ಅತ್ಯಾಚಾರಕ್ಕೆ ಯತ್ನಿಸಿದ ವಿದೇಶಿಯರಿಗೆ ಥಳಿತ

Published: Monday, January 2, 2012, 16:22 [IST]

ತೂತುಕುಡಿ, ಜ.2: ವಿದೇಶಿ ಮಹಿಳೆಯರ ಮೇಲೆ ಸ್ಥಳೀಯರು ಅತ್ಯಾಚಾರ ಮಾಡುವ ಸುದ್ದಿ ಆಗಿಂದಾಗೆ ಕೇಳಿಬರುತ್ತಿವೆ. ಆದರೆ ಸ್ಥಳೀಯ ಮಹಿಳೆ ಮೇಲೆ ವಿದೇಶಿ ಪುರುಷರು ಅತ್ಯಾಚಾರಕ್ಕೆ ಯತ್ನಿಸಿ ಸಿಕ್ಕಿಬಿದ್ದ ಘಟನೆ ತಮಿಳುನಾಡಿನ ತೂತುಕುಡಿ ಜಿಲ್ಲೆಯ ಪಾಲಾಯಂಕೊಟ್ಟಾಯಿ ಎಂಬಲ್ಲಿ ನಡೆದಿದೆ.

ಕಾರ್ಗೋ ಹಡಗಿನಲ್ಲಿ ನಾವಿಕರಾಗಿರುವ ಅಮೆರಿಕದ ರಸ್ಲೆ ಫ್ರಾನ್ಸಿಸ್ ಮತ್ತು ಜಾನ್ ಡೋಗಲ್ಸ್ ಎಂಬುವರು ಪಾಲಾಯಂಕೊಟ್ಟಾಯಿಯಲ್ಲಿ ಹೊಸವರ್ಷದ ಆಚರಣೆಯ ಸಂದರ್ಭದಲ್ಲಿ ಪಾನಮತ್ತರಾಗಿ ಅಲ್ಲಿಯೆ ಇದ್ದ ಮಹಿಳೆಯನ್ನು ಶುಭ ಕೋರುವಂತೆ ಕೈಕುಲುಕಿ ನಂತರ ಆಕೆಯೊಂದಿಗೆ ಅನುಚಿತವಾಗಿ ವರ್ತಿಸಿದರು. ಇವರ ಈ ಕೆಟ್ಟ ವರ್ತನೆಯಿಂದ ಭಯಪಟ್ಟ ಮಹಿಳೆ ಓಡಲಾರಂಭಿಸಿದಳು.

ವಿದೇಶಿಯರ ಈ ಅಟ್ಟಹಾಸವನ್ನು ನೋಡಿ ರೊಚ್ಚಿಗೆದ್ದ ಸ್ಥಳೀಯರು ಚೆನ್ನಾಗಿ ಥಳಿಸಿ ಸಮೀಪದಲ್ಲಿರುವ ಪೊಲೀಸ್ ಠಾಣೆಗೆ ಒಪ್ಪಿಸಿದ್ದಾರೆ. ಇವರ ವಿರುದ್ಧ ಪ್ರಕರಣ ದಾಖಲಿಸಿಕೊಂಡು ಜನರ ಏಟಿನಿಂದಾಗಿ ತೀವ್ರ ಗಾಯಗೊಂಡಿದ್ದ ಆರೋಪಿಗಳನ್ನು ಪೊಲೀಸರು ಸಮೀಪದ ಆಸ್ಪತ್ರೆಗೆ ದಾಖಲಿಸಿದ್ದಾರೆ.

Published On January 2, 2012