರ್ಧಾರಗಳಲ್ಲಿ ತಮಗೆ ಸಮಾನವಾದ ಸ್ಥಾನವನ್ನು ಮತ್ತೊಬ್ಬ ನಾಯಕನಿಗೆ ನೀಡುವುದು ಅವರಿಗೆ ಸವಾಲಾಗಬಹುದು. ಹಿಂದೆ ಯುಪಿಎ (UPA) ಸರ್ಕಾರದಲ್ಲಿ ಸೋನಿಯಾ ಗಾಂಧಿ ಅವರು ಪಕ್ಷದ ನಿಯಂತ್ರಣ ಹೊಂದಿದ್ದರೆ, ಮನಮೋಹನ್ ಸಿಂಗ್ ಅವರು ಆಡಳಿತವನ್ನು ನೋಡಿಕೊಳ್ಳುತ್ತಿದ್ದರು. ಈ ಸ್ಪಷ್ಟ ವಿಭಜನೆಯೇ ಅಂದಿನ ಯಶಸ್ಸಿಗೆ ಕಾರಣವಾಗಿತ್ತು. ಈಗ ಸ್ಟಾಲಿನ್ ಮತ್ತು ರಾಹುಲ್ ಗಾಂಧಿ ನಡುವೆಯೂ ಇಂತಹದ್ದೇ ಒಂದು ಹೊಂದಾಣಿಕೆಯ ಅಗತ್ಯವಿದೆ.

ತಮಿಳುನಾಡಿನ ರಾಜಕೀಯ ಮತ್ತು ಮೈತ್ರಿಯ ಬಿಕ್ಕಟ್ಟು

ರಾಷ್ಟ್ರ ಮಟ್ಟದಲ್ಲಿ ಸ್ಟಾಲಿನ್ ಮತ್ತು ರಾಹುಲ್ ಒಂದಾಗುವ ಚರ್ಚೆ ನಡೆಯುತ್ತಿದ್ದರೆ, ತಮಿಳುನಾಡಿನ ನೆಲದಲ್ಲಿ ಕಾಂಗ್ರೆಸ್ ಮತ್ತು ಡಿಎಂಕೆ ನಡುವೆ ಬಿರುಕು ಮೂಡುತ್ತಿದೆ. 2026ರ ವಿಧಾನಸಭಾ ಚುನಾವಣೆಗೆ ಮುನ್ನ ತಮಿಳುನಾಡಿನಲ್ಲಿ ಸೀಟು ಹಂಚಿಕೆ ಮತ್ತು ಅಧಿಕಾರ ಹಂಚಿಕೆಯ ವಿಚಾರದಲ್ಲಿ ಭಿನ್ನಾಭಿಪ್ರಾಯಗಳು ಸ್ಫೋಟಗೊಂಡಿವೆ.

ಕಾಂಗ್ರೆಸ್ ಸಂಸದರಾದ ಮಾಣಿಕ್ಕಮ್‌ ಟ್ಯಾಗೋರ್ ಮತ್ತು ಕಾರ್ತಿ ಚಿದಂಬರಂ ಅವರಂತಹ ನಾಯಕರು ಬಹಿರಂಗವಾಗಿಯೇ ಡಿಎಂಕೆ ಬಳಿ ಅಧಿಕಾರದಲ್ಲಿ ಪಾಲು ಕೇಳುತ್ತಿದ್ದಾರೆ. "ನಾವು ಕೇವಲ ಮತ ಹಾಕುವ ಯಂತ್ರಗಳಲ್ಲ, ಮೈತ್ರಿ ಸರ್ಕಾರದಲ್ಲಿ ನಮಗೂ ಸಚಿವ ಸ್ಥಾನ ಬೇಕು," ಎಂದು ಕಾಂಗ್ರೆಸ್ ನಾಯಕರು ಒತ್ತಾಯಿಸುತ್ತಿದ್ದಾರೆ. ಆದರೆ, ಮುಖ್ಯಮಂತ್ರಿ ಎಂ.ಕೆ. ಸ್ಟಾಲಿನ್ ಅವರು ಇದನ್ನು ಕಡ್ಡಿ ಮುರಿದಂತೆ ತಳ್ಳಿಹಾಕಿದ್ದಾರೆ. "ತಮಿಳುನಾಡಿನಲ್ಲಿ ಅಧಿಕಾರ ಹಂಚಿಕೆ ಸಾಧ್ಯವಿಲ್ಲ, ಡಿಎಂಕೆ ನೇತೃತ್ವದಲ್ಲೇ ಸರ್ಕಾರ ನಡೆಯಲಿದೆ. ರಾಹುಲ್ ಗಾಂಧಿ ಅವರಿಗೂ ಈ ಬಗ್ಗೆ ಯಾವುದೇ ತಕರಾರಿಲ್ಲ," ಎಂದು ಸ್ಟಾಲಿನ್ ಖಡಕ್ ಆಗಿ ಹೇಳಿದ್ದಾರೆ.

