ಕಾಪಿ ಚಟ್ ತಡೆಯಲು ಬಟಾಬಯಲಲ್ಲಿ ಪರೀಕ್ಷೆ!

ವುಹಾನ್‌ (ಚೀನಾ), ನ. 14: ಇತ್ತ ಭಾರತದಲ್ಲಿ ಮಕ್ಕಳ ದಿನಾಚರಣೆ ನಡೆಯುತ್ತಿದ್ದರೆ ಅತ್ತ ನೆರೆಯ ಚೀನಾದಲ್ಲಿ ವಿದ್ಯಾರ್ಥಿಗಳು ಮೈದಾನದಲ್ಲಿ ಪರೀಕ್ಷೆ ಬರೆದಿದ್ದಾರೆ. ಪರೀಕ್ಷೆಯಲ್ಲಿ ವಿದ್ಯಾರ್ಥಿಗಳು ನಕಲು ಮಾಡುವುದನ್ನು ತಡೆಯಬೇಕೆಂಬ ದೃಢ ನಿರ್ಧಾರ ತೆಗೆದುಕೊಂಡ ಶಾಲಾ ಆಡಳಿತ ಮಂಡಳಿ ಬಟಾಬಯಲಿನಲ್ಲಿ ಈ ಪರೀಕ್ಷೆ ನಡೆಸಿದೆ. ಚೀನಾದ ಕೇಂದ್ರ ಭಾಗದ ವುಹಾನಿನ ಸಿಹೂಂಗ್ ಮಿಡ್ಲ್ ಸ್ಕೂಲಿನಲ್ಲಿ ಇತ್ತೀಚೆಗೆ ಈ ಘಟನೆ ನಡೆದಿದೆ.

ಈ ರೀತಿಯ ಕಟ್ಟುನಿಟ್ಟಿನ ಕ್ರಮದ ಹೊರತಾಗಿಯೂ ಕಿಡಿಗೇಡಿ ವಿದ್ಯಾರ್ಥಿಗಳು ನಕಲು ಮಾಡುವುದಕ್ಕೆ ಪ್ರಯತ್ನಿಸಬಹುದು ಎಂದು ಮುನ್ನೆಚ್ಚರಿಕೆ ವಹಿಸಿದ ಟೀಚರುಗಳು ಮೈದಾನದ ಸುತ್ತ ಇದ್ದ ಎತ್ತರದ ಗುಡ್ಡದ ಮೇಲೆ ನಿಂತು 'ನಕಲು ದುಸ್ಸಾಹಸಕ್ಕೆ ಕೈಹಾಕಬಹುದಾದ ವಿದ್ಯಾರ್ಥಿಗಳ' ಮೇಲೆ ಕಣ್ಣಿಟ್ಟಿದ್ದಾರೆ.

ಅಷ್ಟೇ ಅಲ್ಲದೆ, ಇದಕ್ಕೆ ಸಾಕಷ್ಟು ಪ್ರಚಾರ ಸಿಗುವಂತೆ ನೋಡಿಕೊಂಡಿರುವ ಶಾಲೆ ನಕಲು ದುಸ್ಸಾಹಸಕ್ಕೆ ಕೈಹಾಕುವ ವಿದ್ಯಾರ್ಥಿಗಳಿಗೆ ಕಟ್ಟೆಚ್ಚರವನ್ನೂ ರವಾನಿಸಿದೆ.

'ಇದರಿಂದ ಪಕ್ಕದ ವಿದ್ಯಾರ್ಥಿಯ ಉತ್ತರ ಪತ್ರಿಕೆಯನ್ನು ಕದ್ದುಮುಚ್ಚಿ ನೋಡುವುದು, ಅಥವಾ ಸಣ್ಣ ದನಿಯಲ್ಲಿ ಪಿಸುಗುಟ್ಟುತ್ತಾ ನಕಲು ಮಾಡುವುದಕ್ಕೆ ಪ್ರಯತ್ನಿಸುವುದನ್ನು ತಪ್ಪಿಸಬಹುದು. ಮೈದಾನ ವಿಶಾಲವಾಗಿರುದರಿಂದ ಅವರನ್ನು ದೂರ ದೂರ ಕೂಡಿಸಿ ಪರೀಕ್ಷೆ ಬರೆಸಬಹುದು. ತಪ್ಪು ದಾರಿಗೆ ಹೋಗುವುದನ್ನು ತಡೆಯುವ ನಿಟ್ಟಿನಲ್ಲಿ ಇದು ಅತ್ಯುತ್ತಮ ಪ್ರಯತ್ನ' ಎಂದು ಶಾಲಾ ಆಡಳಿತ ಮಂಡಳಿ ಹೇಳಿದೆ.

English summary

Cheat proof: A China School holds exams in field- Determined school heads have cracked down on exam cheats in Wuhan, in central China, by making their pupils sit their tests in the field.