Wheeling: ಬೆಂಗಳೂರಲ್ಲಿ ಹಾವಳಿ ಕೊಡ್ತಿದ್ದ 56 ವೀಲಿಂಗ್‌ ರೋಮಿಯೋಗಳು ಅರೆಸ್ಟ್‌

ಬೆಂಗಳೂರಿನ ರಸ್ತೆಗಳಲ್ಲಿ ವೀಲಿಂಗ್‌ ಪುಂಡರ ಹಾವಳಿ ಮಿತಿಮೀರಿರುವ ಹಿನ್ನೆಲೆ ಪೊಲೀಸರು ವಿಶೇಷ ಬೇಟೆಯಾಡಿದ್ದಾರೆ. ಈ ವೇಳೆ ಡ್ರಗ್ಸ್‌ ಸೇವಿಸಿ ವೀಲಿಂಗ್‌ ಮೋಜು ಮಸ್ತಿಯಲ್ಲಿ ತೊಡಗಿದ್ದ 56 ಮಂದಿ ಪುಂಡರನ್ನು ಪೊಲೀಸರು ಬಂಧಿಸಿದ್ದಾರೆ. ಡಿಸೆಂಬರ್‌ ಮೊದಲಿನಿಂದ ಇಲ್ಲಿವರೆಗೆ ವೀಲಿಂಗ್ ಅಪರಾಧಿಗಳ ವಿರುದ್ಧ ವಿಶೇಷ ಕಾರ್ಯಾಚರಣೆ ನಡೆಸಿರುವುದಾಗಿ ಪೊಲೀಸ್‌ ಕಮೀಷನರ್‌ ಬಿ.ದಯಾನಂದ್‌ ಮಾಹಿತಿ ನೀಡಿದ್ದಾರೆ.

ಡಿಸೆಂಬರ್‌ 2ರಿಂದ 12ರವರೆಗೆ ವೀಲಿಂಗ್ ಅಪರಾಧಿಗಳನ್ನು ತಡೆಯಲು ನಡೆಸಿದ ವಿಶೇಷ ಕಾರ್ಯಾಚರಣೆಯಲ್ಲಿ 56 ಜನರನ್ನು ಬಂಧಿಸಲಾಗಿದೆ. ಅವರಲ್ಲಿ 4 ಮಂದಿ ಡ್ರಗ್ಸ್‌ ಸೇವಿಸಿದ್ದರು. ಅವರ ವಿರುದ್ಧ NDPS ಕಾಯ್ದೆಯಡಿ ಪ್ರಕರಣ ದಾಖಲಿಸಲಾಗಿದೆ ಎಂದು ಹೇಳಿದ್ದಾರೆ. ಈ ಮೂಲಕ ವೀಲಿಂಗ್‌ ಪುಂಡರಿಗೆ ಪೊಲೀಸರು ಬಿಸಿ ಮುಟ್ಟಿಸಿದ್ದಾರೆ.

ಬೆಂಗಳೂರು ನಗರ ಪೊಲೀಸರು, ಎರಡು ಪ್ರತ್ಯೇಕ ಕಾರ್ಯಾಚರಣೆಗಳಲ್ಲಿ ಚಂದನದ ಮರ ಕಳ್ಳಸಾಗಣೆ ಮತ್ತು ಕಳ್ಳತನವನ್ನು ಪತ್ತೆ ಮಾಡಿದ್ದಾರೆ. ಸುಬ್ರಮಣ್ಯ ಪೊಲೀಸ್ ಠಾಣೆಯವರು 14.6 ಲಕ್ಷ ರೂಪಾಯಿ ಮೌಲ್ಯದ 146.3 ಕೆ.ಜಿ ಚಂದನ ಕಳ್ಳಸಾಗಣೆ ಮಾಡುತ್ತಿದ್ದ ವ್ಯಕ್ತಿಯನ್ನು ಬಂಧಿಸಿದ್ದಾರೆ. ಜ್ಞಾನಭಾರತಿ ಪೊಲೀಸರು ಚಂದನದ ಮರವನ್ನು ಕಡಿದು ಕದಿಯಲು ಯತ್ನಿಸುತ್ತಿದ್ದ ಮತ್ತೊಬ್ಬ ವ್ಯಕ್ತಿಯನ್ನು ಬಂಧಿಸಿ, 5 ಲಕ್ಷ ಮೌಲ್ಯದ 115.5 ಕೆ.ಜಿ ಚಂದನವನ್ನು ವಶಪಡಿಸಿಕೊಂಡಿದ್ದಾರೆ. ಪರಾರಿಯಾಗಿರುವ 5 ವ್ಯಕ್ತಿಗಳನ್ನು ಪತ್ತೆ ಮಾಡಲಾಗುತ್ತಿದೆ ಎಂದು ಮಾಹಿತಿ ನೀಡಿದ್ದಾರೆ.

