2026ರ ಆರ್ಥಿಕ ವರ್ಷದಲ್ಲಿ ಅದಾನಿ ಸಮೂಹಕ್ಕೆ ಭಾರಿ ಲಾಭ: ಮೂಲಸೌಕರ್ಯ, ಎಐ ವಿಸ್ತರಣೆಗೆ ಬೃಹತ್ ಯೋಜನೆ

By Oneindia Staff

Published: Wednesday, June 24, 2026, 13:36 [IST]

ಅದಾನಿ ಗ್ರೂಪ್ ತನ್ನ ವಾರ್ಷಿಕ ಮಹಾಸಭೆಯಲ್ಲಿ (AGM) 2026ರ ಹಣಕಾಸು ವರ್ಷದ ಅತ್ಯುತ್ತಮ ಆರ್ಥಿಕ ಪ್ರಗತಿಯ ವರದಿಯನ್ನು ಮಂಡಿಸಿದೆ. ಇದೇ ವೇಳೆ ಸಂಸ್ಥೆಯು ಮೂಲಸೌಕರ್ಯಗಳ ವಿಸ್ತರಣೆ, ಇಂಧನ ಭದ್ರತೆ, ಕೃತಕ ಬುದ್ಧಿಮತ್ತೆ (AI) ಮತ್ತು ಡಿಜಿಟಲ್ ತಂತ್ರಜ್ಞಾನದ ಆಧುನೀಕರಣಕ್ಕೆ ಒತ್ತು ನೀಡುವಂತಹ ತನ್ನ ಭವಿಷ್ಯದ ಮಹತ್ವಾಕಾಂಕ್ಷೆಯ ಯೋಜನೆಯನ್ನು ಹಂಚಿಕೊಂಡಿದೆ.

ಷೇರುದಾರರನ್ನು ಉದ್ದೇಶಿಸಿ ಮಾತನಾಡಿದ ಅದಾನಿ ಗ್ರೂಪ್, ಈ ಬಾರಿ "ಮೂಲಸೌಕರ್ಯದ ವೇಗವರ್ಧನೆ, ಬುದ್ಧಿಮತ್ತೆಯ ಸದುಪಯೋಗ" ಎಂಬ ಮುಖ್ಯ ವಿಷಯವನ್ನು ಮುಂಚೂಣಿಗೆ ತಂದಿದೆ. ಮೂಲಸೌಕರ್ಯ ಮತ್ತು ಕೃತಕ ಬುದ್ಧಿಮತ್ತೆ ತಂತ್ರಜ್ಞಾನಗಳು ಭಾರತದ ಭವಿಷ್ಯದ ಬೆಳವಣಿಗೆಯ ಎರಡು ಪ್ರಮುಖ ಇಂಜಿನ್‌ಗಳಾಗಲಿವೆ ಎಂದು ಸಂಸ್ಥೆ ಹೇಳಿದೆ. ಜಾಗತಿಕ ಆರ್ಥಿಕ ಏರುಪೇರುಗಳು, ರಾಜಕೀಯ ಉದ್ವಿಗ್ನತೆಗಳು, ಇಂಧನ ಭದ್ರತೆಯ ಆತಂಕಗಳು ಮತ್ತು ತಂತ್ರಜ್ಞಾನ ಲೋಕದ ಕ್ಷಿಪ್ರ ಬದಲಾವಣೆಗಳ ನಡುವೆಯೂ 2026ರ ಹಣಕಾಸು ವರ್ಷವು ನಮಗೆ ಅತ್ಯಂತ ಪ್ರಮುಖ ವರ್ಷವಾಗಿತ್ತು ಎಂದು ಸಂಸ್ಥೆ ತಿಳಿಸಿದೆ. ಮಾರುಕಟ್ಟೆಯ ಸವಾಲುಗಳು ಮತ್ತು ಬಾಹ್ಯ ತನಿಖೆ, ವಿಮರ್ಶೆಗಳ ನಡುವೆಯೂ ಈ ಉದ್ಯಮ ಸಮೂಹವು ತನ್ನ ಪ್ರಮುಖ ವ್ಯವಹಾರಗಳಲ್ಲಿ ಹೂಡಿಕೆಯನ್ನು ಮುಂದುವರಿಸಿದ್ದು, ದೇಶದ ಅಭಿವೃದ್ಧಿಗೆ ಶ್ರಮಿಸುವ ತನ್ನ ದೀರ್ಘಕಾಲೀನ ಬದ್ಧತೆಯನ್ನು ಮತ್ತೊಮ್ಮೆ ಸ್ಪಷ್ಟಪಡಿಸಿದೆ.

