Yash: ಜಗತ್ತಿನಲ್ಲೇ ನನಗೆ ಈ ಊರಿನಲ್ಲಿರುವ ಆ ಥಿಯೇಟರ್ ಅಂದ್ರೆ ಸಿಕ್ಕಾಪಟ್ಟೆ ಇಷ್ಟ ಎಂದ ಯಶ್
ರಾಕಿಂಗ್ ಸ್ಟಾರ್ ಯಶ್ ಇಂದು ಜಾಗತಿಕ ಮಟ್ಟದ ಸೂಪರ್ಸ್ಟಾರ್ ಆಗಿ ಬೆಳೆದಿದ್ದರೂ, ತಮ್ಮ ಹಳೆಯ ದಿನಗಳನ್ನು ಹಾಗೂ ಸಿನಿಮಾ ಕ್ರೇಜ್ ಹುಟ್ಟುಹಾಕಿದ ಆ ದಿನಗಳನ್ನು ಎಂದಿಗೂ ಮರೆಯುವುದಿಲ್ಲ. ಇತ್ತೀಚೆಗೆ ಅಂತಾರಾಷ್ಟ್ರ ಪ್ರಶಸ್ತಿ ವೇದಿಕೆಯೊಂದರ ಸಂದರ್ಶನದಲ್ಲಿ ಭಾಗವಹಿಸಿದ್ದ ಅವರಿಗೆ, "ನಿಮಗೆ ಜಗತ್ತಿನಾದ್ಯಂತ ಅತ್ಯಂತ ಇಷ್ಟವಾಗುವ ಸಿನಿಮಾ ಥಿಯೇಟರ್ ಯಾವುದು?" ಎಂಬ ಆಸಕ್ತಿದಾಯಕ ಪ್ರಶ್ನೆ ಎದುರಾಗಿದ್ದು, ಇದಕ್ಕೆ ಯಶ್ ನೀಡಿರುವ ಉತ್ತರ ನಿಜಕ್ಕೂ ಅಚ್ಚರಿ ಮೂಡಿಸಿದೆ.
'ಕೆಜಿಎಫ್' ಚಿತ್ರದ ಅಭೂತಪೂರ್ವ ಯಶಸ್ಸಿನ ನಂತರ ಜಾಗತಿಕ ಮಟ್ಟದಲ್ಲಿ ಸದ್ದು ಮಾಡುತ್ತಿರುವ ಸ್ಯಾಂಡಲ್ವುಡ್ನ ರಾಕಿಂಗ್ ಸ್ಟಾರ್ ಯಶ್ ಸದ್ಯ ತಮ್ಮ ಮುಂಬರುವ ಬಹುನಿರೀಕ್ಷಿತ ಚಿತ್ರಗಳಾದ 'ಟಾಕ್ಸಿಕ್' (Toxic) ಹಾಗೂ 'ರಾಮಾಯಣ' (Ramayana) ಸಿನಿಮಾಗಳ ಕೆಲಸಗಳಲ್ಲಿ ಬ್ಯುಸಿಯಾಗಿದ್ದಾರೆ. ಇತ್ತೀಚೆಗೆ ಅಂತಾರಾಷ್ಟ್ರೀಯ ಮಟ್ಟದ ಜಾಗತಿಕ ವೇದಿಕೆಯೊಂದರಲ್ಲಿ ಭಾಗವಹಿಸಿದ್ದ ಯಶ್, ತಮ್ಮ ಈ ಎರಡೂ ಸಿನಿಮಾಗಳ ಕುರಿತು ಮಹತ್ವದ ಮಾತುಗಳನ್ನು ಹಂಚಿಕೊಳ್ಳುವ ಜೊತೆಗೆ, ತಮ್ಮ ನೆಚ್ಚಿನ ಸಿನಿಮಾ ಥಿಯೇಟರ್ ಬಗ್ಗೆ ಹೆಮ್ಮೆಯಿಂದ ಮಾತನಾಡಿದ್ದಾರೆ.