ಇದು ಕಾಂಗ್ರೆಸ್ ಪಕ್ಷವನ್ನು ಇಕ್ಕಟ್ಟಿಗೆ ಸಿಲುಕಿಸಿದೆ. ಕಾಂಗ್ರೆಸ್ ರಾಜ್ಯದಲ್ಲಿ ತನ್ನ ಸ್ವಂತ ಬಲವನ್ನು ಹೆಚ್ಚಿಸಿಕೊಳ್ಳಲು ಬಯಸುತ್ತಿದೆ, ಆದರೆ ಇದರಿಂದ ದಶಕಗಳ ಹಳೆಯ ಡಿಎಂಕೆ ಮೈತ್ರಿ ಮುರಿಯುವ ಅಪಾಯವಿದೆ. ರಾಷ್ಟ್ರ ಮಟ್ಟದಲ್ಲಿ ಮೈತ್ರಿಕೂಟದ ಸಂಘಟಕರಾಗಿ ಸ್ಟಾಲಿನ್ ಅವರನ್ನು ನೋಡುತ್ತಿರುವ ಕಾಂಗ್ರೆಸ್, ರಾಜ್ಯ ಮಟ್ಟದಲ್ಲಿ ಅದೇ ಸ್ಟಾಲಿನ್ ಅವರ ವಿರುದ್ಧ ಸೆಣಸಾಡಬೇಕಾದ ವಿಚಿತ್ರ ಪರಿಸ್ಥಿತಿ ನಿರ್ಮಾಣವಾಗಿದೆ.

ದಳಪತಿ ವಿಜಯ್ ಅವರ ಟಿವಿ-ಕೆ (TVK) ಪಕ್ಷದ ಪ್ರಭಾವ

ಈ ಎಲ್ಲಾ ಗೊಂದಲಗಳ ನಡುವೆ, ಖ್ಯಾತ ನಟ ವಿಜಯ್ ಅವರ 'ತಮಿಳಗ ವೆಟ್ರಿ ಕಳಗಂ' (TVK) ಪಕ್ಷ ತಮಿಳುನಾಡು ರಾಜಕೀಯದಲ್ಲಿ ಹೊಸ ಸಂಚಲನ ಮೂಡಿಸಿದೆ. ಯುವಕರು ಮತ್ತು ಮಹಿಳೆಯರ ದೊಡ್ಡ ಬೆಂಬಲ ಹೊಂದಿರುವ ಟಿವಿ-ಕೆ, 2026ರ ಚುನಾವಣೆಯಲ್ಲಿ ಪ್ರಮುಖ ಪಾತ್ರ ವಹಿಸುವ ಲಕ್ಷಣಗಳಿವೆ. ಇತ್ತೀಚಿನ ಸಂದರ್ಶನವೊಂದರಲ್ಲಿ ಕಾಂಗ್ರೆಸ್ ನಾಯಕ ಕಾರ್ತಿ ಚಿದಂಬರಂ ಅವರು, "ವಿಜಯ್ ಅವರು ಬಹಳ ಜನಪ್ರಿಯ ನಟ. ಅವರು ಖಂಡಿತವಾಗಿಯೂ ಜಾತ್ಯತೀತವಾಗಿ ಎಲ್ಲಾ ಪಕ್ಷಗಳ ಮತಗಳನ್ನು ಒಡೆಯಲಿದ್ದಾರೆ. ಆದರೆ ಆ ಮತಗಳು ಸೀಟುಗಳಾಗಿ ಪರಿವರ್ತನೆಯಾಗುತ್ತವೆಯೇ ಎಂಬುದು ಕಾದು ನೋಡಬೇಕು," ಎಂದಿದ್ದಾರೆ.