ಅದಾನಿ ಗ್ರೂಪ್ 2026ರ ಹಣಕಾಸು ವರ್ಷದಲ್ಲಿ ಒಟ್ಟು 2.92 ಲಕ್ಷ ಕೋಟಿ ರೂಪಾಯಿ ಆದಾಯವನ್ನು ಗಳಿಸಿದ್ದು, ಕಳೆದ ವರ್ಷಕ್ಕೆ ಹೋಲಿಸಿದರೆ ಶೇಕಡಾ 7.4ರಷ್ಟು ಪ್ರಗತಿ ಸಾಧಿಸಿದೆ. ಕಂಪನಿಯ ಕಾರ್ಯನಿರ್ವಹಣಾ ಲಾಭ (EBITDA) 94,834 ಕೋಟಿ ರೂಪಾಯಿಗಳಾಗಿದ್ದು, ನಿವ್ವಳ ಲಾಭವು ಶೇಕಡಾ 13.9ರಷ್ಟು ಏರಿಕೆಯಾಗಿ 46,376 ಕೋಟಿ ರೂಪಾಯಿಗಳಿಗೆ ತಲುಪಿದೆ.

ಅದಾನಿ ಸಮೂಹವು ಈ ಹಣಕಾಸು ವರ್ಷದಲ್ಲಿ ವ್ಯವಹಾರದ ಮೂಲಕ 67,995 ಕೋಟಿ ರೂಪಾಯಿ ನಗದು ಹರಿವನ್ನು ಸೃಷ್ಟಿಸಿದೆ. ಇದೇ ಅವಧಿಯಲ್ಲಿ ಸಂಸ್ಥೆಯು ಮೂಲಸೌಕರ್ಯ ಅಭಿವೃದ್ಧಿಗಾಗಿ 1.5 ಲಕ್ಷ ಕೋಟಿ ರೂಪಾಯಿಗೂ ಅಧಿಕ ಬಂಡವಾಳ ಹೂಡಿಕೆಯನ್ನು ಮಾಡಿದೆ. ಇದರೊಂದಿಗೆ, ಕಂಪನಿಯು ಭಾರತದ ಕಾರ್ಪೊರೇಟ್ ಇತಿಹಾಸದಲ್ಲೇ ಅತ್ಯಂತ ದೊಡ್ಡದಾದ 25,000 ಕೋಟಿ ರೂಪಾಯಿ ಮೌಲ್ಯದ 'ರೈಟ್ಸ್ ಇಶ್ಯೂ' ಪ್ರಕ್ರಿಯೆಯನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದೆ. ಇದು ಹೂಡಿಕೆದಾರರಿಗೆ ಸಂಸ್ಥೆಯ ಮೇಲಿರುವ ಬಲವಾದ ನಂಬಿಕೆಯನ್ನು ತೋರಿಸುತ್ತದೆ ಎಂದು ಕಂಪನಿ ಹೇಳಿದೆ.

