ಸಾಫ್ಟ್ವೇರ್ ಹಿಂದಿಕ್ಕಿದ ಹಾರ್ಡ್ವೇರ್ಗೆ ಹೆಚ್ಚು ಸಂಬಳ: ಬೆಂಗಳೂರೇ ಅಗ್ರಗಣ್ಯ
ಬೆಂಗಳೂರು, ನವೆಂಬರ್ 22: ಹಾರ್ಡ್ವೇರ್ ನೆಟ್ವರ್ಕ್ ಮತ್ತು ಮಾಹಿತಿ ತಂತ್ರಜ್ಞಾನ ಹಾಗೂ ಅದರ ಸಂಬಂಧಿ ಕ್ಷೇತ್ರಗಳಲ್ಲಿ ಅತಿ ಹೆಚ್ಚು ಸಂಬಳ ನೀಡುವ ಪರಿಪಾಠ ದೇಶದಲ್ಲಿ ಚಾಲ್ತಿಯಲ್ಲಿದ್ದು, ಆ ಪೈಕಿ ಬೆಂಗಳೂರು ನಗರ ಅತಿ ಹೆಚ್ಚು ಸಂಬಳ ನೀಡುವ ನಗರವಾಗಿ ಹೊರಹೊಮ್ಮಿದೆ.
ಸಾಂಪ್ರದಾಯಿಕ ಗ್ರಾಹಕರ ಸೇವಾ ವಲಯದಲ್ಲಿ ಹಾರ್ಡ್ ವೇರ್ ಮತ್ತು ಐಟಿ ಸಂಬಂಧಿ ಕ್ಷೇತ್ರಗಳಲ್ಲಿ ಸಂಬಳ ನೀಡುವ ವಿಚಾರಕ್ಕೆ ಬೆಂಗಳೂರು ಮುಂಚೂಣಿಯಲ್ಲಿದ್ದರೆ ಮುಂಬೈ ಮತ್ತು ದೆಹಲಿ ನಂತರದ ಸ್ಥಾನದಲ್ಲಿದೆ.
ಸೈನಾಪ್ಸಿಸ್ ಇಂಡಿಯಾ ಕಂಪನಿ ನಡೆಸಿದ ಸಮೀಕ್ಷೆಯಲ್ಲಿ ಈ ವಿಷಯ ಬಹಿರಂಗಗೊಂಡಿದ್ದು, ಬೆಂಗಳೂರು ನಗರದಲ್ಲಿ ಹಾರ್ಡ್ ವೇರ್ ಕ್ಷೇತ್ರದಲ್ಲಿ ಸರಾಸರಿ 15 ಲಕ್ಷ , ಐಟಿ ಹಾಗೂ ಐಟಿ ಸಂಬಂಧಿ ಕ್ಷೇತ್ರಗಳಲ್ಲಿ ಸರಾಸರಿ 12 ಲಕ್ಷ ಹಾಗೂ ಗ್ರಾಹಕರ ಸೇವಾವಲಯದಲ್ಲಿ ಸರಾಸರಿ 9 ಲಕ್ಷ ರೂಪಾಯಿಗಳ ಸಂಬಳ ನೀಡಿಕೆ ಜಾರಿಯಲ್ಲಿದ್ದು, ಇದು ದೇಶದ ಇತರೆ ಎಲ್ಲ ನಗರಗಳಿಗಿಂತ ನೀಡುವ ಅತಿ ಹೆಚ್ಚು ಸಂಬಳವಾಗಿದೆ.
ಬೆಂಗಳೂರಿನಲ್ಲಿ ಅತಿ ಹೆಚ್ಚು ಸಂಬಳವಾಗಿ 11,67,337 ಲಕ್ಷ ರೂ ನೀಡಲಾಗುತ್ತಿದ್ದು, ಮುಂಬೈನಲ್ಲಿ 9,03,929 ಲಕ್ಷ ರೂ, ದೆಹಲಿಯಲ್ಲಿ 8,99,486 ಲಕ್ಷ ರೂ ವೇತನ ನೀಡಲಾಗುತ್ತಿದೆ.
ತಜ್ಞರ ಪ್ರಕಾರ ಹಾರ್ಡ್ ವೇರ್ ಮತ್ತು ನೆಟ್ವರ್ಕಿಂಗ್ ಕ್ಷೇತ್ರದಲ್ಲಿ ಇಷ್ಟು ಅತಿ ಹೆಚ್ಚು ಸಂಬಳ ನೀಡುತ್ತಿರುವುದು ಇತ್ತೀಚಿನ ಬೆಳವಣಿಗೆಯಾಗಿದ್ದು, ವಿಶೇಷವಾಗಿ ಚಿಪ್ ಡಿಸೈನ್ ಹಾಗೂ ನ್ಯೂಯೇಜ್ ನೆಟ್ವರ್ಕಿಂಗ್ ಕ್ಷೇತ್ರದಲ್ಲಿ ದುಡಿಯುತ್ತಿರುವ ನಿಪುಣರಿಗೆ ಅತಿ ಹೆಚ್ಚು ಸಂಬಳ ಕೊಡಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ ಎಂದು ತಜ್ಞರು ಅಭಿಪ್ರಾಯಪಡುತ್ತಾರೆ.
ಕಂಡಕ್ಟರ್ ತಯಾರಿಕಾ ಸಂಸ್ಥೆಯ ಸಂಶೋಧನೆ ಮತ್ತು ಅಭಿವೃದ್ಧಿ ವಿಭಾಗದ ಮುಖ್ಯಸ್ಥ ಶಿವಾನಂದ್ ಕೋಟೇಶ್ವರ ಅವರ ಪ್ರಕಾರ ಚಿಪ್ ಡಿಸೈನ್ ಉದ್ಯಮದಲ್ಲಿ ಭಾರತ ಸಾಕಷ್ಟು ಮುಂದುವರೆದಿದ್ದು, ಬೇಡಿಕೆಗೆ ತಕ್ಕಂತೆ ಇತರೆ ರಾಷ್ಟ್ರಗಳಿಗೆ ಪೂರೈಸಬೇಕಾದ ಒತ್ತಡದ ಹಿನ್ನೆಲೆಯಲ್ಲಿ ಚಿಪ್ ಡಿಸೈನ್ ತಜ್ಞರಿಗೆ ಅತಿ ಹೆಚ್ಚು ಸಂಬಳ ನೀಡಬೇಕಾದ ಅಗತ್ಯತೆ ಕಂಡುಬಂದಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.
Click it and Unblock the Notifications
Sign in with Google