ಭವಿಷ್ಯ ನಿಧಿ ಬಡ್ಡಿದರ ತುಸು ಏರಿಕೆ

ನವದೆಹಲಿ,ಏ.27: EPFO ಮಂಡಳಿ 2011-12ನೇ ಆರ್ಥಿಕ ವರ್ಷದಲ್ಲಿ ನೌಕರರ ಭವಿಷ್ಯ ನಿಧಿ ಮೇಲಿನ ಬಡ್ಡಿದರವನ್ನು ಶೇ. 8.25ಕ್ಕೆ ಕುಗ್ಗಿಸಿ, ಉದ್ಯೋಗಿಗಳ ಜಂಘಾಬಲವನ್ನು ಕುಗ್ಗಿಸಲಾಗಿತ್ತು. ಆದರೆ ಕೇಂದ್ರ ಸರಕಾರ ಪ್ರಸಕ್ತ ಆರ್ಥಿಕ ವರ್ಷಕ್ಕೆ ಈ ಬಡ್ಡಿದರವನ್ನು ಶೇ. 8.6ಕ್ಕೆ ನಿಗದಿಪಡಿಸಿ, ತುಸು ಚೇತರಿಕೆ ನೀಡಿದೆ.

ಅಂದರೆ ಈ ಏರಿಕೆಯ ಪ್ರಮಾಣ ಶೇ. 0.35 ರಷ್ಟಿದೆ. ಕಾರ್ಮಿಕ ಸಚಿವ ಮಲ್ಲಿಕಾರ್ಜುನ ಖರ್ಗೆ ಅವರು ರಾಜ್ಯಸಭೆಯಲ್ಲಿ ಗುರುವಾರ ಈ ವಿಷಯ ಪ್ರಕಟಿಸಿದ್ದಾರೆ. 2010-11ನೇ ಆರ್ಥಿಕ ವರ್ಷದಲ್ಲಿ ಭವಿಷ್ಯ ನಿಧಿ ಬಡ್ಡಿದರ ಶೇ. 9.5 ರಷ್ಟಿತ್ತು.

ಭವಿಷ್ಯ ನಿಧಿ ಖಾತೆಗೆ ಐದು ಕೋಟಿಗೂ ಹೆಚ್ಚು ನೌಕರರು ಸದಸ್ಯರಾಗಿದ್ದಾರೆ. ಸದಸ್ಯರಿಂದ ಸ್ವೀಕರಿಸುವ ನಿಧಿಯನ್ನು ವಿಶೇಷ ಠೇವಣಿ ಯೋಜನೆಗಳಲ್ಲಿನ ಹೂಡಿಕೆ ಮಾಡಲಾಗುವುದು. ಅದರಿಂದ ಬರುವ ಆದಾಯಕ್ಕೆ ತಕ್ಕಂತೆ ಬಡ್ಡಿದರ ವಿತರಿಸುತ್ತೇವೆ.

ಕಳೆದ ವರ್ಷ (2011-12) ಈ ಹೂಡಿಕೆಗಳಲ್ಲಿ ಕಡಿಮೆ ಆದಾಯ ಬಂದಿದ್ದರಿಂದ ಬಡ್ಡಿ ದರಗಳನ್ನು ಇಳಿಸಲಾಗಿತ್ತು. ಆದರೆ ಈ ಸಲ ಬಡ್ಡಿ ದರ ಏರಿಕೆಯಾಗುವ ವಿಶ್ವಾಸವಿದೆ ಎಂದು ಖರ್ಗೆ ತಿಳಿಸಿದರು.

English summary

The interest rate on Employees’ Provident Fund will be increased to 8.6 per cent for the current fiscal. The move is expected to benefit around five crore subscribers across the country. Union labour minister Mallikarjun Kharge made this announcement in Rajya Sabha yesterday (Apr 26)