ವೇಗದ ಕಾರ್ಯಾಚರಣೆಯತ್ತ ಗಮನ

ಈಗ ಕಂಪನಿಯ ಆದ್ಯತೆಯು ಬಂಡವಾಳ ಕ್ರೋಡೀಕರಣದಿಂದ ಯೋಜನೆಗಳನ್ನು ವೇಗವಾಗಿ ಅನುಷ್ಠಾನಗೊಳಿಸುವತ್ತ ಬದಲಾಗಿದೆ ಎಂದು ಸಂಸ್ಥೆ ತಿಳಿಸಿದೆ. ಇಂದಿನ ಕೃತಕ ಬುದ್ಧಿಮತ್ತೆಯ ಯುಗಕ್ಕೆ ತಕ್ಕಂತೆ ವೇಗವಾಗಿ ನಿರ್ಧಾರಗಳನ್ನು ತೆಗೆದುಕೊಳ್ಳಲು ಮತ್ತು ಸಂಸ್ಥೆಯ ಚುರುಕುತನವನ್ನು ಹೆಚ್ಚಿಸಲು ಹೊಸದಾಗಿ 'ಮೂರು ಹಂತಗಳ ಸಾಂಸ್ಥಿಕ ರಚನೆ'ಯನ್ನು ಜಾರಿಗೆ ತರಲಾಗಿದೆ. ಇದಲ್ಲದೆ ಉದ್ಯೋಗಿಗಳಲ್ಲಿ ನಾಯಕತ್ವದ ಗುಣಗಳನ್ನು ಬೆಳೆಸುವುದು, ಪಾಲುದಾರರ ನಿರ್ವಹಣಾ ವ್ಯವಸ್ಥೆಯನ್ನು ಬಲಪಡಿಸುವುದು ಮತ್ತು ಕಾರ್ಮಿಕರ ಕಲ್ಯಾಣಕ್ಕೆ ಒತ್ತು ನೀಡುವ ಯೋಜನೆಗಳನ್ನು ಸಹ ಸಂಸ್ಥೆ ಪ್ರಸ್ತಾಪಿಸಿದೆ.

ಇಂಧನ ಮತ್ತು ಇತರೆ ವಲಯದಲ್ಲಿ ಭಾರಿ ಹೂಡಿಕೆ

ಹಸಿರು ಹೈಡ್ರೋಜನ್: ಅದಾನಿ ಎಂಟರ್‌ಪ್ರೈಸಸ್ ಸಂಸ್ಥೆಯು ಭಾರತದ ಮೊದಲ 'ಆಫ್-ಗ್ರಿಡ್ 5 ಮೆಗಾವ್ಯಾಟ್ ಹಸಿರು ಹೈಡ್ರೋಜನ್ ಪ್ರಾಯೋಗಿಕ ಪ್ಲಾಂಟ್' ಅನ್ನು ಆರಂಭಿಸಿದೆ.

ಶಾಖೋತ್ಪನ್ನ ವಿದ್ಯುತ್: ಅದಾನಿ ಪವರ್ ಸಂಸ್ಥೆಯು ಸುಮಾರು 2 ಲಕ್ಷ ಕೋಟಿ ರೂಪಾಯಿ ಹೂಡಿಕೆ ಮಾಡಲು ಯೋಜಿಸಿದ್ದು, 2032ರ ಹಣಕಾಸು ವರ್ಷದ ವೇಳೆಗೆ 45 ಗಿಗಾವ್ಯಾಟ್ (GW) ವಿದ್ಯುತ್ ಉತ್ಪಾದನೆಯ ಗುರಿ ಹೊಂದಿದೆ.

ಪರಮಾಣು ಇಂಧನ: 'ಅದಾನಿ ಅಟಾಮಿಕ್ ಎನರ್ಜಿ' ಮೂಲಕ ಪರಮಾಣು ಇಂಧನ ವಲಯಕ್ಕೂ ಕಾಲಿಡುತ್ತಿರುವುದಾಗಿ ಸಂಸ್ಥೆ ಘೋಷಿಸಿದ್ದು, 2035ರ ವೇಳೆಗೆ 10 ಗಿಗಾವ್ಯಾಟ್ ಸಾಮರ್ಥ್ಯದ ವಿದ್ಯುತ್ ಅಭಿವೃದ್ಧಿಪಡಿಸುವ ಗುರಿ ಇಟ್ಟುಕೊಂಡಿದೆ.

ಜಲವಿದ್ಯುತ್: ಭೂತಾನ್ ದೇಶದ 'ಡ್ರುಕ್ ಗ್ರೀನ್ ಪವರ್ ಕಾರ್ಪೊರೇಷನ್' ಜೊತೆಗೂಡಿ ಭೂತಾನ್‌ನಲ್ಲಿ 5 ಗಿಗಾವ್ಯಾಟ್ ಸಾಮರ್ಥ್ಯದ ಜಲವಿದ್ಯುತ್ ಯೋಜನೆಗಳನ್ನು ಜಂಟಿಯಾಗಿ ಅಭಿವೃದ್ಧಿಪಡಿಸಲಿದೆ.

