200 ರುಪಾಯಿ ಮುಖಬೆಲೆಯ ನೋಟು ಶೀಘ್ರವೇ ಚಲಾವಣೆಗೆ

ಮುಂಬೈ, ಅಗಸ್ಟ್ 23: ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ(ಆರ್ ಬಿಐ) ಶೀಘ್ರದಲ್ಲೇ 200 ರುಪಾಯಿ ಮುಖಬೆಲೆಯ ನೋಟುಗಳನ್ನು ಚಲಾವಣೆಗೆ ತರಲಿದೆ.

ಕಳೆದ ಮಾರ್ಚ್ ನಲ್ಲಿ ನಡೆದ ಸಭೆಯಲ್ಲಿ ಈ ಬಗ್ಗೆ ತೀರ್ಮಾನ ತೆಗೆದುಕೊಳ್ಳಲಾಗಿದ್ದು,ವಿತ್ತ ಸಚಿವಾಲಯ ಕೂಡಾ ಬುಧವಾರ(ಆಗಸ್ಟ್ 23) ದಂದು ಈ ಬಗ್ಗೆ ಸುಳಿವು ನೀಡಿದೆ. ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಕಾಯ್ದೆ 1934ರ ಅನ್ವಯ ಹಾಗೂ ಆರ್ ಬಿಐ ಪ್ರಮುಖರ ಸಲಹೆ ಮೇರೆಗೆ 200ರೂಪಾಯಿ ಹೊಸ ನೋಟು ಹೊರಬರಲಿದೆ.

ಕೇಂದ್ರ ಸರಕಾರ ಒಮ್ಮೆ ಅಧಿಕೃತವಾಗಿ ಒಪ್ಪಿಗೆ ನೀಡಿದ ಮೇಲೆ ಈ ವರ್ಷದ ಆಗಸ್ಟ್ ಅಂತ್ಯಕ್ಕೆ ಅಥವಾ ಸೆಪ್ಟೆಂಬರ್ ಮೊದಲ ವಾರದ ನಂತರ 200 ರುಪಾಯಿ ನೋಟಿನ ಮುದ್ರಣ ಆರಂಭವಾಗುತ್ತದೆ. ಆದರೆ, ರಿಸರ್ವ್ ಬ್ಯಾಂಕ್ ಇಂಡಿಯಾದ ವಕ್ತಾರರು ಈ ಬಗ್ಗೆ ಇನ್ನೂ ಅಧಿಕೃತ ಹೇಳಿಕೆ ನೀಡಿಲ್ಲ.

ಕಡಿಮೆ ಮುಖ ಬೆಲೆಯ ನೋಟುಗಳನ್ನು ಪರಿಚಯಿಸಲು ಸರಕಾರ ಕೈಗೊಂಡಿರುವ ಕ್ರಮದ ಭಾಗವಾಗಿ 200 ರುಪಾಯಿ ನೋಟು ಚಾಲ್ತಿಗೆ ಬರಲಿದೆ

ಕಳೆದ ವರ್ಷ ನವೆಂಬರ್ 8ರಂದು 500, 1000 ರುಪಾಯಿ ಹಳೇ ನೋಟನ್ನು ಚಲಾವಣೆಯಿಂದ ಹಿಂಪಡೆಯಲಾಯಿತು. ಆ ನಂತರ ,2000 ಹಾಗೂ 500 ರುಪಾಯಿಯ ಹೊಸ ನೋಟು ಪರಿಚಯಿಸಲಾಯಿತು. ಈ ಹಿಂದೆ ಕೂಡ 2,000 ರುಪಾಯಿ ನೋಟಿನ ಚಿತ್ರಗಳು ಬಿಡುಗಡೆಗೂ ಮುನ್ನವೇ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದ್ದನ್ನು ಇಲ್ಲಿ ಸ್ಮರಿಸಬಹುದು.

English summary

The Finance Ministry issued a notification in the Gazette of India about Reserve Bank of India (RBI) is likely to put the proposed Rs 200 bank notes in circulation by the end of August or in the first week of September.