ಕಾಂಗ್ರೆಸ್‌ನ ಕೆಲವು ಸ್ಥಳೀಯ ನಾಯಕರು (ಉದಾಹರಣೆಗೆ ಪಳನಿ ಕುಮಾರ್) ಡಿಎಂಕೆ ಜೊತೆಗಿನ ಮೈತ್ರಿಯನ್ನು ಕಡಿದುಕೊಂಡು ವಿಜಯ್ ಅವರ ಪಕ್ಷದೊಂದಿಗೆ ಕೈಜೋಡಿಸಬೇಕು ಎಂದು ಬಹಿರಂಗವಾಗಿ ಹೇಳುತ್ತಿದ್ದಾರೆ. "ವಿಜಯ್ ಅವರ ಜೊತೆ ಹೋದರೆ ನಾವು 70 ಸೀಟುಗಳನ್ನು ಗೆಲ್ಲಬಹುದು ಮತ್ತು ಗೌರವಯುತವಾಗಿರಬಹುದು," ಎಂದು ಅವರು ವಾದಿಸುತ್ತಿದ್ದಾರೆ. ಟಿವಿ-ಕೆ ನಾಯಕರು ಕೂಡ ಕಾಂಗ್ರೆಸ್‌ಗೆ ಬೆಂಬಲ ಸೂಚಿಸಿದ್ದು, "2006ರಲ್ಲಿ ಸೋನಿಯಾ ಗಾಂಧಿ ಅವರು ಡಿಎಂಕೆಯನ್ನು ಉಳಿಸದಿದ್ದರೆ, ಡಿಎಂಕೆ ಎಂದಿಗೋ ಮುಗಿದುಹೋಗುತ್ತಿತ್ತು," ಎಂದು ನೆನಪಿಸಿದ್ದಾರೆ.

ಕಾಂಗ್ರೆಸ್ ಪಕ್ಷವು ತಮಿಳುನಾಡಿನಲ್ಲಿ ತನ್ನ ಅಸ್ತಿತ್ವವನ್ನು ಮರಳಿ ಪಡೆಯಲು ಟಿವಿ-ಕೆ ಜೊತೆ ಹೋಗುವ ಸಾಹಸ ಮಾಡುತ್ತದೆಯೇ ಅಥವಾ ಸುರಕ್ಷಿತವಾಗಿ ಡಿಎಂಕೆ ಜೊತೆಯಲ್ಲೇ ಉಳಿಯುತ್ತದೆಯೇ ಎಂಬುದು ದೊಡ್ಡ ಪ್ರಶ್ನೆ. ಒಂದು ವೇಳೆ ಕಾಂಗ್ರೆಸ್ ಡಿಎಂಕೆ ಮೈತ್ರಿಯಿಂದ ಹೊರಬಂದರೆ, ಅದು ರಾಷ್ಟ್ರ ಮಟ್ಟದಲ್ಲಿ ಇಂಡಿಯಾ ಮೈತ್ರಿಕೂಟದ ಮೇಲೆ ತೀವ್ರ ಪರಿಣಾಮ ಬೀರಲಿದೆ.