ಮೈಕೋ ಲೇಔಟ್ ಪೊಲೀಸ್ ಠಾಣೆಯ ಅಧಿಕಾರಿಗಳು ದ್ವಿಚಕ್ರ ವಾಹನ ಮತ್ತು ಮೊಬೈಲ್ ಫೋನ್ ಕಳ್ಳತನಗಳಿಗೆ ಸಂಬಂಧಿಸಿದ ಒಬ್ಬನನ್ನು ಬಂಧಿಸಿದ್ದಾರೆ. ಬಂಧಿತನಿಂದ ಅಧಿಕಾರಿಗಳು 5,60,000 ರೂಪಾಯಿ ಮೌಲ್ಯದ 2 ಕಳುವಾದ ದ್ವಿಚಕ್ರ ವಾಹನಗಳು ಮತ್ತು 40 ಮೊಬೈಲ್ ಫೋನ್‌ಗಳನ್ನು ವಶಪಡಿಸಿಕೊಂಡಿದ್ದಾರೆ. ಇದೇ ಠಾಣೆಯಲ್ಲಿ ದಾಖಲಾಗಿರುವ 2 ದ್ವಿಚಕ್ರ ವಾಹನಗಳು ಕಳ್ಳತನ ಪ್ರಕರಣಗಳ ಸಂಬಂಧ ವಾಹನಗಳು ಸಿಕ್ಕಿವೆ.

ಬಾಣಸವಾಡಿ ಪೊಲೀಸ್ ಠಾಣೆಯ ಪೊಲೀಸರು ಮನೆ ಕನ್ನ ಕಳ್ಳತನ ಮತ್ತು ವಾಹನ ಕಳ್ಳತನದ ಹಲವಾರು ಪ್ರಕರಣಗಳಿಗೆ ಸಂಬಂಧಿಸಿದಂತೆ ಮೂವರನ್ನು ಬಂಧಿಸಿದ್ದಾರೆ. ಬಂಧಿತರಿಂದ 18 ಲಕ್ಷ ರೂಪಾಯಿ ಮೌಲ್ಯದ 180 ಗ್ರಾಂ ಚಿನ್ನ, 4.8 ಕೆಜಿ ಬೆಳ್ಳಿ ವಸ್ತುಗಳು ಮತ್ತು ದ್ವಿಚಕ್ರ ವಾಹನವನ್ನು ವಶಪಡಿಸಿಕೊಂಡಿದ್ದಾರೆ. ನಗರದ ವಿವಿಧ ಪೊಲೀಸ್ ಠಾಣೆಗಳಲ್ಲಿ ದಾಖಲಾಗಿದ್ದ 11 ಪ್ರಕರಣಗಳನ್ನು ಪೊಲೀಸರು ಭೇದಿಸಿದ್ದಾರೆ.

ನಕಲಿ ದಾಖಲೆ ಸೃಷ್ಟಿಸುವ ಗ್ಯಾಂಗ್‌ ಪತ್ತೆ

ನ್ಯಾಯಾಲಯದಲ್ಲಿ ಸುಳ್ಳು ಜಾಮೀನು ಸಲ್ಲಿಸಲು ಆಧಾರ್ ಕಾರ್ಡ್‌ಗಳು, ಭೂಮಿ ದಾಖಲೆಗಳು ಮತ್ತು ಇತರ ದಾಖಲೆಗಳನ್ನು ನಕಲಿ ಮಾಡುವಲ್ಲಿ ತೊಡಗಿದ್ದ 13 ಜನರನ್ನು ಹಲಸೂರು ಗೇಟ್ ಪೊಲೀಸರು ಬಂಧಿಸಿದ್ದಾರೆ. ಆರೋಪಿಗಳು ಈ ಕೃತ್ಯದಲ್ಲಿ ನ್ಯಾಯಾಂಗ ಮತ್ತು ಆಸ್ತಿ ಮಾಲೀಕರಿಗೆ ಸಾಕಷ್ಟು ಮೋಸ ಮಾಡಿದ್ದಾರೆ. ಪೊಲೀಸರು 139 ನಕಲಿ ಆಧಾರ್ ಕಾರ್ಡ್‌ಗಳು, 43 ಪಡಿತರ ಚೀಟಿಗಳು, 16 ಪ್ಯಾನ್ ಕಾರ್ಡ್‌ಗಳು, 35 ಭೂಮಿ ದಾಖಲೆಗಳು ಮತ್ತು ನಕಲಿ ದಾಖಲೆ ತಯಾರಿಸಲು ಬಳಸಿದ ಉಪಕರಣಗಳನ್ನು ವಶಪಡಿಸಿಕೊಂಡಿದ್ದಾರೆ. ಈ ಗ್ಯಾಂಗ್‌ನ ಮತ್ತೊಬ್ಬ ಪರಾರಿಯಾಗಿದ್ದು, ಪೊಲೀಸರು ಆತನಿಗಾಗಿ ಬಲೆ ಬೀಸಿದ್ದಾರೆ.

English summary

Bengaluru police arrested 56 individuals for drug use and performing dangerous wheelies on city roads, ensuring public safety amidst rising concerns about reckless behavior.