ಗ್ಯಾಸ್ ವಿತರಣೆ: ಅದಾನಿ ಎನರ್ಜಿ ಸಲ್ಯೂಷನ್ಸ್ ಸಂಸ್ಥೆಯು 72,000 ಕೋಟಿ ರೂಪಾಯಿ ಮೌಲ್ಯದ ವಿದ್ಯುತ್ ಪ್ರಸರಣ ಆರ್ಡರ್‌ಗಳನ್ನು ಹೊಂದಿದ್ದರೆ, ಅದಾನಿ ಟೋಟಲ್ ಗ್ಯಾಸ್ ಸಂಸ್ಥೆಯು ನಗರಗಳಲ್ಲಿ ಅನಿಲ ವಿತರಣೆಯನ್ನು ವಿಸ್ತರಿಸಿದ್ದು, 11 ಲಕ್ಷಕ್ಕೂ ಅಧಿಕ ಪಿಎನ್‌ಜಿ ಸಂಪರ್ಕ ಕಲ್ಪಿಸಿದೆ.

ಬಂದರುಗಳು, ವಿಮಾನ ನಿಲ್ದಾಣಗಳು ಮತ್ತು ಲಾಜಿಸ್ಟಿಕ್ಸ್ ವಿಸ್ತರಣೆ

ಬಂದರುಗಳ ಪ್ರಗತಿ: ಅದಾನಿ ಪೋರ್ಟ್ಸ್ ಸಂಸ್ಥೆಯು 2026ರ ಹಣಕಾಸು ವರ್ಷದಲ್ಲಿ 50 ಕೋಟಿ ಟನ್‌ಗಳಿಗೂ ಹೆಚ್ಚು ಸರಕನ್ನು ನಿರ್ವಹಿಸಿದ್ದು, 2030ರ ವೇಳೆಗೆ ಈ ಸಾಮರ್ಥ್ಯವನ್ನು 100 ಕೋಟಿ ಟನ್‌ಗಳಿಗೆ ಹೆಚ್ಚಿಸುವ ಗುರಿ ಹೊಂದಿದೆ. ಮುದ್ರಾ ಬಂದರು ವಿಶ್ವದ ಟಾಪ್ 25 ಬಂದರುಗಳ ಪಟ್ಟಿಗೆ ಸೇರಿದ್ದರೆ, ವಿಝಿಂಜಂ ಬಂದರು ಕಾರ್ಯಾಚರಣೆಯ ಮೊದಲ ವರ್ಷದಲ್ಲೇ 10 ಲಕ್ಷ ಟಿಇಯು ಸರಕು ನಿರ್ವಹಣೆಯ ಮೈಲಿಗಲ್ಲು ದಾಟಿದೆ.

ವಿಮಾನ ನಿಲ್ದಾಣಗಳು: ನವಿ ಮುಂಬೈ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣವು ಕಳೆದ 2025ರ ಡಿಸೆಂಬರ್‌ನಲ್ಲಿ ಯಶಸ್ವಿಯಾಗಿ ಕಾರ್ಯಾಚರಣೆ ಆರಂಭಿಸಿದೆ ಎಂದು ಸಂಸ್ಥೆ ತಿಳಿಸಿದೆ. ಇದು ವಾರ್ಷಿಕವಾಗಿ 9 ಕೋಟಿ ಪ್ರಯಾಣಿಕರನ್ನು ನಿರ್ವಹಿಸುವ ಸಾಮರ್ಥ್ಯ ಹೊಂದಿದೆ. ಗುವಾಹಟಿ ವಿಮಾನ ನಿಲ್ದಾಣದಲ್ಲೂ ಹೊಸ ಟರ್ಮಿನಲ್ ಅಭಿವೃದ್ಧಿಪಡಿಸಲಾಗಿದೆ.