ಎಂ.ಕೆ. ಸ್ಟಾಲಿನ್ ಅವರು ರಾಹುಲ್ ಗಾಂಧಿ ಪಾಲಿಗೆ 'ಇಂದಿನ ಕಾಮರಾಜ್' ಆಗಬಲ್ಲರು ಎಂಬ ಮಾತು ಕೇಳಲು ಆಕರ್ಷಕವಾಗಿದ್ದರೂ, ಅದರ ಯಶಸ್ಸು ಹಲವು ಸವಾಲುಗಳ ಮೇಲೆ ನಿಂತಿದೆ. ಕಾಂಗ್ರೆಸ್ ಪಕ್ಷವು ಒಂದು ಕಡೆ ರಾಜ್ಯಗಳಲ್ಲಿ ಸ್ವತಂತ್ರವಾಗಿ ಬೆಳೆಯಲು ಹವಣಿಸುತ್ತಾ, ಇನ್ನೊಂದು ಕಡೆ ರಾಷ್ಟ್ರಮಟ್ಟದಲ್ಲಿ ಸುಗಮ ಮೈತ್ರಿಯನ್ನು ನಿರೀಕ್ಷಿಸುವುದು ಅಷ್ಟು ಸುಲಭವಲ್ಲ.

ಅಂತಿಮವಾಗಿ, ಸ್ಟಾಲಿನ್ ಅವರು ಕಾಮರಾಜ್ ಪಾತ್ರ ವಹಿಸುತ್ತಾರೋ ಇಲ್ಲವೋ ಎಂಬುದಕ್ಕಿಂತ, ರಾಹುಲ್ ಗಾಂಧಿ ಮತ್ತು ಕಾಂಗ್ರೆಸ್ ಹೈಕಮಾಂಡ್ ತಮ್ಮ ಅಧಿಕಾರವನ್ನು ಹಂಚಿಕೊಳ್ಳಲು ಎಷ್ಟು ಸಿದ್ಧವಿದೆ ಎಂಬುದು ಇಲ್ಲಿ ಮುಖ್ಯವಾಗುತ್ತದೆ. ಪಕ್ಷವು ತನ್ನ ವೈಯಕ್ತಿಕ ಮಹತ್ವಾಕಾಂಕ್ಷೆಗಳನ್ನು ನಿಯಂತ್ರಣದಲ್ಲಿಟ್ಟುಕೊಂಡು, ಪ್ರಾದೇಶಿಕ ನಾಯಕರನ್ನು ವಿಶ್ವಾಸಕ್ಕೆ ತೆಗೆದುಕೊಂಡರೆ ಮಾತ್ರ 'ಇಂಡಿಯಾ' ಮೈತ್ರಿಕೂಟವು ಮುಂಬರುವ ದಿನಗಳಲ್ಲಿ ಪ್ರಬಲ ಶಕ್ತಿಯಾಗಿ ಹೊರಹೊಮ್ಮಲು ಸಾಧ್ಯ.

ಬರಹ: ಕೀರ್ತಿ ಪಾಂಡೆ

(ಲೇಖಕಿ ಕೀರ್ತಿ ಪಾಂಡೆ ಹಿರಿಯ ಪತ್ರಕರ್ತೆ ಹಾಗೂ ಲೇಖಕಿ. ರಾಜಕೀಯ, ಸಮಾಜ, ಸಂಸ್ಕೃತಿ ಮತ್ತು ಸಾರ್ವಜನಿಕ ನೀತಿ ಕ್ಷೇತ್ರಗಳಲ್ಲಿ ಸಂಶೋಧನಾಧಾರಿತ ವಿಶ್ಲೇಷಣೆಗಾಗಿ ಪ್ರಸಿದ್ಧರು. ಟೆಲಿವಿಷನ್ ಹಾಗೂ ಡಿಜಿಟಲ್ ಮಾಧ್ಯಮಗಳಲ್ಲಿ ಅನುಭವ ಹೊಂದಿರುವ ಅವರು ಆಡಳಿತ, ಆರೋಗ್ಯ, ಲಿಂಗಸಮಾನತೆ ಮತ್ತು ಆರ್ಥಿಕ ವಿಷಯಗಳಲ್ಲಿ ವರದಿಗಾರಿಕೆ ಮಾಡಿದ್ದಾರೆ.)

English summary

Will Stalin be the 'Kamaraj' to Rahul Gandhi? An analysis of the INDIA bloc's leadership model, the Nehru-Kamaraj parallel, and the growing Congress-DMK rift ahead of the 2026 Tamil Nadu elections.