Bengaluru-Hyderabad ಬುಲೆಟ್ ಟ್ರೈನ್: ಕೇವಲ 2 ಗಂಟೆ ಪ್ರಯಾಣ, 626 ಕಿಮೀ ಉದ್ದದ ಹಾದಿಯಲ್ಲಿ 12 ನಿಲ್ದಾಣಗಳು

ಬೆಂಗಳೂರು: ದಕ್ಷಿಣ ಭಾರತದ ಪ್ರಮುಖ ಐಟಿ ಹಬ್‌ಗಳಾದ ಬೆಂಗಳೂರು ಮತ್ತು ಹೈದರಾಬಾದ್ ನಡುವೆ ಸಂಪರ್ಕ ನೀಡುವ ಮಹತ್ವಾಕಾಂಕ್ಷೆಯ 'ಬೆಂಗಳೂರು-ಹೈದರಾಬಾದ್ ಬುಲೆಟ್ ರೈಲು' (ಹೈಸ್ಪೀಡ್ ರೈಲು ಕಾರಿಡಾರ್) ಯೋಜನೆಗೆ ಇದೀಗ ಭಾರಿ ವೇಗ ಸಿಕ್ಕಿದೆ. ಈ ಯೋಜನೆಗೆ ಸಂಬಂಧಿಸಿದಂತೆ ಕರ್ನಾಟಕದಲ್ಲಿ ಭೂಸ್ವಾಧೀನ ಪ್ರಕ್ರಿಯೆ ಮತ್ತು ಮಾರ್ಗ ನಕ್ಷೆ ಸಿದ್ಧಪಡಿಸುವ ಕುರಿತು ಕೇಂದ್ರ ರೈಲ್ವೆ ಅಧಿಕಾರಿಗಳು ರಾಜ್ಯ ಸರ್ಕಾರದೊಂದಿಗೆ ಮಹತ್ವದ ಚರ್ಚೆಗಳನ್ನು ಆರಂಭಿಸಿದ್ದಾರೆ.

ಫೆಬ್ರವರಿ 1ರಂದು ಮಂಡನೆಯಾದ 2026-27ನೇ ಸಾಲಿನ ಕೇಂದ್ರ ಬಜೆಟ್‌ನಲ್ಲಿ ಈ ಹೈಸ್ಪೀಡ್ ರೈಲು ಕಾರಿಡಾರ್ ಅನ್ನು ಅಧಿಕೃತವಾಗಿ ಘೋಷಿಸಲಾಗಿತ್ತು. ಒಟ್ಟು 626 ಕಿಲೋಮೀಟರ್ ಉದ್ದದ ಈ ಬೃಹತ್ ಕಾರಿಡಾರ್ ನಿರ್ಮಾಣಗೊಂಡರೆ, ಬೆಂಗಳೂರು ಮತ್ತು ಹೈದರಾಬಾದ್ ನಡುವಿನ ಪ್ರಯಾಣದ ಸಮಯ ಕೇವಲ 2 ಗಂಟೆಗಳಿಗೆ ಇಳಿಕೆಯಾಗಲಿದೆ. ಇದು ದಕ್ಷಿಣ ಭಾರತದಲ್ಲಿ ಯೋಜಿಸಲಾಗಿರುವ ಅತ್ಯಂತ ವೇಗದ ಅಂತರ್‌-ನಗರ (Inter-city) ಸಂಪರ್ಕ ಜಾಲಗಳಲ್ಲಿ ಒಂದಾಗಲಿದೆ.