ಡಿಜಿಟಲ್ ಮೂಲಸೌಕರ್ಯ ಮತ್ತು ಎಐ ವೇಗ

ಡೇಟಾ ಸೆಂಟರ್: ಅದಾನಿ ಗ್ರೂಪ್ ತನ್ನ ಡಿಜಿಟಲ್ ಮೂಲಸೌಕರ್ಯವನ್ನು ವಿಸ್ತರಿಸುತ್ತಿದ್ದು, 2030ರ ವೇಳೆಗೆ 3 ಗಿಗಾವ್ಯಾಟ್ ಸಾಮರ್ಥ್ಯದ ಡೇಟಾ ಸೆಂಟರ್ ನಿರ್ಮಿಸುವ ಗುರಿ ಹೊಂದಿದೆ.

ಗೂಗಲ್ ಜೊತೆ ಒಪ್ಪಂದ: ವಿಶಾಖಪಟ್ಟಣದಲ್ಲಿ ಬೃಹತ್ ಮಟ್ಟದ ಡೇಟಾ ಸೆಂಟರ್ ಯೋಜನೆಗಾಗಿ ಕಂಪನಿಯು 'ಗೂಗಲ್' ಸಂಸ್ಥೆಯೊಂದಿಗೆ ಪ್ರಮುಖ ಒಪ್ಪಂದವನ್ನು ಮಾಡಿಕೊಂಡಿದೆ. ಭಾರತದ ಕೃತಕ ಬುದ್ಧಿಮತ್ತೆ ಆಧಾರಿತ ಬೆಳವಣಿಗೆಗೆ ಈ ಡಿಜಿಟಲ್ ಮೂಲಸೌಕರ್ಯ ದೊಡ್ಡ ಶಕ್ತಿಯಾಗಲಿದೆ ಎಂದು ಸಂಸ್ಥೆ ಹೇಳಿದೆ.

ಉತ್ಪಾದನೆ ಮತ್ತು ರಕ್ಷಣಾ ವಲಯದ ವಿಸ್ತರಣೆ

ಗಣಿಗಾರಿಕೆ ಮತ್ತು ಸಿಮೆಂಟ್: ಸಮೂಹದ ಗಣಿಗಾರಿಕೆ ಸೇವೆಗಳ ಸಾಮರ್ಥ್ಯವು ವಾರ್ಷಿಕ 145 ಮಿಲಿಯನ್ ಟನ್‌ಗೆ (MTPA) ಏರಿಕೆಯಾಗಿದ್ದರೆ, ಸಿಮೆಂಟ್ ಉದ್ಯಮದ ಒಟ್ಟು ಸಾಮರ್ಥ್ಯವು ವಾರ್ಷಿಕ 110 ಮಿಲಿಯನ್ ಟನ್‌ಗೆ ವಿಸ್ತರಿಸಿದೆ.

ರಕ್ಷಣಾ ವಲಯ: ರಕ್ಷಣಾ ಮತ್ತು ಏರೋಸ್ಪೇಸ್ ವಲಯದಲ್ಲಿ ದೇಶೀಯ ಉತ್ಪಾದನೆಯನ್ನು ಬಲಪಡಿಸಲು ಅದಾನಿ ಸಂಸ್ಥೆಯು ಅಂತರರಾಷ್ಟ್ರೀಯ ಕಂಪನಿಗಳಾದ 'ಲಿಯೋನಾರ್ಡೊ' ಮತ್ತು 'ಎಂಬ್ರೇಯರ್' ಜೊತೆ ಪಾಲುದಾರಿಕೆ ಮಾಡಿಕೊಂಡಿದೆ. ಡ್ರೋನ್‌ಗಳು, ಆಂಟಿ-ಡ್ರೋನ್ ವ್ಯವಸ್ಥೆಗಳು ಮತ್ತು ಇತರ ರಕ್ಷಣಾ ತಂತ್ರಜ್ಞಾನಗಳಲ್ಲಿ ತನ್ನ ಕೊಡುಗೆಯನ್ನು ಕಂಪನಿ ನೆನಪಿಸಿಕೊಂಡಿದೆ.

