ಯಡಿಯೂರಪ್ಪಗೆ ಜೈಲಿನಲ್ಲಿ 'ಫಸ್ಟ್ ನೈಟ್' ಅನುಭವ ಹೇಗಿತ್ತು!?

ಬೆಂಗಳೂರು, ಅ.16: ಈ ಇಳಿ ವಯಸ್ಸಿನಲ್ಲಿ ಪಾಪ ಯಡಿಯೂರಪ್ಪಗೆ 'ಫಸ್ಟ್ ನೈಟ್' ಅನುಭವ ಹೀಗಿರಬಾರದಿತ್ತು! ಭೂಹಗರಣದಲ್ಲಿ ಶನಿವಾರ ಜೈಲುಪಾಲಾದ ನಾಡಿನ ಮಾಜಿ ಮುಖ್ಯಮಂತ್ರಿ ಯಡಿಯೂರಪ್ಪಗೆ ಜೈಲಿನಲ್ಲಿ ಮೊದಲ ರಾತ್ರಿ ಹೇಗಿತ್ತು ಎಂದು ತಿಳಿದುಕೊಳ್ಳಲು ಇಚ್ಚಿಸುವವರಿಗೆ ನಿರಾಶೆ ಕಾದಿದೆ. ಜೈಲಿನಲ್ಲಿ ಸಂಪೂರ್ಣವಾಗಿ ಒಂದು ರಾತ್ರಿಯನ್ನೂ ಕಳೆಯದ ಯಡಿಯೂರಪ್ಪ ದಿಢೀರನೆ ಆರೋಗ್ಯ ಹಾಳು ಮಾಡಿಕೊಂಡಿದ್ದಾರೆ.

ಊಟ ಮಾಡದೆ, ಟಿವಿ ನೋಡುತ್ತಾ ಹಾಗೆಯೇ ಮಂಚದ ಮೇಲೆ ಮುದುರಿಕೊಂಡಿದ್ದ ಯಡಿಯೂರಪ್ಪಗೆ ಮೊದಲು ಬೆನ್ನು ನೋವು ಕಾಣಿಸಿಕೊಂಡಿದೆ. ಇದರಿಂದ ಎಚ್ಚರವಾಗಿ ದಿಗ್ಗಂತ ಎದ್ದು ಕುಳಿತ ಅವರ ದೇಹದಲ್ಲಿ ರಕ್ತ ಒಂದೇ ಏಟಿಗೆ ಜಲ್ಲಂತ ಸಂಚರಿಸಿದೆ. ಇದರಿಂದ ಕಣ್ಣಿಗೆ ಕತ್ತಲೆ ಕಟ್ಟಿದಂತಾಗಿದೆ. ಆಗ ವಾಂತಿಯೂ ಮಾಡಿಕೊಂಡಿದ್ದಾರೆ. ಅದಾದ ನಂತರ ಎದೆ ಹಿಡಿದುಕೊಂಡಿದೆ.

ಇದೆಲ್ಲ ಆಗುವ ವೇಳೆಗೆ ಮಧ್ಯರಾತ್ರಿ ಕಳೆದಿತ್ತು. ಅಂದರೆ ಜೈಲಿನಲ್ಲಿ ಅರ್ಧ ರಾತ್ರಿಯನ್ನಷ್ಟೇ ಕಳೆದಿದ್ದ ಕೈದಿ ನಂ. 10462 (ಯಡಿಯೂರಪ್ಪ) ಅಲ್ಲೇ ಇದ್ದ ಅತ್ಯಾಪ್ತ ಸಿದ್ಲಿಂಗುಗೆ 'ಇನ್ನು ನನ್ನ ಕೈಯಲ್ಲಿ ತಡೆಯೋಕಾಗೊಲ್ಲ. ನಡಿ ದೇವಾ! ಜಯದೇವಗೆ ಹೋಗೋಣಾ ಅಂದಿದ್ದಾರೆ. ಅದರಂತೆ 2 ಗಂಟೆಯ ಸುಮಾರಿಗೆ ಜಯದೇವ ಆಸ್ಪತ್ರೆ ಸೇರಿಕೊಂಡಿದ್ದಾರೆ.

ಆಸ್ಪತ್ರೆಯ ನಿರ್ದೇಶಕ ಡಾ. ಸಿ. ಎನ್, ಮಂಜುನಾಥ್ ಅವರು ಭಾನುವಾರ ಬೆಳಗ್ಗೆಯೂ ಯಡಿಯೂರಪ್ಪಗೆ ತುರ್ತು ಚಿಕಿತ್ಸಾ ಘಟಕದಲ್ಲಿ ಚಿಕಿತ್ಸೆ ನೀಡುತ್ತಿದ್ದು, ವರದಿ ಸಿದ್ಧಪಡಿಸಿದ ಬಳಿಕ ವಿಚಾರಣಾಧೀನ ಕೈದಿಯನ್ನು ಆಸ್ಪತ್ರೆಯಲ್ಲೇ ಇಟ್ಟುಕೊಳ್ಳುತ್ತಾರಾ ಅಥವಾ ಜೈಲಿಗೆ ವಾಪಸ್ ಅಟ್ಟುತ್ತಾರಾ? ಎಂಬುದು ಸುಮಾರು 9.30 ರ ವೇಳೆಗೆ ಸ್ಪಷ್ಟಗೊಳ್ಳಲಿದೆ.

ಈ ಮಧ್ಯೆ, ನಗರ ಪೊಲೀಸ್ ಆಯುಕ್ತ ಜ್ಯೋತಿ ಪ್ರಕಾಶ್ ಮಿರ್ಜಿ ಅವರು ಆಸ್ಪತ್ರೆಯ ಭದ್ರತೆಯನ್ನು ಪರಿಶೀಲಿಸುವುದರ ಜತೆಜತೆಗೆ ಯಡಿಯೂರಪ್ಪನವರ ಆರೋಗ್ಯವನ್ನೂ ಖುದ್ದಾಗಿ ವಿಚಾರಿಸಿಕೊಂಡರು.

English summary

Former chief minister of Karnataka BS Yeddyurappa who spent first night in Parappana Agrahara central jail has all of a suuden developed chest pain and started vomitting in the night. After that jail authorities admitted him to Jayadeva Hospital at 2 am on Oct 16.