ಕೇವಲ 2 ಗಂಟೆಯಲ್ಲಿ ಹೈದರಾಬಾದ್ ಪ್ರಯಾಣ

ಪ್ರಸ್ತುತ ಬೆಂಗಳೂರಿನಿಂದ ಹೈದರಾಬಾದ್‌ಗೆ ರೈಲಿನಲ್ಲಿ ಪ್ರಯಾಣಿಸಲು ಸೇವೆಯ ಆಧಾರದ ಮೇಲೆ ಸುಮಾರು 8 ರಿಂದ 19 ಗಂಟೆಗಳ ಸಮಯ ಬೇಕಾಗುತ್ತದೆ. ಅತ್ಯಂತ ವೇಗದ ರೈಲು ಎನಿಸಿಕೊಂಡಿರುವ 'ವಂದೇ ಭಾರತ್ ಎಕ್ಸ್‌ಪ್ರೆಸ್' ಕೂಡ ಈ ಎರಡು ನಗರಗಳನ್ನು ತಲುಪಲು 8 ಗಂಟೆಗಳಿಗೂ ಹೆಚ್ಚು ಸಮಯ ತೆಗೆದುಕೊಳ್ಳುತ್ತದೆ. ಇನ್ನು ವಿಮಾನದ ಮೂಲಕ ಪ್ರಯಾಣಿಸಿದರೆ ಆಕಾಶದಲ್ಲಿ ಕೇವಲ 1 ಗಂಟೆ 15 ನಿಮಿಷ ಬೇಕಾಗಬಹುದು. ಆದರೆ ವಿಮಾನ ನಿಲ್ದಾಣಕ್ಕೆ ಹೋಗುವ ಟ್ರಾಫಿಕ್, ಚೆಕ್-ಇನ್ ಮತ್ತು ಭದ್ರತಾ ತಪಾಸಣೆ ಸೇರಿ ಒಟ್ಟಾರೆ ಪ್ರಯಾಣದ ಸಮಯ ವಿಪರೀತವಾಗಿ ಹೆಚ್ಚಾಗುತ್ತದೆ. ಆದರೆ, ಹೊಸ ಬುಲೆಟ್ ರೈಲು ಯೋಜನೆಯು ನೇರವಾಗಿ ಒಂದು ನಗರದ ಕೇಂದ್ರದಿಂದ ಮತ್ತೊಂದು ನಗರದ ಕೇಂದ್ರಕ್ಕೆ ಕೇವಲ 2 ಗಂಟೆಗಳಲ್ಲಿ ಸಂಪರ್ಕ ಕಲ್ಪಿಸುವ ಭರವಸೆ ನೀಡಿದೆ. ಇದು ಐಟಿ ವೃತ್ತಿಪರರು, ಉದ್ಯಮಿಗಳು ಮತ್ತು ನಿರಂತರ ಪ್ರಯಾಣಿಕರಿಗೆ ಭಾರಿ ಅನುಕೂಲ ಮಾಡಿಕೊಡಲಿದೆ.

ಕರ್ನಾಟಕದಲ್ಲಿ ಬರಲಿದೆ 3 ನಿಲ್ದಾಣಗಳು

ನಮ್ಮ ರಾಜ್ಯದಲ್ಲಿ ಪ್ರಮುಖವಾಗಿ 3 ನಿಲ್ದಾಣಗಳನ್ನು ಗುರುತಿಸಲಾಗಿದೆ:

1. ದೇವನಹಳ್ಳಿ: ಬೆಂಗಳೂರು ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದ ಹತ್ತಿರ.

2. ಅಲಿಪುರ: ಗೌರಿಬಿದನೂರು ತಾಲ್ಲೂಕು.

3. ಕೋಡಿಹಳ್ಳಿ: ಬೆಂಗಳೂರು ಗ್ರಾಮಾಂತರ ಜಿಲ್ಲೆ.

ವಿಶೇಷವಾಗಿ ದೇವನಹಳ್ಳಿ ನಿಲ್ದಾಣವು ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದ ಸಮೀಪವಿರುವುದರಿಂದ, ವಿಮಾನ ಪ್ರಯಾಣಿಕರಿಗೂ ಇದು ವರದಾನವಾಗಲಿದೆ.

ಇತರ ಪ್ರಮುಖ ನಿಲ್ದಾಣಗಳು:

ರೈಲು ಕರ್ನಾಟಕವನ್ನು ಪ್ರವೇಶಿಸುವ ಮೊದಲು ಈ ಕೆಳಗಿನ ನಗರಗಳಲ್ಲಿ ನಿಲುಗಡೆ ಹೊಂದಲಿದೆ:

ಮಹಬೂಬ್‌ನಗರ (ತೆಲಂಗಾಣ)

ಕರ್ನೂಲ್ (ಆಂಧ್ರಪ್ರದೇಶ)

ಅನಂತಪುರ (ಆಂಧ್ರಪ್ರದೇಶ)

ಹಿಂದೂಪುರ (ಆಂಧ್ರಪ್ರದೇಶ)