ಆರೋಗ್ಯ, ಶಿಕ್ಷಣ ಮತ್ತು ಸಾಮಾಜಿಕ ಸೇವೆ

ಅದಾನಿ ಫೌಂಡೇಶನ್: ಯಶಸ್ವಿಯಾಗಿ 30 ವರ್ಷಗಳನ್ನು ಪೂರೈಸಿರುವ ಅದಾನಿ ಫೌಂಡೇಶನ್, ಪ್ರಸ್ತುತ ದೇಶದ 22 ರಾಜ್ಯಗಳ 7,000 ಹಳ್ಳಿಗಳಲ್ಲಿ ಸುಮಾರು 1 ಕೋಟಿ ಜನರನ್ನು ತಲುಪಿದೆ.

ಹೆಲ್ತ್ ಸಿಟಿ ಯೋಜನೆ: ಅಹಮದಾಬಾದ್ ಮತ್ತು ಮುಂಬೈನಲ್ಲಿ 'ಅದಾನಿ ಹೆಲ್ತ್ ಸಿಟಿ' ಯೋಜನೆಗಳನ್ನು ಪ್ರಕಟಿಸಲಾಗಿದೆ. ಇದರಲ್ಲಿ ಮಲ್ಟಿ-ಸ್ಪೆಷಾಲಿಟಿ ಆಸ್ಪತ್ರೆಗಳು, ವೈದ್ಯಕೀಯ ಕಾಲೇಜುಗಳು ಮತ್ತು ಸಂಶೋಧನಾ ಕೇಂದ್ರಗಳು ಒಂದೇ ಸೂರಿನಡಿ ಇರಲಿವೆ.

ಶಿಕ್ಷಣ ಮತ್ತು ಉದ್ಯೋಗ: ಬಿಹಾರದಲ್ಲಿ ಕೈಗೆಟುಕುವ ದರದಲ್ಲಿ ಕಣ್ಣಿನ ಚಿಕಿತ್ಸೆ ನೀಡುವ ಯೋಜನೆ ಮತ್ತು ಉನ್ನತ ಶಿಕ್ಷಣ ಸಂಸ್ಥೆಗಳ ಮೂಲಕ ವೈದ್ಯಕೀಯ ಶಿಕ್ಷಣವನ್ನು ಬಲಪಡಿಸಲಾಗುತ್ತಿದೆ. ಕೌಶಲ್ಯಾಭಿವೃದ್ಧಿ ಯೋಜನೆಯಡಿ ಗ್ರಾಮೀಣ ಭಾರತದ 1.25 ಲಕ್ಷಕ್ಕೂ ಹೆಚ್ಚು ಯುವಕರಿಗೆ ತರಬೇತಿ ನೀಡಲಾಗಿದೆ.

ಭಾರತದ ಮೂಲಸೌಕರ್ಯ ವ್ಯವಸ್ಥೆಯನ್ನು ಬಲಪಡಿಸುವುದು, ಭೌತಿಕ ಆಸ್ತಿಗಳೊಂದಿಗೆ ಕೃತಕ ಬುದ್ಧಿಮತ್ತೆಯನ್ನು ಸಂಯೋಜಿಸುವುದು, ಇಂಧನ ಭದ್ರತೆಯನ್ನು ಹೆಚ್ಚಿಸುವುದು ಮತ್ತು ಪೂರೈಕೆ ಸರಪಳಿಯನ್ನು ಗಟ್ಟಿಗೊಳಿಸುವುದಕ್ಕೆ ನಾವು ಬದ್ಧರಾಗಿದ್ದೇವೆ. ವೇಗ ಮತ್ತು ದೊಡ್ಡ ಪ್ರಮಾಣದ ಕಾರ್ಯಾಚರಣೆಯ ಮೂಲಕ ದೇಶದ ದೀರ್ಘಕಾಲೀನ ಅಭಿವೃದ್ಧಿಗೆ ಶ್ರಮಿಸುವುದೇ ನಮ್ಮ ಮುಖ್ಯ ಉದ್ದೇಶ ಎಂದು ಅದಾನಿ ಗ್ರೂಪ್ ತಿಳಿಸಿದೆ.

Published On June 24, 2026