ಕಳೆದ 7 ತಿಂಗಳಲ್ಲಿ 70 ಯುವಕರು ಉಗ್ರಗಾಮಿ ಸಂಘಟನೆಗಳಿಗೆ ಸೇರ್ಪಡೆ

ಶ್ರೀನಗರ, ಆಗಸ್ಟ್ 14 : ಜಮ್ಮು ಮತ್ತು ಕಾಶ್ಮೀರ ಕಣುವೆಯಲ್ಲಿ ಭಯೋತ್ಪಾದಕ ಸಂಘಟನೆಗಳಿಗೆ ಸೇರುವ ಯುವಕರ ಸಂಖ್ಯೆ ವರ್ಷದಿಂದ ವರ್ಷಕ್ಕೆ ಏರಿಕೆಯಾಗುತ್ತಿದೆ.

ಕಳೆದ ಏಳು ತಿಂಗಳ ಅವಧಿಯಲ್ಲಿ ಜಮ್ಮು-ಕಾಶ್ಮೀರದಲ್ಲಿ 70 ಯುವಕರು ಭಯೋತ್ಪಾದಕ ಸಂಘಟನೆಗಳಿಗೆ ಸೇರಿದ್ದಾರೆ ಎಂದು ಹಿರಿಯ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಈ ಪೈಕಿ ಬಹುತೇಕರು ದಕ್ಷಿಣ ಕಾಶ್ಮೀರದ ಪುಲ್ವಾಮಾ, ಶೋಪಿಯಾನ್, ಕುಲ್ಗಾಮ್ ಜಿಲ್ಲೆಗಳಿಗೆ ಸೇರಿದವರಾಗಿದ್ದಾರೆ. ಇದರಿಂದ ಈ ಸ್ಥಳಗಳಲ್ಲಿಯೇ ಅತಿಹೆಚ್ಚಿನ ಸಂಖ್ಯೆ ಎನ್‌ ಕೌಂಟರ್‌ಗಳು ಹಾಗೂ ದಾಳಿಗಳು ನಡೆದಿವೆ.

ಉಗ್ರಗಾಮಿ ಚಟುವಟಿಕೆಗಳು ಹೆಚ್ಚಲು ಪುಲ್ವಾಮಾದ ಭೌಗೋಳಿಕ ಸ್ಥಿತಿಯೂ ಇದಕ್ಕೆ ಕಾರಣವಾಗಿದ್ದು, ಪುಲ್ವಾಮಾವು ಸಾಕಷ್ಟು ಪ್ರಮಾಣದ ತೋಟಗಳು ಹಾಗೂ ದಟ್ಟ ಅರಣ್ಯದಿಂದ ಸುತ್ತುವರಿದಿದೆ. ಹೀಗಾಗಿ ಉಗ್ರರು ಅಡಗಿಕೊಳ್ಳಲು ಪ್ರಶಸ್ತ ತಾಣವಾಗಿದೆ.

2014ರಿಂದ ಭಯೋತ್ಪಾದಕ ಸಂಘಟನೆಗಳಿಗೆ ಸೇರುವ ಯುವಕರ ಸಂಖ್ಯೆ ಹೆಚ್ಚಾಗುತ್ತಿದ್ದು, 2011 ರಿಂದ 2013ರ ವರೆಗಿನ ಅವಧಿಯಲ್ಲಿ ಉಗ್ರಗಾಮಿ ಸಂಘಟನೆಗಳಿಗೆ ಸೇರುವವರ ಸಂಖ್ಯೆ ಕಡಿಮೆ ಇತ್ತು.

2014ರಿಂದ ಮತ್ತೆ ಹೆಚ್ಚಾಗಿದೆ. 2010ರಲ್ಲಿ 54, 2011- 54, 2012- 21, 2013- 16, 2014- 53 ಯುವಕರು, 2015-66 ಮತ್ತು 2016ರಲ್ಲಿ 88 ಯುವಕರು ಭಯೋತ್ಪಾದಕ ಸಂಘಟನೆಗಳಿಗೆ ಸೇರಿದ್ದಾರೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.

English summary

Seventy young men have joined militancy in the past seven months this year with most of the recruits from three districts in south Kashmir, according to a senior official.