ಈ ಹೈಸ್ಪೀಡ್ ರೈಲು ಗರಿಷ್ಠ 350 ಕಿ.ಮೀ. (ವಿನ್ಯಾಸದ ವೇಗ) ಹಾಗೂ ಸರಾಸರಿ 320 ಕಿ.ಮೀ. ಕಾರ್ಯಾಚರಣೆಯ ವೇಗದಲ್ಲಿ ಚಲಿಸುವ ನಿರೀಕ್ಷೆಯಿದೆ. ಈ ಕಾರಿಡಾರ್ ಅನ್ನು ಅಸ್ತಿತ್ವದಲ್ಲಿರುವ ರೈಲ್ವೆ ಮಾರ್ಗಗಳಿಗಿಂತ ಪ್ರತ್ಯೇಕವಾಗಿ, ಸಂಪೂರ್ಣ ಹೊಸ ಮಾರ್ಗದಲ್ಲಿ ಎತ್ತರದ (Elevated) ಟ್ರ್ಯಾಕ್‌ಗಳ ಮೇಲೆ ನಿರ್ಮಿಸಲಾಗುತ್ತದೆ. ಪ್ರಸ್ತುತ ರೈಟ್ಸ್ ಲಿಮಿಟೆಡ್ ಸಂಸ್ಥೆಯು ಅಂತಿಮ ಹಂತದ ಸಮೀಕ್ಷೆಗಳನ್ನು ನಡೆಸುತ್ತಿದ್ದು, ಇದೇ 2026ರ ಮಾರ್ಚ್ ವೇಳೆಗೆ ವಿವರವಾದ ಯೋಜನಾ ವರದಿ ಸಲ್ಲಿಕೆಯಾಗುವ ಸಾಧ್ಯತೆಯಿದೆ.

ಕರ್ನಾಟಕದಲ್ಲಿ ಭೂಸ್ವಾಧೀನ ಪ್ರಕ್ರಿಯೆಗೆ ಚಾಲನೆ

ಯೋಜನೆಯ ಯಶಸ್ಸಿಗೆ ಭೂಸ್ವಾಧೀನವೇ ಪ್ರಮುಖ ಸವಾಲಾಗಿದ್ದು, ಕರ್ನಾಟಕದಲ್ಲಿ ಈ ಪ್ರಕ್ರಿಯೆಯು ಈಗ ಕೇಂದ್ರದ ಪ್ರಮುಖ ಗಮನವಾಗಿದೆ. ಸಮನ್ವಯ ಮತ್ತು ಅನುಮೋದನೆಗಳನ್ನು ತ್ವರಿತಗೊಳಿಸಲು ನೋಡಲ್ ಅಧಿಕಾರಿಯೊಬ್ಬರನ್ನು ನೇಮಿಸುವಂತೆ ಕೇಂದ್ರವು ರಾಜ್ಯ ಸರ್ಕಾರವನ್ನು ಕೋರಿದೆ. ಇತ್ತೀಚೆಗಷ್ಟೇ ದಕ್ಷಿಣ ಮಧ್ಯ ರೈಲ್ವೆಯ ಉನ್ನತ ಅಧಿಕಾರಿಗಳ ತಂಡವು ಬೆಂಗಳೂರಿಗೆ ಆಗಮಿಸಿ ರಾಜ್ಯ ಸರ್ಕಾರದ ಹಿರಿಯ ಅಧಿಕಾರಿಗಳೊಂದಿಗೆ ಸಭೆಗಳನ್ನು ಯಶಸ್ವಿಯಾಗಿ ಮುಗಿಸಿದೆ.

ಈ ಕುರಿತು ಪ್ರತಿಕ್ರಿಯಿಸಿರುವ ಕರ್ನಾಟಕ ಮೂಲಸೌಕರ್ಯ ಅಭಿವೃದ್ಧಿ ಸಚಿವ ಎಂ.ಬಿ. ಪಾಟೀಲ್, ಈ ಪ್ರತಿಷ್ಠಿತ ಯೋಜನೆಗೆ ರಾಜ್ಯದಿಂದ ಸಂಪೂರ್ಣ ಸಹಕಾರ ನೀಡುವುದಾಗಿ ಭರವಸೆ ನೀಡಿದ್ದಾರೆ. ಈ ಬುಲೆಟ್ ರೈಲು ಯೋಜನೆಯು ನಿಗದಿತ ಸಮಯಕ್ಕೆ ಪೂರ್ಣಗೊಂಡರೆ, ದಕ್ಷಿಣ ಭಾರತದ ಆರ್ಥಿಕತೆಗೆ ದೊಡ್ಡ ಮಟ್ಟದ ಬೂಸ್ಟ್ ಸಿಗುವುದರ ಜೊತೆಗೆ, ಎರಡು ಮಹಾನಗರಗಳ ನಡುವಿನ ವಾಣಿಜ್ಯ ಮತ್ತು ಔದ್ಯೋಗಿಕ ಸಂಬಂಧಗಳು ಮತ್ತಷ್ಟು ಗಟ್ಟಿಯಾಗಲಿವೆ.

English summary

The proposed 626 km Bengaluru-Hyderabad bullet train project is gaining momentum as the Centre begins land acquisition talks with the Karnataka government. This high-speed rail will reduce travel time between the two tech cities to just two hours.