ಆ ವೈಬ್ ಬೇರೆ
ಯಶ್ ಭಾಗವಹಿಸಿದ್ದ ಜಾಗತಿಕ ಸಂದರ್ಶನದಲ್ಲಿ ಆಂಕರ್, "ನಿಮಗೆ ಜಗತ್ತಿನಾದ್ಯಂತ ಅತ್ಯಂತ ಇಷ್ಟವಾಗುವ ಸಿನಿಮಾ ಥಿಯೇಟರ್ ಯಾವುದು?" ಎಂಬ ಆಸಕ್ತಿದಾಯಕ ಪ್ರಶ್ನೆಯನ್ನು ಕೇಳಿದ್ದರು. ಇದಕ್ಕೆ ಯಶ್ ನೀಡಿದ ಉತ್ತರ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದ್ದು, ಕನ್ನಡಿಗರ ಮನಗೆದ್ದಿದೆ. "ನನಗೆ ಜಗತ್ತಿನಲ್ಲೇ ಅತ್ಯಂತ ಇಷ್ಟವಾಗುವ ಫೇವರೇಟ್ ಸಿನಿಮಾ ಥಿಯೇಟರ್ ನಮ್ಮ ಬೆಂಗಳೂರಿನಲ್ಲಿರುವ 'ಮೆಜೆಸ್ಟಿಕ್' ಎನ್ನುವ ಏರಿಯಾದಲ್ಲಿದೆ. ಅಲ್ಲಿನ ಚಿತ್ರಮಂದಿರಗಳಲ್ಲಿ ಸಿನಿಮಾ ನೋಡುವ ವೈಬ್ ಹಾಗೂ ವಾತಾವರಣವೇ ಸಂಪೂರ್ಣವಾಗಿ ಬೇರೆ ಲೋಕದಂತಿರುತ್ತದೆ" ಎಂದು ತಮ್ಮ ನೆಚ್ಚಿನ ಸಿನಿಮಾ ತಾಣವನ್ನು ಜಾಗತಿಕ ಮಟ್ಟದಲ್ಲಿ ಪರಿಚಯಿಸಿದ್ದಾರೆ.
ಚಿತ್ರಮಂದಿರವನ್ನು ಸ್ಟೇಡಿಯಂ ರೀತಿ ಬದಲಾಯಿಸುತ್ತಾರೆ
ಅಲ್ಲಿನ ಥಿಯೇಟರ್ ಒಳಗೆ ಹೋದರೆ ಸಿಗುವ ಕಿಕ್ ಜಗತ್ತಿನ ಬೇರೆಲ್ಲೂ ಸಿಗಲು ಸಾಧ್ಯವಿಲ್ಲ ಎಂದು ಮೆಜೆಸ್ಟಿಕ್ ಚಿತ್ರಮಂದಿರಗಳ ಗತ್ತು ಹಾಗೂ ಇತಿಹಾಸವನ್ನು ಜಾಗತಿಕ ಮಟ್ಟದಲ್ಲಿ ಪರಿಚಯಿಸಿದರು. ಮೆಜೆಸ್ಟಿಕ್ನ ಸಿನಿಮಾ ಪ್ರೇಕ್ಷಕರ ಕ್ರೇಜ್ ಬಗ್ಗೆ ವಿವರಿಸಿದ ಯಶ್, "ಅಲ್ಲಿನ ಜನ ಸಿನಿಮಾವನ್ನು ಕೇವಲ ವೀಕ್ಷಿಸುವುದಿಲ್ಲ, ಬದಲಿಗೆ ಇಡೀ ಚಿತ್ರಮಂದಿರವನ್ನೇ ಒಂದು ಕ್ರಿಕೆಟ್ ಸ್ಟೇಡಿಯಂ ರೀತಿ ಬದಲಾಯಿಸಿಬಿಡುತ್ತಾರೆ. ತಮ್ಮ ನೆಚ್ಚಿನ ನಟನ ಎಂಟ್ರಿಯಾದಾಗ ಅಥವಾ ಮಾಸ್ ಸೀನ್ಗಳು ಬಂದಾಗ ಪರದೆಯ ಮುಂದೆ ನಾಣ್ಯಗಳನ್ನು (Coins) ಗಾಳಿಯಲ್ಲಿ ತೂರಿ ಸಂಭ್ರಮಿಸುತ್ತಾರೆ. ಅಷ್ಟೇ ಅಲ್ಲದೆ, ಸಿನಿಮಾ ನಡೆಯುತ್ತಿರುವಾಗಲೇ ಸೀಟುಗಳಿಂದ ಎದ್ದು ಬಂದು ಡ್ಯಾನ್ಸ್ ಮಾಡ್ತಾರೆ, ಪರದೆಯ ಮುಂದೆ ನಿಂತು ಜಂಪ್ ಮಾಡ್ತಾರೆ, ಹಾಡಿಗೆ ಧ್ವನಿಗೂಡಿಸಿ ಕುಣಿದು ಕುಪ್ಪಳಿಸುತ್ತಾರೆ. ಅದೊಂದು ರೀತಿ ಅದ್ಭುತ ಮತ್ತು ವಿಭಿನ್ನವಾದ ವಾತಾವರಣ. ಆ ತರಹದ ಮಾಸ್ ಕ್ರೌಡ್ ಮಧ್ಯೆ ಕುಳಿತು ಸಿನಿಮಾ ನೋಡುವುದನ್ನು ನಾನು ಇಂದಿಗೂ ತುಂಬಾ ಇಷ್ಟಪಡುತ್ತೇನೆ" ಎಂದು ಯಶ್ ತಮ್ಮ ಹಳೆಯ ದಿನಗಳನ್ನು ನೆನಪಿಸಿಕೊಂಡಿದ್ದಾರೆ.
ಬೆಂಗಳೂರಿನ ಮೆಜೆಸ್ಟಿಕ್ ಎನ್ನುವುದು ದಶಕಗಳಿಂದಲೂ ಕನ್ನಡ ಚಿತ್ರರಂಗದ ಹೃದಯಭಾಗ ಹಾಗೂ ಸ್ಟಾರ್ ನಟರ ಚಿತ್ರಗಳ ಹಬ್ಬದ ಆಚರಣೆಯ ಕೇಂದ್ರಬಿಂದುವಾಗಿದೆ. ಇಂದು ಜಾಗತಿಕ ಮಟ್ಟದ ಸೂಪರ್ಸ್ಟಾರ್ ಆಗಿ ಬೆಳೆದಿದ್ದರೂ, ಯಶ್ ಅವರು ತಮ್ಮ ಸಿನಿಮಾ ಪ್ರೀತಿ ಹುಟ್ಟಿದ ಮತ್ತು ಬೆಳೆದ ಬೆಂಗಳೂರಿನ ಮೆಜೆಸ್ಟಿಕ್ನ ಮಾಸ್ ಥಿಯೇಟರ್ ಸಂಸ್ಕೃತಿಯನ್ನು ಇಂಟರ್ನ್ಯಾಷನಲ್ ವೇದಿಕೆಯಲ್ಲಿ ಮುಕ್ತವಾಗಿ ಕೊಂಡಾಡಿರುವುದು ಅವರ ಅಭಿಮಾನಿಗಳಿಗೆ ಭಾರಿ ಖುಷಿ ತಂದಿದೆ. ಯಶ್ ಅವರ ಬಹುನಿರೀಕ್ಷಿತ ಚಿತ್ರಗಳಾದ 'ಟಾಕ್ಸಿಕ್' ಹಾಗೂ 'ರಾಮಾಯಣ' ಸಿನಿಮಾಗಳಿಗಾಗಿ ಅಭಿಮಾನಿಗಳು ತುದಿಗಾಲಲ್ಲಿ ನಿಂತಿದ್ದಾರೆ.
Click it and Unblock the Notifications
Sign in with Google